32 Chaqhawok axta han xa ekhem nak, apkelwákxexa axta Isaac apkeláneykha, apkeltennássekxo apwet'a yegmen ma'a yámelchet apmeta.
Apkelanak axta han Isaac xama ekwatnamáxchexa aqsok ma'a, apkelpeykásawók axta Wesse' egegkok. Appakxenwokmek axta m'a yókxexma nak, keñe apkeláneykha apmetma xama yámelchet.
Keñe axta axto'ók apnaqxétekhágko, apmésa chá'a appeywa pók ekmámnaqsoho agko'. Tén axta Isaac apkelpeykeságkokxo, keñe axta apkeltaqháwo m'a aptáha kaxwók apkelásekhayókxa'.
Apteméssessek axta han Isaac ekwesey Sebá xa yámelchet nak. Cháxa keñamak ektéma nak makham apwesey Beerseba xa tegma apwányam nak.
Meyke aqsok egagkok hentemhek ma'a negháxamáxkoho nak antemeykha; xámok eyke katnehek aqsok egagkok ma'a negwasqápeykekxoho nak antemeykha.
Apmenyeyk eykhe katnehek aqsok apagkok ma'a énxet apháxamákpoho nak chá'a etneykha, métyehek eyke; xámok eyke katnehek aqsok apagkok ma'a énxet ekha nak aptamheykha.
