6 Met taramo a kum mamaut, sur mot in los a warut uni, ma sur din ulaun mot. Ra o God in umarom met, mot kai mot in taramo i. A umumarom ra mot in taramo i, in udekdek mot sur mot in tur dekdek una kum ngas na ngunungut ri, ra met taramo i.
Ikut ra a wonom mawit na bung i sa rop, met wan melet, ra a taro na ususer rop det tulu tar met unago utasi, det tomo nam anundet a kum ino ma a kum nutnutun det. Ra met sa wanpat nago utasi, met kis butkeke una usalin, ma met wararing.
Ra dat tasmani lena, a kum utna rop ra i wanpat, o God i papam nami, sur a wakakino in nanpat torom det, ra det nem o God, ma i sa kabo pas det elar nama nuknukino.
I ser umarom met una kum mamaut rop ra met taramo i, sur met kai met in umarom a taro, ra a kum mamaut i los det, nama umumarom ra o God i pitar tari tamet.
A gas kut sur an pitar tar anung a kum utna rop, ma anung a nilaun kai, sur u warut mot. A nem doko mot, ma pepetlai, anumot a marmaris torom iau in natino kut?
O God ut i sa ukis tar dat sur dat in los a nilaun ri, ma i tabor dat nama Niono, i a ukinalong sur in ulingmulusi lena, numur dat in rakon a kum utna ra o God i sa waninar tari sur dat.
I mo ra, a saring mot sur gong mot tusako ra mot longoro a kum mamaut ra a barato i sur an warut mot. A taramo a mamaut sur anumot a kinkinis na minamar.
I mo ra a taramo a kum ngunungut, ikut a tur dekdek ut, sur det ra o God i sa pilok pas det, det kai det in nurnur un o Karisito Iesu ma in ulaun pas det, ma det in los a minamar tukum.
