Jeremiah 5:7 - Hawaii Pidgin Bible

⁷ Da One In Charge tell: “How come you Jerusalem guys tink I gotta let you guys go? Yoa kids wen dig out from me. Wen yoa kids make one promise, Dey call out to da gods dat not gods fo real kine, Fo make shua dey goin do wat dey wen promise fo do. I da One give dem eryting dey need. But dey fool aroun wit da wahines dat not dea wife, in front da odda gods. Dey all go togedda to da houses wea da wahines stay Dat fool aroun fo get money fo da odda gods.

Jeremiah 5:7 交叉參考

Galatia 4:8

Befo time you guys neva know God. Dat time you guys gotta do eryting da odda spirits tell you fo do, no matta dey not real kine gods.

Jeremiah 2:11

All dose peopos, dey neva dump dea gods dat dey get from befo time. No matta da gods dey get, dey not gods fo real. But my peopo, dey wen bag from me, Da God dat make dem come awesome, Fo go pray to idol kine gods dat good fo notting!

Joshua 23:7

No make frenz wit da peopos dat stay hea still yet. No talk bout dea gods, an no use dea god names fo make one strong promise. No go work fo dose gods o go down in front dem.

Rules Secon Time 32:21

Dey make me come jealous Cuz dey pray to da kine gods Dat not gods fo real kine. Dey make me come huhu Cuz a dea idol kine gods dat good fo notting. Me, I goin make dem come jealous, Cuz I goin do good tings Fo some no good peopo, not dem. I goin make dem come huhu Cuz I goin do good tings fo one nation Dat donno notting, not dem.

Zefaniah 1:5

I goin wipe out da peopo dat go on top dea flat roofs Fo go bow down in front Da sun, da moon, an all da star gods. An I goin wipe out da peopo dat use my name ‘Da One In Charge’ fo pray to me, An same time dey use da Molek god name fo pray to him too.

1 Corint 8:4

So den, even if da peopo make one sacrifice to da idol kine gods, an den somebody go eat dat food, we all know dat da idol kine gods inside dis world not da real God. Jalike da Bible tell, “Ony get one God dass fo real, an all da odda gods no mean notting.”

Jeremiah 23:10

All ova da land, get plenny peopo Dat ack jalike one wahine dat fool aroun behind her husban back, Cuz dey go fool aroun wit da odda gods. Da land get kahuna on top um, Cuz da peopo no do wat dey tell God dey goin do. Az how come da whole land look dry jalike stay mahke. Da places inside da boonies wea get grass, stay dry. Az cuz da guys dat suppose to talk fo God, Dey ony do wat dey like do, an az bad. Dey no use dea powa da right way.

Rules Secon Time 32:15

But Jeshurun, az da Israel peopo Dat stay do wass right, Dey wen come real fat an do Ony wat dey like do. Eh, I stay talk bout you Israel peopo! You guys eat too much an come real fat. You wen bag from da God dat wen make you. Da One dat stay solid jalike one big stone Da One get you guys outa trouble, But you guys tink he stupid, an bag from him.

James 4:4

You guys, jalike you go fool aroun behind God back! An you guys ack jalike you neva know dis: Whoeva love da bad kine stuff inside da world, fo real, dat guy stay agains God! So, whoeva come frenz wit all da bad kine stuff inside da world, dat guy show dat he stay agains God fo shua!

Jeremiah 12:16

Dey goin learn fo real kine how my peopo suppose to ack. So den wen dey make one strong promise, dey goin tell lidis, ‘Jalike fo shua Da One In Charge stay alive.’ (Az not like befo time, wen da odda peopos wen teach my peopo fo use Baal name wen dey make one promise.) But if dey learn eryting bout me, Da One In Charge, den I goin let dem get da same rights my peopo get.

1 Corint 6:9

You guys ack jalike you donno dis: Da peopo dat no like do da right ting, no way dey goin get God fo dea king. No let nobody bulai you guys fo make you do wrong! Da guys dat fool aroun da wahines, da peopo dat go pray to da idol kine gods, da peopo dat sleep wit anodda guy wife o husban, da guys dat make sex wit odda guys, da mahu kine guys,

Malakai 3:5

Da One In Charge Ova All Da Armies tell dis too: “I goin go by you guys in front da judge right den an dea, I goin tell da judge wat I know bout you guys, Bout da ones dat make kahuna kine ceremony, An da ones dat fool aroun behind dea wife o husban back, An da ones dat make one strong promise but dey bulai, An da ones dat make trouble fo dea worka guys cuz dey no like pay um, An make trouble fo da widows an da kids dat no mo faddah o muddah, An da ones dat give one hard time to da peopo from anodda place. All dose peopo, dey no sked me!”

Amos 8:14

Da ones dat make one strong promise, an make um by da name a da pilau idol kine gods dat da Samaria an Dan an Beer-Sheba peopo pray to, dey goin come wipe out an stay lidat foeva. Dey goin tell: “I shua dat I goin do um, Jalike I shua dat da idol kine god dat da Dan ohana peopo pray to, stay alive! O jalike I shua dat da idol kine god we go pray to Beer-Sheba side, stay alive! “But all dose peopo dat make dat kine promise, dey goin fall down an mahke. Dey no goin get up, eva!” Dass wat Da One In Charge tell.

Hosea 13:6

Wen I wen feed dem, dey get full. Wen dey full, den dey ack high makamaka. Dass how dey foget me.

Hosea 11:8

“You Efraim peopo, no way I goin tell you guys ‘Laytas!’ No way I goin give you Israel peopo to anodda god! No way I goin wipe out you guys jalike I wen wipe out Admah town! O Zeboim town! Now I wen change my mind, Az why now I feel all kine love an pity fo you guys!

Hosea 7:4

Dey all fool aroun erytime behind dea wife back. Dey get da hots jalike dey one oven Wea da guy dat bake bread no need make da fire mo hot, From wen he poun down da dough till come mo big.

Hosea 4:2

Dose guys put kahuna on top each odda. Dey bulai each odda an murda each odda. An dey rip off peopo. Dey fool aroun behind dea wife o husban back. Dey bus up peopo an kill um one afta anodda.

Ezekiel 22:11

Inside yoa town get guys dat do pilau kine stuff an fool aroun wit da wife a some odda guy. Get odda guys dat no shame fo poke dea daughtah-in-law. An get odda guys dat no mo shame fo rape dea sistah, dea faddah girl.

Jeremiah 13:27

I wen look an see da pilau kine tings you guys do On top da hills in da countryside. You guys fool aroun wit da guys an wahines Dat not yoa husban o wife. You guys come hot up an fool aroun fo money. Bummahs, you Jerusalem peopo! How long you goin stay pilau?”

Jeremiah 9:2

Too bad no mo one place inside da boonies Fo me stay dea nite time. Den fo shua I can go way from my peopo An stay ova dea. Cuz all my peopo fool aroun wit odda gods Jalike dey fool aroun wit peopo dat not dea wife o husban. You no can trus dem cuz dey bulai.

Jeremiah 3:19

“Da One In Charge tell, ‘Me, I da One wen tell Dat fo shua I like make you guys importan, jalike you my kids. I like give you guys da good kine land dat erybody like live dea Fo stay yoas foeva. Dis place, mo nice looking den da lands da odda peopos get. I wen like fo you guys call me yoa faddah. An I no tink you guys goin dig out from me an no stay tight wit me.

Jeremiah 2:31

You peopo dat live nowdays, Tink bout wat I tell! Dis me, Da One In Charge! You Israel guys tink I jalike da empty boonies fo you, O I jalike one land wea eryting stay real dark, o wat? How come my peopo tell, “We goin go wea eva we like go! No way we goin go back by you no moa!”?

Songs 50:18

If you see one guy dat rip somebody off, Make you feel good inside. You hang out wit da kine peopo Dat stay fool aroun Behind dea wife o dea husban back.

Prieses 20:10

If somebody fool aroun wit anodda guy wife, an dass mean any odda guy wife, you guys gotta kill da guy an da wahine dat fool aroun.

Hebrews 13:4

An erybody gotta show plenny respeck fo da guy an wahine dat stay marry. Wen dey sleep togedda, dass good. Az why da husban o da wife betta not fool aroun behind each odda back. Cuz God goin punish da peopo dat fool aroun behind da odda back, an erybody dat fool aroun anybody dey no stay married to.

2 Records 13:9

But you guys wen throw out Aaron boys, dat stay da pries guys fo Da One In Charge, an da Levi ohana guys. You guys make odda guys yoa pries guys, jalike da peopos inside da odda lands stay do. Whoeva show up fo come spesho fo yoa gods, an bring one young boy cow an seven boy sheeps, dat guy can come one pries fo dose statues dat not fo real kine gods!

Jeremiah 7:9

“ ‘You guys stealas, an killas! You fool aroun wit wahines dat not yoa wife! You guys make one strong promise, but you bulai! You guys burn incense fo da Baal god! You guys stay tight wit odda gods you guys neva know from befo time!

Jeremiah 16:11

Den you tell dem, ‘Dis wat Da One In Charge tell: Yoa ancesta guys wen bag from me. Dey stay tight wit odda gods, dey work fo dem, an dey go down an pray in front dem. Dey bag from me, an no do wat my Rules tell.

Jeremiah 16:20

Az true, o wat? dat peopo make da kine gods dey like? Fo shua dey make um! But dose kine gods, dey not gods fo real kine!”

Sad Song 3:42

“Us guys wen do bad kine stuff, An stan agains you. An you neva let us go fo dat!

Job 31:12

Az jalike one fire dat burn inside peopo an make dem wipe out. If get dat kine fire, goin burn up all da food dat I wen plant, all da way down to da roots. But I not dat kine guy.

Jeremiah 3:8

An da Judah peopo wen see dat I wen cut off da Israel peopo, jalike I give um one divorce paypa an sen um away, cuz dey ack jalike one wahine dat no stay tight wit her husban an fool aroun wit da odda gods. But I see dat dea sistah guys, da Judah peopo, dey no stay tight wit me too. Dey no sked fo make jalike one wahine you no can trus, an go fool aroun wit da odda gods too, jalike da wahines dat fool aroun fo money.

Jeremiah 9:1

I like my head come jalike one spring fo watta, An my eyes jalike one fountain fo my tears come out! Cuz I like cry plenny, day time an nite time, Cuz plenny peopo get kill, an dey my peopo.