Ka met nem na ulabo pas met torom mot, awu. Met nemi sur mot in warango met, ma sur mot in balu det ra det ser warango det un asau ra a taro det ulabo det uni, ikut ka det ngara sur a balandet in tokodos.
Dat ra dat lotu torom o God nama dekdekin a Niono, dat kut ra, a taro mulus anun o God, i elar nami ra di sa tok talilis tar a pinindat. Ka dat nurnur una pinapam ra a taro det pami, awu. Dat gas kut una pinapam ra o Karisito Iesu i sa pam tari un dat.
A gas doko una Labino, uni uniri, mot sa nuk melet iau. I sa suano i ra ka mot warut iau, ikut, a lingmulus, ka mot dumano iau, ikut katu kisapi sur mot in warut iau.
A kum tistising, a ururop na wasiso ri, a tumusi torom mot: Mot in gas uni mot anun a Labino. A gas sur an tumus melet a kum utna ra a sa tumus tari munung torom mot, sur in warut mot.
Lenkutkai ra torom mot, uniri mot tupunuk, ikut an tama melet mot, ra mot in gas. A ngas na gas ri, kataio in pet lar pasi sur in rakon ru i gusun mot.
Ra ke wan utmakai, a warango mot toromi, ma ka mot ban umaimai iau. A kum utna ra met watungi tan o Taitus un mot i lingmulus, elar nam anumet a kum wasiso rop torom mot i lingmulus.
