Jeremiah 17:23 - Hawaii Pidgin Bible

²³ But yoa ancesta guys neva lissen fo real kine. Dey ony come hard head. Wen I tell um fo do stuff da right way, dey ony make deaf ear.’

Jeremiah 17:23 交叉參考

Smart Guys 29:1

Da kine guy dat make deaf ear Cuz peopo tell um ova an ova He do wrong an he betta stop, Fo real Da One In Charge goin bring down dat guy one time. Cuz no way da guy can come good bumbye.

Jeremiah 19:15

“Da One In Charge tell dis. He da God Ova All Da Armies, an da God fo da Israel peopo. He tell: Lissen up! Inside dis big town an da small towns aroun um, I goin make happen all da real bad kine stuff I wen tell dem dat I goin do befo I do um. Cuz dey hard head, an dey no like lissen wat I tell.”

Jeremiah 11:10

Dey stay make jalike befo time an do wass wrong. Dey do same kine ting dea ancesta guys wen do. Dea ancesta guys neva like lissen wat I tell. An now, dese guys stay tight wit odda gods an work fo dem. Da Israel an Judah ohanas wen broke da deal I wen make wit dea ancesta guys.

Jesus Guys 7:51

Den Stephen tell, “You guys real hard head! You no like go all out fo God! You no like lissen him! You make jalike yoa ancesta guys! You erytime like beef da Good An Spesho Spirit!

Zefaniah 3:7

Me, Da One In Charge, I tell da Jerusalem peopo, ‘Fo shua you guys goin get choke respeck fo me now, An lissen wen I teach you how fo do da right kine stuff.’ If dey do dat, den I no need wipe out da place wea dey live, An I no need punish dem all da ways I wen tink bout. But still yet, dey stay amping out Fo do all kine pilau kine stuff.”

Ezekiel 20:21

“You know awready, dat whoeva lissen wat I teach, dey goin get da real kine life wen dey do um. But even da kids go agains me. Dey no follow da rules I wen make. Dey no live da way I wen tell you guys fo live. Dey no follow wat you tell um bout wass right an wass wrong. An da kids make da days dat stay spesho fo me come pilau. Az why I wen tell dat I goin show how mad I stay agains dem. Cuz a eryting dey do, dat time I stay ready fo wipe um out ova dea inside da boonies.

Jeremiah 32:33

Dey turn dea back to me an make jalike dey no give a rip, no matta I wen teach dem ova an ova. Wen I teach dem stuff, dey no lissen fo change wat dey do.

Isaiah 48:4

Cuz I know you guys get hard head. Yoa neck jalike iron An yoa forehead jalike bronze metal.

Ezekiel 20:16

Az cuz da Israel ohana guys bag from wat I tell um bout wass right an wass wrong, an dey no live da way I tell um dey gotta live. Dey make all my Res Days an all da odda days dat stay spesho fo me come real pilau cuz dey like stay tight wit dea idol kine gods.

Ezekiel 20:13

But da Israel ohana wen go agains me inside da boonies. Dey no live da way I tell um dey gotta live, an dey bag from wat I tell um bout wass right an wass wrong. Cuz whoeva lissen my rules, dey goin stay alive if dey do um. An da Israel ohana guys make all my Res Days come real pilau. So I wen tell dat I goin stay huhu wit dem an wipe um out ova dea inside da boonies.

Jeremiah 35:15

Plenny times, I tell all my worka guys dat talk fo me fo go by you guys. Dey tell you: All you guys, one by one, no do da bad kine stuff you guys stay do no moa. You gotta start fo do wass right. No follow da odda gods an work fo dem. Den fo shua you guys can come back fo live on top da land I wen give you guys an yoa ancesta guys. But you guys still no use yoa ears fo lissen me.

Jeremiah 7:28

Az why you gotta tell um, ‘You Judah guys, da peopo dat no lissen yoa God, Da One In Charge. You guys no like learn notting wen he punish you fo make you go da right way. Fo you guys, no mo nobody tell da trut. You no even talk bout wass true!

Jeremiah 6:8

You Jerusalem peopo betta lissen up right now! O I goin had it wit you guys. An I goin wipe you guys out Fo no mo nobody live inside yoa land.”

Smart Guys 8:10

Learn from me wat stay right, Dass mo betta den get plenny silva. Learn plenny good stuff! Dass mo betta den get da bestes kine gold.

Smart Guys 5:12

An den you goin tell: “Bummahs! I no like How peopo wen try teach me Fo do da right ting! How dey tell me az wrong, Erytime I go do someting bad. But inside, I tink, ‘I no goin change!’

Smart Guys 1:5

Da smart peopo dat know awready wat fo do, Dey goin lissen up mo an moa, An erytime dey goin undastan even mo betta. Da peopo dat lissen good, Dey goin find out wat dey gotta do.

Smart Guys 1:3

Dis book goin help you undastan wass right, So den you goin do da right ting erytime, An know how fo figga out wass good an wass bad An make same kine to erybody.

Songs 50:17

Cuz weneva I tell you wat you gotta do, You come all piss off. You throw out eryting I tell.

Local Leadas 6:10

I tell you guys, ‘I yoa God, Da One In Charge. No go down in front da gods fo da Amor peopo, no matta you guys live inside dea land.’ But you guys neva lissen me.”

Jeremiah 5:3

Jeremiah tell, “Eh! Da One In Charge, fo shua you look Fo peopo you can trus, aah?! But dese Jerusalem guys, even wen you wack um, Still yet, dey neva feel bad cuz a dat. You wen smash um, But no way dey goin learn fo do wass right. Dey hard head, jalike one rock. Az why dey no like change dea mind An come sorry fo da bad kine stuff dey wen do.