Nyabukura, Yahweh arye amalaikat ati asibuk. “Yata wiripminya deice arye, el talima tamopnamle do?” nyabuk. Nyabukba, amalaikat arye nyabuk. “Aning ara, narye Ahab dam yupu nyalinamak nang nabi-nabi nang ati, sik talima noutam tilila yupu binuka nyapniba, kekebikirye, atilila yupu uk Ahab biti binuka nyalinamake,” nyabuk. Amalaikat arye nyabukba, Allah el si Yahweh arye tamubuka, aisa ati nyabuk. “Aning binuka nyapdeipminba, anabi nang arye Ahab biti atilila yupu nyabicopura, dipkoprob kekebuka Ahab talima tamupnamle. Ati, adiparyuk winipnalame,” nyabuka Allah arye, aisa ati nyabuk. Mikha birye nyabuk. Ura, aning eibuk ning nirya ara, Mikha birye Ahab biti nyabuk.
Zakaria 13:2 - Eipomek2 Atalak ara, atam mutuku nirya, na Allah, mikip weik deice arye, isa si erenyak ning nirya ara, kiliplopnamne. Winipnyeura, ninye nirya arye, aisa si nirya, tamubuka tonap, pia kum bikinamake. Lubakinuk unamake. Tonda, yuk nang arye, ‘Na Allah arye nyalul yupu, laka nyana deiyoknye, nabi unune,’ nyabuka nyanyak bukni, sik anang ara, isa siuk erenyake. Anang ap, isa nirya ap ara, amutuku nirya, narye yaknamne. 參見章節 |
Zakaria 13:2
40 交叉參考
Tonda, kam una kum ninguk, si erenyak ninye ara, kam ning bobuka, aisa dam yangakirye, si erenyak ninye ara, ikin weik kanye bobuka unamake. Sik nong deice ikin ning, pia weik unamle. Sikce talye ning, aisa si erena ati, kam ning obuka, uku dongolbalamaka ara, na kum melibuka donamne. Tonda, sikce isa si nyanyak ning ara, narye aisa si pia kum nyanamne.
Bukni, tia ati dopropmalinye birye, awein ning weilamlibuk, adomba basam do, sapi basam do, bai tam ulye kam ning, pia yu weik ning arye, abasam yanuka obuka dipmalirye, sekdoba batakmalye ning ap, yok toto seklopmalye ning ara, ‘Dip obuka dipmalʼ tenen, kel bikna ati, aning seklopmalye ning dobuka yalyopura, abasam deiyoknye birye, aobuka dipmalya, akunum eiplyopura, tia weilamlinye birye, abasam deiyoknye ati, dekna tamubuka, kum arepnamle. Aning kum punupnamlule.
Narye anggunti, “Winipnamlume, aning ara, kum wininamlume,” nyapdeipmasin yupu, mem yupu nirya ara, moubuka talipmunce, unamlume. Tonoknye babye, kum bataknamlume. Tonda, yuk talye ning nirya ati, ‘Nun ni koprobaʼ tenen, si kum erenamlume. Atonun, yuk ninye arye, sik si erenyak ning si nirya ara, sik si ton, pia kum sinamlume. ‘Aning arye melipsitingʼ tenen, kum yukunamlume. Na Allah Yahweh arye nyapsine.
Tonda, asum akunum winiplyopura, ninye nirya ara, sikce talilamik dekna weik kat ning, perak ap, emas ap, dopromikce, ‘Isa si erepnamapʼ tenen, aning deice arye, ninye urasin atonun kibuka, memepdeiamik ning, isa si erena ati, talye ning nirya ara, adiparyuk batakuka bindopnamake. Winipnamaka ara, sik anang ulamicak ara, yamba maka ap, bai tam balamle ayam mana ap ulyakuk, isa si erena ati, memebuka delinyak patung ara, batakuka bindopnamake.
Na Allah Yahweh arye, ninye tukwak mutuku unyak nang arye, wininyak ning moubuka elinuna ati, narye sik wenena ati, na elinun ning nirya laka nyapnirye, yupu bokeipnamsine. Zedekia ap, Ahab ap arye, pia malye ning winilamdika ati, sik bitinye ara, sik dengna ati, weik tonun wenepnamne. Sik bitinye arye, sik kayapu nang arye, akunum domik kilapu ara, alubuka yolamdik. Tonda, narye sikti, pia kum nyapse bukni, sikce, “Allah si deice arye nyapsinamne. Allah arye yanuka nyapdeipsukba, nun bitinye arye, sik Israel nang ati laka nyapnume,” nyabuka, tilila yupu dem nyalamdik. Ati, abitinye nang wenebuka opnamne,” Allah arye nyabuk.
Ati ara, atalak arye dipdongobuka, doyanamle talak nirya ara, sik Israel yala nang nirya ati, talye yupu nyanyak nabi nang arye ton, pia kum tikuka nyanamsiake. Tonda, sik tilila yupu nyanyak nabi nang arye, ‘E, atilila yupu nyapnyeba, amutuku nang arye, nati, kanye delinamnika ati, talye yupu uk, nyanamne’ tenen, tilila yupu ton, pia kum nyanamake. Atilila yupu nyanyak nabi nang nirya ara, kum kipdeipnamne atia.
Ati ara, wini talak arye dipdongobuka, doyanamle talak nirya ara, sikce, ‘Kume nun lengdar mapmaba deice arye, mambul ning elinyabe,’ nyabuka, tuba kum nyanamlume. Tonda, anggunce, “Kume, nun ap, akunum diamik nang, sik kanye ap, yupu sisikinmapce, sikce nyanmasiak yupu ara, ani,” nyabuka, pia tuba kum nyanamlume. Anggun kanye aryuk, talye tenebuka nyanmalum ning nirya ara, kum kipdeipnamne. Winipye deice arye, na mapu koproba, sik Israel yala nang ara, anggun malye winin ninguk, talibuka ulamluma kan-kan, ulamik nang ara, naryuk lyepdopnamne. Aning nirya akunum winipnyopura, sik amutuku ulamik nang nirya arye, nati ara, ‘Se, diba, Allah Yahweh ara, dipkoprob aulule’ tenen, biknamnulume.
Tonda, Israel nang wenena ati, dipkoprob na nabi bukni, narye ‘Nyapnukine,’ nyaplyeba, tonoknye kekeplirye, talye yupu nyalya deice arye, talye-talye yupu lak nyapdeiptu babye, anggunce, ‘Kume, Allah elce anye talima noutam nyapdeibuk touk nyapmale,’ tenenamlume. Ara, sik Israel nang malye unyak ning, wenena ati, naryuk talye yupu nyalinune. Bukni, atalye yupu nyalul nabinye bira, wenepnirye opnamne. Na mapu koproba, sik Israel yala nang dam arye, dopkwetepnamne.
Aning ara, na Allah Yahweh, aning-aning nirya talibuka, deice tam erebuka, pia mikip weik ununye birye, ayupu nyapsine. Mesir mutuku noutam mambul weik asik domik ning, el si Memfis mutuku noutam unyak nang arye, isa si erenyake. Isa si erena ati, ninye urasin atonun ning puturubuka, isa si erenyak ning ap, tonda aisa ap babye, aning nirya kum kipdeipnamne. Winipnyopura, tonda Mesir mutuku noutam ara, ninye deiyok nang, Raja nang ton kum kipdeipniba, ninye deiyok nang babye, pia kum unamake. Aning winiplya deice arye, Mesir mutuku noutam unyak nang nirya ara bikikirye, sik ilil pia weik unamle.
Akunum boyasinyopura, anggun nong nirya ara, narye pia mek diksukum arye, anggun nirya mek likuka, teleb kipdeipnamsine. Winipsinyopura, anggun malye winimunce, Isa Mutuku Dongonye si erelulum ning nirya batakmumce, telebuk unamlume. Ara, narye mek diksukum busubuka, anggun nong deice purupdonoksinya deice arye, anggun talima pum tam malye winilulum ning ap, Isa Mutuku Dongonye si eremunye ning ap nirya ara, kum daneipnamsine.
Narye anggun malye ululum ning nirya ara, kum daneipsinirye, teleb kibuka un ninye uk, kipdeipnamsine. Winipsinyopura, anggun wa wibuka kounamlum ning, jagung atonun ning, el si gandum ara, narye nyapniba, pia teleb kibuka bongobuka paplirye, duk weik mouplibuk, weika arye libuka dinamlume. Duk pia telebuk mounamla ati ara, na mapu anggunda, din ning ton pia kum patanamsile. Kwaning patana li ton kum arenamsine.
Tonda, minop talak ara, Isa Mutuku Dongonye si erelamikce, malye un ning weik arye, winilamik bukni, atalak arye diprongobuka dounamle talak noutamak nirya ara, aning nirya tuba tonap kum wininamake. Isa Mutuku Dongonye si erebikirye, malye un ning ton kum ubikirye, malye kum updeipdanamake. Na Allah arye, ‘Like,’ tenenun ning nirya kum wininamake. Atonun talye ning yupu nyana ap, kanye bona kum ning, ninye arye kintinibuka deibikirye, si erelamak ning ara, sikce kum erenamake. Tonda, na Allah ati, batakaninyakce, pia malye-malye weik ulamik ning ara, tonap kum wininamake. Bukni, aning nirya ara, narye kum kipdeipnirye, aninye nirya teleb kipdeipniba, sikti, lyepropnamne. Winipnyopura, sikda na mapu koprop unamake. Nara, sik ni koproba Allah unamne.
Yahweh arye nyapnuk. “Se, anda ninye sirika arye deipkiknye ulyama ati, anda minopce dipnalame. Nara, anyaik ununa deice arye, aning-aning nirya talibuka, ninye deiyok kibuka unirye, tukwak mutuku nang nirya ati, yupu bokolinamne. Anyaik noutam ara, na yan arye yanibuka unamne. Ati ara, ninye deiyok nang bunyak ning, el si ara takhta atonun, anyaik ulule. Ati, asukum ara, na unirye, Israel yala nang, sik kan–kan pia aulamnirye, sik Israel nang ati, ‘Aning winipnamlume, aning ara pia kum wininamlume,’ nyabuka, yupu bokolinamne. Ara, sik Israel talye nang ap, sik deiyok-deiyok kibuka, Raja-Raja unyak nang arye, na pia leknye si ati, tuba yaninikirye, malye kum kilinamniake. Sikce na pia teleb si, yaninikirye, malye winilininyak ning ara, ani. Ara, isa mer ati, ‘Nun niʼ tenen, si erenyake. Tonda, sik mutuku talibuka, deiyok-deiyok nang, sik Raja nang dibikiba, na si eren aik bai tam domik keil poka dam weinyaka deice arye, malye kililanyake. Minop talak aning nirya winilamik bukni, wini talak arye dipdongobuka doupnamle talak nirya ara, aning tuba kum wininamake.
Anggun Israel noutam ululum nang nirya ara, wenebuka opsikirye, kum kipdeipnamsiyake. Ara, anggun ululum mutuku nirya ara, weik asik doplumak, ulubuka sikce buklopnamake. Atalakuk anggunce, si erelulum isa si erenak ap, isa arena ati, mesba doplumak ap, tonda anggunce, ‘Isa si erenamapʼ tenen, puturubuka deiplum patung ap, tonda, ‘Isa mer arye kekepnamsiyakʼ tenen, sik si eremunce, siltong lena teleb ning dobuka, uku dongopmunyak babye, sikce buklopnirye, kum kipdeipnamne. Tonda, yata ning do nirya, anggunce, ‘Isa si erepnamapʼ tenen, kintinibuka deiplum ning nirya babye, uluplopnirye, sirya daknamne. Aning nirya ara, sikce bukuka bataknamne. Allah Yahweh arye nyabuk
Ati ara, anggun Israel ninye ati nyapsine. Anggunce talye ning memebuka deiamlumce, aning si erelamlum ning ara, bataknamlume. Atalye ning arye, anggunti kum melipsitinge bukni, naryuk anggun patasilye ning melibuka aresunune. Winipmanto ara, kwarang yo tiklirye, bok teleb ubuka, sulum-sulum alamle atonye bira, na unune. Tonda lemon yo duk aketing tamun, aketing tamun duk mounauk ulamle touk, upnin banamsine. Ati, narye anggunti, pia melinamsine. Wininamna ati, anggunce nati, ‘Elcuk aning-aning nirya ara, Allah elcuk melinamsile’ tenen, na siuk erenamnululume. Na Allah Yahweh arye nyapsine.
Se, na mapu Israel ninyeo. Na arye melipsinyopura, anggunce Isa Mutuku Dongonye el si Bahal, el si erena ati, anggun taruk arye, puturubuka delilulum ning ara, adiparyuk luba kipnamlulume. Bahal ap, yuk Isa Mutuku Dongonye si ap eremunye ning ara, narye, ‘Sik si bam bol deice arye, aning si tonap kum erenamak’ tenen, asi kum daneipsine. Winipnamna deice arye, anggunce aisa si tonap kum nyanamlulume. Allah arye Israel ninye ati nyabuk.
Na arye anggun dopropsinirye, pia ati, na kil atonun kipdeipnamsine. Ara, narye anggunti, dipkoprob kil dolamak atonun, kipnamsina deice arye, diksukum winin ninguk kipdeipsinyopura, telebuk unamlume. Tonda, narye teleb kipdeipsiniba, ninye nirya arye, yuk nang nirya ati, diksukum yupu uk nyabikirye, dipkoprob yupu uk, bokolilanamake. Tilila yupu ap, minina yupu ap ara, kum danamle. Tonda, na Allah arye, anggun Israel ninye ati, pia bico tenepsinirye, tuba-tuba melinamsine. Aning nirya ara, pia kum kum danamle. Pia ati, telebuk unamlulume.
Tonda, anggunce tenelulum ning ara ani. ‘Kume, Allah arye, el yupu nyapliba, laka nyanyak nang, nabi-nabi arye tilila yupu deice arye, peteresikce yupu ara telebe,’ tenemunce, ‘Dipkoprop nyan yupu ara, nun like,’ tenelulume. Tonda, tilila yupu nyan nabi-nabi nang arye, “Amutuku uk ubirye, anggur mek kanye wangalamak ning ap, yuk yu mek ap, teleb nyalamle ning nirya, weika arye dina ara teleb uka,” nyabuka nyapsitingopura, anggun malye winilulum ninye arye, atilila yupu nyana nang ati, kanye deiptume. ‘Tilila yupu nyanyak nabi-nabi nang ara, nun kanye telebe,’ tenemunce, ato nang ati kanye delilulume. Winiluluma ati, amutuku arye batakuka, yuk mutuku bindopnamlume, nyapsine. Allah arye nyabukba, nabi Mika kekebukce, sekuk.
Ati ara, na Allah Yahweh arye, sik Pilistin mutuku unyak nang ati, yu arye wenepnyopura, sikda ilil pia weik unamle. Tukwak mutuku, im sirya, mutuku sirya nirya, noutam unyak nang arye, talye isa ati, ‘Nun ni koproba,’ nyabuka, si erenyak talye ning ap, isa-isa nirya ara, na Allah arye obuka, sirya daknirye, malye kiplopnamne. Winipnyopura, tukwak mutuku sirya, im sirya nirya, weik laut kup-kup unyak nang ap, laut mekwen noutam arye, antanap dongobuk mitik mutuku, pulau-pulau deice unyak nang nirya ara, Allah Yahweh dam ngangkanudongobikirye, kutam tuku dipdongobuka, na Allah ati, si erenamniake. Ara, sik nirya, mutuku yuk-yuk daunyak touk, sik talibuka unyak mutuku noutam aryuk, na Allah siuk, erenamniake.
Yesus arye ayupu tonap nyabuk. “Kekenululume. ‘Tilila yupu peteren nang arye yanuka peterepsikcak’ tenen, kanye moubuka unamlulume. Ara, anang arye, ‘Allah el yupu peterenyabe,’ nyabuka talya nyaplopsikiba, tilila yupu peteren nang yanuka peterepsicopura, mangkau kanye bobuka, sik nyanyak yupu diba teneluluma ati, anggun moubuka tenepmunce unamlulume. Anang sik winina ara, kanye talima mitang arye teleb winin nang atonun wininyak bukni, sik talima ak ara, yua basam atonun unyake. Ara, yu una ap, wirik-wirik ana ap, unyaka ati nyapsine.
Kume, na isa mer nirya yakuka dolkwetenya ara, Mutuku Dongonye mikip deice arye kum dolkwetenune. Allah el mikip deice arye yakuka dolkwetenune. Aning ati ara, Allah ninye weik lyeplirye, sik kanye talima talinamle talak akunum deiyok uple. Anggun dam akunum yanmale. Na isa mer bisibuka dolkwetenuna deice arye, laka akunum eiplume.
Amutuku binuka wekmunye talak ara, amutuku unyak ninye arye, ‘Isa si erepnamap’ tenen, pala keil lelebuka yangapdeibikirye, kam ning obuka, Isa Mutuku Dongonye ati arinyak sukum ap, ‘Isa asukum ulul’ tenen, cang keil tikilinyak sukum ap, Isa Mutuku Dongonye kil, el si Asera, el si erena ati, cang yo ikilamice sukum ap, ninye urasin atonun puturubuka deibikce, si erenyak patung ap, aning-aning nirya daklopmunce, uku dongopmunyopura, amalye ning nirya sirya daknamlume. Amutuku ninye arye, talye ning ati, si erenyak ning nirya binuka obuka, sirya dakuka, sik si kiliplopmunce, kum daneipnamlulume.
Bukni, na yupu laka nyana deiyoknye kum bukni, narye, ‘Wininamlulume,’ nyabuka, kum nyalamse yupu bukni, yuk talye nang, narye kum wipdeiamse nang arye, sik bidamnye kanye aniryuk, ‘Allah arye nyapnuke,’ nyabuka, na si deice arye tilila nyabice nang ara, adiparyuk oplopnamlulume. Aning atonun, yata nang do nirya, Isa Mutuku Dongonye el si do, yuk-yuk talye ning si do, sik si erenyak ning deice arye, ‘Wininamlulume, wininamlulume,’ nyabice nang ara, adiparyuk oplopnamlulume. Sikda, narye kum wipdeipse nang arye, tilila yupu nyanyaka atia. Allah arye nyapnuke. Musa birye nyabuk.
Pia dipkoprob wininamluma deiyok ara, ani. Ara, anggun Israel yala nang ara, ayupu talibuka unamlume. Kanaan mutuku tuba unyak nang babye, sik unamakak ara, anggun Israel nang ap, ansinibuka una meme. Tonda, sikce wininyak ning ara, anggun Israel nang ap, neika una kume. Amutuku nang, sik si erenyak isa si ara, ‘E, isa arye ton melipsitingeʼ tenen, sik si erebuka, pia kina meme. Tonda, anggun Israel ninye arye, Kanaan tam nang melibuka, sik si erenyak ning ati, ‘Melipsitingʼ tenen, sikti, si kum erenamlulume. Tonda, isa sik si erena ati, kutam tuku dipdongobuka, si erebuka, sik pil kum donamlume.
El yupu ara, mikip weika arye ayupu nyabukba, kekepse. El yupu ara, ani. “Weik asik domika, el si ara Babel mutuku, aninye ati Allah arye malye kibuka oplopnule. Oploplirye, amutuku ap amutuku unyak ninye ap, amutuku noutamak, unyak isa nirya ap, Allah arye kum daneiplirye, sirya daknamle. Amutuku noutamak ara, isa ayala-yala nirya unyake. Tonda ninye unak kum ati, pia malye maka weik daunyake. Ara teleb wininyak nang arye, ‘Amaka yala nirya ara, pia malye maka anya arye, nun lik’ tenen, pia Kum dinyak maka yala nirya amutuku noutamak unyake.
‘Kurun kuda basam deice bukuka balulnye, malye kipnuyap’ tenen, pirilenmek bukni, kum winipmanto unmekak eipse. Ara, kurun kuda basam deice bukuka balulnye, el yin talin nang arye, Kam Ulirye, Pia Malinye ati tomobikce tapu koubik. Tonda, Tilila Nyana Deiyoknye ton tomobikce, tapuko koubik. Anye bira, tilila nabi ulamuk. Elce, ‘Malye Kam Ulul Ning, na ni kopropa ulula ati, el melipnun’ tenen, min arye ninye kum winipmanto ning mambul pil dolamuknye, el si ara, Tilila Yupu Nyana Deiyoknye tomobik. Minop talak ara, aTilila Nyana Deiyoknye birye, ninye kum winipmanto pil dolamukba, ninye weika arye tilila ninguk diba tenelamik. Elti diba tenelamik ninye ara, Kam Ulirye, bukni, Pia Malinye el pitin kilina ning, el nomor sik nong bol deice sekikce, el urasin aton ning puturubuka deiyamikba, elti, si erelamik nang ati nyapne. Kurun kuda deice bukmoknye ap, el tam nang ap arye, Kam Ulirye, bukni, Pia Malinye ap, Tilila Yupu Nyana Deiyoknye ap, tilila nabi ap tomobikce, uku pia dilamukak pum tam dopkwetebik. Uku pia dilulak ara, mek kwen urasin atonun ulule. Bukni, amek kwem ara, mek kwen sirika kume. Ara kumasan bol keil, akeil si ara belerang, uku buk weika arye dipliba, keil but-buta tong ara, sikin tong atonun tong weik nyalamle ning ap, tin ap, welelamukce, mekwen atonun deiamukce, uku buk paklamukce, uku pia dilamukak noutamak dopkwetebik.
廣告