Hosea 14:2 - Hawaii Pidgin Bible

² Come back by Da One In Charge, An tell him you sorry. Tell um: ‘Try hemo da shame fo all da bad tings us guys wen do, An let us guys go! Lissen wen we pray Fo tell you we sorry. Den we goin talk good bout you, Jalike wat we tell now, az one sacrifice Dass mo betta den da bulls we kill.

Hosea 14:2 交叉參考

Hebrews 13:15

Us guys, oua ancesta guys wen make sacrifice fo show dey like tell plenny good tings bout God. Az why same ting, us guys goin tell erybody dat us God guys cuz we know who him! Dass why us guys can tell plenny good tings all da time bout how God stay. An we can do all dat cuz a Jesus.

Job 7:21

How come you no hemo da shame I get cuz I do bad kine stuff?! An let me go from da wrong tings I wen do?! Cuz pretty soon I goin be inside da dirt! Wen you look fo me, I no goin stay no moa!”

1 John 3:5

You guys know dat Christ wen come fo throw out da bad kine stuff we wen do. Christ, he no do bad kine stuff, eva!

1 Peter 2:5

Eh, you guys, come tight wit Christ fo God use you guys too, jalike you guys da stones fo make one place fo God Spirit. An you guys stay alive fo real kine too, jalike Christ. All you guys goin be jalike pries guys dat stay spesho fo God. Jalike you guys goin give sacrifices to God, da kine sacrifices God like, cuz Jesus Christ wen mahke fo all you guys.

2 Timoty 1:9

Eh! God wen take us outa da bad kine stuff we do. He wen pick us fo go all out fo him. He neva do dat cuz a wat us guys wen do, But he wen do dat cuz he wen make one plan fo do dat, An he like do good tings fo us guys. He wen do all dat fo us befo da world wen start, Cuz he know us goin stay tight Wit his Spesho Guy Jesus Christ.

Luke 18:13

But da guy dat colleck tax money wen stan up far away. He no even like look up to da sky, but he beat on his ches an tell, ‘God, I one guy dat wen do bad kine stuff. Give me chance!’ ”

Joel 2:17

Let da pries guys dat work in front Da One In Charge Cry wen dey go from da temple lanai to da altar. Let dem tell, “Da One In Charge, try show pity fo yoa peopo. No let da odda peopos talk bad bout yoa property! No good da odda peopos tell each odda, ‘Wea dea God stay?’ ”

2 Samuel 24:10

Laytas, David feel bad afta he wen count da guys dat can fight.

2 Samuel 12:13

David tell Nathan, “Was real bad, dis ting I wen do agains Da One In Charge!” Nathan tell, “An Da One In Charge, he let you go awready fo da bad ting you wen do. You no goin mahke from dis.

1 Peter 2:9

But you guys da one God wen pick. You da pries guys fo da King. You guys da peopo dat stay spesho fo God. God tell, “Dey mines!” bout you guys, fo you guys tell erybody all da good stuff God wen do. He tell you guys fo come outa da bad kine stuff an stick wit da good kine stuff he like us fo do. Jalike you wen go outa da dark an come inside da awesome light.

Hebrews 10:4

Cuz da blood from da cows an da goats no mo powa fo hemo da shame fo all da bad kine stuff peopo do!

Rome 11:27

An I goin hemo dea shame fo da bad kine stuff dey wen do. I goin make one spesho deal wit dem”

John 1:29

Da nex day John spock Jesus stay coming by him, an he tell, “Eh, you guys, try look da guy ova dea! You know wat? He jalike God bebe sheep fo da sacrifice. He hemo da shame fo da bad kine stuff dat erybody inside da whole world stay do!

Luke 11:13

Eh, even if you guys bad peopo, you know how fo give good kine stuff to yoa kids. Fo shua den, yoa Faddah inside da sky, he erytime good, an he goin give his Good An Spesho Spirit to you guys cuz you go aks him fo um.”

Matthew 7:11

Eh, no matta you guys no good, still yet you know how fo give good kine stuffs to yoa kids. Fo shua den, yoa Faddah in da sky goin give good kine stuffs to da peopo dat aks him fo do someting fo dem.

Zekariah 3:4

Da angel guy tell da angel helpa guys dat stay stan in front him, “Take off his pilau kine clotheses.” Den he tell Joshua, “Look, I wen take away da blame awready fo da bad kine stuff you wen do. I goin put da bestes kine clotheses fo you wear.”

Isaiah 6:7

He touch da hot charcoal on top my mout an tell, “Now dis charcoal touch yoa mout, All da bad tings you wen do stay gone awready. God wen pay da price Fo hemo from you all dat bad kine stuff.”

1 John 1:7

But if we do good kine stuff, dass jalike us stay inside da light, jalike God stay inside da light. Den us stay tight wit each odda. You know, Jesus, God Boy, he wen bleed an mahke, an dass jalike his blood make us come clean inside from all da bad kine stuff us wen do.

Titus 2:14

He wen give his life fo mahke fo us guys, fo him cut us loose from all kine pilau stuff, an from go broke God rules, an make us clean inside. He like make us his spesho peopo, dat go all out fo do wateva stay good.

Songs 50:14

You know wat da real kine sacrifice You suppose to make Fo me, yoa God? You gotta tell me ‘Mahalo!’ Fo wat I do, An wateva promise you wen make to me, Do um. Dass da real kine sacrifice.

Songs 51:16

Fo make you stay good inside, Da sacrifices I make Not da main ting! Jus cuz I make One burn up kine sacrifice, Dat no make you feel good Bout me, you know!

Songs 51:17

Eh God, dis da kine sacrifice you like: You like me feel all bus up inside Wen I do one bad kine ting. Wen I stay bus up an sore inside Cuz I wen do someting dass no good, You no goin tell I good fo notting.

Songs 119:108

Eh! You Da One In Charge! I goin talk good bout you, Jalike dass one sacrifice Dat I like make fo you Fo make you feel good inside. Try teach me da tings you tell Cuz you da judge.

Hosea 6:6

Cuz make me feel good, Wen you guys stay tight wit me, Mo den wen you jus make sacrifice. Make me feel good, Mo den wen you jus make one burn up kine sacrifice Wen you guys know dat I God.

Jonah 2:9

But me, I like make one sacrifice fo you bumbye, An sing an tell you dat you da greates! Da ting I wen promise you dat I goin do, I goin do um! Cuz you Da One In Charge, An you da One wen get me outa trouble!”

Isaiah 44:22

You guys go agains me plenny. Wat you wen do, was jalike one black cloud. But I wen wipe all dat out! You wen do plenny bad kine stuff, An dat was jalike get cloud all ova da place. But I wen hemo da shame fo all dat! Go come back by me! Cuz I wen pay da price Fo let you guys go awready.”

Jeremiah 3:12

Go, tell dis fo da Israel peopo hear um: “Da One In Charge tell, ‘Go come back by me, you Israel peopo Dat wen tell “Laytas” to me. I no goin give you guys stink eye no moa. Cuz I like give you guys chance, I no goin stay huhu all da time.

Hosea 5:5

“Da Israel peopo get big head, Dat show dat dey get da blame. Da Efraim peopo an da odda Israel peopo, Jalike dey trip an fall down wen dey do bad kine stuff. An da Judah peopo trip an fall down wit dem.

Hosea 12:7

Da biznis guys use scales dat bulai. Dey like scam peopo real bad an hurt um.