Micah 3:7 - Hawaii Pidgin Bible

⁷ “Da guys dat tell dey see wat odda peopo no can see, Goin come shame. An da guys dat tell wat goin happen, Dey all goin lose face, Cuz God no tell dem notting dey aks um about.”

Micah 3:7 交叉參考

Zekariah 13:4

“Dat time, all dem dat talk fo da odda gods goin come shame fo tell dea dreams. Dey no goin put on da kine clotheses dat da guys dat talk fo da odda gods make from animal kine hair, fo bulai da peopo.

Isaiah 44:25

I da One dat jam up da sign Da fake talka guys use Fo tell wat goin happen. Da guys dat try fo find out Wat goin happen bumbye, I show da peopo dat dey stupid. I turn aroun da stuff Dat da guys talk bout dat suppose to know wat fo do, An I make eryting dey know Show dat dey donno notting.

Amos 8:11

Amos tell: “Dis wat da Boss, Da One In Charge a me, tell: “ ‘You know wat? Goin come one time Dat I goin make erybody all ova da land Feel jalike dey hungry. But dass not da hungry you get fo bread O da thirsty you get fo watta. Me, Da One In Charge, I stay talk bout dis: Dey goin like hear all da tings I wen tell befo time, Cuz dey goin come hungry fo hear all dat now!

Ezekiel 24:17

Moan inside, but no show you sore inside. Wea yoa regula kine turban an no go aroun barefeet fo show you stay sad inside. No cova up yoa beard, o eat funeral kine food.”

1 Samuel 28:6

He aks Da One In Charge fo tell wat goin happen, but Da One In Charge no tell him notting—not inside his dreams, o wit da Urim da Main Pries Guy use, o from da guys dat talk fo Da One In Charge. Notting!

Prieses 13:45

“Anybody get dat kine sick odda guys can catch, dey gotta rip da clotheses dey wear fo show dey stay sad inside, an no comb dea hair. Dey gotta cova up da bottom part a dea face, an yell to erybody, ‘No come nea! No come nea! I no stay pono fo go in front Da One In Charge!’

Micah 7:16

Wen da odda peopos see dat happen, dey goin come shame, Cuz dey no mo powa. Dey goin put dea hand on top dea mout Cuz dey donno wat fo do. Dey no can hear notting dat time.

Ezekiel 24:22

An you guys goin make how me Ezekiel wen make. No cova up yoa beard, o eat funeral kine food.

Songs 74:9

Us guys, no mo spesho mark Fo show who us. No mo nobody talk fo God no moa. No mo nobody wit us know Wen all dis trouble no goin be no moa.

1 Samuel 28:15

Samuel tell, “How come you stay bodda me an bring me up hea?” Saul tell, “I get plenny presha! Da Filisha guys stay fight me. Jalike God tell ‘Laytas’ to me an no lissen you! He no talk to me no moa, no matta I aks da guys dat talk fo him, o I dream. Az why I wen call fo you fo tell me wat fo do.”

1 Samuel 14:37

So Saul aks God, “You tink dass okay if I go down dea afta da Filisha guys, o wat? You goin make us Israel guys win, o wat?” But God no tell him notting dat time.

1 Samuel 9:9

(Now, befo time, wit da Israel peopo, wen one guy go some place fo find out someting from God, he tell, “Come! We go by da guy dat can see wass goin happen,” cuz az wat dey call da guys dat talk fo God, dat time, “guys dat can see.”)

Outa Egypt 9:11

Da Egypt pries guys no can even stan up in front Moses cuz a da boils, cuz da boils come out all ova da Egypt pries guys an all ova all da odda Egypt peopo.

Micah 3:4

Bumbye, dose leada guys goin yell real loud Fo Da One In Charge help dem. But he no goin ansa dem! Dat time he goin hide his face from dem guys, Cuz a all da bad kine stuff dey wen do.”

Jeremiah 18:18

Some peopo tell: “Eh come! We go make one plan fo kill Jeremiah. Dat way, we not goin throw out da rules da pries guys teach, o throw out wat da guys dat know wat fo do erytime tell us fo do, o throw out da tings da guys dat talk fo God tell. So we goin poin finga Jeremiah an tell wat he do wrong. We no goin lissen him notting!”