Zakaria 4:7 - Eipomek

⁷ Ninye deiyoknye, Gubenur Zerubabel, dipkoprob an dam ara, pia kanye imun weik ning aupmaliba, ance, ‘Se yatato ning winiptinyeba, aning nirya, malye kiptinye do? Winipmanto ara, cang weik mutuku, welepman kumto bulamle touk, an dam arye kanye imun weik ning tuba aupnamle. Bukni, winipmanto ara, cang weik mutuku luluklamliba, tokna paksakuka poulbalamlirye, amutuku nirya lu uk kilamle touk, akanye imun weik ning nirya ara, malye kipminyeba, narye, aning nirya kum kipdeipnamne. Winipnyopura, na si eren aik uluplopmik ning ara, lipsisikuka dopnamnilame. Tonda, anyaik dona sirya dakna ara, ance tonok keil min yuma dobuka deipnalam talak ara, atalak unamak nang arye, ‘Se, akeil ara, pia teleb keil ulule. Tonda, anyaik ara, Allah arye el si eren aik ulula ati, elcuk anyaik pia teleb kipdeipnamle,’ tenebikirye, anang nirya arye, kanye pia deibuka, kanye lon yupu nyanamake!”

Zakaria 4:7 交叉參考

Esra 3:10

Atalak ara, sik aik don nang arye, Allah el si eren aik dona ati, weik keil pala kibikce, yangabuka ayukumna yo ikik talak ara, Allah el aik pum pil dolamika deiyok nang, sik pil don talak ongolamik baju ongobukabikce, binggong nyan ning, el si terompet dobukabikce, pong-pong nyabik. Tonda, sik Lewi yala nang bukni, ninye si Asaf, elce deiamuk mapu arye, sikce talipmek ning ara, piring pala atonun ubuka, kat ning arye memamika ak, onmekce lelim nyabik. Sik nirya yanuka, anyaik dopnamika dam tikuka, Allah el si Yahweh ati, si erebuka mot selamik. Aning winibika nirya ara, Raja Daud, Israel ninye sik ninye deiyoknye ulamuk talak arye, “Wininamlume,” nyapdeiamuk touk winibik.

Mazmur 114:4

Tonda, atalak ara, weik mutuku bukamukak nirya ara, tobukce, im kurukuka biyuk. Winipmanto ara, kambing basam arye, im kuruklirye, balamle touk ubukce, aweik bukuk mutuku nirya ara, lokonmokce banmok. Tonda, mitik mutuku kon nirya babye, domba basam mapu, im kurukikirye balamak touk, amitik mutuku kon babye, lokukba im kurukukce, banmok.

Mazmur 114:6

Atonun ton, sik weik mutuku kon bukamukak nirya ara, yata deiyok ati, mutuku nirya tobukce, im kurukuka banmok do? Tonda, sik mitik mutuku kon bukamukak nirya ara, yata deiyok ati, tobukce im kurukuka banmok do?

Mazmur 118:22

Tonda, sik asik teleb ubuka dolamik nang arye, ‘Akeil urasin malye keil’ tenen, dobuka, bai tam donokik. Akeil ara, bataklamik bukni, akeil dobuka, bai tam donokik keiluk, weik mambul keil akunum upmale. Winipmanto ara, keil aik donyak nang arye, ‘Akeil aik abilinga nirya, pia teleb diksukumuk upnamle’ tenen, minopce delilamak keil atonun, sik bai tam donokik keil ara, weik mambul keil akunum ulule. Winipmanto ara, yuk keil nirya ara, mitik mambul bukni, akeil tonok ara, weik mambul aik dona deiyok keil, akunum ulule.

Mazmur 84:11

Teleb weik ning ara, tonok sum Allah an si eren aik dam yanuka eipkitinyeura, telebe teneptinye. Bukni, yupa weik seribu sum ara, talye yukak daunmatinye babye, telebe kume. Tonda, na ara, an si eren aik bublan dam kalikna pil doptinye babye, pia telebe. Bukni, malye wininyak nang, sik teleb aik binuka uptinye babye, aning telebe kume.

Yesaya 28:16

Ati, na Allah Yahweh, aning-aning deice tam unirye, Weik Erena Deiyoknye ununa anya arye, narye, ‘Winipnamne,’ tenenye touk wininune. Narye dipkoprob nyapsine. Narye weik mambul keil tonok Sion mutuku noutam deipne. Akeil ara dipkoprob pia mikip keil deipne. Tonda akeil ara, dekna weik keil deipniba, pia darabuka buknamla ati, yata ninye do nirya, akeil ati diba tenebice ninye ara, alye pia kum dakdanamake.

Yesaya 41:15

Na mapu Israel nango, anggunce na yupu kekepnululume. Winipmanto yupu ton nyapnusine. Anggunda, ‘Gandum bama labibirye, el duk ning wibuka dopropnamap’ tenen, weik ikin yo, gandum deice deibuka teiklamlumba, el duk labuka poulbalamle. Atonun el bama babye, yuk labuka saklamle. Winiplyopura, ninye arye gandum bama yuk, gandum duk yuk, wibuka delilamak touk, upnamlume. Weik ikin yo deice, kat yo arye tace lubuka tuku deice lukmunyeba, tuku palilamle touk, upnamlume. Ara, anggunce weik mutuku dup ap, mitik mutuku dup ap, adeice unyak ninye nirya ara, opra balamunce, obuka sirya daknamlume. Ara, anggunce anggun olan ninye nirya ati, obuka sirya daknamlume. Winipmunyopura, ninye arye wa tuku palibuka bataklamaka touk, sik yuk mutuku nang ati, oplopnamlulume. Tonda, diklanye duk labikirye, kala saklye ning ara, kumanya arye bobuka balamle touk, anggunce anggun mal olan nang nirya ati, obuka kum kipdeipnamlume.

Yeremia 33:11

Bukni, aminyan doyanamle talak ara, amutuku noutam nirya, tuba tonap teleb kipdeipyopura, weik kwalya kwalibuka dinmakirye, kanye deibuka, yupu ding weik nyanmakiba, yuk mutuku nang arye kekepnamake. Tonda, wel nang arye, dopdakirye, sik kilapu donamak nang ap, sik sal donamak kilapu ap ara, kanye deibuka, pin-pin kanye arye nyanamak yupu ara, yuk mutuku nang arye kekepnamake. Tonda, yuk nang babye, na Allah ati, telebe nyana ati, arin ning, sikce boyanuka, na si eren aik dam boyangakirye, kanye lon mot nyanmakiba, yuk mutuku nang arye kekepnamake. Sik amutuku unamak nang arye nyanamak yupu ara ani. “Se, nun ni koproba Allah Yahweh ara, pia telebnye ulule! Elda, im deice yin talin malaikat nirya ara, sik deiyoknye ulula ati, el mikip pia weik aulule. El ti, nunce ‘Pia telebe,’ nyanyabe. Allah ara, nunti, pia bico tenesulula ati, elce nunti, ‘Wininamsine,’ nyalin yupu deice nyapdeiamsuk yupu nirya ara, pia melibuka arenamsile. Elce bico tenesilye ning ara, pia min kume kum danamle!” Anang arye, ayupu nyanamake. Sikce, na Allah ati ayupu nyanamniaka ara, talye ati kume. Deiyok ara, ani. Anggun mal olan nang arye, malye weik kipdeibik bukni, narye tonap, pia teleb kipdeipniba, minop talak, pia teleb ulamuk touk upnamle. Narye winipnamsina ati, na si erena ati, ayupu nyapmakine. Na Allah Yahweh arye nyapmasina ati, aning nirya ara, dipkoprob nong upnamlarya!

Yeremia 51:25

Se, anggun Babel mutuku nango, winipmanto ara, anggunda mutuku kon topsaklirye, mutuku sirya, im sirya nirya, sice bultakalamle touk ululume. Anggunce, tukwak mutuku noutam nirya, yuk-yuk mutuku nang, weik tonun akunum obuka, sirya daknamlume. Bukni, nara Allah Yahweh arye anggun deice yanipnamsine. Winipsinirye, anggun adiparyuk lipdopnamsine. Tonda bongop dongopsinirye, bataksiniba, uku arye dipsiliba, atu butbuta atonun upnamsile. Winipmanto ara, minop talak anggun Babel mutuku nang ara, weik tonun bukamuk mutuku ulamlum bukni, aminyan talak ara, weik uku arye mutuku kon Nirya dipliba, tokna pakuka saklirye, lu ulamle touk, na mikip weik deice arye, malye kipdeipsinirye, amu tamuk deipnamsine.

Mika 1:4

Winibuka tikilyanganamla talak ara, amutuku nirya, weik arye luluklirye, mutuku nirya, atu atonun kiplopnamle. Winipmanto ara, lilin dobuka, uku dinipdongobikiba, uku buk dilirye, mek balamle touk upnamle. Ara, nun ulamepye mutuku deice tikilyaliba, mek kutuklirye, tokna donamle. Tonda, mutuku deice arye, mek kutuklirye, tokna pakuka balirye, opnin banamlya ani, lu mutuku obuka, dalalbalamle touk, upra binamle.

Mika 4:1

Aminyan doryanamle talak winipnamle ning ara, ani. Allah Yahweh el si eren aik domik mutuku ati, ninye mutuku-mutuku nirya arye, ‘Se, yuk mutuku ara, mitik mambul bukni, amutuku ara, weik mambul mutuku ulule,’ tenenamake. Allah el si eren aik domik mutuku erepdeipliba, yuk mutuku nirya ara, amutuku amu tam atonun unamle. Winipliba, im sirya, mutuku sirya nirya, daunyak ninye arye, amutuku uk, yanganamake. Amutuku yacopura, Allah el siuk erenamake.

Habakuk 3:6

Na nio, an Allah arye, mutuku deice tiklumba, amutuku ara, weik arye lulukamuk. Tonda, yata mutuku ninye do nirya, ance aninye sik wenena ati, pia pirilelalum talak ara, ninye nirya elilamekce, ilil ubukba, imun kanye bolamikce, ‘Se yata wiripnamsil do?’ tenen, sirim talilamukba ulamik. Minop talak bukamuk mutuku ara, ance areplumba, weik arye lulukunmok deice arye, sakukba, kum kipdeiplume. Tonda, minop talak elilamupu mutuku dup ara, ance areplumba, ila tokna dobukce, pia kum kibuka deiplumopura, lyu weik ubuke. Na nio, ance winiminye ning nirya ara, pia aunamle.”

Zakaria 4:8

Winibukopura, Allah Yahweh arye nyapdeiamuk yupu, yuk ning ton, na Zakaria dam, yanuka nyapnuke. Aning ara, ani.

Zakaria 4:9

Ninye deiyoknye Zerubabel birye, na si eren aik dona ati, keil min yuma dobuka, na aik ayukumna ati ikamuk keil ara, el taruk mikip arye deiamuk. Winibukopura, adiparyuk dopnin balamika ani, sirya ara, na si eren aik nong nirya dobuka, sirya daknamnile. Aning akunum winipnilyopura, na mapu koproba, sik Israel nang nirya arye, moubuka bikinamake. Ara, ‘Se, nabi Zakaria bira, dipkoprob Allah arye, anye wibuka dopdeiamukba, nun dam yanuka, Allah arye nyapdeiamuk yupu, laka nyapsuk touk, akunum winipmala atia,’ tenebikirye, bikinamake. Ara, Allah Yahweh, im deice unyak yin talen malaikat nirya, sik deiyoknye ulula ati, elce, ‘Winipnamne,’ tenyamuk touk, akunum winipmale!’ tenen, bikinamake.

Matius 21:21

Nyabikopura, Yesus arye tamubuka nyabuk. “Na dipkoprop nyapsine. Yatanye do nirya, kanye talima bokoltona kumce, Allah ati pia dib teneplirye, ‘Narye Allah ati moropne ning ara, Allah arye dipkoprop winipnamnile,’ tenebuka, Allah ati moroplyopura, weik mambul ning uptue. Ara, narye nyapmanuba, ara yo kolupmal touk uptue. Tonda, aninguk kume. Omutuku ati nyaptue. ‘An yuk aryuk erepdakuka, laut mekwen noutamak delilbilyame,’ nyaptuopura, el nyaplye yupu deice aryuk, amutuku el yuk aryuk erebuka, laut mekwen noutamak dopkwetepdatue.

Matius 21:42

Nyabikopura, Yesus arye tamubuka ayupu tonap nyabuk. Daud arye sekamuk buku noutamak sekamuk yupu nyapnusin ning ara, deiyok kum tenepmalumce nyanmanulum do? Daud arye domon yupu deice sekamuk yupu ara atia. ‘Keil aik dolamik nang arye ‘Akeil ara malye keil’ tenen, batakik keil ara, abilinga dukuldongonak delilamak keil, pia mambul ning ara, akunum uplye. Pia teleb uplye ning ara, Allah arye teleb kipdeibuka anya arye, nunce aning pia telebe tenenyabe.’ (Mazmur 118:22-23) Ara Daud arye sekamuk yupu akunum nyapsine. Yesus arye Yahudi yala deiyok nang awekmek ati nyabuk.

Markus 12:10

Nyabukce, ayupu tonap, nyabuk. “Daud arye sekamuk buku noutamak sekamukbuk nyapnusin yupu ara, anggun ton kum nyamlum do? Daud domon yupu deice sekamuk yupu ara, ani. ‘Keil aik dolamik nang arye ‘Akeil ara, malye keil’ tenen, batakik keil ara, abilinga dukulongonak delilamak keil, pia mambul ning ara, akunum uple.

Lukas 20:17

Nyabikura, Yesus arye tamubuka anyanmek nang dipdeyukce, ayupu tonap nyabuk. “Daud arye sekamuk buku noutamak sekamukak nyapnusin yupu ara, deiyok kum tenepmalumce nyanmanulum do? Daud arye domon yupu deice sekamuk yupu ara ani.” Keil aik dolamik nang arye, ‘Akeil ara malye keil’ tenen, batakik keil ara, abilinga dukulongonak delilamak keil, pia mambul ning ara, akunum uple. (Mazmur 118:22) “Ara, Daud arye sekamuk yupu akunum nyapsine,” Yesus arye Yahudi yala deiyok nang awekmeka ati nyabuk.

Lukas 3:5

Mutuku dokbong-bong ak nirya ara, gon ak arye dalubuka pala kilinamlulume. Mutuku dup nirya ap, dalubuka pala kilinamlulume. Gwalin bisik nirya ara, lepsisikuka funguk yalinamlulume. Bisik mutuku lilkwa bisik nirya ara, pum uawamlya ak ara, tuku delinamlulume. Keil dula belyamlya ak nirya ara, lukuka lepsisikuka telebuk ulinamlulume.

Rasul 4:11

Allah el yupu laka nyalamuknye Daud arye, aYesus ati nyapdeiamuk domon yupu ani. ‘Anggun kel aik dona deiyok ninye arye batakamlum keil ara, winira mambul geil pia teleb ning akunum upmale.’ (Mazmur 118:22)

Roma 11:6

Allah el kanye aryuk Israel ninye ati, bico tenyamsukce, urdem arye wiamsuka ara, teleb ubuka pil dolamupa deice arye kume. Nun apu yapu, Israel ninye babye, sik teleb ubuka pil dolamika deiceuk wipdeiamtopura, “Allah el kanye aryuk bico tenesilirye, wibuka delisulule,” kum nyaptibye. Bukni, el kanye aniryuk, bico tenyamsukce talye wiamsuka ara, nun teleb pil dolamupa deice arye kume, el kanye aniryuk bico tenyamsukce wiamsuke.

Efesus 2:20

Winipmanto yupu ton nyapnusine. Aik dona deiyok nang arye, pia unamle aik dopnamikce talak ara, anyaik ayukumna ati, tuku palibuka, keil yangapdeibikirye, adeice ak, aik nong dolamak atonun, Allah arye el mapu nun nirya ati, teleb kilisulule. Allah el yupu dobuka peterelbana ati, deiya kouna deiyok nang, Rasul nang ap, Allah el yupu laka nyabuka peteresinyaka deiyok nabi-nabi nang ap, sikda aik ayukumna ati, keil yangaldelilamak atonun winisinyake. Pia aik dopnamikce talak ara, aik dika deililamak keil ara, ‘Aik abilinga nirya funguk upnamle’ tenen, konop keil deibikirye, akeil deice, anyaik nong nirya dobuka deililbalamak touk, Kristus el babye, akonop keil atonun, nun Deiyoknye usulule.

1 Peterus 2:7

Wini talak, anggunce Yesus ati diba tenelulum ninye babye, akeil ati ara, ‘Weik mambule,’ tenelulume. Bukni, sik diba kum tenenyak ninye ati ara, Allah yupu buku Mazmur noutamak arye ayupu nyabuk. ‘Sik aik dona deiyok nang arye, ‘Akeil ara, malye keil’ tenen, batakik ning ara, wini talak weik mambul keil akunum upsile.’ (Mazmur 118:22)

Wahyu 16:20

Weik mutuku lulukna lulukukba, laut mekwen noutamak arye sekelongolamuk mutuku taram pulau nirya ara mekwen dibukba, adiparyuk kum dayuk. Mutuku kon mutuku kon nirya ara, weik arye lulukukba, tokna paklirye, yamultaklamle touk winibukce, amutuku-amutuku nirya sakukce lu kibuk. Mutuku kon nirya kum dayuk.