Rules Secon Time 12:3 - Hawaii Pidgin Bible

³ Broke down dea altars fo dea idol kine gods, smash da stones dat stay kapu fo dem, an burn up dea kapu Asherah poses wit fire. Cut down da idols dat look jalike dea gods. Broke down eryting bout dea gods, so nobody even rememba dea names in da places wea da gods stay befo time.

Rules Secon Time 12:3 交叉參考

Local Leadas 2:2

An you guys, you not suppose to make one deal wit da peopo inside dis land. You guys suppose to broke down dea altars. But you guys no lissen! How come you guys make lidat, aah?!

Census 33:52

take ova da property from all da peopo in front you guys dat live ova dea. Broke down all da idol kine gods dey wen carve, an da idols dey make from melt da metal. Broke down all da sacrifice places on top da hills wea dey go down in front dea gods.

Zekariah 13:2

Da One In Charge, Da God Ova All Da Armies, tell: “Dat time, I no goin let nobody use da names fo all da idol kine gods from da land. Nobody goin rememba dose gods no moa. I goin throw out da peopo dat talk fo dose gods, an da pilau kine spirit dat peopo inside dis land get.

Songs 16:4

But now, fo da peopo dat like hang out wit dose gods, Dey goin suffa mo an mo plenny! No way I goin go wit dem fo make one sacrifice An pour blood on top da groun fo dose gods, I no even goin tell da names A da gods dey stay tight wit.

Rules Secon Time 7:5

“Az why dis wat you guys gotta do to dem: Broke down dea altars, smash da big kapu stones dey put up fo da Baal god, cut down da kapu poses dey put up fo da Asherah wahine god, an burn up dea idol kine gods inside da fire.

Outa Egypt 23:13

Make shua you do eryting I stay tell you guys fo do. No even talk bout da odda gods. No even use dea name notting!

Jesus Show 13:1

Den, jalike one dream, I wen see one Wild Animal coming outa da watta. He get ten horn an seven head, wit ten crown on top da horns. On top da heads, all dem get one name dat tell any kine bad stuff bout God.

Micah 5:14

I goin pull up da poses you guys put up Fo da wahine god Asherah Dat stay in da middo a you guys. An I goin make all yoa big towns come wipe out.

Hosea 2:17

I goin take away da names fo da Baal gods from her mout. She no goin talk bout dem no moa.

Jeremiah 17:2

Even dea kids no foget fo pray in front da altars fo odda gods, An in front da tiki poses fo da idol kine wahine god Asherah, An undaneat ery big tree dat get plenny leaf An on top da high hills.

2 Records 34:3

Wen he stay king eight year, an he still young, he start fo try stay tight wit da God dat his ancesta David wen pray to. Wen he stay king twelve year, he start fo throw out from Judah an Jerusalem da sacrifice places on top da hills, da tiki poses fo da wahine god Asherah, an da idol kine gods dey carve an da gods dey make wit da metal dey melt.

2 Records 31:1

Wen all dat pau, all da Israel peopo dat stay dea go out from Jerusalem. Dey go inside da odda Judah towns. Ova dea, dey smash da stan up kapu stones an chop down da tiki poses fo da wahine god Asherah. Dey wipe out da sacrifice places on top da hills an da altars fo da idol kine gods all ova da Judah, Benjamin, Efraim, an Manasseh lands. Afta da Israel peopo wipe out all dose tings, dey go back dea home towns an lands.

2 Records 19:3

Still yet, get some good kine stuff inside you. Cuz you wen take out all da tiki poses fo da wahine god Asherah inside da land, an you wen make up yoa mind fo come fo know Da One In Charge.”

2 Kings 23:14

Josiah smash all da kapu stones, an cut down da tiki poses fo da wahine god Asherah, an cova dea place wit mahke peopo bones so no mo nobody can make sacrifice dea.

2 Kings 18:4

Hezekiah da one dat wen take away da sacrifice places on top da hills, smash da big kapu stones fo da odda gods, an cut down da poses fo da wahine god Asherah. He broke in small kine pieces da bronze snake dat Moses wen make, cuz till dat time da Israel peopo wen burn incense fo da bronze snake jalike az was one idol kine god. (Dey call um Nehushtan, Da Snake God.)

1 Kings 15:13

He even kick out his granmuddah Maakah an no show her respeck fo be da ol queen, cuz she wen make one real pilau kine pos fo pray to da wahine god Asherah. Asa cut down da pos an burn um by da Kidron Stream.

2 Records 14:3

He take down da altars fo da gods from anodda place, an da sacrifice places fo da odda gods on top da hills. He smash da kapu stones, an cut down da tiki poses dey put up fo da wahine god Asherah.

Outa Egypt 23:24

You betta not go down in front dea gods fo pray to dem, an you betta not let dose peopo make you do stuff fo dea gods, da way dey make. You gotta broke up dea idol gods, an smash da big stones dat dey set up fo dem pray in front.

Outa Egypt 34:13

Dis wat you gotta do: you gotta broke down dea altars, smash da big stones dey put up fo dea gods, an cut down da poses dey put up dea fo dea wahine god Asherah.

Rules Secon Time 7:25

You guys goin burn up dea idol kine gods inside da fire. No make jalike you like take da silva o gold on top da idols, an no take dat fo you. Cuz all dat kine stuff no good, an can catch you guys jalike az one trap. Fo yoa God, Da One In Charge, all dat kine stuff pilau.

Rules Secon Time 12:4

“No do da kine stuff fo pray to God, Da One In Charge, da same way dose peopo stay do fo pray to dea gods.

1 Kings 14:15

Da One In Charge goin smash all da Israel peopo so dey no goin stan up strait, jalike wen you smash one plant dat grow inside one riva. He goin pull out da Israel peopo from dis good land he wen give to dea ancesta guys, jalike wen you pull one plant outa da groun wit da roots. He goin throw dem all ova da place, da odda side a da Eufrates Riva. Az cuz dey wen put up poses fo pray to da wahine god Asherah, an dat make Da One In Charge come plenny huhu.

2 Kings 11:18

Den all da peopo inside da land go by da Temple Fo Baal, an bus um up. Dey smash da altars an da idol kine god statues real small. Dey kill Mattan, da pries guy fo Baal, in front da altars. Den Jehoiada da pries guy put guard guys in charge a da Temple Fo Da One In Charge.

Isaiah 27:9

Dass wat God goin do fo pay da price, Fo hemo da shame fo da Jacob ohana. Dass wat goin happen Wen God throw out all da bad kine stuff dey wen do. Den, God goin make all da stones Inside da altars fo da odda gods Come jalike chalk wen somebody smash um. Da poses wea dey pray to da wahine god Asherah An da altars wea dey burn da incense fo da odda gods, Dey no goin stan dea no moa.

2 Records 14:2

Asa wen do wat stay good an right da way his God, Da One In Charge, see him.