Isaiah 1:7 - Hawaii Pidgin Bible

⁷ You guys land, nobody can live dea. Yoa big towns stay all burn up. You see da odda peopo take away All yoa food from yoa fields an eat um. An peopo from odda places take um ova.

Isaiah 1:7 交叉參考

Sad Song 5:2

Oua property wen pass to peopo us guys donno. Peopo from anodda place get oua houses.

Rules Secon Time 28:43

“Da peopo from anodda place dat live wit you guys goin come da bosses ova you guys mo an moa, an you guys goin come not importan mo an moa.

Rules Secon Time 28:33

One peopo dat you donno goin eat da food from yoa land dat you wen work hard fo grow. You guys no goin get notting fo keep, you ony goin get hard time erytime.

Hosea 7:9

Da peopo from anodda place take away dea powa. But da Efraim peopo tink notting wen happen to dem. Az jalike da Efraim peopo hair come all gray, But dey donno dey stay weak.

Ezekiel 30:12

I goin make da Nile channels come dry groun. I goin sell da Egypt land fo da bad kine guys take um ova. I goin wase da land an eryting inside um. I goin use guys from odda countries fo do all dat. Az me Da One In Charge tell dis.

2 Records 28:5

Az why his God, Da One In Charge, give him an his guys to da Aram king. Da Aram guys win ova Ahaz army. Dey grab plenny Judah peopo an make dem come prisonas, an take dem Damascus side. An da Israel king grab Ahaz an his guys too, an kill plenny a dem.

Hosea 8:7

“Az jalike da Israel guys plant da wind, An harves da whirlwind! Da wheat stalk no mo wheat berry, An no can make flour. An if some wheat plant get wheat berries, Fo shua, goin get guys from anodda place goin eat um!

Jeremiah 6:8

You Jerusalem peopo betta lissen up right now! O I goin had it wit you guys. An I goin wipe you guys out Fo no mo nobody live inside yoa land.”

Jeremiah 2:15

Da ones dat stay agains da Israel peopo, Dey make big noise wen dey go afta dem, Jalike da lion make noise wen he start fo hunt. Da ones dat stay agains da Israel peopo wase da land. Dey make dea towns come one junk pile, An no mo nobody live dea no moa.

Isaiah 34:9

Da watta inside streams Edom side Goin come jalike tar. Da dirt ova dea goin come jalike sulfur. Da whole land goin come jalike burning tar.

Isaiah 9:5

Fo shua, all da boots da army guys wear wen dey fight, An all da clotheses dat get blood all ova um, Dey goin throw all dat kine stuff on top da fire Fo burn um up.

Isaiah 6:11

Den I aks him, “Boss, how long I gotta do dat?” An he tell, “Till all da towns stay all bus up An no mo peopo live dea, An all da house no mo peopo inside, An all da land stay dry an all wipe out.

Isaiah 5:17

Dat time, da sheeps goin eat grass Inside dea grass land. Dey goin stay on top da land an eat plenny, An da bebe sheeps goin eat Wea da rich peopo wen live befo time, But now, ony get bus up house all ova.

Isaiah 5:9

Da One In Charge, Da God Ova All Da Armies, He talk fo me hear um: ‘Fo shua, goin get plenny big house ova dea, But goin be kinda skery, Cuz no mo nobody inside um. Get nice big kine house But no mo peopo live inside dem.

Songs 107:39

But den, da peopo come litto bit. Dey no stay importan no moa, Cuz dey get hard time. Odda peopos presha dem. An do bad kine tings to dem, An da peopo stay sad inside.

Songs 107:34

God make da kine land dat grow plenny fruits Come all mud, Cuz da peopo dat live dea do bad kine stuff.

Prieses 26:34

Den da land goin stay good, cuz goin res jalike inside da Res Years. Goin res all da time stay good fo notting, all da time you guys stay inside da land a da guys dat stay agains you guys. Dass da time da land goin res, an goin stay good inside cuz now get da Res Years.

Prieses 26:33

I goin make you guys go all ova da place wea all kine peopos stay. I goin take out my sword an go afta you guys. You guys land goin come good fo notting, an yoa towns, goin come all bus up.

Rules Secon Time 29:23

Da whole land goin stay jalike was burn up from salt an sulfur. Nobody goin plant notting dea. No can make notting grow dea. No mo notting green come up. Goin be jalike wen Sodom an Gomorrah towns wen come wipe out, an wen Da One In Charge bus up Admah an Zeboiim towns cuz he real mad wit dem.

Songs 109:11

Make da peopo dat da guy owe money to, Go an grab eryting from him. Make peopo dat he donno Rip off eryting he wen bus ass fo get.

Isaiah 1:8

My big town dea Jalike one shack in da middo a one grape field, An jalike fo guard one cucumba field, Jalike one big town wit army guys all aroun, Get ready fo bus up da town.

Isaiah 3:8

You know, da peopo inside Jerusalem, Jalike dey no can walk strait. Da peopo inside Judah, Jalike dey stay fall down too. Cuz wit wat dey tell, An wit wat dey do, Dey talk bad bout Da One In Charge An go agains him. Dey tink he no good, no matta he awesome.

Isaiah 9:18

Cuz wen somebody do bad kine stuff, Az jalike wen get one big fire. All da thorns an da grass burn, An all da trees burn too, Wit plenny black smoke dat go up in da sky.

Isaiah 49:19

No matta no mo notting Jerusalem side, An da town stay all bus up, An yoa land all jam up yet, I stay shua, da town goin be too small Fo all da peopo live dea. An all da guys dat wen make you guys dea slave, Dey goin go way one far place.

Isaiah 60:15

“Befo time, peopo wen go way from you guys, An hate you guys, An nobody go pass thru yoa land. But now, I goin make you guys come Da ones dat erybody tell, ‘You da greates!’ An dey goin feel good inside Bout you guys all da time.

Isaiah 62:8

Da One In Charge make dis promise Cuz he get da powa fo make um happen: “No mo I goin eva let Da peopo dat stay agains you Take away yoa wheat an barley. I no goin eva let Da peopo from anodda place Drink da new wine You guys wen bus ass fo make.

Isaiah 64:10

Da towns dat stay spesho fo you, Now no mo notting dea. Even on top Mount Zion, no mo notting! Yoa main town, Jerusalem, Stay all bus up!

Jeremiah 4:7

“Get one guy, Jalike he one lion dat come outa da place he hide. His army guys goin wipe out plenny peopos. Dey wen go way from dea place Fo come wase yoa land An make erybody come bum out. Yoa towns goin come all bus up Cuz no mo nobody goin stay ova dea.

Jeremiah 7:34

Inside da Judah towns an da Jerusalem streets, no mo noise goin come from dea, from peopo dat stay good inside, da ones dat get good fun. No goin get wedding party kine noise cuz da whole land goin come all wipe out.”

Jeremiah 44:6

Az why I come real huhu agains da peopo inside da Judah towns an on top da Jerusalem streets. Cuz I wen get mad, da towns stay all bus up an no mo peopo dea now.’

Ezekiel 25:4

Az why dis wat me Da One In Charge goin do: I goin let da peopo from da east side take ova you guys. Dey goin move dea army camps wea you guys live an put up dea tents by you guys. Dey goin eat up yoa fruit an drink up yoa milk.

Micah 5:11

I goin wipe out big towns inside yoa land, An broke down all yoa strong wall.

Micah 6:13

Dass why me Da One In Charge Stay start awready fo wipe out you guys, An wack you guys so hard I make you come sick. I mess you up cuz a all da bad kine stuff you guys do.