23 Ме вешта Ассьым киӧс. Сэки тэ аддзан Менӧ бӧрвывсянь, а чужӧмӧс он аддзыв».
Верман-ӧ тӧдӧмлуннад аддзыны Енсӧ, верман-ӧ тырвыйӧ шымыртны Ставсӧвермысьӧс?
Сылӧн уджъяс пиысь ставыс тайӧ сӧмын этшаниктор, Сы йылысь ми кылам сӧмын вашкӧдӧмсӧ. Коді вермас гӧгӧрвоны Сылысь гымалана вынсӧ?
Сэсся Господь шуис: «Тэ он вермы видзӧдны Менам чужӧмбан вылӧ. Ме вылӧ видзӧдлӧм бӧрын мортыс оз вермы ловйӧн кольны».
Йӧзыс Енсӧ эз аддзывлыны, сӧмын ӧтка Пиыс, Бать дінас олысьыс, восьтіс Сійӧс миянлы.
Ӧні ми аддзам Енсӧ ылӧсас, чусмӧм рӧмпӧштанысь моз, а бӧрыннас аддзам Сійӧс асланым синмӧн. Ӧні сӧмын этшаник тӧда Енмыс йылысь, а бӧрыннас кута тырвыйӧ тӧдны Енсӧ, кыдзи Сійӧ тӧдӧ менӧ.
Сійӧ ӧтнас кувлытӧм, олӧ югыдас, кытчӧ матыстчыны он вермы. Морт Сійӧс эз аддзыв, и аддзыны оз вермы. Сійӧс нимӧдӧмыс, Сылӧн ыджыдалӧмыс помтӧм. Аминь.
