18 Хирам мӧдӧдіс ассьыс йӧзсӧ, медым найӧ ваясны Соломонлы корабльяс да кесйӧгъясӧс, кодъяс бура кужӧны кывтны саридз вывті. Соломонлӧн кесйӧгъяскӧд найӧ кывтісны Офирӧ да вайисны сэтысь Соломон ӧксылы нёльсё ветымын талант зарни.
Хирамлӧн корабльясысь ӧтдор саридз вылын Соломон ӧксылӧн вӧліны тшӧтш фарсисса корабльяс. Куим во пытшкас ӧтчыдысь фарсисса корабльяс вайлісны зарни-эзысь, слӧн лы, ӧблезянаясӧс да павлинъясӧс.
Хирамлӧн да Соломонлӧн кесйӧгъясыс, кодъяс вайлывлісны Офирысь зарни, вайисны тшӧтш гӧрд пу да дона изъяс.
Быд во Соломонлы вайлісны квайтсё квайтымын квайт талант зарни.
Соломон ӧксылӧн корабльяс вылын сылӧн йӧзыс Хирамлӧн йӧзкӧд кывтлісны Фарсисӧ. Куим во пытшкас ӧтчыдысь найӧ вайлісны сэтысь зарни-эзысь, слӧн лы, ӧблезянаясӧс да павлинъясӧс.
Ме чукӧрті аслым эзысь-зарни, ӧксыяслысь да мукӧд войтыръяслысь озырлунсӧ. Чукӧрті ас дінӧ сьылысь аньясӧс да айуловӧс и босьті аслым гӧтырӧ уна аньӧс, медым найӧ гажӧдісны менӧ.
