Jeremiah 5:19 - Hawaii Pidgin Bible

¹⁹ Wen da peopo tell, ‘How come oua God, dass Da One In Charge a us, do all dis kine stuff to us?’ you, Jeremiah, goin tell um, ‘Da One In Charge tell, you guys wen dig out from me, fo work inside yoa land fo da idol kine gods from da diffren peopos. An den, dese diffren peopos goin make you guys work fo dem inside one land dass not yoa land!’

Jeremiah 5:19 交叉參考

Jeremiah 16:13

Az why I goin throw you guys outa dis land, an bring you inside one land dat you guys an yoa ancesta guys neva know befo time. Ova dea you guys goin work fo odda gods day time an nite time. Cuz I no goin give you guys chance.

Jeremiah 13:22

Wen you guys start fo tink, “How come all dis stay happen to us?” All dis happen cuz you guys stay do plenny bad kine stuff. Az why dea army guys goin rip off yoa clotheses An rape you!

Sad Song 5:8

Get slave guys stay in charge us guys. An no mo nobody fo get us away from dem.

Jeremiah 2:35

But you guys tell, “Me, fo shua I neva do notting wrong. God no stay huhu wit me now.” But me, God, I da One goin poin finga you guys, Cuz you tell, “I neva do notting wrong.”

Jeremiah 2:13

“My peopo wen do two real bad tings: Numba one, dey wen bag from me, No matta I jalike one watta spring Wea da watta come out all da time An make peopo come alive. Numba two, dey go wit odda gods, dass good fo notting. Jalike dey dig big holes fo hold watta, But no can hold da watta!

Jeremiah 2:14

You tink da Israel peopo wen born fo come slaves? No ways! So how come dey wen come prisonas, aah?!

Jeremiah 5:18

Da One In Charge tell dis too: “But wen dat happen, I still yet no goin wipe out all you guys.

Jeremiah 5:20

“Tell all da peopo dat come from Jacob An make real shua da Judah ohana peopo hear dis:

Jeremiah 9:13

Da One In Charge tell: “Az cuz dey no like follow my Rules dat I wen give um. Dey no like lissen wen I talk, an dey no do wat da Rules tell.

Jeremiah 9:12

Nobody stay smart enuff fo undastan all dis! No mo nobody dat Da One In Charge wen teach fo da guy tell wat all dis mean! How come da land stay all wasted an burn up jalike da boonies fo no mo nobody go thru dea?!

Jeremiah 17:4

You guys get da blame! Az why you guys goin lose da land I wen give you guys fo come yoa property. I goin make you guys come slaves fo da peopo dat stay agains you Inside one land you guys donno from befo time. Az cuz you guys wen make me come real huhu, Jalike one real hot fire dat goin burn foeva.”