Jeremiah 17:8 - Hawaii Pidgin Bible

⁸ Dey goin be jalike da trees dat somebody plant nea da watta. Dea roots go to wea da watta go. Dat kine tree, no stay sked wen da hot time come. Da leaf stay green erytime. Even da years wen no mo rain, da tree no need worry. Dat kine tree erytime goin get fruits.”

Jeremiah 17:8 交叉參考

Songs 1:3

Dat kine peopo, dey jalike da trees Dat peopo plant nea da watta ditch, An ery year da tree give fruits Da right time An da leafs no come all dry an fall down. Eryting dose peopo do, Come out good fo dem.

Isaiah 58:11

Da One In Charge goin show you guys Wea fo go all da time. He goin take kea wateva you guys need, No matta da sun stay hot an burn up da land. He goin make you guys stay strong An feel good. You goin be jalike one garden dat get plenny watta, Jalike one watta puka wea da watta no pau come out.

Ezekiel 47:12

All kine fruit trees goin grow on top two sides a da riva. Dea leafs no goin come dry, an erytime goin get good fruit. Ery month dey goin get fruit, cuz da watta from da Place Dat Stay Spesho Fo Me goin flow inside um. Dea fruit goin come food fo eat, an dea leafs goin come medicine.”

Job 8:16

Da peopo dat no tink bout God, Dey jalike one plant dat get plenny watta wen da sun shine. Az jalike da new branches dat come out all ova da garden.

Job 29:19

I goin be jalike one tree. My roots goin stay spread out an reach da watta. An da dew goin stay all nite on top my branches.

Smart Guys 11:28

Da peopo dat tink dey no need worry Cuz dey get plenny stuff awready, Dey goin wipe out one time. But da peopo dat do da right ting erytime, Eryting goin come out good fo dem, Jalike da tree dat get plenny leaf.

Isaiah 61:3

Da One In Charge sen me fo help da peopo Mount Zion side Dat stay sad inside. He tell me fo give dem One nice haku lei fo put on top dea head, An take away da ashes. An make dem stay feel good inside wit perfume Fo dem no stay sad inside no moa. He sen me fo give um one nice robe fo wear Dat make erybody like tell, “Da One In Charge, da greates!” So dea spirit no feel jalike dey lose fight no moa. Dey goin show dat Da One In Charge make dem get um right wit him, Jalike dey strong oak trees dat Da One In Charge wen plant Fo show how awesome he stay.

Jeremiah 39:18

Fo shua, I goin get you outa dea. You no goin mahke from da war. Da prize you goin get from da war, goin be dis—you goin stay alive cuz you trus me!’ Az wat Da One In Charge tell.”

Ezekiel 31:3

You know bout Assyria, aah? Befo time, jalike dey was one cedar tree Lebanon side. Get nice looking branches Dat make shade ova all da odda fores trees. Da Assyria tree real tall, mo high den da odda trees Dat grow togedda wit um.