Micah 4:13 - Hawaii Pidgin Bible

¹³ Da One In Charge tell: “You guys my Jerusalem peopo, Get up an go drag da heavy board wit plenny spike Fo clean da junks from my peopo, Jalike dey wheat fo clean! Cuz I goin make you guys strong Jalike one bull dat get iron horns an bronze feets. You goin bus up plenny peopos! You goin give all dea rich kine stuffs to Da One In Charge, Jalike da stuffs az one sacrifice fo him. Da stuff dey get wen dey bus up odda peopos, Goin be fo Da One In Charge, Da Boss fo all da peopos inside da world!”

Micah 4:13 交叉參考

Daniel 2:44

“Da time numba four kine govmen get powa, God Inside Da Sky goin set up anodda kine govmen. Dat govmen, no goin come wipe out eva, an odda peopo no goin get um. Dey goin smash all da odda kine govmens, so dey no mo powa. An dat govmen, goin stay solid foeva.

Isaiah 23:18

But dat time, wateva da Tyre peopo make from wat dey buy an sell, an from work, goin come spesho fo Da One In Charge, not fo ony dem. Wateva dey make, goin be fo plenny food an good clotheses fo da peopo dat stay tight wit Da One In Charge.

Isaiah 18:7

“Dat time, peopo goin bring gifs Fo Da One In Charge, Da God Ova All Da Armies. An who goin bring da gifs? Fo shua, dose same peopo from far places, Da tall guys dat get smooth skin, Dat erybody sked dem. An from da land even mo far still yet, Da real strong kine peopo ova dea Dat stay bus up erybody, Ova dea wea da big rivas cut thru dea land. “Dey da ones goin bring gifs to Jerusalem town fo him, cuz dass da place fo find out wat kine god Da One In Charge.”

1 Corint 16:2

Ery Sunday, erybody suppose to stash some money fo dis, from wateva dey wen make. No good you guys try fo put da money togedda afta I come dea.

Zekariah 6:5

Da angel tell me, “Dese, da four spirits from da sky. Dey stay go out afta dey wen stan in front da Boss Fo Da Whole World.

Zekariah 4:14

So he tell me, “Dese branches, dey da two guys dat Da One In Charge wen pick. He put olive oil on top dea heads fo show dey work fo him, da Boss fo all da world.”

Jeremiah 51:33

Dis one message from Da One In Charge, da God Ova All Da Armies, da God fo da Israel peopo. He tell: “Babylon town an da peopo dat live dea Goin come jalike one flat place Wea peopo clean da groun Fo take da junk kine stuffs outa da wheat. Wen da flat place all clean up, Den da harves time almos ready fo come.”

Songs 68:29

Cuz you wen put yoa Temple Inside Jerusalem town, Plenny kings bring presents dea Fo you.

Joshua 6:19

All da silva, gold, bronze, an iron stuff, az all kapu fo Da One In Charge. Az why all dat gotta stay wit all da odda rich kine stuffs dat stay kapu fo ony God.”

Isaiah 5:28

Dea arrow, stay sharp, An dea bows, ready fo shoot. Da horses feet run real fas. Da wheels on dea war wagons make big noise Jalike da strong wind.

Songs 72:10

I like fo da king guys from Spain An all da islans Come back to oua king Fo give um gifs. I like fo da king guys From Yemen an Ethiopia Bring wat dey owe Fo show he da boss fo dem.

Rules Secon Time 33:25

You Asher guys, I like you get iron an bronze bars fo yoa gates, Fo nobody hurt you all da time you stay alive.

Isaiah 21:10

God tell, “Bummahs! My Israel peopo, You pooa guys stay all bus up, Jalike wen dey smash da wheat on top da groun Fo take out da junk kine stuffs.” Dass wat I wen hear from Da One In Charge, Da God Ova All Da Armies, Da God fo da Israel peopo. He wen tell me all dat fo help you guys.

Jeremiah 51:20

“You Babylon guys, you jalike my war club fo fight, My war club fo make war. Wit you, I goin use you fo bus up da peopos, An fo wipe out kings an dea peopos.

Hosea 10:11

Da Israel peopo ack Jalike one young girl cow dat somebody wen train Fo step da wheat an barley fo da wind take out da junks. But I goin do mo den dat. I goin put one heavy yoke on top dat cow good looking neck, Fo make da Israel peopo pull da plow. Da Judah peopo gotta make da groun ready, But firs, da Israel peopo gotta broke up da hard dirt.

Habakkuk 3:12

You stay huhu, an you walk thru da earth. You huhu, an you make to da nations Jalike wen peopo wack da wheat Fo split um from da junk kine stuff.

Songs 24:1

Da One In Charge, he own Da whole world an eryting dea. He own da land An all da peopo dat live dea.

Micah 5:7

All da peopo from da Jacob ohana Dat stay alive still yet, Dey goin live togedda wit plenny diffren peopos. Dey goin be jalike dew from Da One In Charge, An rain on top da grass. Cuz nobody can hold back da dew, An da rain come from Da One In Charge, Not from peopo!

Zekariah 12:3

But dat time wen all da peopos inside da world goin go agains Jerusalem, I goin make da Jerusalem peopo come jalike one big rock dat nobody from all da odda peopos can move. Wen dey try move um, dey goin hurt ony dem.”

Zekariah 12:6

“Dat time I goin make da Judah leada guys come jalike one fire pan wit hot coals dat make one big stack wood burn, an jalike one torch dat burn up da wheat afta dey harves um. Dey goin burn up all da peopo dat stay aroun dem, but da Jerusalem peopo goin stay safe.