2 Samuel 22:17 - Hawaii Pidgin Bible

¹⁷ “From up dea inside da sky, Jalike Da One In Charge put down his hand An pull me up outa da deep watta. He get me outa trouble.

2 Samuel 22:17 交叉參考

Isaiah 43:2

Weneva any one a you guys go thru da watta, I goin stay wit you. Weneva you go thru da rivas, Dey no goin go ova you. Weneva any a you guys walk thru da fire, No goin hurt you, No goin burn you up.

Songs 144:7

Da peopo from anodda place Stay attack me, So put down yoa hand From up dea wea you stay, An no let dem capcha me. Get me outa trouble, Cuz dey jalike one flood Dat can wipe me out.

Songs 32:6

Cuz a dat, I like tell dis: All da peopo dat stay tight wit you, Good dey pray to you Erytime dey get trouble. Jalike wen da big flood come down, An no hit dem.

Songs 18:16

From up dea, jalike Da One In Charge put down his hand An pull me up outa da deep ocean. He get me outa trouble.

Jesus Show 17:15

Den da angel messenja guy tell me, “Da big ocean you wen see, wea da hoa get her throne, dass peopos, nations, countries, an languages.

Songs 130:1

I feel jalike I down inside da deep watta, Cuz a da trouble I stay in. An from dea, I yell fo you help me, Da One In Charge!

Outa Egypt 2:10

Laytas, da kid come big. Da muddah bring um back by da Pharaoh guy daughtah. Da Pharaoh guy daughtah hanai da kid, fo him come her boy. She give um da name Moses, cuz she tell, “I wen pull um outa da watta,” cuz in da Hebrew language, “Moses” soun kinda like “pull um out.”

Sad Song 3:54

Da watta go ova my head, An I tink my life pau awready.

2 Samuel 22:18

Da guys dat stay agains me, dey strong, Dey mo strong den me, an dey hate me to da max! But Da One In Charge get me outa dea.