Micah 1:16 - Hawaii Pidgin Bible

¹⁶ Shave off yoa hair an come bolohead Fo show you guys stay sad inside. Cuz da kids dat you guys get plenny love an aloha fo, Da army guys goin make dem prisonas An take dem away. So come bolohead jalike one scavenja bird!”

Micah 1:16 交叉參考

Isaiah 22:12

My boss, Da One In Charge, Da God Ova All Da Armies, He goin call you dat time Fo cry an stay sad inside, Fo pull out yoa hair, An put on burmbag kine clotheses, Fo show you stay sad inside.

Jeremiah 7:29

“ ‘Eh you Jerusalem peopo! Cut yoa hair an make bolohead fo show you stay sad inside. Cut um off an throw um away. Go da trails on top da mountains wea no mo notting grow, An sing one sad song dea. Cuz Da One In Charge had it wit his peopo. He dig out awready from da peopo dat stay hea now. He throw um out cuz he stay real huhu wit dem.’ ”

Job 1:20

Wen Job hear dat, right den an dea he stan up an rip his clotheses an shave his head fo show he stay sad inside. Den he go down an put his face on top da groun.

Amos 8:10

Wen you guys make one religious kine ceremony dat make you feel good, I goin change um an make you guys come sad. Wen you guys sing, I goin make you guys sing one sad kine song. I goin make erybody stay sad inside An wear burmbag kine cloth An shave bolohead fo show dey stay sad inside. Goin be jalike wen da faddah-muddah guys come sad Cuz dea one an ony boy mahke. Dat time, goin be jalike eryting taste real bad, till da end.”

Jeremiah 16:6

“Da importan peopo an da not so importan kine peopo, dey all goin mahke inside dis land. No mo nobody goin bury dem, an no mo nobody goin stay sad inside an cry fo dem. No mo nobody goin cut dea body o make dea head bolohead fo show dey stay sad inside.

Jeremiah 6:26

My peopo, you betta put on burmbag kine clotheses An lay down on top da ashes fo show you stay sad inside! Stay sore inside an cry plenny, Jalike yoa ony boy wen mahke! Cuz wen you tink dey no stay come, Da army guys dat goin wipe us out goin come!”

Isaiah 15:2

Da Moab peopo go up to dea temple, An da Dibon peopo go up da sacrifice place on top da hill Fo cry. Cuz Nebo an Medeba stay bus up, Da Moab peopo yell plenny. Dey cut off dea hair an all dea beard Fo show dey stay sad inside.

2 Kings 17:6

Wen Hoshea stay king fo nine year, da Assyria king take ova Samaria town, an make da Israel peopo go Assyria side fo live. He make some a dem live Halah side, some a dem by da Habor Riva dat go by Gozan, an da res inside da towns wea da Mede peopo live.

Rules Secon Time 28:41

You guys goin get boys an girls, but you no goin keep dem fo stay wit you guys cuz odda peopo goin make dem prisonas an take dem away.

Jeremiah 47:5

Da Gaza peopo goin shave dea head cuz dey stay sad inside. Da Ashkelon peopo goin come wipe out. You odda Filisha peopo Dat still stay alive inside yoa valley, How long you goin cut yoa body Fo show you stay sad inside?”

Amos 7:11

Dis Amos guy, dis wat he stay tell peopo: ‘King Jeroboam, somebody goin kill him wit one sword, an fo shua, dose peopo goin take all da Israel peopo far away from dea land.’ ” Dass wat Amaziah tell Jeroboam.

Amos 7:17

But cuz you stay talk lidat, dis wat Da One In Charge tell: “Yoa wife, she goin come one hoa Right hea inside yoa home town. Da ones dat stay agains you Goin kill yoa boys an yoa girls wit swords. Yoa land, odda peopo goin measure um fo broke um up an sell um. An you, you goin mahke inside anodda land dat stay pilau, Cuz you Israel peopo goin come prisonas Far away from yoa land.”

Jeremiah 4:8

So, you guys betta put on burmbag kine clotheses, Fo show you guys stay sad inside an crying, Cuz Da One In Charge stay real huhu wit us guys. An he still yet stay huhu!”

Sad Song 2:19

Wake up! Yell loud nite time, Wen da watcha guys start fo call. Pour out eryting inside you, jalike watta in front da Boss. Lif up yoa hands an pray to him, fo yoa kids no mahke! Dey stay hungry, so dey pass out at ery street corna.