17 اے تان اَبد منی و اِسراییلئے نیامئے اَهد و کَرارئے نشانیَ بیت، چێا که منِ هُداوندا شش رۆچا زمین و آسمان اَڈّ کرتنت و هپتمی رۆچا آرام کرت و تازه‌دَم بوتان.‘“
چێا که هُداوندا شَش رۆچا آسمان، زمین، دریا و هرچے که اِشانی تها هست، اَڈّ کرتنت و هپتمی رۆچا آرامی کرت، پمێشکا هُداوندا شَبَّتئے رۆچ برکت داتگ و گِچێنی و پاکێن رۆچے جۆڑ کرتگ.
”اِسراییلیان بگوَش: ’منی شَبَّتان اَلّم برجاه بدارێت. اے په شمئے آیۆکێن نَسل و پَدرێچان منی و شمئے نیامئے اَهد و کَرارئے نشانیَ بیت تانکه شما بزانێت که من هُداوند آن، هما که شمارا گِچێنی کرتگ و شمارا پاک و پَلگارَ کنت.
