Allah ance teneminye ning ara, ninye arye, ‘Se, nun malye winin ning, kum kibuka deipsuturye, lyepsutu’ tenen, kam ning obuka weika arye dobuka, uku dongolyanganamniake. ‘Aninguk na kanye delinune’ tenen, kum ulyame. Tonda, an si erena ati, ‘Teleb arin ning weika arye boyanganamniake’ tenen, kum patakulule. Ance nati, akunum laka nyalamnulumce, melipnuluma deice arye, moubuka kekepsirye, akunum bikse. Ara, ‘Sik malye winin ning kilina ati, kam ning obikirye, uku dongobuka, arelyanganamniake,’ kum tenelyame. Bukni, weik mambul ning ara, ance nunti, ‘Na yupu moubuka kekebikirye, na dobolyanamniake’ tenen, patakulule.
Zakaria 2:10 - Eipomek10 Nyabukura, ayupu ton Allah Yahweh arye, nyabuk. “Se anggun Yerusalem mutuku noutam ululum nang nirya ara, pia weik tonun kanye deipmunce, kanye lon mot nyanamlume! Deiyok ara, ani. Anggun nirya ara, moubuka dinauk unamlume. Nara dipkoprob yanirye, anggun Israel yala nang noutamuk, neika unamabe. Na Allah Yahweh arye nyapmasina ati, aning ara, dipkoprob nong upnamle! Winipmunyopura, na anggun ni bira, anggun umunyak noutam anyuk unamne!” 參見章節 |
Zakaria 2:10
41 交叉參考
Allah el pia mikip weik ulula ati, winipmanto ara, ninye olyangana ati, kuda basam arye libuka, tuku deice balamle ning, el si ara kereta perang, yupa pia weik ribuan aulula ati, nunce kum nuktibye. Akereta perang ap, Allah ap, Sinai mutuku arye batakuka, Yerusalem mutuku noutam bukni, el pia teleb lek unamle aik dam ara, akunum yanmale. Allah bira aning-aning nirya talibuka, mikip weik ulya deiyoknye ulule.
Anggun Sion mutuku ululum nango, kanye lopsiliba, weik yupu ara, weika arye nyapmunce, Allah si eren mot senamlume. Wininamluma ara, talye ati kum bukni, deiyok ara, Israel nang anggun ni koproba Allah, malye winin ning tonok babye kum winilirye, Pia Diksukum Leknye ulule. Tonda, elda pia weik si erenanye, anggun kan-kan ulamlibuk, anggun ap neika ansinibuka unamlume.
Winibuka unamake ati, Allah Yahweh el tenelamukce, lyepdeiamuk ninyeuk, abisik bakirye, Sion mutuku tamubuka binamake. Sikce, ‘Yerusalem mutuku weknamap’ tenen, abisik banyak talak ara, sik nirya teleb aryuk kanye deibuka, Allah el si erena ati, mot nyanamake. Ikin kanye bona pia kum diparyuk, pin-pin kanye bobuka, pia unamake. Allah arye sikti, kanye bona deiyok ning arepliba, sik kanye talima pum tam arye, ‘Pia dipkoprob akunum upmasile’ tenen, kanye deibikirye, tonok kanyeuk bobuka unamake. ‘Se,’ tenen, teniltona ap, ikin kanye bona ap, ton pia kum unamake. Allah arye, aning-aning nirya kum kipdeipnamle. Nabi Yesaya birye nyabuk.
Na Allah arye anggun tukwak ninye nirya ati nyapsine. Anggun nirya arye, na Allah Yahweh ati, kanye deibuka, “Nun ni Allah pia teleb ulule,” nyabuka, winiryuk mot deice arye, na si erebuka si kinamnulume. Anggun mutuku sirya, im sirya ululum ninye arye, na Allah ati, mot senamluma deice arye, na si erenamnulume. Aning atonun, anggun weik laut mekwen deice arye, weik mek liya yo wekuka mekwen deice balamlum nang ap, tonda weik laut mekwen kup-kup ulalum nang ap, na Allah ati, mot senamluma deice arye, na si erenamnulume.
Ati ara, anggun Israel yala nang ara, Babel mutuku arye batakuka, bikbik abuka bimunce, yuk-yuk mutuku nirya binuka unamlume. Anggun nirya ara, Kasdim mutuku batakuka, bikbik abuka bindopnamlume. Narye nyapnusin yupu ara, boyanuka, weik yupu deice arye, ayupu nyabuka, dana-dana tam nirya banamlume. Anggun kanye pin-pin deice arye, “Ayupu nyapnamlume. Ara ani. Nun ni Allah Yahweh arye, el amu tam pil donanye Yakub, elce deiamukba, dadeipdanin yangalamikce deiamik nang, Israel nang ara, akunum lobukaplirye lyepdopnamal atia!” nyabuka ayupu weik tonun nyapnamlume.
Ati ara, nun babye winibuka melisilyame. Minop talak weik mambul pil dolamlum touk, wini talak babye, melibuka lyepdopnamsilyame. Ara, an mapu koproba ara, yu nang arye yanuka, obuka sirya daksikce, sik pera mutuku bobinamsikce, ikin ning nun nong deice deiamsik bukni, Allah Yahweh ancuk, akunum lyepdomsulum nang nirya ara, tamubuka Sion mutuku yanamabe. Ara, ‘Pia telebuk unamap,’ tenebikirye, Yerusalem mutuku tamubuka yanamake! Tonda, tamubuka yanamak talak ara, sik asok deice, lang-lang nyapliba, kanye deibuka, weik yupu arye kanye deilin mot nyabikirye, sik adiparyuk tamubuka, Yerusalem mutuku yanamake. Tonda, sik anang ara, tia talak ati kum bukni, pia ati, kanye weik deibikirye, anti si erenamkiyake. Tonda, sik anang ikin-ikin ulamukba, kanye imun weik kanye bobuka ulamik ning nirya ara, akunum kum danamla ati, pin-pin asa tuba si erenamkiyake. Sik Israel nang arye, Allah ati, nyabik.
Wini talak ara, Babel mutuku batakmumce, anggun mutuku koproba tamubuka yanamlume. Allah Yahweh el si eren aik pil don ning nirya dobuka bobinamik ning ara, tuba tamubuka boyanamlulume. Aning dobuka boyanamlum nang ara, Allah arye, ‘Aning ara, malye ning anya arye, aning talina meme,’ nyalamuk ning aning-aning nirya ara, anggun ton kum talinamlulume. Winipmunce, anggun Babel mutuku arye tamubuka Yerusalem mutuku yanumunye talak ara, anggun nong nirya mek kekuka teleb kilanamlulume.
Yerusalem mutuku ululum ninyeo, na Allah arye anggunti, domon yupu deice arye nyapsine. Minop talak ara, you kilapu atonun ulamlume. Mi kum bomlum talak ara, mi deiyok ton kum dipsukba, mapu ton kum deiamlume. Bukni, wini talak ara anggun kanye deipmunce, pin-pin asa arye mot senamlume. Ara, anggun mapu pia weik upre banamaka atia. Winipmanto ara, ninye domice kilapu arye delinyak mapu ara, mitik tonun arye delinyak bukni, anggunda, ninye kum domice kilapu atonun ulamlum bukni, aminyan talak ara, sik mapu anggun weik tonun deipmunyeba, weik upra banamake. Na Allah Yahweh arye nyapsina ati, aning ara dipkoprob nong upnamlarya.
Nabi Yesaya birye nyabuk. Aminyan talak ara, Yerusalem mutuku unyak ninye arye nyanamake. ‘Nunda Allah Yahweh atibuk weik tonun kanye delinyabe,’ nyanamake. Tonda, ‘Nun ni Allah ati, nun kanye teleb usiliba, pin-pin kanye bonyabe,’ nyanamake. Ninye arye teleb cang baju ongolamak touk, Allah arye diksukum una deiyok ning weik tonun arisiliba, telebuk unamabe. Tonda, baju ongolamak touk, Allah arye ninye lyen ning arenamsile. Arenamsila ati, winipmanto ning ara, sal arye kil dopnulye talak ara, el kisok deice kweirya teleb ning kibuka yangalamle touk, Allah arye Israel ninye ati, pia teleb ulinamsile. Atonun, sal dopnun tenebice kilapu arye, dekna weik ning, emas ap, perak ap, dekna weik keil ap, sik nong deice karaklamak touk, Allah arye Israel ninye ati pia teleb ulinamsile.
Allah arye, sik Israel yala nang ati nyabuk. Aning nirya akunum winipnirye, anggunti pia teleb kipdeipsinyopura, anggun Yerusalem mutuku umunye nang eipmunce, anggun kanye weik deipnamlume. Tonda, na Allah arye anggun mikip kipdeipsinirye, anggun nong telebuk unamlume. Winipmanto ara, mok cepliba winiryuk yo mutmuta minopce paplirye, pia weik tonun tiklamle touk, narye melipsinyopura, anggunda pia telebuk unamlume. Aning akunum teleb kipdeipsinyopura, na amu tam pil moubuka dolulum nang ati ara, anang nirya eipsikirye, ‘Se, dipkoprob Allah Yahweh arye, el pia taruk mikip arye, el ‘Naʼ tenen, nang ati, dipkoprob melilule. Bukni, elti, ‘Nun likeʼ tenen, elti, mal olan nang ati ara, el yu upliba, sik dekna ati, weik arye wenenamle,’ tenebikirye, kel biknamake.
Amutuku noutam unamak nang ara, pia kanye deibuka, weik yupu tabikirye, sikce nati, ‘Naio telebe,’ nyabuka, si erepnikirye, kanye kil-kil mot nyanamake. Narye sik teleb kipdeipniba, yuk mutuku nang nirya ara sikti, ‘Se, sikda dipkoprob mambul nang,’ nyabuka, si erenamake. Tonda, sik Israel nang ati, ‘Sikda malyeuk unyake, dauaplye,’ nyabuka, malye yupu pia kum nyanamake. Tonda, minop talak ara, ninye yupa ara, mitik kipnin balamik bukni, aminyan talak ara, narye sikti, teleb kipdeipniba, anang sik yupa ara, nukman kumto, pia weik upnin banamake.
Allah arye Israel ninye lyeproplyopura, sik aninye Sion mutuku deice yakirye, atalak ara, kanye deibuka, pin-pin asa arye, teleb mot sepnin yanganamake. Ara, Allah arye sik un ning, teleb ning nirya areplibuk, aning deice kanye deibikirye, kanye teleb mot senamake. Allah arye sikti, arenamle ning ara, ani. Yakong atonun ning, el si ara gandum ap, anggur tapu duk ap, anggur duk teikuka, anggur din mek kwepnamake ap, tonda sapi basam ap, domba basam ap, kambing basam ap nirya arepnamle. Winipliba, sik mutuku ap, sik ap, pia teleb unamake. Winipmanto ning ara, ninye arye koulamak ning mekinak kouamikiba, bok teleb ulamle touk, sik kounamak ning nirya ara, ton pia kuoluna kum unamle. Teleb uk ulirye, weik unamle. Winibuka unamle anya arye, tuba tonap ikin kum unamake. Telebuk unamake.
Bukni, aminyan doyanamle talak ara, amutuku noutam nirya, tuba tonap teleb kipdeipyopura, weik kwalya kwalibuka dinmakirye, kanye deibuka, yupu ding weik nyanmakiba, yuk mutuku nang arye kekepnamake. Tonda, wel nang arye, dopdakirye, sik kilapu donamak nang ap, sik sal donamak kilapu ap ara, kanye deibuka, pin-pin kanye arye nyanamak yupu ara, yuk mutuku nang arye kekepnamake. Tonda, yuk nang babye, na Allah ati, telebe nyana ati, arin ning, sikce boyanuka, na si eren aik dam boyangakirye, kanye lon mot nyanmakiba, yuk mutuku nang arye kekepnamake. Sik amutuku unamak nang arye nyanamak yupu ara ani. “Se, nun ni koproba Allah Yahweh ara, pia telebnye ulule! Elda, im deice yin talin malaikat nirya ara, sik deiyoknye ulula ati, el mikip pia weik aulule. El ti, nunce ‘Pia telebe,’ nyanyabe. Allah ara, nunti, pia bico tenesulula ati, elce nunti, ‘Wininamsine,’ nyalin yupu deice nyapdeiamsuk yupu nirya ara, pia melibuka arenamsile. Elce bico tenesilye ning ara, pia min kume kum danamle!” Anang arye, ayupu nyanamake. Sikce, na Allah ati ayupu nyanamniaka ara, talye ati kume. Deiyok ara, ani. Anggun mal olan nang arye, malye weik kipdeibik bukni, narye tonap, pia teleb kipdeipniba, minop talak, pia teleb ulamuk touk upnamle. Narye winipnamsina ati, na si erena ati, ayupu nyapmakine. Na Allah Yahweh arye nyapmasina ati, aning nirya ara, dipkoprob nong upnamlarya!
Akat keil arye, cang poka dopnamlum ning ara, kota Yerusalem antanap dongobuka dana-dana tam nirya nukmunyopura, el cang nirya ara, 9 kilometer deice kiklibuka dopnamlume. Tonda, kota Yerusalem dona ati, anggun deiyok koupnamlum talak arye dipdongobuka, keting tamun oyanamle talak nirya ara, akota si ton si sinamak nang ara, ani. Akota el si ara, ‘Allah Yahweh, amutuku noutam tuba aulule,’ nyabuka, kota si ati sisinamlume.
Deiyok ara, anggun ni Allah Yahweh arye, aning-aning talibuka, eitam erebuka, Pia Mikip Weik Deiyoknye unirye, anggun kan-kan noutam arye, pia kalikuka melinamsine. Anggun mal olan nang ap, ikin ning yanuka, ikin usulul ning nirya ara, naryuk obuka, sirya dakanune. Anggun dobuka, deice tam erebuka, tupa teleb kipdeipkamsene. Tonda, anggun Israel yala nang ara, na amu tam ululumba, na Allah arye anggunti, kanye deipsinirye, na kanye kil-kil deice arye, teleb kipdeipnamsine. Tonda, na Allah arye, anggun nirya ati, kanye delisununa ati, anggun wini talak, ikin usulul ning ap, minop talak kum dasuk ning ara, na Allah arye anggunti, ila tamubuka, teleb kipdeipsinirye, winiryuk kam un ning arenamsine. Anggun Israel nang ara, na mapu koproba ululuma ati, anggunti tenepsinirye, teleb kanye deibuka, weik yupu deice arye, kanye kil-kil mot ton nyanamne. Allah arye nyabuk.
Ati ara, na Allah Yahweh arye nyapsine. Wini talak ara, na adiparyuk tamubuka, Yerusalem mutuku binuka unamne. Sik amutuku unyak nang ati, bico tenepnirye, pia melinamne. Winipnyopura, narye lo arepnyeba, na si erena ati ara, sik mutuku, Yerusalem mutuku noutamuk boyanuka deipnamake. Winipnamak talak ara, sik aik dona kel weik nang arye, anyasik-anyasik lipsisikuka dona ati, ‘Amutuku pala ara, yata wiribuka ulul do? El cang ara, yata barye ubuk do?’ tenen, cang tapu arye, kiklipdenamake. Winipnamne talak ara, Yerusalem mutuku nirya ara, tamubuka tuba teleb kipdeipnamne.” Allah arye nyabuk.
Ati ara, Zaitun mutuku nirya adiparyuk toplirye, keting panalyangan tam arye, otam keting kumulban tam lipdopnamle. Liplyeura, amutuku noutam ara, weik lu ara, lak kipnamla ati, anggunce adiparyuk alu mutuku noutam bikbik abuka binamlume. Bikbik abuka binamlumak ara, Asal mutuku dam binamlume. Ura, minop talak, ninye deiyoknye Raja Usia birye Yehuda mutuku talibuka ulamuk talak, sik mutuku noutam ara, weik mutuku lulukna lulukukba, anggun apu yapu nang arye minopce, bibik abuka binamik touk, Zaitun mutuku topnamle talak ara, anggun amutuku unamlum nang babye, atonun bibik abuka binamlume. Ati ara, na Zakaria birye si erenun Allah, na ni koproba Allah Yahweh ap, el im deice pil don nang, sik pia teleb lek malaikat nirya ap, sik neika yanamake.
Atalak ara, yuk-yuk mutuku, im sirya, mutuku sirya unyak nang nirya arye, Allah Yahweh damuk, bulubuka yanganamake. Ara, ‘Nun ap neika unamabeʼ tenen, atia. Sik anang babye, nara Allah, na mapu koproba kinamake. Wininamak talak ara, na Allah ap, sik nirya ap, amutuku noutamuk neika unamabe. Allah arye nyabuk. Nyabukba, nabi Zakaria birye, nyabuk. “Anggun nirya kekeplulume! Allah arye, ‘Aning-aning winipname,’ nyapdeipmasil yupu, nong akunum uplyopura, anggun nirya arye nati, biknamnulume. Ara, ‘Yo, elda dipkoprob Allah aryuk dopdeibukba, nun dam yanuka, laka nyapsuk touk, akunum unmal atiaʼ tenen, diba tenenamnulume. Nabi Zakaria birye, sik Israel tam nang ati, nyabuk.
Bukni, keil poka antanap dongopnamak ning ara, kum patapnamle. Deiyok ara, na Allah Yahweh arye, naryuk amutuku noutam ara, talibuka unirye, weik keil poka tembok antanap dongolamak touk ubuka, uku buk dilirye, antanap dongobuka ulamle touk winipnamne. Ara naryuk, amutuku ap, amutuku unamak nang nirya ap ati, melibuka kalikinamne. Tonda, amutuku noutam ara, na mikip weik ap, na teleb weik unilye ning ap, na weik dirina ap, deice aryuk, pia mambul mutuku unamle. Allah arye nyapnuke.
Nara, Allah Yahweh arye nyapsine. Nara, tuba tamubuka, Sion mutuku uk, yanamne. Ara, nara weik asik domikak, Yerusalem mutuku noutamuk unamnarya! Ninye nirya arye, amutuku ati, ‘Se, sik Yerusalem mutuku unyak nang arye, Allah ati, pia diba tenebikirye, el tibuk talibuka ukirye, el siuk erenyake,’ nyanamake. Tonda, na Allah Yahweh, im deice yin talen malaikat nirya ara, sik weik deiyoknye unune. Na mutuku koproba ara, Sion mutuku ati, ninye nirya arye, ‘E, amutuku ara, dipkoprob pia teleb lek mutuku ulule,’ nyanamake. Nara Allah Yahweh, amutuku noutam yanirye, amutuku pia unamne.
Se, Sion mutuku noutam ululum ninye, anggun weik tonun kanye deibuka, kil-kil asa upmunce, unamlulume. Tonda, anggun Yerusalem mutuku ululum ninye nirya ara, weik tonun kanye deibuka, weik yupu deice arye, ‘Telebe,’ nyanamlulume. Anggun elilulume. Anggun ninye deiyoknye, aning nirya bisina ap, tonda pia diksukum una ap, deiyoknye yanmala ati, dilulume. El ayanamlanye bira, ninye unyak touk dipdebuka, diksukum kibuka, yupu lipsisikuka, bokolina deiyoknye ulule. Tonda, ninye lyena deiyok ning boyanmale. Bukni, anye bira, el kanye talima nimalyap asa arye, ulirye, amu tam ulule. Anye bira, winiryuk keledai basam balye deice bukuka yanganmale.
Allah Yahweh arye nyabuk. Anggun nirya moubuka dipdelulume! ‘Na yupu laka nyalbanamle’ tenen, narye wipdeipniba yanamlanye bira, na bisik yalina ati dopdeipniba, el minopce yalirye, na bisik yabuka kintinipnamnile. Akunum kintinipnilyopura, na talye karin arye yanamne. Anggunce enumunye, na Allah Yahweh ara, na si eren aik koproba noutamakuk yanamne. Tonda, anggun kanye deiplumce, ‘Se, Allah el nyalin yupu nun dam laka lelyanamlanye bira, minopce yanuka nyapsutue,’ tenemunye bira, dipkoprob minopce nyalyanamsile. Nara Allah Yahweh, aning-aning ap, im deice yin talin malaikat nirya ap, sik weik deiyoknye birye nyapsina ati, dipkoprob winipnamle.
Tonda, narye, ‘Wininamlulume,’ nyabuka peterelamsise yupu nirya, ‘Aninye babye, aning atonun winibuka unamak’ tenen, na yupu bobuka peterelbinamlume. Wininamlum talak nirya ara, na dipkoprop nyapsine, na ap, sik ap, neikak unamabe. Winibuka daulamibya ani, sirya talak babye, na ap, sik ap, pia neikauk unamabe.” Yesus arye nyabuk. Telebe, na Matius arye ayupu sekdeipsine.
Yupu nyalamapnye bira, ninye nong atonun dayukce, tukwak mutuku yayukura, nun kan-kan noutamak neika ulamubu. El pia teleb ubuka ulamukba, elilamubu. El pia teleb ulula ara, talye ati kume. Ara Allah el Mi Koprop tonok ululnye bira, el uka. Allah el Mi Koprop ulamukce, el dipkoprop una ap, el dipkoprop yupu nyana ap, el kanye aryuk tukwak ninye ati bico tenebuka, pia melina deiyok ning ap, anye deice weik arye uamuk. Nun ni koprop Allah arye anye bira dopdeipsukba, pia telebuk ulamukak, elilamubu.
Asipdeyukura, Yesus arye nyabuk. “Na ti diba tenebikirye, kanye talima deipnikcopura, aninye dipkoprop na yupu kekepnikirye, anyuk talibuka dobolbanamake. Na yupu pia talibuka diksukumuk unyak talak noutamak nirya ara, na Ni Koprop Allah arye sikti, bico tenebuka melinamle. Winiplirye, na ni Allah ap, na ap, aninye sik un dam yanimirye, aninye ap kanye talima dukdongobuka neika unamabe.
Tonda, Allah Yahweh arye anggunti, amutuku noutam arye yakuka donoksiliba, ninye yuk mutuku nang unyaka noutam, binuka unamlume. Tukwak mutuku noutam, mutuku-mutuku nirya binuka unamlume. Amutuku binuka umunye talak ara, sik amutuku unyak nang arye, talye keil ap, yo ap, yuk teleb ning ap, dobuka memebukabikirye, sikce, ‘Nun ni aniʼ tenen, talye ning atibuk, si erenamake. Atalye ning ara, anggun babye, anggun apu yapu babye, kum bikamlum ning buk, talibuka, isa si erenamlume.
Ninye Mi Koprop Atonunye birye nyapnuk. “Yohanes, ance Efesus mutuku diba tenenyak ninye, sik melin malaikat ati ayupu sekuka dopdeiplyame. Dopdeipnulam yupu ara, ani.” Ayupu nyapmakilinye bira, talinye kume. Na sirik taruk arye kurya tekbarye talinune. Tonda, narye atekbarye weisa dirina ning eipmase ning noutamak banune. Narye ayupu nyapkine.
Eipsiba, Allah el weik bun ning dam, tonoknye birye ayupu nyabuk. “Wini talak ara, Allah el pia unamlak ara, el ap, ninye ap neika pia unamake. Kam tuba unyak ninye nirya ara, Allah el mapu kopropa unamake. Allah arye aninye nirya ati talipliba, sikce, ‘Nun Ni’ tenen, Allah el siuk pia erenamake. Allah elda, sik ap neika unamake.
廣告