A Pas anun o Pol torom a taro Rom 8:4 - Nupela Testamen long tokples Kandas
4 I pami sur a tokodos na petutna, ra a kum Warkurai det wasiso uni, in nanpat mulus una nundat a nilaun. Ka dat mur meleti mo a sakino nemnem ina pinindat, dat muri mukut a nemnem anun a Tokodos na Nion.
A taro gisen ka di tok talilis det, ikut, ra det mur asau ra a kum Warkurai anun o God i wasiso uni, o God i tama det elar nami ra di sa tok talilis tar det.
Ra an nanpat torom mot, i topasi kut sur an ukodos mot nama kum dekdek na wasiso. Ikut ka nemi. Ara taro tagun mot det watungi lena, met muri kut a petutna tagun a rakrakon bual. Ra a saring det, sur det in mana gusun a ngas na wasiso ra, sur gong a wanpat nama kum dekdek na wasiso torom det.
Ikut uniri, o God i sa dat pas mot toromi, sur mot pasano melet. I pam a pinapam ri, nama pinin o Karisito ra i mat, sur in ben pas mot umatan o God, ma mot anun a taro, ra katu niraro kura un mot, ma katu etakun in los mot.
Mot sa wanpat una kinkinis tomo anun a kum mugano nutnutun o God, det ra di sa tumus tar a kum risandet sapat netes una langit. Mot sa wanpat torom o God, i ra a Tene Warkurai anun a taro rop, ma torom a nion a kum tene tokodos, ra o God i sa utokodos sakit pas det,
A kum wakak na paspasang, uniri dat a kum nutnutun o God, ma ke puaso utmakai lena, numur, dat in nanpat pepetlai. Ikut dat tasmani lena, numur ra o Iesu in nanpat, dat in elar ut nami, uni dat in tama mulusi maragom.
Dat in watung ulabo pas o God, ra i pet lar pasi sur in tamtamabat mot sur gong mot puku, ma in utur mot umatan anun a minamar, nama labino gasgas ma katu etakun torom mot.
