Isaiah 2:3 - Hawaii Pidgin Bible

³ Den plenny peopos goin go dea an tell, “Come on. We go up da hill wea da Temple stay, Da Temple Fo Da One In Charge, da God Jacob pray to. He goin teach us guys wat he like us fo do, An we goin do um.” Wat Da One In Charge teach goin come from him, From Zion Hill inside Jerusalem town.

Isaiah 2:3 交叉參考

Luke 24:47

Afta dat, his guys goin teach all da diffren peopos inside da whole world bout da Christ Guy, da Spesho Guy God Wen Sen. Dey goin tell da peopos dey gotta come sorry fo all da bad kine stuff dey stay do, an no do um no moa. So den, God goin let go da peopos an hemo dea shame fo all da bad kine stuff dey wen do. His guys goin go teach lidat cuz dey his guys an dey get his powa, an dey goin start Jerusalem side.’

Songs 110:2

Da One In Charge stay On top Mount Zion, Jerusalem side, An he goin make you strong Fo be da king ova mo an mo peopo. No matta get peopo all aroun you Dat stay agains you, You da one goin be in charge.

John 7:17

If anybody like do wat God like um fo do, dey goin know if da stuff I stay teach come from God, o if ony come from my head.

Rules Secon Time 6:1

Moses tell dis too: “Dis wat oua God, Da One In Charge, wen tell me fo teach you guys—all da stuff you gotta do, an da rules bout wass right an wass wrong. Dass wat you guys gotta do inside da land wea you goin go fo take um ova, da odda side a da Jordan Riva.

Jeremiah 31:6

Goin come one time Wen da security guard guys On top da hills Efraim side Goin yell lidis: ‘Go come! fo us go Mount Zion Fo talk to oua God, dass Da One In Charge a us, Jerusalem side.’ ”

Rome 10:18

Wat you tink? You guys tink da Israel peopo neva hear notting, o wat? Fo shua dey wen hear someting! Jalike da Bible tell befo time: “All ova da world, get peopo dat wen hear da Good Kine Stuff. Da tings dey tell, go all ova da world fo peopo hear.”

Luke 11:28

But Jesus tell, “Da peopo dat hear wat God tell um fo do, an do um, dey da ones dat stay real good inside!”

Matthew 7:24

“So you know, whoeva hear wat I tell um fo do, an go do um, he jalike one smart guy dat make one plan, den he build his house on top solid rock.

James 1:25

But eryting God tell his peopo dey gotta do, dass perfeck, cuz dass wat can hemo you from all da bad kine stuff. So den, if you go check out real good da Rules from God, an no foget wat you wen hear, an stay do um, eh! you goin feel real good inside cuz you stay do um.

Jesus Guys 10:33

So right den an dea, I send dem fo bring you by me. An you get one good heart fo come my house. Now we all stay hea in front God, an we like hear all da stuff God tell you fo tell us.”

Jesus Guys 1:8

But you guys goin get spesho kine powa wen da Good An Spesho Spirit take charge a you. An den you guys goin tell da peopo in Jerusalem wat you know bout me, an same ting fo da peopo all ova Judea, Samaria, an all ova da world.”

John 4:22

You guys from Samaria go down in front somebody an pray, but you guys donno who him. Us Jew guys, we go down in front God an pray, an we know wat kine God him. Cuz God show us Jew guys da ony way fo get outa da bad kine stuff we stay do.

Rules Secon Time 33:19

Dey goin call peopo from da odda ohanas Fo come by dea mountain Fo make da good an right kine sacrifices ova dea. Dey goin eat plenny stuff from da ocean, An da rich kine stuff dat stay hide inside da sand.”

Songs 48:1

Da One In Charge, he da greates! Real good fo erybody Tell he da greates Ova dea inside God town, On top da hill dat stay spesho fo him!

Songs 119:171

Help me fo tell how awesome you stay, Cuz you teach me da tings I gotta do.

Songs 122:1

My frenz wen tell me, “Eh, we go da Temple Fo Da One In Charge!” Dat make me stay good inside.

Isaiah 28:9

Dey stay talk lidis: “Eh! Dis Isaiah guy, who he tink him?! He try fo teach us stuff, An make us guys undastan! How come he stay make to us Jalike us bebes dat jus pau drink milk From dea muddah breas?!

Isaiah 56:5

Fo dose guys dat no can make kids But stay tight wit me, I goin give dem someting Mo betta den get boys an girls. I goin make dem come jalike az my ohana, An give dem one spesho place inside my house. Peopo no goin foget dea name foeva, An nobody goin foget dea name eva.

Isaiah 56:7

Dey da peopo I goin bring Jerusalem side, To da mountain dat stay spesho fo me. I goin make dem feel real good inside Wen dey come inside my house fo pray. Wen dey make burn up kine sacrifice on top my altar, An odda kine sacrifices dey make dea, Dat goin make me feel real good. Cuz peopo goin call my house ‘Da house wea all diffren peopos go fo pray.’ ”

Isaiah 60:3

Da peopos from plenny countries Goin come by you guys fo see da light you get. King guys goin come fo see da light too, Cuz stay bright, Jalike da sun come up fo you.

Isaiah 65:11

“But you guys, you go way from me, Da One In Charge! You foget fo pray On top da mountain dat stay spesho fo me! You guys put up one table fo da Good Luck god, An you pour wine wit spice In front Da God Fo Wateva Goin Happen Bumbye!

Isaiah 66:20

Da peopo I sen, goin bring all yoa braddah guys from all da countries to Jerusalem, da mountain dat stay spesho fo me. Wen all dem come, dat goin be jalike one wheat sacrifice fo tell me, ‘Eh! You Da One In Charge, mahalo plenny!’ Dey goin come on top horses, in war wagons an wagons wit cloth on top, an on top mules an camels.” Az wat Da One In Charge tell. “Dey goin bring dem jalike da Israel peopo bring dea wheat in clean baskets fo make sacrifice inside da Temple Fo Da One In Charge.

Jeremiah 26:18

“Wen Hezekiah stay da Judah king, Micah from Moreshet wen talk fo God. He tell all da Judah peopo, ‘Dis wat Da One In Charge, da God Ova All Da Armies, tell: “Zion Hill wea da Temple stay goin come jalike one field somebody wen plow. Jerusalem town goin come jalike one big rubbish pile! Da hill fo da Temple goin come one hill wit plenny trees all ova.” ’

Ezekiel 40:2

God make me see someting jalike one dream. He take me from da Babylon land to da Israel land, an put me down on top one big mountain. From da top, da south side a da mountain get some buildings dat look jalike one big town.

Hosea 3:5

An bumbye da Israel peopo goin come back an try fo know dea God, Da One In Charge, an dea king dat come from King David blood line. Dey goin shake cuz dey sked, an get choke plenny respeck fo me, Da One In Charge. An dat time I goin do plenny good kine stuff fo dem.

Hosea 6:3

Good we know Da One In Charge. Good we go all out fo know um. Jalike us guys stay shua da sun goin come up, We stay shua Da One In Charge goin show up— Jalike da rain dat come winta time, An jalike da rain give watta on top da earth spring time.”

Micah 4:2

Peopo from diffren nations Goin come dea an tell, “Go come! Us go up Da mountain a Da One In Charge, Wea his Temple stay. He da God Jacob wen pray to. He goin show us guys da way he like fo us live, Fo us do wat he tell us fo do, His Rules goin come out from Mount Zion. Wat he tell goin go out from Jerusalem.”

Esther 9:27

Da Jews start da custom fo dem an dea kids an da ones dat come from dem, an all da odda peopos dat come Jews bumbye. From dat time, ery year dey goin make shua dey make one big party dose two days, jalike Mordecai wen write to dem.

Songs 102:23

But me, I not makule yet, An still yet God Wen make me come litto mo mahke, An give me ony short time fo live!

Isaiah 1:26

Den I goin bring good kine judge guys fo you guys, jalike befo time. An akamai kine peopo dat can tell you guys wat fo do, Jalike you guys wen get da firs time. Afta dat, peopo goin call you guys ‘Da big town wea erybody do da right ting,’ An ‘Da town wea you can trus da peopo.’ ”

Isaiah 11:10

Dat time, dis wat goin happen: Goin get one new king stay come. He goin get King David blood, jalike David faddah ohana da root fo him, an him da new branch. Dat king, goin be dea jalike one flag, so all da diffren peopos goin know he dea, fo all da diffren peopos know fo go by him. Peopo inside all da countries goin aks him wat fo do. An da place he goin live goin be awesome.

Isaiah 19:23

Dat time, goin get one big road go from Egypt to Assyria. Da Assyria peopo goin go Egypt side, an da Egypt peopo goin go Assyria side. An dey goin work togedda fo Da One In Charge.

Isaiah 44:5

One guy goin tell, ‘Da One In Charge own me.’ Anodda guy goin tell he one Jacob ohana guy. Anodda guy goin write on top his hand, ‘Da One In Charge own me.’ An tell ‘Call me Da Israel Guy.’ ”

Jeremiah 12:16

Dey goin learn fo real kine how my peopo suppose to ack. So den wen dey make one strong promise, dey goin tell lidis, ‘Jalike fo shua Da One In Charge stay alive.’ (Az not like befo time, wen da odda peopos wen teach my peopo fo use Baal name wen dey make one promise.) But if dey learn eryting bout me, Da One In Charge, den I goin let dem get da same rights my peopo get.