Rome 2:5 - Hawaii Pidgin Bible

⁵ But you get hard head. An you no like change wat you do. So, you stay make tings mo worse fo you. Bumbye God da Judge goin tell who wen do bad kine stuff, an erybody goin know dat God judge da right way. Den he goin punish you cuz he had it wit wat you do.

Rome 2:5 交叉參考

Rome 1:18

One mo ting God show us guys: Get peopo ack jalike God no matta, an dey do da kine tings dey not suppose to do. But God had it wit wat dey do. Az why he goin judge um from up dea in da sky. Inside, dey know wass true, but dey stay do da kine tings dey not suppose to do. Az why dey no let odda peopo know wass true.

Teacha 12:14

Erybody gotta go in front God da Judge bout eryting dey wen do, Even all da stuff dey try hide, no matta good o bad.

Jude 1:6

Same ting wit some angel messenja guys, da ones dat neva like stick wit da kuleana dat God wen give um. God wen give um dea place fo stay, but dey wen bag. Now dey all tie up wit chains foeva. An dey down dea inside da Deep Dark Hole. Den wen da Big Day come, God goin judge dem.

2 Peter 3:7

An you know wat goin happen wit da sky an da world dat get nowdays? God wen awready tell how goin be wit dem. He let um stay lidat right now, but he goin burn um up wen da time come. Dat time, God goin be da Judge an wipe out da peopo dat ack jalike God notting.

Hebrews 3:15

Jalike da Bible tell, “Today, wen God tell you guys someting, No go come hard head, Jalike yoa ancesta guys wen do, Dat time dey go agains Moses.”

Rules Secon Time 32:34

“Me, eryting I make one plan fo do, I keep um in one good place wit me An lock um up wea I put all my rich stuffs.

2 Peter 2:9

All dis stuff show dat Da One In Charge know how fo get peopo outa trouble wen dey lissen him. Same time, he know how fo make da peopo suffa dat no like do wass right, till dey gotta stan in front God da Judge.

Hebrews 4:7

One mo time, God make spesho anodda day fo dem. Cuz long time afta oua ancesta guys neva like trus God, David wen write down inside da Bible wat God tell, da same kine tings I jus tell you guys. He talk bout one time, an dat time, he call um “Today.” He tell: “Today, wen God tell you guys someting, Lissen good an no come hard head!”

Hebrews 3:13

Mo betta do dis: all you guys give each odda good kine words an do dat ery day. Cuz now, da “Today” God stay talk bout befo time inside da Bible, dass fo us guys today too. An cuz a dat, no mo nobody from you guys goin get hard head cuz now you no do bad kine stuff. Cuz da bad kine stuff jam up how you tink.

Rome 9:22

Same ting wit God. He like show erybody dat he had it wit da stuff da peopo like do. He like make shua erybody know he get plenny powa. Fo show dat, fo one long time he take any kine stuff da peopo do—da kine stuff he no like take. But dose peopo dat make lidat, fo shua dey goin get wipe out bumbye.

Songs 110:5

My boss, he stay right dea Wit you fo proteck you. Da time he goin show peopo Dat he real huhu, He goin bus up odda king guys.

2 Records 30:8

No get hard head, jalike yoa ancesta guys. Let Da One In Charge take ova you. Go come by da spesho place dat Da One In Charge make spesho fo him fo long time. Work fo yoa God, Da One In Charge, fo him pau stay real huhu wit you guys.

1 Samuel 6:6

No good, you know, dat you guys make hard head, jalike da Egypt peopo an da Pharaoh guy wen make, long time befo time! Wen da Pharaoh guy give da Israel peopo hard time, ony afta Da One In Charge wen bus up da Egypt peopo, den Pharaoh an da Egypt peopo let da Israel peopo go outa dea land. An da Israel peopo, dey get outa dea!

Jesus Show 6:17

Cuz da time stay come awready wen dey goin punish us. Horraz! Fo shua, no mo nobody goin come out alive!”

James 5:3

All da gold an silva stuff you get, poho! awready get rus all ova. Wen you guys stan in front God da Judge, dat rus goin be jalike one picha fo show erybody how you guys stay pilau inside, an dat goin eat up yoa body jalike da fire. Da world goin come pau, you know! But still yet, you guys like stash plenny stuffs fo you!

Rome 11:25

Braddahs, dis someting you guys gotta know dat was secret befo time. If you undastan um, den you no goin get big head cuz you tink you smart. Dis da secret: Da Israel peopo wen come hard head an neva like trus God, but dey no goin be lidat foeva. Bumbye wen all da peopo dass not Jew guys trus God, den da Jew guys goin trus um too.

Daniel 5:20

“But den, King Nebukadnezzar start fo get big head, an inside, he come hard head an tink he can make how he like. Az why God throw him out fo be da king, an da peopo no show respeck fo him no moa.

Ezekiel 3:7

But da Israel ohana peopo, dey no goin like lissen you cuz nobody like lissen me cuz all da Israel ohana peopo hard head. Dey make up dea mind awready. Dey no goin change.

Isaiah 48:4

Cuz I know you guys get hard head. Yoa neck jalike iron An yoa forehead jalike bronze metal.

Smart Guys 29:1

Da kine guy dat make deaf ear Cuz peopo tell um ova an ova He do wrong an he betta stop, Fo real Da One In Charge goin bring down dat guy one time. Cuz no way da guy can come good bumbye.

Smart Guys 11:4

Wen God ready fo wipe out eryting Cuz he no can stan wat peopo stay do, All da money you get, no goin help you! Wen you stay do da right ting erytime, Dat goin get you outa trouble wit wateva can make you mahke.

Songs 95:8

God tell, “Eh! No be hard head, Jalike befo time Wen yoa ancesta guys wen stay Inside da boonies, Dis da place dey call Meribah, Cuz yoa ancesta guys wen fight me, Dey call dat same place Massah too, Cuz yoa ancesta guys Wen tes me ova dea.

Job 21:30

Dey can tell you guys, dat wen get big trouble, Da bad kine peopo no suffa. Wen God come huhu, dey outa dea awready!

2 Records 36:13

Zedekiah even try fo fight King Nebukadnezzar, no matta befo time King Nebukadnezzar wen make Zedekiah make one strong promise an use God name fo do um. Zedekiah come hard head. He no change his mind fo come pono wit Da One In Charge, da God fo da Israel peopo.

Joshua 11:20

Da One In Charge da One wen make da odda peopos come hard head fo dem like fight da Israel peopo. Az how Da One In Charge wipe dem all out jalike dey one sacrifice, an no give dem chance. Az wat Da One In Charge wen tell Moses fo do.

Rules Secon Time 2:30

But Sihon, da king fo Heshbon town, no like let us go thru dea. Az cuz oua God, dass Da One In Charge a us, wen make him hard head, an cuz a dat he give you guys da powa fo take him ova. An now, God let you guys win.

Outa Egypt 8:15

But wen da Pharaoh guy see dat eryting come good, he come hard head one mo time. He no lissen Moses an Aaron, jalike Da One In Charge wen tell befo time.

Amos 3:10

You betta lissen! Da One In Charge, he tell dis: “My peopo, dey donno notting how fo do da right ting! Dey pile up dea palaces wit stuffs dey get From peopo dey wen bus up.”

Outa Egypt 14:17

You know wat I stay do? I stay make da Egypt army guys get real hard head fo dem chase afta you guys. Den, I goin use da Pharaoh guy an all his army guys an his war wagons an his horse rida guys fo make erybody know how awesome I stay!

Outa Egypt 32:34

Now, you go. Take da peopo da place I wen tell you fo go. Goin get one angel messenja guy from me dat goin go in front a you. An wen da time come fo me fo punish peopo, I goin punish da ones dat wen do da bad kine stuff.”

Smart Guys 1:18

Dese guys, dey try jump somebody, But dey da ones goin bleed, Dey da ones goin mahke.

Smart Guys 28:14

Da peopo dat no do notting bad Cuz dey erytime come real sked wat goin happen, Dey can stay good inside. But da ones dat no kea cuz dey hard head, Dey goin fall down real hard, An bad tings goin happen to dem.

Jeremiah 40:3

So now Da One In Charge stay do eryting jalike how he wen tell he goin do. All dis stuff happen cuz you guys do bad kine stuff agains Da One In Charge, an you neva lissen him.

Ezekiel 11:19

I goin give dem one heart dat know da one ting dass importan, an put one new spirit inside dem. I goin hemo dea stone heart, an give dem one heart dass fo real.

Hosea 13:12

“Da Efraim peopo get plenny blame. I write one lis a all da bad kine stuff dey do, An I keep dat lis fo punish.

2 Corint 5:10

You know, erybody gotta go in front Christ da Judge, an us no can hide notting. Dat time us goin get back wat we wen do, wen we wen stay inside dis world. An no matta us wen do da good kine stuff o da no good kine stuff.

2 Tessalonika 1:5

All dis show dat God judge da right way. Az why he goin make you guys da right kine peopo, so he no shame fo tell, “You my guys, an I yoa King.” You guys know how come you stay suffa now? Cuz you da King guys, az why.

Jesus Show 2:21

I wen give dat wahine plenny chance awready fo come sorry an no do da bad kine stuff she stay do, but she no like.