Исай 50:2 - Коми Библия 2023

² Мыйла некод эз вӧв, кор Ме волі тіян дінӧ? Мыйла некод эз вочавидз, кор Ме чуксалі тіянӧс? Менам киӧй ӧмӧй дженьдаммис, Ме ӧмӧй вынтӧмми, медым мездыны тіянӧс? Менам ӧлӧдӧмысь саридз косьмӧ, юяс лоӧны косінӧн, сэні ватӧмысла чериыс сісьмӧ, горш косьмӧмысла кулӧ.

Исай 50:2 交叉參考

Олӧм 18:14

Но эм-ӧ мыйкӧ Господьлы вермытӧмыс? Индӧм кадӧ во мысти Ме бара вола тэ ордӧ. Сэки Сарраыдлӧн лоас пи».

2 Каднебӧг 32:15

Сідзкӧ, энӧ лэдзӧй Езекейлы ылӧдлыны тіянӧс. Энӧ эскӧй сылы. Оз сюр сэтшӧм войтырыс, кодлӧн енмыс эськӧ вермис мездыны ассьыс войтырсӧ менам киысь да менам батьяслӧн киысь. Тіян Енныд сідзжӧ оз мезды тіянӧс менам киысь”».

Псалтыр 106:9

Ӧд Сійӧ ловзьӧдӧ нюкыртчӧмаясӧс, Аслас бурнас пӧткӧдӧ тшыгъялысьясӧс.

Петӧм 14:21

Мӧисей нюжӧдіс кисӧ саридзлань, и Господь войбыд йӧткис васӧ ён асыв тӧлӧн. Ваыс вешйис ӧтарӧ-мӧдарӧ, и тыдовтчис саридз пыдӧсыс.

Петӧм 14:29

А Израиль пиян мунісны саридз шӧрӧд косінті. Налӧн веськыдладорсянь и шуйгаладорсянь ваыс сулаліс стен моз.

Петӧм 7:18

Юын чериыс кулас, ваыс дуксяс. Египетсаяслы зывӧк лоӧ сэтысь васӧ юны».

Петӧм 7:21

Юын чериыс куліс, а ваыс лои лёк дука. Египетсаяс эз вермыны юны сэтысь васӧ. Египет му пасьтала вӧлі вир.

Шусьӧгъяс 1:24

Ме кори, но ті энӧ кывзысьӧй, киӧс нюжӧді, но некод меным вочасӧ эз пет.

Исай 11:15

Господь косьтас Египетса саридзлысь куръясӧ, нюжӧдас юлань Ассьыс кисӧ да кыпӧдас ыджыд тӧвныр, Сійӧ юкас юсӧ сизим шор вылӧ, и йӧзыс сэті подӧн вуджасны.

Исай 19:5

Саридзын ваыс ямас, юын ваыс чинас да косьмас.

Исай 23:11

Господь нюжӧдіс Ассьыс кисӧ саридз весьтӧ да пыркнитіс войтыръясӧс. Господь тшӧктіс жугӧдны Ханаанлысь изкаръяссӧ.

Исай 36:20

Кутшӧмкӧ ен ӧмӧй мездіс ассьыс мусӧ менам киысь? Господь сідзжӧ оз вермы мездыны Ерусалимнытӧ менам киысь”».

Исай 41:28

Ме видзӧді, но тіян пиысь эг аддзы некодӧс, коді эськӧ вермис туйдӧдны, кодлысь эськӧ верми юавны, и коді эськӧ вермис вочавидзны.

Исай 42:15

Ме кушта керӧсъяс да мылькъяс, чишкала сэтысь став быдмӧгсӧ, юяс вӧча діясӧн, тыяс косьта.

Исай 43:16

Господь восьтіс саридз пыр мунан туй, джуджыд ва пыр мунан туй, петкӧдіс тарантасъяс, вӧвъясӧс да вына тышкайӧзӧс – найӧ ставныс усисны, эз чеччыны, найӧ сись моз кусісны-сылісны. Господь тадзи висьталӧ:

Исай 44:27

Джуджыд саридзлы Ме тшӧкта косьмыны, Ме косьта сылысь юяссӧ.

Исай 51:10

Эз-ӧ Господьлӧн киыс косьты саридзсӧ, пыдӧстӧм васӧ, эз-ӧ вӧч саридз пыдӧссӧ кос туйӧн, кыті мунісны мездмӧмаяс?

Исай 54:6

Господь корӧ тэнӧ эновтӧм да ловнас усьӧм гӧтырӧс моз, том кадӧ босьтӧм гӧтырӧс моз, кодӧс вӧлі эновтӧма. Тадзи висьталӧ тэнад Енмыд.

Исай 59:1

Господьлӧн киыс эз дженьдаммы, медым мездыны, Сылӧн пельыс эз сьӧктаммы, медым кывны.

Исай 59:16

Сійӧ аддзис, мый абу мортыс, шензис, мый абу дорйысьыс. Сійӧ вермис Аслас киӧн, Сылӧн веськыдлуныс лои Сылы отсӧгӧн.

Исай 63:13

Кӧні Сійӧ, коді нуӧдіс найӧс джуджыд саридз пыдӧсӧд? Косінті мунысь вӧв моз найӧ мунісны сэті да эз крукасьлыны.

Исай 64:6

Ми ставным пежӧсь, миян веськыдлунным няйтчӧм паськӧм кодь, ми ставным косьмӧм коръяс кодьӧсь, миян мыжъясным тӧвныр моз нӧбӧдӧны миянӧс.

Исай 65:12

тіянӧс Ме сета шыпурт улӧ, ті ставныд сувтанныд пидзӧс выланыд, и тіянӧс кераласны. Ме чуксалі тіянӧс, но ті энӧ шыасьӧй. Ме висьталі тіянлы, но ті энӧ кывзӧй. Ті вӧчинныд сійӧ, мый Менам син водзын шогмытӧм, ті бӧрйинныд сійӧ, мый эз вӧв Менам кӧсйӧм серти.

Исай 66:4

А Ме бӧръя налы мыждӧм, мӧдӧда налы сійӧ, мыйысь найӧ полӧны. Ӧд Ме чуксалі найӧс, но некод эз шыась, Ме висьталі налы, но найӧ эз кывзыны. Найӧ вӧчисны сійӧ, мый Менам син водзын шогмытӧм, найӧ бӧрйисны сійӧ, мый эз вӧв Менам кӧсйӧм серти.

Еремей 14:9

Мыйла Тэ шӧйӧвошӧм морт кодь, мездыны вермытӧм вына тышкаморт кодь? Но Тэ, Господьӧй, миян пӧвстын, миянӧс сиӧма Тэныд, эн эновт миянӧс!

Еремей 35:14

Рекавлӧн Ионадав пиыс аслас пиянлы эз лэдз юны вина, и найӧ ӧнӧдз оз юны вина. Найӧ кывзысьӧны асланыс батьныслысь, олӧны сылӧн кывъясыс серти. А Ме выльысь и выльысь ӧлӧдлі тіянӧс, но ті энӧ кывзысьӧй Менсьым.

Еремей 35:15

Ме выльысь и выльысь мӧдӧдлі тіян дінӧ Ассьым кесйӧгъясӧс – пророкъясӧс. Ме тшӧкті налы юӧртны тіянлы: бергӧдчӧй асланыд лёк туй вылысь, вӧчӧй бурсӧ, энӧ юрбитӧй мукӧд енъяслы да энӧ кесъялӧй налы, сэки ті кутанныд овны сійӧ муас, мый Ме сеті тіянлы да тіян батьяслы. Но ті энӧ сибӧдӧй Менсьым кывъясӧс, энӧ кывзӧй Менӧ.

Еремей 5:1

– Ветлӧдлӧй ерусалимса уличьясті, видзӧдалӧй да тӧдмалӧй, корсьӧй изэрдъяс вылысь мортӧс, коді олӧ веськыда да кутчысьӧ збыляс. Аддзанныд кӧ, сэки Ме прӧстита Ерусалимын олысьясӧс.

Еремей 7:13

Ті на моз жӧ вӧчанныд пежсӧ, – висьталӧ Господь. – Ме дугдывтӧг висьталі тіянлы, но ті энӧ кывзӧй, Ме чуксалі тіянӧс, но ті энӧ вочавидзӧй.

Еремей 7:27

Кор тэ висьталан тайӧ войтырыслы став тайӧ кывъяссӧ, найӧ оз кывзыны тэнӧ. Кор тэ чукӧстан найӧс, найӧ оз вочавидзны.

Еремей 8:6

Ме сюся кывза найӧс, но збыльсӧ найӧ оз висьтавны, некод оз каитчы аслас лёк вӧчӧмысь, некод оз шу: «Мый нӧ ме вӧчи!» Тышӧ петысь вӧв моз быдӧн котӧртӧ аслас туйӧд.

Даниил 3:15

Но талунсянь лоӧй дасьӧсь. Кор ті кыланныд буксанлысь, пӧлянлысь, цитралысь, гуслилысь, арфалысь, тутсанлысь да мукӧд ворсанторлысь шысӧ, сэки кымынь уськӧдчӧмӧн копыртчылӧй меӧн сувтӧдӧм бӧлбанлы. А онӧ кӧ копыртчылӧй, тіянӧс дзик пыр шыбитасны ыпъялысь пачӧ. Кутшӧм Ен сэки вермас мездыны тіянӧс менам киысь?»

Даниил 3:29

Ми мыж вӧчим, лёк вӧчим, Тэысь кежим, быдторйын мыжмим.

Даниил 6:20

Гу дорӧ матыстчигӧн сійӧ нориник гӧлӧсӧн шыасис Даниил дінӧ: «Даниил, ловъя Енлӧн кесйӧг! Вермис-ӧ Тэнад Енмыд, кодлы тэ дугдывтӧг кесъялан, мездыны тэнӧ левъясысь?»

Даниил 6:27

Сійӧ мездӧ и дорйӧ, вӧчӧ шензьӧданаторъяс да индысьпасъяс енэжас и му вылас. Сійӧ мездіс Даниилӧс левъяслӧн гыж улысь».

Осий 11:2

Сійӧс чукӧстісны, и сійӧ муніс Ме дінысь, пондіс вись вайны Ваал идолъяслы, сотны висьяс бӧлбанъяслы.

Осий 11:7

Менам войтыр пыр бергӧдчӧ Меысь. Налы шуӧны: «Шыасьӧй Медвылыссаыс дінӧ», но найӧ оз шыасьны, оз нимӧдны-кыпӧдны Менӧ.

Наум 1:4

Сійӧ тшӧктӧ, и саридзыс косьмӧ, юяс косьмӧны, Васан ыб да Кармил керӧс вылысь быдмӧгъяс нярмӧны, нярмӧны ливанса дзоридзьяс.

Аввакум 3:8

Господьӧй, Тэ пуксин Аслад вӧвъяс вылӧ, Аслад тарантасъясӧн петін, медым вермыны. Юяс вылӧ ӧмӧй Тэ скӧралан, шоръяс вылӧ ӧмӧй лӧглуныд петӧ, саридз вылӧ ӧмӧй скӧрлуныд киссьӧ?

Лыд 11:23

Господь шуис Мӧисейлы: «Менам киӧй ӧмӧй оз вермы отсавны? Талун тэ аддзан, инас-ӧ Менам кывйӧй».

Марк 4:39

Исус чеччис, ӧлӧдіс тӧвсӧ да тшӧктіс ваыслы: «Лӧнь, ланьт!» Тӧлыс ланьтіс, и вӧвлытӧм чӧв-лӧнь пуксис.

Иоан 1:11

Сійӧ локтіс Ас йӧз дінас, но найӧ эз сибӧдны Сійӧс.

Иоан 3:19

Мыждӧмыс сыын, мый му вылас локтіс югыдыс, но йӧзыслы мусаджык вӧлі пемыдыс, ӧд налӧн уджъясыс лёкӧсь.

Нав Исус 3:16

ваыс дугдіс визувтны да сувтіс стенӧн ылӧ, Адам кар дорӧ, мый Цартан карсянь матын. А визувтысь ваыс лэччис ковтысса Сола саридзӧ да бырис.