Isaiah 8:4 - Hawaii Pidgin Bible

⁴ Az cuz befo dis small boy learn how fo tell ‘Daddy’ o ‘Mama,’ da Assyria army guys goin steal all da rich kine stuffs inside Damascus town an Samaria town. Dey goin bring um to da king fo Assyria.”

Isaiah 8:4 交叉參考

Rome 9:11

But you know, befo Rebecca born her twin boys, an no matta her twin boys neva do notting good o bad yet, God tell Rebecca, “Da boy dat goin born firs, he da one dat goin work fo da boy dat born afta.” He tell her dis fo show dat wen God pick somebody, he pick um cuz he know wat he goin do wit dat guy. God wen tell um fo be his guy. He no need wait fo find out how dat guy goin ack cuz God know awready how he goin ack.

Jonah 4:11

“So now, tink bout me. I no like see notting bad happen to da Nineveh peopo! Get mo den hundred twenny tousan peopo ova dea inside Nineveh, you know, an all dea animals. An da peopo dea jalike small kids dat donno notting bout wass right an wass wrong, jalike dey donno wass dea right hand an wass dea lef hand!”

2 Kings 17:3

Shalmaneser, da Assyria king dat time, wen come wit his army guys fo attack Hoshea. Az how Hoshea come one small kine king unda Shalmaneser, an ery year, Hoshea gotta pay Shalmaneser plenny.

2 Kings 16:9

Da Assyria king tell Ahaz, “Shoots!” Den he go attack Damascus town an take um ova. He kill King Rezin an make all da peopo move house Kir side cuz dey his prisonas.

2 Kings 15:29

Wen Pekah stay king Israel side, da Assyria king Tiglat-Pileser come back attack one mo time. He take ova five town: Ijon, Abel Bet-Maakah, Janoah, Kedesh, an Hazor. He take da Gilead an Galilee lands too, an all da Naftali land, an make da peopo dea give up dea land an go Assyria side.

Rules Secon Time 1:39

“An Da One In Charge tell da peopo, ‘You guys even tell dat odda guys goin make yoa litto kids prisonas, no matta dose kids still yet donno wass good an wass bad. But dose kids, dey da ones goin go inside da land. I goin give um to dem, an dat goin come dea property.

Isaiah 17:3

Inside da Efraim land, No goin get towns dat get strong wall no moa. Inside da Damascus land, No goin get kings no moa. Da Aram kings from Damascus, An da Israel kings from Efraim, Dey was awesome befo time. But bumbye, da ones dat still stay alive From da Aram peopo an da Israel peopo, Dey no goin be awesome no moa. Az how goin be, Da One In Charge, Da God Ova All Da Armies tell.

Isaiah 8:5

One mo time Da One In Charge talk to me fo tell dis:

Isaiah 17:1

Me, Isaiah, I get heavy kine stuff fo tell bout wat I see goin happen to da Damascus peopo: Look! Damascus no goin be one big town no moa. Da whole place goin come one pile a bus up junks.

Amos 1:3

You betta lissen! Dis wat Da One In Charge tell: “Ova an ova, da Damascus peopo wen go agains me. Az why no way I goin let um go an no punish dem! Da buggahs wen trash da Gilead peopo, Jalike dey wen go drag one heavy board wit plenny spikes ova dea bodies.

Isaiah 28:4

Dat town, da army guys goin take um ova An rip off eryting, No matta da place stay look Jalike one nice looking flowa, On top a da Samaria hill, An stay jalike one real nice haku lei Dat stay come all dry up, Ova one valley wea eryting grow good! Dat town, goin be jalike one fruit dat come ripe early An somebody see um, An right den an dea, Dey grab um an eat um.

Amos 1:5

I goin broke down da gate fo Damascus town An wipe out da main guy fo Aven Valley, Da guy dat stay in charge Bet-Eden side. Da Aram peopo, I goin catch dem An take all dem Kir side.” Dass wat Da One In Charge tell!