Yohanes 5:25 - Eipomek

²⁵ Dib yupu nyapsine. Aminyan talak mambul talak yanamle. Tonda wini talak akunum deiyok koupmasile. Atalak ara, sik akunum diamik ninye bukni, Allah el Mi Koprop arye el yupu nyapliba, kekebicopura, kam bukuka pia kam unamake.

Yohanes 5:25 交叉參考

Yohanes 5:28

Ayupu nyapmasina ati ara, lukuldana kume. Aminyan sirya talak ara, nara Ninye Mi Koprop Atonunye birye na yupu nyapnyopura, akunum diamikba, weiamik ninye nirya na yupu kekepnamake. Yesus arye nyabuk.

Efesus 5:14

Yata ning do nirya, dirinarye aning deice deipliba, lak akuk ulule. Laka upliba, moubuka kel biktibirye, ‘Aning teleb ning, aning ara, malye ning’ tenen, bikinyabe. Aning ati ara, ayupu ton nyanyabe. “Amio, an diplumnye bira kam buklyame. Kristus el dirinarye, teleb kipdeipnamkile.”

Efesus 2:5

Nunce el yupu yaniplobuka malye-malye ulamupa deice arye, akunum diplamak ninye atonun ulamubu bukni, Kristus ap, talima dukdongopsuka deice arye, kam bulina atonun, teleb kipdeipsukce, lyepsuke. Allah arye, lyepsuka ara, yuk deice arye, kume. El bico tenyamsukce, el kanye aryuk talye meilyamsuka deice arye, lyepsuke. Nun teleb winina ati kume.

Yohanes 4:23

Aning nyapmakin bukni, aminyan yanamle talak ara, tonda dipkoprop akunum yalye talak babye, nun Ni Koprop Allah el si dipkoprop ubuka erepnamak ninye nirya ara, talye nong bol deice winina kum bukni, Allah El Dib Kanye mikip deice melisilyebuk, dipkoprop tenebuka unyakce, el si teleb ubuka erenamake. Aning ara, Allah arye, ‘Wininamake,’ tenesilye touk, wininamake. Talya kum nyapkine. Allah arye, ‘Na Dib Kanye mikip deice arye, dipkoprop tenebuka unyakce, na si erenamake,’ tenyamsuk touk winibicopura, Allah arye sikti, kanye delilule. Ato ninye ati el kanye delilule.

Wahyu 3:1

Ninye Mi Koprop Atonunye birye nyapnuke. “Yohanes, ance Sardis mutuku diba tenenyak ninye, sik melin malaikat ati, ayupu sekuka dopdeiplyame. Dopdeipnulam yupu ara, ani.” “Allah el bulul sukum urasin tam unyak dib kanye, tekbarye ap, tonda kurya tekbarye ap, talibuka ununye birye ayupu nyapsine. Anggun ululum ning nirya ara, narye kel bikisunune. Yuk ninye arye anggunti, ‘Kume, anang ara, sik teleb kibuka, Allah yupu kekebuka diksukumuk dobolbanyak,’ nyasinyake. Winibuka nyasinyak bukni, narye dipkoprop kele. Anggunda, dipkoprop teleb ubuka na yupu ati kum dobolbalulume. Ati, na kanye ara, anggunda akunum diamik ninye atonun ululume.”

Yohanes 8:47

Deiyok nyapnusine. Ara, Allah arye anggun kanye talima kum talisilibuk, el mapu kum ululuma anya arye, narye nyasinye yupu kekepmunce, diba kum tenelulume. Bukni, yata ninye do nirya, Allah arye sik kanye talima talibuka, el mapu unyak ninye nirya arye, Allah nyalye yupu kekenyakce, ‘Deiyok anye,’ tenen, moubuka tenebikirye, talinyake. Yesus arye sik Yahudi yala deiyok nang ati nyabuk.

Kolose 2:13

Ara, anggun Yahudi yala kum ninye ara, anggun malye tenelamlum ning ap, talima malye ulalum ning ap, deice arye, akunum dibilamak ninye atonun ulalume. Minop talak Allah arye, “Den bam bol mouse ning kum seklamik nang, na dam kum yatinge,” nyapdeiamuk touk, anggun Yahudi yala kum ninye babye, anggun malyeuk ulamlum talak ara, Allah el dam kum yanmanto ulamlume. Minop talak noutamak winibuka pia malye ulalum bukni, atalak noutamak arye, Allah arye Kristus kam bukeibuka deice arye, anggun babye, kam bukepsuke. Allah arye, nun malye unyap ning ap, malye tenenyap ning ap, namin kipsukce, kum kipdeipsuke.

Efesus 2:1

Na kayapu, anggun Efesus mutuku ululum ninye ara, minop talak anggun malye-malye winilalum ning ap, Allah el yupu yanilalum ning ap, winibuka ulalum deice arye, akunum diplamak ninye atonun ulalume.

Roma 6:4

Mek dongopsik deice arye, nunti Allah el kanye ara, nunti, ‘Aninye ara, Yesus dibukba tuku pali weibika atonun, winibake,’ tenesulule. ‘Tonda, sik Yesus ati diba tenenyak ninye nirya babye, akunum deamikba tuku lukamik ninye atonun unyake,’ tenesulule. Ati, ‘Winibuka unamak,’ tenesilya deiyok ara nyapnusine. Ara, Kristus dibukba, el Li Kopropa Allah, el weik mikip deice arye kam bukeibuk touk, ‘Sik babye minop talak malye winilamik ning nirya batakuka, winiryuk ninye atonun ubikirye, diksukumuk unamak’ tenen, Yesus dibuka deice arye, Yesus ap kanye talima dukdongopsukba, nun ap dibupu. Ara, Allah el kanye aniryuk utenesulul ning ati laka nyapsine.

Yohanes 8:43

Yesus arye ayupu nyabukopura, ayupu tonap dukdongobuka nyabuk. Narye na peteresinye yupu nirya ara, amul deice aryuk kekeltakamunce, ‘Deiyok ani’ tenen, moubuka kum kel kilulum ning ara, deiyok tenepmalum do? Deiyok nyapnusine, ara narye nyasinye yupu, moubuka kum kekepmanto ninyeuk ululuma ati, ‘Deiyok ani’ tenen, pia kum kel bikilulume.

Yohanes 5:21

Ayupu ara talye ati kum nyapsine. Ara, Allah arye akunum diamikce ninye, kam bukuka delilamle touk, el Mi Koprop arye el kanye delilul ninye ati ara, elcuk tenelul touk, kam una deiyok ning ariliba, pia kam unamake.

Lukas 15:24

Ara talye ati kume. Na mi yanmanila ara, dipna nang atonun ulamukbuk wini talak ara, kam ulamak nang atonun upmale. Tonda, na mi tunimapnuk bukni, akunum yanmalak eipmana anya arye, yuna kwalimunyeura, kil-kil arye dipnuyabe,” nyabuk. Nyabuka ati, sik nirya kanye deibikce, yuna deiya koubuka kwalinmek.

Lukas 9:60

Nyabukura, Yesus arye tamubuka nyabuk. “Dib tenena kum ninye ara, dibinyak ninye atonun unyak anya arye, sik dibikce ninye ara, aninye arye weiptinge. Anda, ‘Allah arye ninye weik lyeplirye, anggun kanye talima talinamsil talak akunum yanmale,’ nyabuka, Allah el kai teleb yupu ara, peterelbilyame,” nyabuk.

Yohanes 4:21

Nyabukura, Yesus arye akil ati nyabuk. Akilo, na nyapnukin yupu ara, dib tenepnalame. Aminyan yanamle talak ara, aunmalam mutuku deice babye ura, Yerusalem mutuku noutamak babye, ‘Teleb ak asukumuk’ tenen, Allah el si kum erenamlume.

Lukas 15:32

Ara, an weit koprop ara, dipne nang atonun ubuk bukni, kam ulamak nang atonun upmale. Tonda, pia tunimamuk bukni, yanmalak, eipmana anya arye, elti, kanye deipmapce, yuna kwalipmapa ara, pia telebuka.” Anye el li birye, el mi dunye kopropa ati nyabuk. Yesus arye awinipmanto yupu deice nyabuk.

Yohanes 17:1

Yesus arye ayupu nirya akunum nyabukopura, el urasin erebuka im deice tam dipdeyukce, Allah morobuk deice arye ayupu nyabuk. Naio, winira, na tenyamnulum talak akunum upmale. Ance an Mi Koprop nati, ‘Ninye nirya arye, na si erepnamak’ tenen, mambul pil dopnamnilyame. Winipniminyopura, ninye arye na si erenamniyake. Winipniminyopura, ‘Ninye tukwak nang nirya arye, an pia teleb winiminya kel bikikirye, anti kibuka si erebikirye, an si pia erenamkiyake’ tenen, narye mambul pil donamne. Na mambul pil dopnaman deice arye, an si erepdeipniba, yuk nang eibikirye, sikce an si erenamake. Ati ance nati teleb kipdeipnamnilame. Winipniminyopura, an Mi Koprop na pil dopnaman deice arye, ‘Ninye nirya an si weik arye erepdeipkikirye, si erenamak’ tenen, moropkine.

Yohanes 13:1

Atalak ara, sik Yahudi yala ninye arye, Kaplina ati Kwalina ati, ambusumto yupnamek sum ubuk. Atalak ara, Yesus arye, ‘Tukwak mutuku bataknirye, na Ni Koprop Allah dam binamne’ tenen, akunum kel bikamuk. Yesus ara, tukwak mutuku ulamuk talak noutamak nirya ara, el wipdeiyamuk nang, sik 12 nang ati, bico tenebuka melilamuk bukni, el tukwak mutuku ulamuk talak sirya dakmanto ubuka anya arye, atalak ara, ‘Na mapu arye, nun ni Yesus pia weik arye bicoe tenepsilirye, talima arisulule, tenebikirye, kel kipnamak’ tenen, elce alukunyan winibuk ning deice arye peterebuk. Aning ara, ani.

Yohanes 6:60

Yesus arye, ayupu nirya Kapernaum mutuku nyabukura, el yupu kekebuka dobolbalamik ninye kan-kan noutamak arye, ton nang ara, “Se, anyapmasil yupu ara, ikin weik yupu anya arye, yata wiribuka dib tenebuka doproptibye do?” nyabik.

Yohanes 9:27

Asipdeyikura, anye birye tamubuka nyabuk. “Aning ara, arup akunum laka nyabuka nyapmasunu bukni, anggunda anye Yesus ati lik teneluluma ati, na yupu kum kekepmanulume. Yata ati, ‘Ila tonap nyapsutuba, kekeptibye,’ tenepmalum do? Ara anggunce, ‘Kume, Yesus el yupu kekebuka dobolbanyap nang unamabe,’ tenepmalumce, nyapnulum do?” nyabuk.