Isaiah 4:1 - Hawaii Pidgin Bible

¹ Dat time, afta plenny guys mahke in da war time, Seven wahines goin grab one a da guys dat still stay dea. Dey goin tell um, “Ony marry us Fo us get yoa name, Fo peopo no talk bad bout us An make us come shame cuz we no mo husban. We goin eat da food us get awready, An wea da clotheses us get awready.”

Isaiah 4:1 交叉參考

Start 30:23

Rachel come hapai an born one boy. She tell, “God take away my shame awready, from all da time I no can born kids.”

Isaiah 2:17

Anybody stay get real high nose, Dey goin come notting. Anybody ack real high makamaka, Dey goin come shame. Dat time, Da One In Charge da ony One Da peopo goin talk good bout.

Isaiah 13:12

I goin leave ony litto bit peopo alive, Jalike get ony litto bit bestes kine gold dat come from Ofir.

Luke 21:22

Cuz da time stay dat dey gotta suffa plenny, jalike da Bible tell.

Luke 1:25

She tell, “Da One In Charge wen do dis fo me. He wen show me he goin do someting good fo me, an he goin take away my shame wit da peopo!”

2 Tessalonika 3:12

Da kine guys dat stay make lidat, we stay tell dem an beg dem fo no make lidat, cuz we Jesus Christ guys, an him Da One In Charge. “No be lazy, get one job! Use da money you get fo buy da food you need!”

Isaiah 17:7

Dass da time erybody goin start fo tink Bout da God dat wen make dem. Dey goin start fo look At da One Dat Stay Spesho fo da Israel peopo.

Isaiah 10:20

Dat time goin come, An some a da Israel peopo dat still stay alive Da ones from da Jacob ohana dat get away, Dey no goin trus da Assyria king no moa, Da one dat wen wack um. But dey goin trus Da One In Charge fo real kine, Da One dat stay good an spesho fo da Israel peopo.

1 Samuel 1:6

But Peninnah—Eh! She no mo respeck fo Hannah. She make any kine to Hannah, an make Hannah come plenny sore inside, jus cuz Da One In Charge no let Hannah come hapai.

Isaiah 2:11

Anybody dat get real high nose, Dey goin come shame. Anybody ack real high makamaka, Dey goin come notting. Dat time, Da One In Charge da ony One Da peopo goin talk good bout.

Isaiah 3:6

“One guy goin grab one a his braddahs From inside dea faddah house An tell, ‘Come on, you get one robe, So you be oua leada, You take kea all dis trouble!’

Isaiah 54:4

“Eh my peopo! No sked, cuz you no goin come shame no moa. Cuz nobody goin make you come shame. Jalike da wahine dat no mo her kids, But now she get um, She foget her was shame Befo time wen her was young. Jalike she goin foget How bad peopo wen make her feel Wen her no mo husban.

Jeremiah 15:8

I goin make dem get mo plenny widows Den da ocean get sand. Noon time, I goin bring somebody Fo wipe out da young guys. Right den an dea I goin make dea muddahs Come sore inside an stay real sked.

2 Samuel 6:23

An Michal, Saul girl, she no mo kids all da time she stay alive.