Hosea 11:6 - Hawaii Pidgin Bible

⁶ Cuz a dat, da peopo dat stay agains dem goin use swords Fo attack da Israel towns Dey goin bus up da bars on top da Israel town gates. Da Israel peopo goin make plans, But dey no can do notting!

Hosea 11:6 交叉參考

Hosea 13:16

Da Samaria peopo gotta get punish, Cuz dey wen go fight me dea God. Dey goin get kill wit swords. Odda peopos goin throw da Samaria small kids down Fo dem mahke on top da groun, An dose odda peopos, dey goin rip open da hapai wahines.”

Hosea 10:14

Yoa peopo goin hear da loud noise from da war, An yoa towns wit strong wall goin come wipe out. Jalike wen Shalman wen wipe out Bet-Arbel, da time dey wen fight, Wen dey throw da muddahs an dea kids down on top da groun fo kill um.

Hosea 10:6

Dey goin take da idol Assyria side Fo make one present fo da importan king ova dea. Da Efraim peopo goin lose face. An all da odda Israel peopo goin come shame too Cuz dey wen trus da idol dey wen make from wood.

Malakai 4:1

Dis wat Da One In Charge, Da God Ova All Da Armies tell: “You know wat I goin do? Fo all da peopo dat ack jalike dey mo betta den erybody, An fo all da peopo dat stay do bad kine stuff— Da time goin come, wen dose peopo goin come Jalike da lef ova junk kine stuff from da wheat Dat peopo burn up inside one hot burning oven! No goin get notting lef, Not even da roots, not even da branches!

Micah 5:11

I goin wipe out big towns inside yoa land, An broke down all yoa strong wall.

Ezekiel 20:47

Tell da trees dat grow in da south side: ‘Lissen wat Da One In Charge, da Boss, tell: You know wat?! I almos ready fo start one fire on you dass goin burn you all up, green trees an dry trees same same. An da fire no goin pio, an ery tree from da north side to da south side goin burn down.

Jeremiah 5:17

Dey goin eat up all da food you guys harves, An all da odda food you get. Dey goin kill all yoa kids. Dey goin eat all yoa cows, sheeps, an goats. Dey goin eat all yoa grapes an figs. No matta you guys trus da big towns dat get strong wall fo proteck you, Dey still goin wipe out all da peopo inside da towns wit dea swords.”

Isaiah 30:1

Dis, one message from Da One In Charge: “Bummahs! to da hard head peopo Dat stay go agains me! Dey make one plan an do um, But da plan, not from me. Dey make one deal wit peopo from anodda country, But my Spirit neva tell dem fo do dat. Dey do one bad ting, Den anodda mo worse ting.

Isaiah 27:10

Da big town dat get strong wall Wea nobody can come inside, Nobody stay dea. Jalike da boonies, ony da cows stay dea. Da peopo, all gone awready. Get small cows stay eat grass dea. Dey eat all da stuff from da tree branches. Den dey lay down ova dea.

Isaiah 18:5

Jalike befo dey harves da food, Wen no mo flowa awready An da grape start fo come ripe litto bit, God goin cut off da small branch dat no mo grape Jalike he use da pruning shear, Den he throw um away,

Isaiah 9:14

In one day, Da One In Charge goin cut off all da diffren kine peopo, Jalike he cut off dea head an dea tail, An same time, he goin cut off da top palm tree branch up dea, An da reed plant dat grow down inside da mud.

Songs 106:43

Plenny times, God get um Outa trouble. Still yet, da Israel peopo ony like do Wat dey like fo do, An dey go agains God. Az why dey come notting, Cuz God punish dem fo wat dey wen do.

Songs 106:39

Cuz a da tings da Israel peopo wen do, Dey come pilau. Az why dey no can pray. Da way dey ack, Jalike dey hoaz.

Rules Secon Time 32:25

Outside on da street, Goin get war dat goin wipe out dea kids. An even inside dea houses, Dey goin come real sked. Same ting fo da young guys an young wahines, Da bebes an da ol guys, Dey goin mahke too.

Rules Secon Time 28:52

Dey goin put army guys all aroun da big towns inside yoa land, fo nobody go inside o come outside, till da tall strong walls aroun da towns fall down, da ones you guys wen trus fo help you. Dey goin put dea army guys aroun all da towns inside da land dat yoa God, Da One In Charge, stay give you guys.

Prieses 26:33

I goin make you guys go all ova da place wea all kine peopos stay. I goin take out my sword an go afta you guys. You guys land goin come good fo notting, an yoa towns, goin come all bus up.

Prieses 26:31

I goin make yoa towns come all bus up, an wipe out da places you make spesho fo yoa gods. I no goin feel good inside notting from da nice smell you guys make wit yoa sacrifices.

Jeremiah 50:35

Da One In Charge tell: “Goin get war Agains da peopo dat live inside Babylon, An agains dea leada guys An dea guys dat know wat fo do erytime!

Sad Song 2:9

Da town gates fall down inside da dirt. Da One In Charge smash da bars fo da gates an wipe um out. Da king an da princes come prisonas an go to odda nations, No mo nobody teach Da Rules From God. Da guys dat talk fo Da One In Charge No see notting jalike dreams from him no moa.

Hosea 4:16

Da Israel peopo, dey hard head. Jalike one young hard head girl cow. So den, how Da One In Charge goin lead da Israel peopo To one big grass field, jalike dey bebe sheeps?! No can!

Hosea 4:17

Da Efraim peopo stay fool aroun da idol kine gods. Let um stay lidat!

Amos 6:8

“Da Boss, Da One In Charge a me, he wen make one strong promise, An he no need anodda guy fo help him do um, jus him. Dis wat Da One In Charge tell: ‘Watch out! Me, I so mad wit dem Israel guys! Dey tink dea Israel ohana mo betta den anybody! Dey get strong wall, but I goin go agains um! Dea main town, an eryting inside dea, I goin give all a dat To da guys dat stay agains um.’ ” Dass wat Da One In Charge tell. An you know wat?! He da God Ova All Da Armies.

Prieses 26:25

An I goin bring army guys wit swords agains you guys. Dass how I goin pay back you guys, cuz you guys broke da deal I wen make wit you guys. Wen you guys go back inside yoa towns, I goin sen bad kine sick on top you guys. An da guys dat stay agains you guys goin take ova.