2 Corint 6:18 - Hawaii Pidgin Bible

¹⁸ I goin be yoa Faddah, An you goin be my kids.” Dass wat Da One In Charge wen tell, da One Dat Get All Da Powa.

2 Corint 6:18 交叉參考

Jesus Show 21:7

Whoeva fight an win ova da bad kine stuff, dey goin get all dat stuff. I goin be dea God, an dey goin be my kids.”

John 1:12

But erybody dat come tight wit him an trus him, God give dem da right fo come his kids cuz dey know who him.

2 Samuel 7:14

I goin come jalike da faddah fo him, an he goin come jalike my boy. Weneva he jam up, I goin punish him, jalike any faddah guy punish his boy fo teach um.

Jesus Show 1:8

Da One In Charge, he tell, “I eryting, from firs to las, A to Z.” He da One dat stay now, dat stay from befo time, an dat goin stay foeva! Him da One dat get all da powa!

Rome 8:29

Befo time, he pick dose peopo awready, cuz he like make um come jalike one copy a his Boy. God Boy, dass Christ. He da main one, an da odda guys, dey jalike his younga braddahs an sistahs.

Jeremiah 31:9

Dey goin cry all da way hea, An wen I lead dem, dey goin pray plenny. I goin bring dem by da streams dat get plenny watta inside dat time, On top one easy fo go road Wea nobody goin trip an fall down. Cuz I da faddah fo da Israel peopo, An da Efraim ohana, dey jalike my numba one boy.

Galatia 3:26

All you guys God kids cuz you trus Jesus, God Spesho Guy.

Start 17:1

Laytas, wen Abram 99 year ol awready, Da One In Charge let Abram see him. He tell um, “Me, I Da God Dat Get All Da Powa. So, live da way I tell you fo live, an no do notting dat goin make shame.

Efesus 1:5

From befo time, God make plan fo eryting. He make one plan fo hanai us into his ohana, an fo Jesus Christ make all dat happen. Dass wat God like an dass wat make him stay good inside.

Isaiah 43:6

I goin tell da peopo from da north side, ‘Let my peopo come!’ An I goin tell da peopo from da south side, ‘No hold dem back!’ Bring all my boys from far places, An my girls from da mos far place inside da world.

Jeremiah 3:19

“Da One In Charge tell, ‘Me, I da One wen tell Dat fo shua I like make you guys importan, jalike you my kids. I like give you guys da good kine land dat erybody like live dea Fo stay yoas foeva. Dis place, mo nice looking den da lands da odda peopos get. I wen like fo you guys call me yoa faddah. An I no tink you guys goin dig out from me an no stay tight wit me.

Songs 22:30

Da peopo dat goin live bumbye, Dey goin work fo Da One In Charge too. Da ones not born yet, dey goin hear bout da Boss, An da peopo dat goin come from dem, same ting.

Jeremiah 31:1

Da One In Charge tell dis: “Dat time, I goin come da God fo all da peopo dat get da Israel blood line, an dey goin come my peopo.”

Jesus Show 21:22

I neva see one temple inside da town, cuz Da One In Charge, dass Da God Dat Get All Da Powa, an God Bebe Sheep Guy, dey da temple!

Start 48:3

Jacob tell Joseph, “You know, Da God Dat Get All Da Powa wen let me see him, Luz side, inside da Canaan land. He da one do someting spesho fo me.

1 Records 17:13

I goin come jalike one faddah fo him, an he goin come jalike my boy. I goin stay tight wit him all da time, not da way I wen bag from Saul, da time he was king befo you.

Rome 8:19

All da tings God wen make, jalike dey no can wait fo someting good fo happen. Dey no can wait fo see God show erybody how proud he stay bout his kids.