Jeremiah 3:13 - Hawaii Pidgin Bible

¹³ But one ting I tell you guys gotta do— You gotta tell wat you wen do az wrong, An dat you guys wen go agains me, yoa God, Da One In Charge, An dat you guys fool aroun all ova da place Wit odda peopo gods, Unda all da trees dat get big shade. An wen I talk, you guys no lissen, you make deaf ear! Az wat Da One In Charge tell.’ ”

Jeremiah 3:13 交叉參考

Jeremiah 3:25

Us no goin show face cuz we get plenny shame. Us goin come bum out cuz no mo nobody get respeck fo us! Us an oua ancesta guys, all us wen do bad kine stuff Agains oua God, dass Da One In Charge a us. We do all dat from small kid time till now. We neva lissen wat oua God, dass Da One In Charge a us, tell us!’ ”

Jeremiah 3:6

Da time Josiah stay king, Da One In Charge tell me, “You see wat da Israel peopo wen do? Dey ack jalike one wahine dat no stay tight wit her husban. Dey go up on top all da high hills an unda ery tree dat get big shade, an go fool aroun dea in front da odda gods, jalike da hoaz.

Jeremiah 2:25

Same ting, you Israel peopo, No need run till yoa slippas broke, An yoa throat come dry. But you guys tell, ‘No try bring us back from how we stay! Us love da gods from da odda peopos! Us gotta stay tight wit dem!’

Rules Secon Time 12:2

Broke down all da sacrifice place on top da high mountains an hills, an unda ery tree dat get plenny green leaf. Dis da kine place wea da peopo dat stay dea, go down in front dea gods. But you guys goin take ova dea land.

Jeremiah 3:2

“Look up da high mountains Wea no mo plants grow cuz erybody go dea. You guys goin see all da sacrifice places dea Wea you wen go fool aroun in front da odda gods! You guys sit by da roads An wait fo somebody you can fool aroun wit, Jalike da steala guys from da dry boonies Stay wait fo jump somebody. You guys make da land pilau, Cuz you do real bad kine stuff Wen you stay fool aroun wit da odda gods.

Jeremiah 2:20

“Long time befo time you guys wen no do wat I tell you fo do, Jalike one cow dat broke off da yoke fo pull da wagon, An broke da ropes dat tie um. You guys wen tell, ‘Us no goin work fo you!’ Fo shua, unda da trees wit plenny leaf on top ery big hill, You guys ack jalike da wahines Dat make sex dea fo get money.

Ezekiel 16:15

“ ‘But cuz you was nice looking, you wen trus how you look. Cuz erybody know yoa rep, you one hoa. You make nice nice an eye up whoevas pass by you, an sell yoa body to dem fo sex.

Jeremiah 14:20

You Da One In Charge, An us guys know we wen do bad kine stuff. Fo shua, wat oua ancesta guys wen do was wrong. All us guys do bad kine stuff agains you.

Smart Guys 28:13

Whoeva do stuff agains God, An den try fo cova up wat dey wen do, Garans stuff no goin come out good fo dem. Whoeva do stuff agains God, But den dey tell God dey wen do wass wrong, An no make lidat no moa, God give dem chance.

Nehemiah 9:2

Da peopo from da Israel ohana stan one side, away from all da odda peopo dat not from dea. An da Israel peopo tell erybody da bad kine tings dey wen do, an wat dea ancesta guys wen do too.

Isaiah 57:5

You guys like fool aroun Unda da kine kapu trees fo da idol kine gods. You guys kill yoa kids fo da god Molek Down by da streams dat no mo watta, Fo make sacrifice unda da cracks in da cliffs.

Jeremiah 14:10

Dis wat Da One In Charge tell bout how his peopo stay: “Dey like go check out any kine place. Dey no pick da right way fo go.” Az why Da One In Charge no like how dey ack. Da way tings stay now, He no goin foget da wrong tings dey stay do. He goin punish dem cuz a da bad tings dey do.

Hosea 5:15

Den I goin go back my place, Till dey know dat dey da ones get da blame. Den dey goin turn to me. Cuz dey get trouble, dey goin try real hard fo come tight wit me.”

Jeremiah 7:24

“But my peopo, dey no lissen, o tink bout wat I tell. Dey hard head, an dey do wat dea bad heart like do. Dey suppose to go one way, an dey go da odda way,

Jeremiah 7:26

But yoa ancesta guys no lissen me o tink bout wat I tell. Dey hard head, an dey do mo plenny bad kine stuff den dea ancesta guys wen do.