Bobirikopura, ayupu nyaprik. “Anggun nirya ara, ‘Nun babye opsilyak’ tenen ati, bikbik abuka bimunce, lyepdanamlulume. Amutuku lyu noutamak nirya, dikdik sena kume, pia bikbik abuka, banauk unamalulume. Tonda, ‘Nun mutuku tonap eipnuyap’ tenen, otam banmamunyak arye, tuba tamubuka amutuku tam dilina pia meme. Mutuku dup mutuku bikbik abuka banamalulume. Kumopura, anggun babye dipnamalume,” nyaprik.
Zakaria 2:6 - Eipomek6-7 Allah Yahweh arye nyapnukopura, ayupu ton dukdongobuka nyabuk. Ara, el mapu koproba, sik Israel nang nirya ati, nyabuk. “Ara narye anggun Israel yala nang nirya, malye-malye winilamluma ati, yakdonokamsisiba, Babel mutuku nang arye, yanuka obuka bobinamsikba, pera mutuku, Babel mutuku noutam ulamlum nang ara, wini talak ara, buklulume! Wini talak ara, anggun yuk mutuku dabinuka ulamlum nango, Babel mutuku arye tamupmunce, adiparyuk bikbik abuka, Yerusalem mutuku tamubuka yalulume,” nyabuk. 參見章節 |
Zakaria 2:6
30 交叉參考
Ati ara, anggun Israel yala nang ara, Babel mutuku arye batakuka, bikbik abuka bimunce, yuk-yuk mutuku nirya binuka unamlume. Anggun nirya ara, Kasdim mutuku batakuka, bikbik abuka bindopnamlume. Narye nyapnusin yupu ara, boyanuka, weik yupu deice arye, ayupu nyabuka, dana-dana tam nirya banamlume. Anggun kanye pin-pin deice arye, “Ayupu nyapnamlume. Ara ani. Nun ni Allah Yahweh arye, el amu tam pil donanye Yakub, elce deiamukba, dadeipdanin yangalamikce deiamik nang, Israel nang ara, akunum lobukaplirye lyepdopnamal atia!” nyabuka ayupu weik tonun nyapnamlume.
Allah el si Yahweh arye, ‘Israel ninye na dam yangakiba, narye teleb kibuka melinamne’ tenen, adomon yupu nyabuk. Anggun mek patasulu ninye nirya ara, narye kintineipse mek dekna kum, ur talye yanduka dobuka dina ati yalume. Anggun yo bok kum ninye ara, na dam yamunce, yo bok kum upmalibuk, anggun din ning ara, dekna kumce, urdem arye dopropmunce, dinamlume. Winipmanto ning ara, anggur tapu duk mek ap, sapi basam moum yung ap, akunum kintinipsise ning ara, dekna kum urdem arye yamunce dobuka dinamlume. Ati, na dam yanulume.
Nyapsiba, Allah arye nyabuk. “Diba awinipmalba eipmomu ning, el nong ara, laka nyapnamkine,” nyabuka laka nyapnuk, “Ara outam arye Yerusalem mutuku unyak ninye nirya ara, sikti, yu tenenyak nang yakirye, ikin ning sik nong deice yanuka deipnamake. Winibikiba, Yerusalem unyak ninye ara, imun kanye bobuka unamaka ati, aning utam arye, mek diksakmanto unmoba eiplume,” nyapnuk.
Na Allah arye aninye ati, weik wenen ning arepneba, mutuku-mutuku daunyak ninye, aning eibikirye, ilil weik upnamle. Ilil weik upliba, sik nirya arye, ‘Se, Israel nang ara, nun like. Malye winililamikba, Allah arye wenebuk ning ara, ikin weik anya arye, aning ara, nunce tonap kum teniptibye,’ tenenamake. Na Allah arye, winipnamne ning nirya ara, urdem ati kume. Ara, Hizkia el mi Manasye, elce Yehuda yala ninye, sik ninye deiyoknye, Raja talibuka ulamuk talak, Yerusalem mutuku noutamak, aRaja arye, weik malye winilamuk ning dekna ati, wenepnamne.” Allah arye nyabuk.
Atalak ara, Yehuda yala nang ap, Israel yala nang ap, epdanuka neika tonok unamake. Tonda, outam dabu mutuku bobuka donokamik nang babye, tamubuka yakceura, neika tonok unamake. Sik anang nirya ara, narye sik apu yapu ati, areamse mutuku uk tamuyanuka deipnyeba, sikce amutuku pia talibuka, sik mutuku koproba, kibuka unamake.
Mutuku-mutuku nirya ululum ninye nirya ara, Allah el si Yahweh arye nyasilye yupu kekeplulume. Tonda, anggunce Allah nyalye yupu dopropmunce, weik laut mekwen koubuka, otam mutuku babye, laka nyalbinamlume. Sik laut mekwen kup-kup unyak ninye nirya babye kekenamake. Ayupu nyanamlulume. “Minop talak ara, anggun wenena ati, Israel ninye ayala-yala nirya, akunum wangapsinyamukba, yuk-yuk mutuku dabinuka ulamik ninye nirya, atalak ara tamubuka, sik mutuku koproba uk, boyanuka deipnamle. Winipmanto ara, domba basam weina deiyok nang arye, sik domba basam ati, teleb kibuka kaliklamak touk, Allah arye sik Israel ninye nirya ati, moubuka kalikinamsile.” Ayupu bobuka laka nyalbinamlame.
Allah el si Yahweh arye nyabuk. “Na tenepse talak akunum uplyopura, doyanamle talak noutamak ara, Yerusalem mutuku nirya tamubuka dopnamake. Ara, na si erena ati, Yerusalem weik asik nirya lipsisikuka dopnamake. Ara, weik cang domik aik, el si ara, Menara Hananel, anirye dipdongobuka dopnin banmaca ani, cang keil poka dukuldongonak, el si Gerbang Sudut bublan dam, aning nirya ara, lipsisikuka dopnamake.
Na Allah Yahweh arye nyapne. Mutuku sirya utam daunyak ninye ap, mutuku sirya, im sirya, dana-dana tam daunyak Israel ninye nirya ap, tamubuka boyanirye, sik nirya bulubuka, tonok sukumuk deipnamne. Sik Israel ninye dobuka boyanganye talak ara, talye ninye ap, yok malye nang ap, asing kun nang ap, tonda mi kabul kum deipmakce kilapu bukni, mun pum bomice kilapu ap, sik nirya melibuka boyanganamne. Neika yanganamake. Winipnamak talak ara, amutuku noutamak, ninye yupa pia weik upnin banamake.
Se, na mapu koproba, anggun Israel nang deiyok kibuka ululum nango, anggunda adiparyuk, Babel mutuku batakuka, bikbik abuka binamlume! Ati ara, angguncuk ninye deiyok nang atonun kibuka, menekmunce, bikbik abuka bamunyopura, sik yuk Israel nang ara, aminyan tam dobolyanganamsiake. Winipmanto ara, ‘Weik yim kambing arye, menekuka bakiba, sik yuk kambing basam nirya ara, sik aminyan tam dobolbalamak touk, upnamlumʼ tenen ati, nyapsine.
Anya arye, se anggunda, na mapu koproba Israel yala nango! Babel mutuku noutam, tuba kam ululum nang arye, amutuku batakuka, bikbik abuka bindopnamlume! Nara Allah Yahweh arye, sik Babel mutuku ninye ati, yu weik unmanila ati, anang ara, weik tonun wenebuka opnamne. Ati, anggun na mapu koproba ara, lyepdamunce, bikbik abuka bindopnamlume. Babel mutuku nang nirya ara, weik tonun wenepnamne.
Allah Yahweh arye, sik Israel nang ati nyabuk. Anggun Israel nang, Babel mutuku noutam tuba kam ululum nang ati, nyapsine. Sik Babel mutuku yin talin nang arye, ninye ona ati parang ya bobuka, sik Israel nang yupa pia weik, akunum olamik bukni, anggun tuba kam unmalum nang ara, adiparyuk bikbik abuka bindopnamlume! Anggun Israel yala nang arye, ‘Malye, nunda aminyan talak binamabe,’ tenena pia meme. Wini talak arye, Babel mutuku batakuka, adiparyuk, bikbik abuka binululume. Anggunda, sik mutuku koproba noutam kum unamlum bukni, minopce, anggun mutuku koproba noutamuk umunce, na Allah atibuk, tenepnumunce, na siuk erenamnulume. Ara anggun ni koproba Allah Yahweh ap, Yerusalem mutuku ap atibuk, moubuka tenenamlume. Allah arye nyabuk.
Ati ara, anggun Israel yala nang ap, Yehuda yala nang ap ara, Babel mutuku noutam tuba ululum nang ara, adiparyuk Babel mutuku batakuka, bikbik abuka bimunce, lyepdanamlume! Wini talak ara, amutuku batakmunce, adiparyuk, bikbik abuka bindopnamlume. Sik Babel yala nang, amutuku noutam unyak nang ara, na Allah ati malye-malye kipdeiamnike. Ati, narye anang opnamne talak, anggun Israel yala nang arye, ‘Nun babye ton opsilyakʼ tenen, anggun adiparyuk, bikbik abuka bindopnamlume! Aning ara, talye kum nyapsine. Deiyok ara ani. Wini talak Babel yala nang ara, sik malye ulamik nang, on sum akunum dam uple. Tonda, na Allah arye, sik wenena ati, kwang daknamne talak, akunum dam upmala ati, sik bidamang malye ulamik ning dengna ati, Babel mutuku nang nirya obuka sirya daknamne.
Wini talak, amutuku unyak nang arye, ayupu nyanyaka ati, an Yeheskiel birye, amutuku nang ati, nyapnulyame. Kume, aning-aning nirya talibuka, Pia Mikip Weik Ulul Deiyoknye, Allah ara, ayupu nyapsile. Dipkoprob ning ara, min talak ara, sik yala nang ap, sik kwitcapu ap, weik tonun, yuk pera mutuku, dawangapdanmanto ulamik. Narye sik wenena ati, anang dobuka bobisirye, pia karin, yuk-yuk mutuku noutam deipseba, daulamik. Winilamik bukni, sikda yuk mutuku nang noutam daulamik talak nirya ara, naryuk sik Israel nang nirya ati, pia melibuka kaliklamse. Sik wenena ati, tiya talak, pera mutuku noutam deipseba, daulamik bukni, wini talak ara, sik dobuka, tuba tamubuka, anggun mutuku koproba, boyangasunune.
Anye wenebuka opnamne talak ara, narye lo arepyeba, sik Babel mutuku yin talin nang arye, el dam yakirye, el yin talin pia teleb nang babye, yu parang ya arye, opnamake. Ninye weik tam nang ara, opmakcebuk, tuba kam unamak nang ara, bai sakuka bendobikirye, im sirya, mutuku sirya ara, yuk-yukak bindopnamake. Aning nirya akunum winiplyeura, anggun nirya arye, nati biknamnululume. Ara, ‘E diba, nun ni koproba Allah, aning-aning talibuka, deice tam erebuka, pia mikip weiknye birye, ‘Winipnamneʼ',’ nyapsuk touk, akunum upmal atia,’ tenepmunce, moubuka biknamnulume. Ayupu ara, akunum nyapdeipsine.
Apia kanye imun weik ning, akunum arepsinyopura, ikin weik unamsila ati, anggunce obuka dinamlum ning ara, anggun aumunye nang kan-kan arye, anggun wisi nang arye, anggun bidamnye delilamunye mapu, obuka dinamlume. Aning atonun, anggun kan-kan arye, yuk mapu arye, sik ni yapu koproba bukni, obikirye, dinamake. Aning atonun, anggun Yerusalem mutuku ululum nang nirya ara, wenebuka kanye imun weik ning dobuka, anggun deice deipsinyopura, ninye weik dipnamak bukni, sik tuba batakniba, mitik tonun tuba kam unamak nang ara, yukak yakuka dopkweteptiniba, yuk mutuku im sirya, mutuku sirya nirya, binuka unamake.” Kumanya dana-dana tam arye dolamle touk, anggun babye dana-dana tam mutuku noutam bikbik abuka binuka unamlume.
Narye anggunti, kanye imun weik ning arepsinyopura, anggunce talibuka ululum mutuku nang bokuka, winilye uplyopura, ton ning sepertiga ton, kanye imun weik uk yalanye yalirye, anggunti talibuka dinmasilya ani, ninye weik toun arye dipnamlume. Tonda, aning atonun, kanye imun weik din patana ton, anggun Yerusalem mutuku noutam yaliba, din kum daliba, din ning ton dina kumce, talye daunamluma deice arye, anggun kan-kan ara, ninye pia weik ton ap dipnamake. Aning atonun ton, anggun aumunye nang noutam bukni, sepertiga nang ton, sik mutuku batakuka, cang weik keil poka domlum ning, bai tam unamlum nang ara, sik yu yin talin nang arye, yu weik parang ya dobuka yakirye, anggunak sekuka oplopnamsiyake. Tonda, aning atonun, anggun amutuku ululum nang kan-kan arye bokuka, sepertiga nang ara, ‘Ninye arye opsikcakʼ tenen, Yerusalem mutuku batakuka, bai sakuka, dana-dana tam bikbik abuka binamak nang babye, sik mal olan nang arye, ‘Anang opnamakʼ tenen, bikbik abuka dobolbikirye, sik dam yanuka, yu parang ya arye, sekuka opnamake. Ara, kumanya dana-dana tam arye dolamle touk, narye sik wenena ati, mutuku sirya, dana-dana tam nirya ara, yakuka dopkwetepnamsin bukni, anggun mal olan nang arye, adopkwetepnamne nang nirya ati, yu parang ya boyanuka dobolbikirye, anggun Israel nang weik tonun opnamsiyake.
Winibuka ninye deiyok kibuka, daupnin balamlya ani, aminyan talak ara, el anye akunum diplyopura, elce taleamlye mutuku nirya ara, noutam bokuka, yuk-yuk wiliprobikirye, dumbarye kipdopnamake. Atalak ara, min yuma talak Raja kiamuknye, elce delinamle mapu, sikce amutuku nirya ati, Raja kibuka kum talinamake. Aning kum bukni, yuk talye nang, sik delinamak mapu arye, Raja kibuka talinamake. Atalinamak nang arye, ninye deiyok kibuka, amutuku talinamak bukni, sikda, min yuma tikamuknye, el mikip weik arye, amutuku taleamuk touk, sik aminyan dumbarye Raja nang arye, kum wininamake.
Nyabukce, ayupu ton dukdongobuka nyabuk. “Ayupu nirya ara, narye urdem ati, kum nyapsine. Deiyok ara, na Allah arye anggun Israel ninye wenena ati, yupu nyapdeipnyopura, yuk pera mutuku unyak yu ninye yakirye, anggunti opnamsiake. Winipmanto ara, ninye arye, gandum duk wina ati, ‘Teleb ning ara, tukwak saknamle, bukni, malye ning ara, kumanya arye bobinamle’ tenen, gandum duk wilamak touk, narye na mapu Israel ninye ati, ‘Teleb ninye dan do, malye ninye dan do?’ tenen, wipnamsine. Yu nang yakirye, obuka sirya daknamsiyaka deice arye, anggunti wenepnamsine. Awipnamne talak arye, teleb ning nirya wipnirye, malye ning ara bataknamne. Bukni, teleb ning ara, tonok ning babye, kum kum danamle. Teleb ning ara, lyepnamnarya.
Ati ara, na Allah Yahweh arye nyapsine. Wini talak ara, na adiparyuk tamubuka, Yerusalem mutuku binuka unamne. Sik amutuku unyak nang ati, bico tenepnirye, pia melinamne. Winipnyopura, narye lo arepnyeba, na si erena ati ara, sik mutuku, Yerusalem mutuku noutamuk boyanuka deipnamake. Winipnamak talak ara, sik aik dona kel weik nang arye, anyasik-anyasik lipsisikuka dona ati, ‘Amutuku pala ara, yata wiribuka ulul do? El cang ara, yata barye ubuk do?’ tenen, cang tapu arye, kiklipdenamake. Winipnamne talak ara, Yerusalem mutuku nirya ara, tamubuka tuba teleb kipdeipnamne.” Allah arye nyabuk.
Tonda, Allah Yahweh arye anggunti, amutuku noutam arye yakuka donoksiliba, ninye yuk mutuku nang unyaka noutam, binuka unamlume. Tukwak mutuku noutam, mutuku-mutuku nirya binuka unamlume. Amutuku binuka umunye talak ara, sik amutuku unyak nang arye, talye keil ap, yo ap, yuk teleb ning ap, dobuka memebukabikirye, sikce, ‘Nun ni aniʼ tenen, talye ning atibuk, si erenamake. Atalye ning ara, anggun babye, anggun apu yapu babye, kum bikamlum ning buk, talibuka, isa si erenamlume.
Kekepsopura, im deice tam arye ayupu ton nyabukba, kekepse. “Na Allah arye nyapsine. Babel mutuku noutamak tuba ululum bukni, nati diba tenenululum ninye ara, adiparyuk amutuku batakuka yukak bindoplulume. Ara talye ati kume. Amutuku batakuka yukak kum biminyopura, amutuku ninye arye, malye unyak ning ara bikmunce, anggun babye atonun winipmunyopura, Allah arye amutuku ninye sik wenena ati, weik kanye imun ning, sik nong deice dopkwetepnul ning ara, ‘Anggun ton tabakuka opsilyak’ tenen, nyapsine. Ati, na Allah ati diba tenenululum kili sal ara, ‘Babel mutuku ninye arye malye weik wininyak ning, anggun babye winipmunba, narye Babel mutuku kili sal sik wenena ati sik nong deice kanye imun ning weik deipnun ning, anggun nong deice babye deipsinirye opsinyak’ tenen, adiparyuk Babel mutuku batakmunce, memebuka moupdopnamlulume.
Ura, amutuku ara, sik anyasik dana-dana ara, cang poka dobuka antanapdongamikce, bisik bublan tonok botopdeiamik. Boas bira, amutuku ninye bisik eldanak, abublan dam binuka bukmok. Binuka bukmokce, dinmok bukni, ‘Elimelek el weit koproba, Rut doplirye, el imun ning ati, lyebuka melinamle do?’ tenepmoknye, el tamnye, yangayukba, eibukce, “Na ka anyaka yanuka buklyame,” nyabukura, yanuka bukuk.
廣告