Éxodo 15:11 - Biblia Enxet

¹¹ “Wesse' egegkok, ¡méko pók dios egwanchek aghéshok xép! ¡Méko apwányam aphawo nak xeyep! ¡Xeyep apkelane chá'a m'a aqsok ekpelakkasso nak agweta' tén han ma'a ekpexchessamo nak egyempehek agweta'! ¡Payhawók xeyep kólteméssesek apcheymákpoho!

Éxodo 15:11 交叉參考

2 Samuel 7:22

Wesse' ahagkok, ¡apwányam apagko' xép! ¡Hakte méko ekhawo exchep, méko han aqsok kéláyókxa ekhawo exchep, ekhawo m'a ekyókxoho ektémakxa nak chá'a negko'o nenlegaya.

1 Reyes 8:23

aptáha s'e: “Wesse' egegkok, Dios nak Israel: méko exchep ekhawo m'a néten, tén han keso náxop, apkeláneya nak chá'a m'a ekhémo mók nélpaqhetchásamáxkoho, apxekmóssama nak chá'a ektaqmeleykha apwáxok ma'a ektáha nak chá'a apkelyetleykha ekmámenyého agko' apkelwáxok;

1 Crónicas 16:25

hakte Wesse' egegkok apteme apwányam apagko', payhawók ólteméssesek apcheymákpoho, apcheymáp nahan neyseksa m'a ekyókxoho aqsok ekha nak élmowancha'a.

2 Crónicas 2:5

Apwányam sa' etnehek ma'a tegma peya nak alána', hakte apwányam ma'a Dios egagkok, megkaxnawok ma'a ekyókxoho aqsok kéláyókxa nak.

2 Crónicas 6:14

aptáha s'e: “Wesse' egegkok, Dios nak Israel: méko exchep ekhawo m'a néten, tén han keso náxop, apkeláneya nak chá'a m'a ekhémo mók nélpaqhetchásamáxkoho, apxekmóssama nak chá'a ektaqmeleykha apwáxok ma'a ektáha nak chá'a apkelyetleykha ekmámenyého agko' apkelwáxok;

Salmos 113:5

Méko ekhawo m'a Dios, Wesse' egegkok, aptéma nak Wesse' apwányam ma'a aphakxa nak néten;

Salmos 119:120

Kelpexyennegkek ko'o ekyókxoho émpehek seyeye nápaqto' xép, eyáyók ma'a apchánamakxa nak antéhek.

Salmos 136:4

Apteme nak chá'a wánxa apkelane élyawe aqsok sempelakkasso nak agweta', hakte megkamassegwomek chá'a segásekhayo.

Salmos 145:17

Péwók ekyókxoho aqsok apkelane nak Wesse' egegkok, kataqmalmakha chá'a apwáxok elanok ma'a aqsok apkelane nak.

Salmos 22:23

Kéxegke kéláyo nak Wesse' egegkok, ¡kólpeykesho! ¡Kóltemésses apcheymákpoho kélyókxoho kéxegke kélteme nak Jacob aptawán'ák neptámen! ¡kóltemésses apwányam kélyókxoho kéltáha nak Israel aptawán'ák neptámen!

Salmos 35:10

Sa' atnehek apaqmétek ekweykmoho kañók agko' ewáxok se'e: “Wesse', méko ekhawo exchep. Apkelwagkassegkek xép teyp énxet'ák apkelmopyóseka apkelmoma m'a énxet'ák apkelyennaqte nak, apkelwagkassegkek xép teyp énxet'ák meyke nak aqsok apagkok apkelmoma m'a apnaqtawáseykegkoho nak chá'a.”

Salmos 60:2

Apyawheyáseykha axta xapop, tén axta ekmayheykekxo; ¡elápekxa kaxwók ma'a élmayhe nak, hakte palleykme'!

Salmos 66:5

Kólchexyem, kólteyánegwatámho Dios apkelane aqsok, aqsok sempelakkasso apkelánesso axta m'a énxet'ák:

Salmos 77:11

Kaxénwakxohok sa' ko'o ewáxok aqsok sempelakkasso nak agweta' apkelane axta Wesse' egegkok ma'a nano' axta;

Salmos 77:14

¡Xép apteme Dios apkelane nak chá'a aqsok sempelakkasso agweta'! ¡Apxekmóssegkek apmopwána m'a pók aptémakxa énxet'ák!

Salmos 77:19

Apmeykáseykekxeyk axta neyseksa wátsam ekwányam aptámeyeykekxo, apmallanegkek axta ekyawakxa yegmen, méko axta eyke ekwetassama apmenek.

Salmos 86:10

Hakte xép apwánxa apagkok apteme Dios; ¡xép apteme apwányam, tén han apkelane chá'a aqsok sempelakkasso nak agweta'!

Salmos 86:8

Wesse', ¡méko aqsok kéláyókxa aghéshok xép! ¡Méko kaxhok élane m'a aqsok apkelane nak xép!

Salmos 89:18

¡Negáhakkásamaxche negko'o m'a Wesse' egegkok! ¡Wesse' apwányam egagkok ma'a Appagkanamap nak Israel!

Salmos 90:11

¿Yaqsa ekya'ásegkoho m'a aplo ekyennaqte nak? ¿Yaqsa ekweteya m'a aplo?

Éxodo 18:11

tén han neyseksók apkelwanyeykha axta. Ekya'ásegwokmek kaxwók ko'o Wesse' egegkok aptáha apwányam apagko' neyseksa m'a ekyókxoho aqsok kéláyókxa nak chá'a.

Éxodo 20:3

“Ná etegye pók dios emonye' ko'o.

Éxodo 3:20

Axekmósek sa' eyke ko'o sekmowána m'a egipcios, alnápok sa' nahan. Atekkessesek sa' nahan ekyókxoho aqsok segyegwakkassamo nak agwetak ma'a kañe' apchókxa. Keñe sa' natámen xa, yohok kólántépok ma'a wesse' apwányam faraón.

Éxodo 8:10

—Saka sa' —axta aptáhak faraón. Tén axta Moisés aptáha apchátegmowágkokxo s'e: —Hoy, sa' katnehek ma'a, yaqwayam sa' ey'asagkohok méko ekhawo xama enxoho m'a Dios Wesse' egegkok.

Éxodo 8:6

Apya'ássek axta néten aptasqapeykha Aarón ekpayhókxa axta chá'a ekheykegkaxa yegmen ma'a kañe' Egipto, apsawhekxók axta nahan paha' apkelántaxnegwokmo m'a ekyókxoho nak kañe' Egipto apkeleñama axta apkelánteyapma m'a neygmen nak.

Éxodo 9:14

hakte keso kaxwo nak, aláphaksek sa' ko'o ekyókxoho mók ektémakxa aqsok nenlegeykegkoho aphakxa exchep, tén han ma'a apkeláneykha, ekweykekxoho m'a énxet'ák apagkok, yaqwayam sa' ey'asagkohok xép, méko pók sekhawo ko'o ekyókxoho nak keso náxop.

Isaías 30:11

Kólyensem kélyetlo s'e ámay nak, kólyetnakhágwom se'e ámay ekpéwomo nak, náhenxekmósseta kaxwók negko'o m'a Dios Aptaqmalma nak ma'a Israel.”

Isaías 40:18

¿Yaqsa sa' kólhéshok kéxegke m'a Dios? ¿Yaqsa sa' aqsok kólyetchásekxoho'?

Isaías 40:25

Aptáhak apkelmaxneyáncha'a Dios Aptaqmalma s'e: “¿Yaqsa sa' hélhéshok ko'o kéxegke? ¿Yaqsa sa' axhok ko'o?”

Isaías 46:9

kaxénwakxoho kélwáxok ma'a ektémakxa axta nentámen cham'a nanók agko' axta. Ko'o sekteme Dios, méko pók; ko'o Dios, méko pók sekhawo ko'o.

Isaías 57:15

Hakte aptáhak appeywa Meyke nak Ekhémo s'e, memassegwayam nak apwesey nak aptaqmalma: “Ekhegkek ko'o m'a netno' nak, ekpagkanamaxchexa nak, ekhegkek eyke nahan nepyeseksa m'a énxet'ák apkelyelqamákpoho nak tén han ma'a apkellegeykegkoho nak ekyentaxno apkelwáxok, yaqwayam enxoho alwasqakkásekxohok chá'a tén han agkeyásekxak chá'a apkelyennaqte.

Isaías 6:3

Axta aptáhak nahan chá'a apcháneya pók se'e: “Aptaqmalma, aptaqmalma, aptaqmalma Wesse' egegkok ekha nak apyennaqte; sawheykekxók apcheymákpoho ekyókxoho keso náxop.”

Jeremías 10:16

¡Megkaxnawok agko' Jacob nak Dios apagkok xa, apkelane nak ekyókxoho aqsok élánteyapma nak! Axta apkelyéseykha énxet'ák Israel ma'a yaqwayam etnehek apagkok apagko'. Wesse' ekha apyennaqte: cháxa apwesey xa.

Jeremías 49:19

Katlakkasek sa' ko'o axegma', ektémól'a yámakméwa katyapok ma'a naxma ekyentaxno neyáwa Jordán, ekmahéyak la'a chá'a m'a yókxexma ekhakxa nak pa'at axnagcha'ák, sa' ko'o amenxenek énxet'ák Edom ma'a, wának sa' ko'o etnehek apkeláneykha apchókxa m'a énxet sélyéseykha nak ko'o. Hakte ¿yaqsa awanchek ko'o hexnésaxkoho'? ¿Yaqsa awanchek ko'o hélyekkónaxche'? ¿Yaqsa keláneykha nepkések apwanchek hénmexekxak ko'o?

Levítico 19:2

“Etne sa' elának israelitas se'e: “Kólteméssesaxche sa' kéxegke kélpagkanamaxche', hakte ko'o Dios Wesse' kélagkok, sekteme sekpagkanamaxche'.

Miqueas 7:18

Méko pók Dios aphawo nak xép, hakte meyaqmagkásekxeyk chá'a exchep nentémakxa ekmaso, kalwanaqmohok nahan chá'a exchep nénmexeykekxa negko'o néleymomáxche nak egqántawók énxet'ák apagkok. Atsek negko'o eltamhók xép henxekmósek segásekhayo, megkawegqók chá'a aplo.

Deuteronomio 1:30

Dios Wesse' kélagkok apxegak kélmonye'e kéxegke, elnapakpok sa' nahan elmeyók kéxegke, ekhawo m'a kélweteya axta apteméssessamakxa m'a Egipto,

Deuteronomio 3:24

‘Wesse', apcheynawók xeyep sexekmósa apteme apwányam apagko' tén han ekha apmopwána, ko'o sektáha nak apkeláneykha. Méko pók Dios néten tén han keso náxop apmopwána elának aqsok ekpelakkasso nak agweta' apkeláneya nak chá'a exchep.

Deuteronomio 33:26

“Méko aphawo m'a Dios apagkok nak Jesurún, apkexyeykmoho nak néten neyseksa yaphope yetlo apcheymákpoho yaqwayam epásegwata'.

Deuteronomio 4:34

¿Yetnéya xama aqsok kéláyókxa élyéseykha énxet'ák nepyeseksa m'a pók aptémakxa nak énxet, ekyetlómo élane m'a ekxámokma aqsok, tén han ma'a magkenatchesso nak agweta', tén han ma'a sempelakkasso nak agweta' tén han ma'a kempakhakma, yetlo ekmeykha ekyawe ekmowána tén han ma'a ekmowána nak hegyegwakkasek, ekhawo apkeláneya axta kélnápaqta'awók kéxegke Dios Wesse' kélagkok ma'a yókxexma Egipto, eñama apkelmasma kéxegke?

1 Samuel 2:2

¡Wesse' ahagkok, méko ekhawo exchep ma'a aptémakxa nak appagkanamap! ¡Dios egagkok, méko exchep ekhawo ektémakxa nak segmasma! ¡Méko ekhawo exchep!