22 Tén axta Noemí ektáha eyátegmowágkokxo atánegken se'e: —Hoy táse', payhawók neykhe kapaxqaha aqsa m'a apkeláneykha nak, eyke nágkamhók aqsa m'a mók namyep enxoho, hakte kólya'aksek katnehek exma ekmahágko enxoho m'a mók namyep.
Ná ekxakhagwom chá'a apkelxegexma'a, tén han ma'a apyáp apkelxegexma'a nak. Ná emyekxa chá'a apepma apxagkok eyesagko enxoho ektáhakxa apha. Tásek ey'ókxak ma'a apha nak ketók apxagkok, kaxnók ma'a apepma apha nak makhawo'.
Kelán'a ektaqmalma nak neyseksa m'a kelán'ák éltaqmalma, sa' agkok kay'ásegkok xeye', kalyetlow sa' aptamnek ma'a nepkések, kalágwom sa' pa'at yát'ay apketkók eknaqtósso m'a ekpayho nak apkelpakxeneykegkaxa m'a apkeláneykha nepkések.
Keñe axta Rut ektáha makham se'e: —Apkeltamhók xeyk han ko'o alenxanmohok sektamheykha yetlo m'a apkeláneykha ekwokmoho apsawhékpo apnakxamap ma'a hótáhap apaktek.
Kelenxanakmók axta makham Rut eyáncheseykekxa hótáhap apaktek élxegexma'a m'a Booz apkeláneykha ekwokmoho apsawhékpo apnakxamap ma'a hótáhap. Hegkek axta eyke makham xamók ma'a yepyámog.
