Zakaria 10:5 - Eipomek

⁵ Yehuda yala nang wipdeipnirye, mikip arepneba, sikda mal olan deiyoknye birye deiyok kiplirye, yuk nang ap mal olalamica ani, ninye nirya obuka, sirya daknamake. Aoplobice nang, sik nong deice ara, talye bental deice yanibuka balamak touk wininamake. Ara, na Allah Yahweh arye sik Yehuda yala nang ati melipniba, sik mal olan nang ati, nirya obuka sirya dakanamake. Aning atonun, yuk mutuku ninye, sik yin talin nang arye, kuda basam balye deice bukuka yanganmace nang babye, ayin talin nang ara, nirya obuka, sirya dakanamake.

Zakaria 10:5 交叉參考

2 Samuel 22:43

Narye, aninye obuka, sirya dakamse talak nirya ara, atu butbuta lubuka yamulamaka atonun, anang obuka, sirya daklamse. Tonda, narye sikti, obuka bisilamsa ara, ninye weik arye, bisik deice bakirye, bental yanibuka balamak touk ulamse. Anang nirya opnin balamsirye, sirya daklamse ati nyapne.

2 Samuel 22:8

Tonda, mutuku-mutuku nirya lulukukce bindakuk. Tonda atalak ara, im ulul ning deiyok kibukak nirya ara, weik arye lulukukce lulukdayuk. Ara, urdem arye kume, Allah el yu weik arye winibuka ati, aning-aning nirya lulukdayuk.

2 Raja-Raja 9:33

Yehu birye, anang anyaik pum unmekbuk, eibukopura, nyabuk. “Izebel bira, adiparyuk dobukapmunce, eitam arye, tuku tam dopkweteplulume nyabuk!” Nyabukura, Izebel dobuka, tuku tam dopkwetebik. Winibikba, Izebel el nong tuku deice sakuk talak ara, el ining ara, weik serik-serik abukopura, anyaik bai tam abilinga dam ap, Yehu el kuda basam deice ap nirya dubuk. Tonda, Izebel el deilyu sakmok ning ara, Yehu el kuda balye deice bukmoka arye, akuda basam arye, el dipmoka yanibuk.

Mazmur 18:42

Anang ara, na ap, sik ap olanmabu talak ara, sikce, ‘Se, yatanye birye yalirye, melibuka lyepsutu do?’ tenen, an Allah ati morobik bukni, ance sikti, bataknauk winiplume. Diba, na mal olan nang ara, ‘Allah Yahweh arye yanuka melipsutu do?’ tenen, anti weik yupu deice morolamik bukni, an Yahweh ara, anang arye morolamkik yupu pia kum kekelamlume.

Mazmur 20:7

Winida na akunum kel bikse. Allah arye, ‘Anye bira, ninye deiyok kiplirye, na mapu koproba, Israel yala nang nirya ara, taliplirye, sik rajanye unamle’ tenen, wipdeiamnuka ati, dipkoprob melipnilirye, pia lyelonamnile. Allah ara, im deice arye, Pia Teleb Lekak arye, na moronun ning kekepnilirye, melinamnile. Allah, el mikip weik, sirik taruk deice melinamnila deice arye, na mal olana ati, yu nang nirya obuka, sirya daknamnarya!

Mazmur 33:16

Tonok mutuku ninye arye, ‘Omutuku unyak ninye ap, sik ninye deiyoknye Raja ap, olbinuyabe,’ tenebikirye, olbinmating buk, otam mutuku ninye deiyoknye birye, ‘Sik opnikcak’ tenen, el yin talin nang, yupa pia weik kintinip deiptua babye, kum lyepdatue. Aning atonun, el amu tam yin talinanye birye, ‘Nara, mikip weiknye anya arye, na mining mikip deice arye, yuk nang obuka lyepdatinye,’ teneptua babye, anye babye, el mining mikip aryuk, kum melibuka lyepdatue.

Mazmur 44:5

Se, na ni Allah, ancuk talinilyama ati, na ninye deiyoknye, Raja atonun ulyame. Allah, ancuk, “Yuk-yuk mutuku nang nirya ati, Israel nang sik dam binuka obikirye, sik mutuku nirya dobuka talipnamake,” nyabuka, nyalin yupu arye nyadeipsulum touk, unyabe. Aning nirya ara, ancuka!

Mazmur 45:3

Na si bambol deice arye, nyapnun yupu ara, kel weik yupu sekenanye birye seklamle touk, nyapnune. Ance kekena teleb yupu nyasilyam ning ara, nyapsiminyeba, ninye kekebikirye, kanye deibuka unyabe. Teleb yupu nyasilyame. Ati ara, Allah arye anti, teleb kipdeipkiliba, pia telebuk unalame.

Yesaya 10:6

Na kayapu Israel nang ara, sikce na nyamse yupu kum kekenyakce, narye, ‘Teleb winin ning ara ani,’ nyanun yupu nirya babye, yaniltakanyaka ati, Asyur mutuku nang dopdeipsinyeba, Israel tam nang olbinamake. Israel nang arye, malye weik unyakba, na yu weik upnuka ati, narye sik Asyur mutuku nang ati, “Sik Israel nang ara, adiparyuk olbinulumume,” nyabuka, sik Asyur mutuku nang dopdeipsiniba, na mapu koproba Israel nang ati, obuka sirya daknamake. Tonda, sik anang obikirye, sik talinyak bona ara, binuka dalubuka dopropnamake. Sik Asyur mutuku nang arye, na mapu koproba Israel nang ara, talye bisikak buta yanilongolamuk touk kibuka, obuka yanipnamake.” Allah arye nyabuk.

Yesaya 25:10

Aminyan talak ara, Allah elce el mapu nirya ati melipnamle bukni, Moab tam unyak nang ati ara, sik unmakcak uk, yaniplirye, amu tamuk kipdongopnamle. Winipmanto ara, weik pala bental sukum, basam dei ap aupmalyopura, ‘Bental ap, dei ap bolpipsilyakʼ tenen, maning ap, yo mutmuta ap dobuka, bental deice deibikcopura, yanilamak touk, Allah arye sik Moab nang ati, wenebuka yaniptapnamle.

Yesaya 31:1

Allah arye nyapdeibukba, nabi Yesaya birye sekeipsuk. ‘Yuk mutuku nang arye olyanamsiyak talak, nun melibuka lyepnamsiyak’ tenen, Mesir mutuku nang dam morolbanyak nang ara, pia bicoe. Sikce utenenyake. ‘Se, Mesir mutuku yin talin nang ara, yuk ninye olana ati kuda basam deice bukikirye, minopce bikbik abuka bana ati, mikip dobuka banyaka anya arye, sikda weik mambule. Tonda, se, Mesir mutuku yin talin nang pia weik tonun unyake. Sik kuda tuku deice libuka banyak ning ara weik mambule,’ tenenyake. Bukni, winibuka tenenyak nang ara, Allah Yahweh aning-aning nirya talibuka deice tam ulirye, Pia Diksukumuk ulirye Israel ninye melibuka kalikilinye biti, ‘Nun ton melipsilyame,’ nyabuka kum moroninyake. Winibuka unyak ara, walwal arye wininyake, nyapsine. Allah arye nyabuk.

Yesaya 41:12

Anggun Israel nang arye, anggunti, ‘Anang optibye,’ tenen, piripdenamsiak ninye ara, ‘Dan mutuku unyak do?’ tenen, eprenamlum bukni, anggunce anang ara kum eipnalume. Anggun ona ati esinyak nang nirya ara, narye kum kipdeipniba, anang ati tuba kum tenenamlume.

Yesaya 41:25

Anggun Israel ninye ara, malye weik winimunya ati, narye anggun wenena ati, anggun ululum mutuku arye dipdongobuka outam mutuku ululnye, yu weiknye ati yukupniba, yanamlarya. Nyapnyopura, elda keting panalyangan tam arye yanamlarya. Anye birye, ‘Winipnamlulume,’ nyapnamle yupu noutamak ara, na si ton nyapnamle. Anye bira, yuk yala ninye nirya obuka malye kipnamlanye ulula anya arye, winipmanto ara, kel nang arye kira tuku yanibikirye bental upliba dobuka sik tenebice ning memenyak touk, ayu deiyoknye birye, yuk mutuku deiyok nang ap, Raja nang ap ati, yanibuka darapsiliba, sirya daknamsile. El tenelye touk talye lukparabuka winipnamlarya.

Yesaya 8:9

Allah elcuk nyabuk. “Awinipnamle ning ati, mutuku-mutuku nirya, daumunye ninye ara, ayupu kekepmunce, kanye kum deipnamlulume. Anggunce, ‘Ninye olbinamap’ tenen, kanye deibuka, weik yupu nyabuka, kulmana lulamlum bukni, na Allah arye wenebuka opnamsin ati, kanye imun bobuka unamlume. Anggun yuk pera mutuku daumunye ninye ara, kekeplulume. ‘Ninye olbinuyap’ tenen, yin ap, mal ap, ya ap, aning-aning nirya kintinilinamlum bukni, na Allah arye wenebuka opnamsin ati, imun kanye bobuka unamlume. Narye anggun nirya obuka, sirya daknamsine.

Yehezkiel 38:15

Ara, anda pia pera sukum dabu tam, arah utara noutam uminyak arye, an ap, an yin talen nang, yupa kum nukmanto nang ap, yuk-yuk mutuku daunyak nang, anti melipnamak nang weik ton ap, Israel nang unyakak minop binuka opnamlyame. Anggun nirya ara, ninye ona kel weik nang arye melipkikiba, anggun neikauk Israel nang unyak mutuku binuka onamlume. Anggun mikip deice arye, anggun nirya ara, kuda basam balye deice bukuka, ‘Israel nang olbana ati, minpola bikbik abuka banamlulume.

Amos 2:15

Tonda, mal oldan ati, weik kel nang babye, adiparyuk yin kum dopmanto upnamake. Tonda, minopce bikbik abuka balamak ninye babye, adiparyuk bikbik abuka, kum binmanto upnamake. Tonda, kuda basam balye deice bukuka, bikbik abuka balamak nang babye, bikbik abuka kum binmanto upnamake. Sik nirya ara, ikin weik upliba, lyepdanmanto kum upnamake. Sik nirya ikin ninguk dopropnamake.

Mika 5:8

Atalak ara, Allah pia weik arye, el mikip dobuka Israel ninye deice deiplyopura, Israel ninye arye, sik mal olan nang nirya obuka, sirya daknamake. Winibikirye, sik mal olan ninye nirya ati, malye kibikirye, pia kum kipdeipnamake.

Mika 7:10

Minop talak ara, nun mal olan nang anggun taleamsikce, nyalamsike. “Anggun ni Allah ara, dan sukum ulul do? Allah arye melibuka kum lyepdopnamsil do?” nyabuka asilamsikce, nalilamsike. Bukni aminyan talak, Allah Yahweh arye nunti lyepsilirye, nunti teleb kipdeipnamle ning ara, sik eibikirye, alye dakdanamake. Tonda aminyan talak, Allah arye nun mal olan nang ati, yaniplirye, aninye obuka kum kipdeipnamle. Winiplyopura, winipmanto ara, ninye bisik balamicak, bental yanibuka balamak touk, Allah arye nun mal olan ninye nirya ati, yaniplirye, obuka sirya daknamlarya. Nun nirya aning eibibirye, biknamabe. Nabi Mika birye, Israel ninye nirya ati, aminyan winipnamuk ning tenebukce nyabuk.

Hagai 2:22

Aning-aning nirya luluknamle talak ara, tukwak mutuku unyak ninye arye, ninye deiyok kibuka talinyak nang nirya ap, tonda tukwak nang mikip weik arye, yuk pera mutuku unyak ninye nirya talinyak deiyok nang ap nirya ara, bisibuka malye kipnirye, kum kipdeipnamne. Tonda, sikce ninye olbana ati, kuda basam arye lipdobikiba, tuku deice bana ati, memebuka deibik ning, el si kereta kuda ap, aning deice bukikirye, bikbik abuka balyebuk, ninye olbanyak nang ap, kum kipdeipnamne. Tonda, kuda basam balye deice bukikirye, olbalamak yin talin nang ap, sik kuda basam ap opnirye, aning nirya ara kum kipdeipnamne. Ara, sik aning deice arye bukuka banyak nang nirya ara, sikce, sik bidamang nanguk, parang ya doprobikirye, opdanamake. Winipnamaka deice arye, narye sik nirya kum kipdeipnamne.

Zakaria 12:4

Winipnamak bukni, atalak noutam ara, sik yin talin nang arye, bukuka bana ati, sik kuda basam ap, tonda, sik kuda basam balye deice bunyak nang ap nirya ara, narye kanye talibuka deipnirye, sik tenen ning nirya ara, walwalabuka kipdeipnamne. Tonda, sik akuda basam deice bukuka banyak yin nang nirya ara, motona talin nang atonun kipdeipnamne. Winipnirye, sik Yehuda yala nang, amutuku noutam unamak nang nirya ara, ‘Yu nang arye obikcakʼ tenen, kalikinamne. Bukni, sikce nati mal pin nang, sik kuda basam nirya ara, asing kun ning arepnyeba, sik asing nirya kupnamle.

Zakaria 12:8

Atalak ara, ‘Yuk mutuku nang arye, na mapu Yerusalem mutuku unyak nang obikcakʼ tenen, narye Yerusalem mutuku unyak nang ati, melibuka kalikinamne. Tonda, sik nirya ati, na mikip arepnyeura, sik amutuku noutam arye mitang kibuka unyak nang nirya babye, melinya deice arye, mikip weik nang unamake. Ara, minop talak Raja Daud el mikip weik ulamuk touk unamake. Atalak ara, sik Yehuda tam unyak nang nirya ati, Daud elce deibukba, deipdanin yangalamik nang kan-kan noutam, el tam nang arye, ninye deiyok kibuka, anang nirya pia teleb kibuka talipnamake. Winipmanto ara, na Yahweh arye, na im deice pil don nang malaikat dopkwtepnyeba, amalaikat arye, anang melibuka kaliklamak touk, Daud tam nang arye, pia teleb kibuka anang talipnamake. Tonda, winipmanto, naryuk anang sik Raja uptinirye, anang pia teleb kibuka taliptinye touk, Daud tam nang arye, pia teleb kibuka, anang talinamake.

Zakaria 14:13

Atalak noutam nirya ara, Allah Yahweh arye, amutuku sirya im sirya nirya unyak nang arye, ‘Yerusalem mutuku nang optinye,’ tenenyak nang nirya ati, ilil una ap, kanye deibuka deilin ning ap nirya ara, areplyeba, sik anang nirya ara, sik kanye tenen ning ap, kanye walwal abuka unauk unamake. Tonda, sik nirya arye, weik ilil uplyeba, sik kayapu nang koproba ati bukni, taruk talipdakirye, mal olana uk unamake. Otam nang ap, atam unamak nang ap atibuk, tomobikirye mal olana uk unamake.

Zakaria 14:3

Aning nirya akunum winibikcopura, daulamikca ani, aminyan talak ara, Allah Yahweh yanuka, ‘Yerusalem mutuku nang, opnamapʼ tenenamak nang yala nirya, mutuku sirya, im sirya nirya unamak nang ati, elcuk olbinamle. Aning ara, minop talak Israel mutuku noutam ulamik nang ap, Allah ap, sik yuk mutuku nang ati, neika olbinamik touk, Allah arye upnamle.

Zakaria 9:13

Na Allah arye, anggun Yehuda yala ninye nirya ati, na ninye on yin atonun kipdeipnamsine. Anggun Israel ninye ara, na ninye on mal atonun kipdeipnamsine. Tonda, anggun Sion mutuku ululum ninye ara, na ninye on parang ya atonun kipdeipnamsine. Winipsinyopura, anggun nirya arye, sik Yahudi yala kum ninye, Yunani yala ninye unyak mutuku olbinamlulume. Minop talak obuka, sirya daksik ninye ara, anggunce obuka malye kipnamlulume. Na Allah arye, Israel yala ninye ap, Yehuda yala ninye ap nirya ati, nyapsine,” Allah arye nyabuk.

Matius 28:20

Tonda, narye, ‘Wininamlulume,’ nyabuka peterelamsise yupu nirya, ‘Aninye babye, aning atonun winibuka unamak’ tenen, na yupu bobuka peterelbinamlume. Wininamlum talak nirya ara, na dipkoprop nyapsine, na ap, sik ap, neikak unamabe. Winibuka daulamibya ani, sirya talak babye, na ap, sik ap, pia neikauk unamabe.” Yesus arye nyabuk. Telebe, na Matius arye ayupu sekdeipsine.

Matius 4:3

Din pia patabukopura, Isa Mutuku Dongonye arye, ‘Yesus piripdenun’ tenen, Yesus dam nyalyayuk. “Anda dipkoprop Allah, el Mi Koprop ulaminyopura, aubuk keil dopropmince, ‘Kwaning kiplyame,’ nyapminba, kwaning daliba, aning dobuka diptume,” nyabuk.

Lukas 24:19

Nyabukura, Yesus arye tamubuka, “Yata ning ati nyapmanilam do?” nyabuka asipdeyuk. Asipdeyukura, sik bitinye nang arye tamubuka nyaprik. Kume Nasaret nang arye deiyamiknye, el si Yesus ati nyapname. Yesus ara talinye kume. Elda Allah yupu laka nyalamuknye nabi ulamuk. Tonda, Allah nyapdeibukura, Yesus arye nyalamuk yupu ap, pil dolamuk ning ap ara, weik mikip deice arye winilamuk. Ninye nirya arye aning nirya elilamuburye, ‘Anye bira mikip weiknye’ tenen kel bikamubu.

Rasul 18:24

Ura, Paulus tuba peterepra balamuk talak ara, tonok Yahudi yalanye, el si ara, Apolos, mutuku si ara, Aleksandia deiamiknye bira, Efesus mutuku yayuk. Apolos ara, aning-aning nirya kel kiyamuk akarye, weik kel kopropnye ulamuk. Tonda, Allah yupu nirya weik arye kel kiyamuk.

Rasul 7:22

Kwangnalamuk talak nirya ara, Mesir mutuku ninye weik kel kiyamik ning nirya Musa ati peterelamikura, weik kel kipnin balamukce, el yupu nyalamuk ning ap, el pil dolamuk ning nirya ap, weik mikip deice arye winilamuk akarye pil teleb ubuka dolamuk.

2 Korintus 10:4

Diba tenena kum ninye arye, ‘Opsilye ning malye kipnamap’ tenen, talye tukwak yin talibuka olbalamak touk kum unyabe. Sikda, talye tukwak yin talibuka olbalamak bukni, nun talinyap ning ara, pia yuke. Allah arye el im deice mikip ulul ning melisiliba, malye ning malye kina ati aning winibuka yanilongonyabe. Yin talin nang arye, anggunti opsikce ninye ati, sik domikce asik mikip asik uptu babye, anyasik nirya uluplobikirye amutuku ninye nirya obuka sirya daklamak touk, Allah melisilyeba, nunce im deice mikip ulye ning talibirye, Allah yupu yanina ninye nyanyak yupu nirya malye kibuka yaninyabe.

Ulangan 20:1

Anggun mal olan talak upliba, anggun mal olan nang ap, mal olalbanamlum talak ara, anggun mal olan nang ara, yin talin nang pia weika arye, kuda basam balye deice bukuka, yanganamak ning ap, ninye arye kuda basam tapu kirikikiba, libuka tuku deice balamak ning, el si ara kereta kuda perang, aning deice bukikirye, anggun dam olyangasikiba eipmunce, anggun ilil una meme. Aning kum bukni, minop talak anggun ni koproba Allah Yahweh, Mesir mutuku ninye noutamak arye melibuka boyanamsuk Allah arye, anggunti melinamsile. Ati asum-asum nirya, el tibuk pia diba tenebuka unamlume.

2 Timotius 4:17

Anang nirya bataknik bukni, nun deiyoknye Yesus, na dam yanuka melipnuka deice arye, el mikip arepnukbuk, na yupu teleb ubuka nyapse deice arye, atalak bulupmek Yahudi yala kum ninye nirya arye, Allah el ninye lyen yupu kekebik. Atalak ara, aninye arye talye merekukua oplopmanitinge. Bukni, Yesus arye lobuka lyepnuka ati, sikce kum opnike.

2 Timotius 4:7

Ara, sik yin talin nang arye, batakna kum aniryuk, malye nang ati olbalamikirye, malye kibuka batakalamak touk, akunum winilamse. Tonda, bik-bik nyan nang arye, ‘Dekni ning dopdopnuyap’ tenen, batakna kum, pi deipnarye piribuka bik-bik abuka balamak touk, akunum winilamse. Anyapmakin yupu nong ara, Allah ap, el yupu ap, ati, diba tenyamse ning ara, kum bataklamsirye, pia moubuka tuba talinune. Allah areamnuk pil ara, akunum dobuka sirya daknin banmane.

Yosua 10:14

Asum arye winibuk ning ara, minop talak arye diprongobuka, wini talak noutamak nirya, pia kum winilamuk. Aning ara, Israel ninye ap, Amori ninye ap, olanmek talakuk winibuk. Ara, Yosua birye, ‘Naio aning adiparyuk winipsutume,’ nyabuka morobuk touk, adiparyuk Allah el si Yahweh arye, talye tukwaknye bukni, Yosua moropmok touk, kekebukce winibuk. Atalak tonok aryuk winibuk. Winibuk ati ara, nun kele, atalak ara, dipkoprob Allah el si Yahweh arye, Israel ninye ati weik arye melibukba, sikce Amori ninye obuka, sirya dakik.

Yosua 10:42

Yosua birye, tonok talak aryuk, amutuku noutam nirya ara, biyukce obuka ara, ninye deiyok Raja-Raja nang ap, sikce talilamik nang ap nirya ara, biyukce obuk. Israel nang nirya arye, amutuku noutam ulamik nang obik. Ara, sik mikip deice aryuk kume. Sik ni koproba Allah Yahweh arye, melibukce, el mikip sik Israel nang deice deibukba, obuka sirya dakik.

Wahyu 19:17

Aning nirya eipsopura, amenyan talak yuk eipse ning ton nyapnune. Ara, keting deipmokce, dirin unmokak tonok malaikat ton tikukce, maka ayala-yala nirya, im noutamak lakuka banmek maka ati, weik yupu deice arye nyabuk. “Anggun maka yala-yala nirya buluplulume. Allah el weik kwalina dinamle ning ara, anggun babye dilyanamlulume.

1 Samuel 16:18

Nyabukopura, el pil donanye kekebukce, nyabuk. “Isai Betlehem mutuku ululnye, el sal mi ton ulule. Ami ara, na akunum eibuka, kel bikse. Ami ara, bilkong ona, el si ara kecapi (gitar atonun ning) talina ara, pia kel mi ulule. Tonda, elda mikip pia weiknye ulule. El ilil pia kum ululnye. Tonda, el yupu nyalula babye ara, teleb yupu uk nyalule. El urasin ara, urasin telebnye ulule. Tonda, Allah el si Yahweh arye, anye biti weika arye melilulce, el ap neika ulule,” nyabuk.