6 Ме петкӧді батьяснытӧ Египетысь, и найӧ локтісны Гӧрд саридз дорӧдз. Египетсаяс тарантасъясӧн да верзьӧмаясӧн вӧтчисны на бӧрся сэтчӧдз.
Миян батьяс водзын Тэ шӧри поткӧдін саридз, и найӧ вуджисны сійӧс косінті. На бӧрся вӧтчысьясӧс Тэ вӧйтін джуджыд саридзӧ, изйӧс моз шыбитін бузгысь ваӧ.
А ми, Тэнад войтырыд, Тэнад йӧрысь ыжъясыд, кутам помтӧг нимӧдны Тэнӧ, кутам ошкыны Тэнӧ чужысьяссянь чужысьясӧдз.
Израиль войтыр петіс Рамсесысь да мӧдӧдчис Суккотӧ. Аньясӧс да ныв-писӧ артавтӧг пода мортыс вӧлі квайтсё сюрс гӧгӧр.
Дзик сійӧ лунӧ Господь петкӧдіс Египетысь Израиль пиянӧс тышкайӧзӧс моз.
Ме петкӧді тэнӧ Египет муысь, мезді тэнӧ нартитӧм улысь, водзвылад ысті Мӧисейӧс, Ааронӧс да Мирьямӧс.
Мӧисей петкӧдіс Израиль войтырӧс Египетысь. Уна шензьӧданатор да индысьпас сійӧ вӧчис Египет муын, Гӧрд саридз вуджигӧн да нелямын во чӧж овтӧминын ветлӧдлігӧн.
Эскӧмӧн Израиль войтыр вуджис Гӧрд саридз вомӧн. Найӧ мунісны сэті косінті моз. Египетсаяс тшӧтш на моз кӧсйисны вуджны, но ставныс вӧйисны.
