Jeremiah 32:10 - Hawaii Pidgin Bible

¹⁰ I write my name on top da paypa dat tell dat I own da land, an I roll um up an put my mark on um. Den da guys dat see me write um, dey write dea name on top da outside. I use one scale fo weigh da silva in front erybody too.

Jeremiah 32:10 交叉參考

Jeremiah 32:44

Peopo goin buy fields an pay wit silva, an get back one paypa dat tell dey own da land. Dey goin put one seal wit dea mark on top da paypa, an dey goin bring peopo dat write down dea name fo show proof dat dey wen buy da land. Dey goin make lidat inside da Benjamin ohana land, an da towns aroun Jerusalem, da Judah towns, an da up country towns inside da hills, an da low hills makai side, an da Negev boonies. All dis goin happen afta I bring um back an dey no stay prisonas no moa. Az wat Da One In Charge tell.”

Jeremiah 32:12

Den I give da paypas dat tell I wen buy da land to Baruk, Neriah boy an Mahseiah grankid. Da odda guys see me do dat too—my cousin Hanamel, da guys dat wen write dea names on da outside a da paypa, an all da odda Judah peopo dat stay sit inside da patio fo da guard guys.

Jeremiah 32:25

Da One In Charge, you da boss fo me! So, how come you wen tell me ‘Go buy da field wit silva! Make shua da guys see you buy um, an write dea names on top da paypa dat dey see you buy um!’ Same time, da Babylon guys goin take ova da town!”

Isaiah 44:5

One guy goin tell, ‘Da One In Charge own me.’ Anodda guy goin tell he one Jacob ohana guy. Anodda guy goin write on top his hand, ‘Da One In Charge own me.’ An tell ‘Call me Da Israel Guy.’ ”

Job 14:17

Jalike you goin put all da wrong tings I do Inside one bag dat you put one seal on top um, An cova ova all da bad kine stuff I wen do.

Rules Secon Time 32:34

“Me, eryting I make one plan fo do, I keep um in one good place wit me An lock um up wea I put all my rich stuffs.

Jesus Show 9:4

God tell da grasshoppas, “No jam up da grass, o plants, o trees on top da earth, but ony da peopo dat no mo God mark on top dea forehead!”

Jesus Show 7:2

Den I see anodda angel guy stay come up from da east. He get one ting fo make one mark on top peopo, from da God dat stay alive. Wit one loud voice he call out to da four angel guys dat get da powa fo jam up da land an da ocean.

Efesus 4:30

No go do notting dat goin make da Good An Spesho Spirit come sore inside. Cuz God Good An Spesho Spirit stay in charge a you guys you know. An dass da mark dat show proof dat you guys da peopo dat know God. Dat show dat bumbye he goin hemo you guys from da powa dat da bad kine stuff you do get ova you guys.

Efesus 1:13

Same ting wit all you guys dat stay tight wit Christ. You guys wen hear da true kine stuff God tell. Dass da Good Kine Stuff bout how God take you guys outa da bad kine stuff you guys stay in. An cuz you guys trus Jesus an stay tight wit him, God give you guys his Good An Spesho Spirit, jalike he wen promise fo do befo time. Dass da Spirit dat make you guys go all out fo him, an da Spirit jalike one mark fo show dat you stay his guys.

2 Corint 1:22

God wen put his awesome Spirit in charge us guys fo show wat he goin do fo us bumbye. Dass jalike he wen put his mark on top us fo show he own us.

John 6:27

No go work ony fo da kine food dat bumbye come no good. Work fo da kine food dat las long time an make you guys live to da max foeva! I da Fo Real Kine Guy, an I give you guys dat kine life, cuz God da Faddah give me da right fo do dat.”

John 3:33

But whoeva take wat da One from up dea tell, dat guy show dat God tell da trut.

Daniel 8:26

“Da ting you wen see, bout da sacrifices fo nite time an morning time—wat you wen hear, az goin happen fo shua! But put one seal on top um fo stay secret, cuz goin be long time befo all dis stuff happen.”

Isaiah 30:8

“Now go. Write um fo dem, wat I jus wen tell you On top one flat board, So goin stay. Den da peopo goin know bumbye an foeva Wat I stay tell you now.

Love Song 8:6

Inside, try tink plenny bout me, Jalike I one seal on top yoa heart, An jalike one seal on top yoa arm. Cuz oua love stay real strong, Jalike wen somebody mahke. Wen you geev um an go all out fo somebody, You no like let go da one you love, Jalike da Mahke Peopo Place No like give up da one dat mahke. Love stay burn jalike one strong fire dat flash.

Joshua 18:9

So da guys go scope out da land, town by town. Dey write bout um on top one paypa, an make seven piece land. Den dey go back by Joshua Shiloh side.

Matthew 27:66

Den dey go an put one offisho seal on top da big rock dat close da tomb, an leave some police guards ova dea fo guard um.

Start 23:16

Abraham tell, “Kay den.” He weigh da silva dey talk bout in front da Het ohana peopo an give um to Efron—400 piece silva, da kine da biznis peopo use ova dea dat time.

Start 23:20

Dass how da land wit da cave inside come Abraham land from da Het peopo, fo bury da mahke peopo from Abraham ohana.

Ruth 4:1

Den Boaz go ova dea by da big gate fo da town, da place wea da town leadas come togedda fo talk. He sit down dea wit da odda leada guys. Right den an dea, da odda guy from his ohana, da one Boaz talk bout, dat get da right fo marry Ruth mo den Boaz get, he walk by dem. Boaz yell to him an call his name. Boaz tell, “Hui! Come ova hea! Sit down! I like talk to you.” So dat guy come an sit down ova dea.