1 Timoti 2:1 - Nupela Testamen long tokples Kandas

¹ A mugano utna, a nemi sur a taro na nurnur det in wararing, nama niaring sur a utna det sibo suri, a niaring sur a taro, ma a niaring na watung wakak torom o God. Mot in wararing lenra sur a taro rop,

1 Timoti 2:1 交叉參考

Aposel 17:30

Una kum kilalo numugu, o God ke nuknuk una kum petutna anun a taro ra ka det nuk pasi. Ikut uniri, i pitar a warkurai sur a taro rop una rakrakon bual det in nukpukus.

A Pas anun o Pol torom a taro Rom 1:8

Iri a mugano utna, una risan o Iesu Karisito, a watung wakak torom anung a God un mot rop, uni a taro tagun a rakrakon bual rop, det wasiso puaso una numot a nurnur.

A Pas anun o Pol torom a taro Rom 6:17

A watung wakak torom o God, uni numugu mot a kum tene ititula anun a sakino petutna, ikut uniri mot mur a kum etowo nama balamot rop. A kum etowo ra di pitar tari tamot.

1 Korin 15:3

Uni a wasiso ra i labo doko, ra a sa los pasi, a sa pitar tari tamot. A wasiso ra i lenri: O Karisito i mat una nundat a kum sakino petutna, elar nami ra di sa tumus tari una Buk Tabu.

2 Korin 8:6

I mo ra met saring o Taitus sur in warut mot sur mot in pam sot pas a pinapam na etabor ri, uni i ut i warut mot ra mot turpas a pinapam na etabor ri.

Epeses 3:13

I mo ra, a saring mot sur gong mot tusako ra mot longoro a kum mamaut ra a barato i sur an warut mot. A taramo a mamaut sur anumot a kinkinis na minamar.

Epeses 5:20

Ma una kum bung rop, mot in watung wakak una kum utna rop torom o God a Tamandat, nama risan anundat a Labino o Iesu Karisito.

Epeses 6:18

Mot in wararing nama dekdekin a Tokodos na Nion una kum bung rop, nama kum wur ngas na niaring rop. Mot in kis na waninar, ma mot in ser wararing sur a taro rop anun o God.

Pilipai 1:3

A watung wakak torom anung a God una kum du bung rop ra a nuk pas mot.

Pilipai 4:6

Gong mot nuknuk doko sur tu utna. Una kum utna rop, mot in wararing nama niaring na watung wakak torom o God. Ma mot in inanosi una numot a kum nemnem.

1 Tesalonaika 3:12

Ma metul wararing kai sur a Labino in ulabo anumot a marmaris, ma in bukus ma in tilingis epotor tamot ma torom a taro gisen kai, elar nama numetul a marmaris kai torom mot.

2 Tesalonaika 1:3

A kum tistisi metul, i wakak sur metul in ser watung wakak torom o God un mot. I tokodos lenra, uni anumot a nurnur i lubung dekdek, ma a marmaris torom mot etetalai kai i lubung nanan.

1 Timoti 2:4

I nemi sur in ulaun a taro rop, ma det in tasman a lingmulusino.

1 Timoti 5:5

A ula, ra kataio i tamtamabati ma i sibo mulus, i nurnur kut un o God ma i kis langlang sur in waruti. Una kum mirum ma a waspi, i ser wararing sur o God in waruti.

2 Timoti 2:24

A tultul anun a Labino gong i ser engaras, ikut in wakak na tene ususer, in pam a wakakino torom a taro rop, ma in ese anun a wowowon na petutna torom a taro ra i ukodos det.

Taitus 2:11

Uni a marmaris anun o God i sa wanpat puaso. Una marmaris ra, o God i papos a kisapi sur in ulaun pas a taro rop.

Taitus 3:2

Gong det emang, det in balano molmol, det in pam a wakakino torom a taro, ma det in unatino pas det torom a taro rop.

Ibru 6:11

Anumet a labino nemnem sur mot rop taktakai mot in dekdek una marmaris lenutra mot ser pami, tuk una ururopino. Mot in pami lenra, sur a kum utna ra mot kis langlang nama nurnur suri, in nanpat mulus ut torom mot.

Jems 5:16

I mo ra mot in wasiso puaso etetalai torom mot una numot a kum sakino petutna, ra mot in wararing un mot etetalai, sur a Labino in ulangolango pas mot. A niaring anun a tene tokodos i dekdek sakit, ma i wu pat a wino.