John 4:23 - Hawaii Pidgin Bible

²³ Garans da time goin come, an awready stay come now, wen da peopo go down an pray to da Faddah fo real kine. Dey goin show him plenny love an respeck cuz dey stay tight wit God Spirit, an dey goin know fo shua who God. Dass da kine peopo da Faddah like, da ones dat show him plenny love an respeck.

John 4:23 交叉參考

Philippi 3:3

Dey tell, “Fo be God guy fo real kine, gotta cut skin.” But you know, us guys, us da guys dat get God Spirit. Dass da mark fo show dat us God guys, not dem. Cuz wen us do stuff fo God, dass da Spirit dat help us fo do um. Us guys can feel real proud cuz we stay tight wit God Spesho Guy, Jesus Christ. We no tink we okay jus cuz somebody wen do someting to oua body.

John 5:25

An if you guys undastan dat, I like tell you guys dis too: I God Boy. Da time goin come, an awready stay hea now, wen da mahke guys goin hear wat I tell. An da peopo dat hear me, an lissen wat I tell, dey goin live fo real kine.

Galatia 4:6

So den, cuz you guys his kids, God put da Spirit from his Boy inside us guys, fo now us tell God, “Daddy, you my Faddah!”

Rome 8:26

Anodda ting, God Spirit help us plenny, cuz us no mo powa. We donno how fo pray da right way. But God Spirit, he take ova an aks God fo do tings fo us. Cuz us guys get big pain inside us cuz we no shua how fo pray.

John 12:23

Jesus tell um, “Time awready fo me, da Fo Real Kine Guy. Now God goin make me come awesome fo real kine! But befo I come awesome to da max, I gotta mahke.

Efesus 6:18

Fo stan strong erytime, pray an stay tight wit God Spirit. Pray bout eryting, an tell God fo help you. Make shua you guys watch out, an hang in dea an pray fo all da peopo dat stay spesho fo God.

John 4:21

He tell, “Sistah, trus me, I stay tell da trut. Da time goin come wen you guys goin go down an pray to God oua Faddah, but no goin be hea on top dis mountain o inside Jerusalem.

John 1:17

Moses wen give oua ancesta guys da Rules From God. Den Jesus Christ, God Spesho Guy, he do plenny good stuff fo us, an eryting he tell us bout God, stay fo real.

Isaiah 29:13

My Boss tell: “Dis peopo tell dey mines, But dey ony mout! Dey talk jalike dey get respeck fo me. But ony mout dem! Inside dey stay far from me. Wen dey like show love an respeck fo me, Dey ony copy da words dey wen learn From da rules odda peopo tell um fo do.

Isaiah 58:2

Me, da One dey aks wat fo do, ery day! Dey ack jalike dey fo real kine like know how I ack. Dey ack jalike dey one nation Dat stay do wass right erytime, An lissen wat me dea God tell um fo do, Cuz I da Judge. Dey aks me fo judge da right way fo dem. Dey ack jalike dey like Fo me come nea dem.

Isaiah 43:21

I wen make dose peopo fo me Fo dem talk story Bout da good tings I stay do.

Rome 8:15

Wen you guys get God Spirit in charge a you, God Spirit no goin make you guys live jalike slaves dat gotta stay sked all da time. Az how was befo time. Wen you get God Spirit in charge a you, you know you stay God kids! Az why he goin lissen wen we yell out, “Daddy!”

Joshua 24:14

Den Joshua tell, “An now stay sked a Da One In Charge, an work fo him, an stay tight wit him. Throw out da gods yoa ancesta guys wen pray to da odda side a da Eufrates Riva an Egypt side, an work fo Da One In Charge.

1 Peter 2:9

But you guys da one God wen pick. You da pries guys fo da King. You guys da peopo dat stay spesho fo God. God tell, “Dey mines!” bout you guys, fo you guys tell erybody all da good stuff God wen do. He tell you guys fo come outa da bad kine stuff an stick wit da good kine stuff he like us fo do. Jalike you wen go outa da dark an come inside da awesome light.

Songs 51:6

Fo shua you feel good wen I tell da trut, Even bout da secret kine tings Dat nobody but me know. So help me know fo real kine Wat I gotta do Bout da stuff I stay hide.

Songs 17:1

Eh! You Da One In Charge! I stay tell you Fo do da right ting fo me, so try lissen! I stay yell to you fo help me, So try lissen real good! I stay pray to you, An I no bulai notting.

1 Samuel 12:24

But make shua you guys stay sked a Da One In Charge an show um plenny respeck, an go all out fo work fo him fo real kine. Tink bout all da big kine tings he wen do fo you guys.

John 16:32

You know wat? Da time goin come, an almos stay hea now, wen all you guys goin bag, an scatta all ova da place. Erybody goin go his place, an I no goin stay by nobody. But I no stay by nobody, cuz my Faddah stay by me.

Jeremiah 4:2

Wen you guys make one strong promise, You gotta tell, ‘I shua Da One In Charge stay alive, Same ting I stay shua I goin do dis.’ You gotta tell da trut fo real kine, An judge da right way, Keep all da rules, An do wass right. If you guys do all dat, Den, wen diffren peopos tink bout me, Da One In Charge, Dey goin tell, ‘Da One In Charge do good kine stuff fo us guys!’ An dey goin talk big bout me cuz dey know me, Da One In Charge.”

Jeremiah 3:10

An cuz a wat da Israel peopo stay do, dea sistah guys da Judah peopo, dat stay ack jalike one wahine you no can trus. Dey no go all out fo come back by me. Dey ony ack!” Az da message from Da One In Charge.

Smart Guys 15:8

Wen da bad kine peopo Make sacrifice fo God, God tink, dat kine sacrifice stay pilau. Wen da good kine peopo pray, Dass wat God like.

1 Records 29:17

My God, I know fo shua dat you da One tes eryting us guys tink. I know fo shua dat you stay good inside wen us guys do wass right. I wen give all dis stuff cuz I like give um fo real kine. An now I stay good inside cuz I see yoa peopo dat stay hea, giving you plenny stuff cuz dey like give um.

Rome 1:9

God know dat I stay tell da trut. He know I go all out fo work fo him wit my spirit. I make lidis fo tell da peopo all da Good Kine Stuff Bout His Boy. An God know dat I no goin give up fo tink bout you guys.

Songs 147:11

Dis wat make Da One In Charge Stay good inside: Wen peopo get choke plenny respeck Fo Da One In Charge, Fo dem feel jalike dey sked In front him, An wen dey wait fo him help dem, Cuz dey know he stay tight wit dem.

Ezekiel 22:30

“Me, Da One In Charge wen look fo one guy from da Israel land fo build up da wall one mo time, an stan up fo me, inside da place wea da wall stay broke down, so I no gotta wipe out da land. But I no find nobody.

Love Song 2:14

Eh! You jalike my dove! Jalike you get nes inside da rough rocks, Inside da far places on da mountain side. Let me see yoa face! Let me hear you talk, Cuz sweet, yoa voice stay! An yoa face stay beautiful.

Songs 32:2

Eryting goin go good fo you If Da One In Charge no tell He gotta punish you, An if you da kine guy Dat no bulai notting inside.

Isaiah 10:20

Dat time goin come, An some a da Israel peopo dat still stay alive Da ones from da Jacob ohana dat get away, Dey no goin trus da Assyria king no moa, Da one dat wen wack um. But dey goin trus Da One In Charge fo real kine, Da One dat stay good an spesho fo da Israel peopo.

John 5:28

No let dis blow yoa mind, cuz da time goin come wen all da mahke guys goin hear my voice.

John 16:2

Da Jew guys goin throw you outa dea churches. An even goin get one time wen whoeva kill you guys goin figga dey stay do someting good fo God.