Zakaria 10:2 - Eipomek2 Tonda, ninye arye si erenyak Isa Mutuku Dongonye si ara, deiyok kum ubukba, talye-talye yupu uk nyanyake. Isa arye ninye ati, tilila yupu uk nyanyake. Tonda, dibilamice ninye, dib kanye ap yupu talilbanyak ninye ara, tilila ati nyanyake. Wininyak ati, sik asing keten nang arye, tamubuka nyanyak yupu ara, dipkoprob yupu ton kum nyanyake. Aning atonun, Isa Mutuku Dongonye si erenyak nang arye, “Lengdar manyaba deice arye eilinyap ning ara ani, ani,” nyabuka laka nyanyak yupu babye, talye yupu uk nyanyake. Anang arye, ‘Aminyan talak aning-aning nirya, telebuk unamsile,’ nyanyakba, kanye deibuka kekelulum bukni, anang ara tilila ati nyaltakanyakce, nong kum yupu uk nyaltakanyake. Tonda, lengdar mapmace ning ati, talye nukultakanyake. Atilila yupu nyabice nang, sik yupu kekemunya ara, winipmanto ara, domba basam ara, sik weina deiyoknye kum ati, ‘Dan bisik binuyab do?’ tenen, kanye walwal upliba, talye-talye balamak touk ululume. 參見章節 |
Zakaria 10:2
44 交叉參考
Nyabukaura, nabi Mikha birye tamubuka nyabuk. “Na dinmasiba Israel yin nang ara, domba basam wein nang kum ati, ulamikirye, talye-talye yuk-yuk mutuku balamak atonun wininmekba, eipse. Ara, nun ni koproba Allah el si Yahweh arye nyapnuke. ‘Wini talak ara, Israel nang sik weik deiyoknye kum unmala ati ara, sik talye kanye bobuka, sik mutuku tamubuka yuk-yuk binamake,’ Yahweh arye nyapdeipnuke,” Mikha birye nyabuk.
Aning nirya ara, tonap akunum laka nyapmasina ati, yata deiyok ati, anggunce talye-talye nyalulum yupu arye tuba wenebuka nyanululum do? Awenen yupu deice arye, anggunce nati, ‘El kanye teleb kipdeiptibyeʼ tenen, nyanululum do? kume, ato yupu nirya ara, talye yupu uk nyanululume. Dipkoprob nyapsine, anggunce nyanululum yupu nirya ara, tilila yupu uk nyanululume.” Ayub birye, el kwit capu winilye nang ati, ayupu nirya nyabuk.
Deiyok ara ani. Anggun Israel ninye ara, Isa Mutuku Dongonye si erelulum ninye nirya ara, tilila yupu nyana ninye uk ululume. Anggunce dolulum pil nirya ara, dipkoprob nong ton kum ulule. Anggun taruk koproba arye memelulumce, isa si erena ati delilulum ning aning-aning nirya ara, talye ning uka. Winipmanto ara, kumanya arye doplibuk talye-talye urdemuk balamle touk, isa si erelulum ning babye aning atonun ulule. Tonda, ninye arye, ‘Yata wiripnuyap do?’ tenen, kanye walwal upliba, kanye teniltona uk ulamak touk, isa si erelulum ning babye aning atonun ulule. Aning nirya ara, talya, kum winipmanto ulibuk wininyake. Allah arye, sik Israel ninye ati wenebukabukce, nyabuk.
Na Allah aryuk, aminyan talak winipnamle ning laka lena deiyok nang bukni, sik tilila yupu nyanyak nang ara, sik tilila nyanyak yupu ati malye kibuka yaniltanyake. Sikce, ‘Winipnamle, winipnamle,’ nyanyak yupu ara, narye yupu sengneba, nong kum ulule. Tonda, Isa mikip deice arye, akunum diamice ninye kanya ap yupu talinyak ninye arye nyanyak yupu ara, narye yaniltanune. Sik nyanyak tilila yupu yaniptapnyopura, yuk nang arye, ‘E, anang ara walwal nang arye nyanyake’ tenen, kel kinyake.
Allah arye nyabuk. “Ninye taruk deice aniryuk kintinibuka deibikirye, si erenyak ning nirya ara, deiyok ton kum ulule. Ara, talye ning atibuk “Nun ni koproba,” nyabuka si erenyake. Aning ara, kanye bona ap, kekena ap, kel bikna ap ara pia kume. Ara, talye ninguk ulule. Anya arye, sik aning talibuka unyak ninye ara, asing kun ninye atonun unyake. Pia walwal nanguk unyaka ati, sirya talak ara, alye weik dakdanamake.
Allah arye nyabuk. “Anggunce nati ara, ‘El atonye ton aulule’ tenen, ‘Anye bira ani,’ nyapnutum do? Yatanye ton, na ununa atonye, aulule nyapnutum do? Na Allah ara, na tonoka anya arye, anggunce teneipdelulume. Anggunce, ‘Aning koproba ton, Allah mitik tonunuk ulule,’ kum nyaptume. Na ununa atonunye ton, pia kum ulula atia.
Tukwak mutuku noutam yuk-yuk yala nang nirya ara, walwal unyake. Sikda, weik tonun arye kum bikinyake. Talye yo bukni, aning dobuka, ninye urasin atonun puturubuka deibikirye, ‘Nun ni koproba,’ nyabuka, si erenyak ning arye, yupu ton kum nyaptinge. Tonda, aning arye yupu nyaptinga babye, nong kum uptue. Aning arye ninye ati, ‘Aning winipnamlume. Aning ara, pia kum winipnamlume,’ nyabuka, teleb un yupu kum nyapsitinge. Talye nong dem ulula ati nyapne. Aning ara, isin yanuka, kam kum upmanto ning memenyake.
Na Yeremia birye, Allah ati nyapse. “Se, na ni Allah Yahweh, anda aning-aning talibuka deice tam, Weik Erena Deiyoknye ulyama anya arye, ance, ‘Winipnamne,’ tenelyam touk winilyame. Nun walwal usulule. Yata ning teninamap do? Ayupu nirya nyapmalamba, kekepmakin bukni, tuba tonap asipdekine. Ton nang arye, ‘Allah arye nun nabi-nabi nang ati, el yupu nyapmasilba, sikti, laka lenyabe,’ nyasinyake. Anang arye nyasinyak ara, ‘Kume, aminyan talak ara, yu yin talin nang arye, kum olyanamsiyake. Tonda, dina ton kum patapnamsile. Aning kum bukni, Allah arye, pia teleb kipdeipsiliba, nun unyap mutuku noutamak ara, talye kanye bobuka, pia telebuk unamabe,’ nyabuka, nyalin yupu nyasinyake. Anang arye nyapsik ning ara dan do?” nyabuka Allah ati asipdese.
Nun ni Allah, nun kele. Mutuku-mutuku nirya arye, kwemdina ning Isa Mutuku Dongonye si erenyak ning ati, ‘Mok arepsilyame,’ nyabuka moroptibye babye, mok kintinibuka kum arepsutue. Tonda, im noutamak ulul ning aryuk, mok tukwak mutuku kum dopkweteptue. Aning nirya kum bukni, Allah ancuk, nun patapsilye ning nirya arisilyame. Ati ara, nunce an deiceuk, nun kanye delinyabe. An dem aryuk, aning-aning nirya arisilyame.” Israel ninye arye, Allah ati ayupu nyabik.
Na Allah arye nyapse yupu ati ara, atilila nabi nang arye, ‘Ayupu ara nun like, kum kekenamabe,’ tenenyak nang ara, sikce nyanyake. “Kume, anggun malye wininmaluma babye, Allah arye talye lyepnamsile. Dipkopropnye bira, Israel ninye malye wininyak bukni, anabi nang arye, ‘Kume, amutuku winipnamsil ning ara, telebuk unamsile,’ nyanyake. Tonda, na yupu nyapse ning kum kekenyakce, sik bidamang kanye noutamak tenenyak ning talibuka, mandipna kanye bobuka, weik ulul ninye ati, nyanyake. “Kume, malye winilalum babye, Allah kum wenepnamsile anya arye, anggun dam ara, ikin ning kum yanamsile. Telebuk unamlume,” nyanyake. Ayupu nyanyak ara, na Allah arye kum nyapdeipse, tilila yupu uk nyanyake. Allah arye nyabuk.
Nara, Allah Yahweh arye nyasunune. Tilila yupu laka nyana nabi-nabi arye, ‘Lengdar mabupu talak ara, Allah arye yanuka nyapmasuk yupu ara, ani,’ nyabuka, yuk ninye dam yanuka, nyaltakanyak nang nirya ara, na like. Atilila yupu nyanyak nang arye, na mapu ati, ayupu nyabikibuk, kekebikirye, dib tenebiceura, amalye bisikuk dobolbanyake. Sikce tilila yupu nyanyak bukni, ‘Aminyan talak ara, yata wiripnamsil do?’ pia kum tenenyake. Talye lukparabuka, tilila yupu uk, nyaltakanyake. Narye ton, sik anabi-nabi nang, sik dam binuka kum nyalinune. Sik kanye aryuk nyanyake. Tonda, ‘Na yupu dobuka laka nyalbinamlyame,’ nyabuka, narye anang ati, wibuka kum deipse. Sikda dipkoprob talye yupu uk, na mapu Israel ninye dam, laka nyanyake. Winica deice arye, na mapu ati, teleb ubuka, pia kum melinyake. Malyeuk winilinyake. Ati, nara Allah Yahweh arye, anang ara wenebuka opnamne, nyapne. “Na Allah Yahweh arye nyapsin ati, dipkoprob nong upnamle,” nyabuk.
Aning ara, talye ati kum nyapsine. Deiyok ara ani. Dipkoprop nyapsine. Sik anang nirya arye, tilila yupu deice aryuk nyanamsiake. Bukni, nyabikba, anggun amutuku noutamak ululum nang arye, ‘Dibaʼ tenen, ayupu kekepnamluma deice arye, anggun mutuku noutam arye, tomobuka donoknamsine. Nara Allah arye, anggun mutuku noutam arye tomobuka donoksinyeba, anggun nong babye, amutuku noutamakuk dipmunyeba, kum kipdeipnamsine.
Aning ati ara, Zedekia an ap, an talilyam nang ap ara, sik mutuku noutam unyak nabi-nabi nang arye, “Babel mutuku talibuka ulye ninye deiyoknye Raja Nebukadnesar birye nyalul yupu ara, kekena kume,” nyabkikca babye, anabi-nabi nang, sik yupu kum kekenamlume. Anang ara, Zedekia anti, ‘Tilila yupu talye nyapnuyapʼ tenen, ayupu nyapnamaka ati, ayupu pia kum kekenamlyame.
Nara Allah arye, winipnamna ati ara, yata nang do nirya, sik dam yakirye, ‘Kume, Babel mutuku ninye deiyok kibuka talibuknye biti, el yupu kekena kume,’ nyabuka, nyamsiak nang nirya ara, sik arye ayupu nyapsitinga babye, sik yupu pia kum kekenamlume. Ara, nabi-nabi nang do, tonda yata talye nang do, amutuku deiyok talibuka unamak nang do, aminyan upnamle ning kum uplye talak, laka nyana deiyok nang, nabi nang arye do, lengdar deice arye eibikirye, laka nyanyak nang do, asing kwa nang arye do, sikce, “Nunda lengdar deice arye nyapdeipmasile,” nyanyak nang do, sik nyapnamak yupu pia kum kekenamlume. Tonda, “Laka kin ning deice arye bikmap ning ara ani,” nyanamak yupu ap, tukwak mutuku sambala mikip deice arye pil dolye ning ap, tonda isa mikip deice arye pil dolye ning ap, adeice arye nyapnamak yupu nirya ara, anggun pia kum kekenamlume.
Ayupu nirya lak nyabukura, nabi Yeremia birye, el nabi Hananya dam, nyabuk. Nyabukopura, nabi Yeremia birye, nabi Hananya biti, ayupu ton dukdongobuka nyabuk. “Se, Hananya anda kekepnulyame! Allah Yahweh arye, an kum wipdeipkukce, nun Israel nang dam ton kum dopdeipkuke. Ati, an kanye deice aryuk, nyapsiminye yupu nirya ara, tilila yupu uk, nyasilyame. Nyapmanuma ati, sik amutuku Israel nang arye, atilila yupu ati, akunum dip tenekinyake.
Israel nango, nara Allah Yahweh unirye, im deice yin talin malaikat nirya, sik deiyoknye unune. Anggun Israel nang arye, anggun ni Allah Yahweh ti, si erenululuma ati, dipkoprob ayupu nyapdeipmasine. Anggun unamlum kan-kan arye, ‘Nunda nabi nang unyabe,’ nyabuka ‘Dotalak ara, winipnamle, winipnamle,’ nyabuka, laka nyanamsiak nang ara, sik nyanamsiak yupu ara, pia kum kekenamlume. Tonda, isa mikip deice arye, asing keten nang arye, Aning-aning winipnamla ara, winipnamsile,’ nyabuka, anggun dam laka nyanamsiak nang ap, sik lengdar mabikirye, nukunamak yupu babye, pia kum kekenamlume. Deiyok ara, ayupu nirya, tilila yupu arye nyapnamsiaka ati, nyapsine.
Nyabukce, ayupu ton dukdongobuka nyabuk. “Tonda amutuku deiyoknye, Raja Zedeikia, an mutuku mambul yupu laka nyana ap, aminyan upnamle ning laka nyana ap, weik kel bikamik nang arye, anti, ‘Kume na nio, sik Babel mutuku yin talin nang arye, nun dam kum yanuka opnamsiyake,’ nyabuka, an dam yanuka, laka nyapkik nang ara, wini talak dan tam unyak do?
Allah arye nyabuk. Winipmanto ara, anggun Israel nang nirya ara, domba basam ding tonok ulamik bukni, bai tam ulamle yu kam, el si singa arye, doplamukba, dabinuka wangapdanamik touk, ulamika ani, wini talak ara, yuk-yuk mutuku bindomika ati, yuk-yuk mutuku noutam arye daunyake. Aning atonun, min talak ara, Asyur mutuku taleamuk ninye deiyoknye Raja arye, minop deiyok kibuka, Israel nang dam yanuka, obukce dobolbinamuk. Winilamuka ani, dotalak ara, Babel mutuku taleamuka deiyoknye, Raja Nebukadnesar bira, elce aminyan talak, Israel nang nirya omukce, taleamuk. Winipmanto ara, Nebukadnesar bira, yu singa arye, yuk kam ning oplirye, tup diplyopura, aminyan talak aning yok nirya ara, si tolamle touk, ulamuk.
Atonun, narye anggunti, mikip ap, lo ap arepsiseba, anggunce domba basam weina deiyok nang ap, sikce weilamik domba basam ap, opmunce kum kilin nang kipdeipsise. Tonda, na mikip deice arye, sik Babel nang ati yuk mutuku wa winyak nang ap, sik wa wina ati, sik sapi basam tapu kirikdongbikirye, tapu lipdobikiba, wa wilul sapi basam nirya ara, opmunce, kum daneipnamlume. Tonda, narye lo arepsisiba, weik nang ap, ninye deiyoknye Gubenur ap, sik amu tam deiyok kibuka, pil melibuka donyak nang ara, opmunce, kum kipdeipnamlume. Aning-aning nirya ara, na Allah Yahweh arye, sik Babel mutuku nang ati, na mikip deice arye, lo arepsisiba, anggunce anang nirya olbalamlume.
Na mapu nirya ara, sik wenena ati, malye kibuka akunum oplopse. Winipsa ati, sik nirya ikin weik unyake. Winipmanto ara, sik deice pia dila weik ubuk bukni, amutuku nabi-nabi nang ap, imam-imam nang ap, sik ning ara, ‘Kume daupmalye, amutuku nang ara, ikin weik kum unyaka ap, ara mitik tonun dila atonunuka tenebikirye, nyanyake. Utenebikirye, yuk nang ap epdakce talak ara, anang ati, “Yo, telebe nun kayapu. Nun nirya ara, teleb kibuka wininyabe. Nun wininyap ning ara, telebe uka, dauaplye. Nun nirya ara, teleb aryuk tunim abuka unamabe,” nyanyake. Bukni, sikce nyanyaka ara, tilila yupu uka. Amutuku nang nirya ara, teleb aryuk tunim abuka kum unyake. Sik nirya ara, tuba malyeuk wininyake.
Sik imam nang babye, nabi nang babye, na mapu koproba, sik Israel nang nirya ati, ‘Yo, daupye, anggunce malye winilalum ning ara, tenena kume. Aning ara, weik malye winin ning kume,’ nyabuka, pilinyak deice arye, pia malye wininyake. Winipmanto ara, pia weik suse dilamle bukni, anang arye, ‘Kume, nun asuse disulul ning ara, weik mambul kume. Aning ara malye. Asuse ara, talye suse disulula ati, aning nirya ara, el yuk lopliba, telebuk unamabe,’ tenebikirye, nyanyake. Nyasinyak bukni, na Allah arye, dipkoprob nyapsine. Anggunda, talye kanye bobuka, telebuk kum unamlume. Ikin weik unamsila ati, imun kanye tuba bobuka, unamlume.
Yehuda yala nang, sik dam dotalak winipnamle ning ati, Allah arye laka nyaplyeba, sik kekebikirye, laka nyasinyak nang, nabi-nabi nang arye nyanyak yupu ara, talye tilila yupu uk nyanyaka ati, nong kum upnamle aryuk, talye yupu uk nyasinyake. Anggun Israel nang, malye upmunye bukni, anabi nang arye, anggun malye ululum ning ara, ‘Ani,’ nyabuka, kum laka nyasikceba, anggun malye ululum ning nirya ara, batakmunce, tamubuka yamunyeba, Allah arye kum lyelosulule. Sik anabi nang arye, anggun dam laka nyasinyak yupu ara, ‘Dipsuksum una ati bisik ara, ani,’ nyabuka kum nyasinyake. Aning kum bukni, tilila yupu deice aryuk, malye un tam bisik ban ning ati ara, laka nyasikceba, anggun abisikuk balulume.
Aning ara, talye ati kume. Deiyok ara, Babel mutuku nang, sik deiyoknye, Raja Babel bira, abisik ap, otam bisik ap, kwa sukumak, tikuka kintinipmale. Raja Babel bira, abisik bitinye kwa lekelanak binuka tiklirye, el si erenamle ning si tenipdelirye, ‘Dan tam bisik binun do? Peterepnutuʼ tenen, merye kibuka moropnamle. Raja el mal bopmalye ning ara, ‘Yata wiribuka tukwak ton saknul do?’ tenen, binuka deiplirye, mal leleklopnamle. Tonda, Raja Babel birye, ninye urasin atonun, kibuka memebukce, si erelul isa ati, “Na binun bisik ara, laka peterepnilyame,’’ nyabuka moropnamle. Amoropnulya ati ara, domba ato ning oplirye, nong noutam wamlye ning ara, talima dobuka bataklirye, moubuka dipdelirye, ‘E, winipnamne,’ tenebuka, moubuka biknamle.
Tonda, sik Israel mutuku nang, tilila yupu nyanyak nang arye, anggunti, talye yupu weika arye nyapsike. Ara, sik nabi palsu nang arye, ‘Kume, anyapmap yupu ara, Allah aryuk arepsukba, lengdar mapmuka deice arye, akunum nyapmasilak, kekepmabe. Israel nang ati ara, winibuka-winibuka winipnamsile,’ nyabuka, laka nyalamik bukni, sikce nyalamik yupu nirya ara, nong kum upnamle. Aning atonun ton, sik nabi palsu nang ara, isa ap yupu talilanyak nang do, isa merye sik deiyok nang do, sik dam binuka, asipdeyikba, anang sik isa mikip deice arye, ‘Aning ton, aning ton dipkoprob winipnamsile,’ nyalamik bukni, anang babye, talye tilila yupu deice aryuk nyalamik. Aning ati ara, Allah arye, lo areplyeba, anggun olan tam nang arye, ninye on parang ya dobikirye, yanuka, sik tilila yupu nyalamik nang ap, tilila yupu kekelamik nang ap ati, oplopnamake. Atalak ara, Allah arye, lo areplyeba, sik mal olan nang arye, parang ya bobikirye, sik pia malye-malye weik wininyak nang ara, ngang yok sekuka bataknamake. Sik pia malye weik wininyak ning ati, weik wenen sum ara, akunum yale. Ati, asum deice ara, Allah arye, amalye weik unyak nang ati, wenelirye, sirya akunum dakanamle. Allah arye anggunti, sirya ning wenepnamsile.
Anggun Israel yala ninye deiyok nang ara, winibuka, pia malyeuk winilamluma ati, Israel nang, sik domba basam atonun unyaka ati, sik weina deiyok nang ton pia kum ati, sik adomba basam atonun nang nirya ara, bikbik abuka, bai tam yuk-yuk dabindomik ning ara, adomba basam nirya ara, talye bai tam daukirye, yu pia weik ulamle kam ning arye, adomba ara, talye luparabuka, obuka dilamikce, sirya dakmanto ulamik. Mangsa basam atonun ulamik.
Nara, dipkoprob pia kam ununa atonun, na nyapnusin yupu ara, dipkoprob nong upnamlarya! Anggunda, pia mounamlulume! Ara, na domba basam nirya ara, bai tam kam ulamle yu ning arye yangakirye, akunum obuka dilonyake. Ara, anggun moubuka weina deiyok nang ara, pia kum ati, na domba basam atonun nang nirya ara, dana-dana tam akunum bindopnakarye, sik bisik kiriklamik. Tonda, sik ninye deiyok nang nirya ara, ‘Naʼ tenen, nang, domba basam atonun nang, sik bisik kiriklamikba, talye sukum balamika nirya ara, ebuka kum boyangalamlume. Deiyok ara, anggunda, anggun ning atibuk tenilamlumce, ulalume. Anggunce, anggun bidamnye ati, din ning arelalulum bukni, na domba basam atonun nang ati, moubuka kum weimunce, pia kum arelulume.
Aning nirya, winipse ning ara, bikilina ati winipse. Winipse ning deiyok nong ara, ani. Ara, sik Israel ninye, sik deiyok nang unyakce, ‘Winiplulume,’ nyan nang ap, ninye deiyok nang, Raja nang ap, Israel ninye kum talinamake. Ara, keting tamun yupa weik noutam arye, urdemuk unamake. Tonda, atalak noutam, sik malye ning kum danana ati, kam ning dobuka, Allah dam arelyanganyak ning ap, Allah el si eren aik bana ap, Allah ap, ninye ap, ansinilina pil dona deiyok nang ap, aning nirya kum danamle. Israel ninye ara, urdemuk unamake. Tonda, talye ning ati, “Nun ni usulule,” nyabuka, Isa Mutuku Dongonye si eren ning babye, kum talinamake. Keting tamun yupa weik noutam arye, talibuka ukirye, mambul kanye bobuka unamake. Allah arye nyabukba, Hosea birye sekuk.
Allah Yahweh arye, ayupu tonap dukdongobuka nyabuk. Se, na mapu koproba Israel ninye, anggunda weika arye wenebuka opsiniba, ninye weika arye dipnamlum bukni, anggun kan-kan ara, ninye mitik tonunuk batakdongopsiniba, kam tuba unamlum ninye ara, narye lyepsinirye, bulubuka tonok mutuku noutam deipnamsine. Winipmanto ara, domba basam weina deiyok nang arye, sik domba basam dobuka, tonokak bulubuka deibikirye, poka pum tam dobuka dongolamak touk, narye anggunti, aning atonun winipnamsine. Winipsinyopura, winipmanto ning ara, domba basam ara, teleb maning palamlyak binuka deibikiba, kanye deibikirye, maning dilamak touk, narye lyepdopsinyopura, teleb kipdeipsiniba, unamlume. Aminyan talak ara, anggun unamlum mutuku tam ara, ninye yala weik kipdeipsiniba, yupa pia weik upra banamake. Yupa weik ubikirye, amutuku noutamuk, kanye deibuka, pin-pin asa arye unamake.
“Tonda, narye nyapnusin yupu ara, moubuka kekepnululume. ‘Nun ni koprop unamsil’ tenen, ninye arye kat ning dobuka, kintinibuka deiamikirye, si erenyak ning nirya ara, aning ara dipkoprob weik mambul ulul do, kum do? Yata deiyok ati, ninye urasin atonun ning memelalum do? Si erenyak ning nirya ara, talye ning uka. Aning ara, ikin pia kume. Deiyok ara, anang aryuk, kat yo dobuka, sikce puturubuka delinyake. Deibikirye, ‘Se, aning ara, nun melinamsil’ tenen, dib tenenyake. Bukni, sikcuk puturubuka delinyaka anya arye, aning ara, talye ning uka. Tonda, ninye aniryuk kintinibuka deipne ning aniryuk, ‘Teleb yupu nyanamsil’ tenen, puturubuka delinyak bukni, aning ara, dipkoprob yupu nyapmanto kum ning anya arye, talye ninguk ulule. Ati, ninye arye, ‘Aning arye nyapnamnil yupu ara, anye,’ tenenyaka babye, talye ning uka. Ara, tilila uka.”
Se, narye wipdeipse domba weina deiyoknye bira, elda pia telebnye kum ulule. Anye bira, pil teleb kibuka dopmantonye kum ulule! Na domba basam nirya, teleb kibuka kum weilirye, adomba basam nirya batakalule! Winilula ati na Allah Yahweh arye elda domba basam moubuka weina kumnye biti supnamne! winipniba, elce adomba basam weina ati ara bataknamle. Winipliba, lo arepniba yu yin talen nang arye, ninye ona ati parang ya arye, el taruk sirik tam opliba weik suse upnamle. Winiplirye, el asing sirik tam babye asing luklopnamle! Winiplyopura, adomba weina malye ululnye bira, el taruk mikip ara, pia kum upnamle. El sirik tam asing ara, kuna daknamle!” Allah arye ayupu nyabukba, na nabi Zakaria birye kekepse.
Ati ance wibuka deipminba, anye birye minopce menekuka balibuk, sik Israel ninye eibikirye, el bilye bisikuk aminyan binamake. Aning atonun, el tamubuka yangaliba, sik eibikirye el amu tam kibuka tamubuka yanamake. Ara, el balye tam ara, sik nirya melibuka abisikuk dobolbanamake. Winipra banamlanye ‘Wipdeipnusilam’ tenen, moropkine na nio. Atonye kum wibuka deipminba, aninye ara, ance batakminba, domba basam wein nang kum ati, sik domba talye urdemuk unyakce, ‘Dan binuyab do?’ tenen, talye-talye ayanapna, obinapna winilamak touk, Israel ninye babye wininamake.” Musa birye Allah ati, nyabuka morobuk.
Amutuku-amutuku nirya balamuk talak ara, ninye yupa weik yangalamikba elilamuk. Dilamukce, ayangalamik nang ara, ninye arye weilamak domba, sik apu dam kum ulyopura, ‘Ortam binun do, atam binun do?’ tenen, kanye walwal upliba, teniltolamak touk, aninye unmeka ati, Yesus arye aninye ati bico tenebuka talima aribuk.
Mek liya yo lukuka delilbiyikce, Yesus tukwak sakukopura, yupa weik wekmek nang ara, eibuk. Eibukce, awekmek nang ara, ninye arye weilamak domba, sik apu yapu dam kum ukcopura, ‘Ortam binun do, atam binun do?’ tenen, kanye walwal uplibuk, teniltolamak touk, aninye babye, wininmek. Ura, aninye ara, ‘Yatanye birye teleb yupu peterepsutu ak, diksukumuk unamap do?’ tenen, teniltona ap, kwelana ap, unmeka ati, Yesus arye anang ati bico tenebukce, ayupu-ayupu yala nirya weik peterenmok.
Atilila nang arye anggunti, ‘Ura, anggun min arye, kum kel kiamlum allah, yuk allah-allah si erebibirye, neika dobolbanamabe,’ nyapnamsiake. Nyapsikirye, ‘Dib tenepnamsiak’ tenen, ninye kum winipmanto ning winipdekiba, nong uptua babye, anang ati, anggunce dib kum tenenamlulume. Atilila nang ati, pia kum kekenamlulume.
Mikha aik dam akunum binuka unmek talak ara, sik pamubarye nang, ara Lais mutuku dilbinmek nang arye, nyabik. “Nun kayapu, anggun ton akunum bikmalum do? Anyaik noutam ton, ninye urasin ato ning patung memepdeibikce, kat ning perak arye taplak dongamik ning ap, tonda yuk talye ning si erena ati, mitik patung ton memepdeiamik ning ap ara, anyaik pum tam aulule. Aning bikilulum do? Aning atouk, tonda, Allah arye ninye ati, ‘Winipnamlume nyabuka,’ lak len ning, el si efod baju ton, anyaik pum tam aulule. Ati ara, anggunce, ‘Yata winipnamap do?’ tenen, tenipnamlulume,” nyabik.
廣告