Yoel 1:2 - Eipomek

² Se, Yudea tam deiyok nang, anggun pia wisi ululum nang ara, anggunda moubuka kekeplulume. Tonda, Yehuda yala nang ululum ninye nirya ara, aning moubuka kekeplulume. Ara, anggun ululum talak nirya, awininmalba elinmalum atonun ning ton, usulul do? Aning atonun, anggun apu yapu nang ulamik talak ara, awininmalto ning ton winilamukba, elilamik do? Kume, atalak wininmal ning ara, minop talak wininmana ak, kum elilamik touk, wini talak babye, kum elilulume.

Yoel 1:2 交叉參考

Ayub 12:12

Tonda, nunce tenenyaba ara, ‘Nong akunum wisi dananyak nang ara, kel weik bikina ap, tenen ning ap ara, akunum bikinyak,’ tenenyabe. Tonda, keting tamun weik arye, akunum kam ulamik nang ara, aning-aning nirya ati, ‘E, deiyok ara, aniʼ tenen, akunum bikamik. Bukni, anggun na dam yanmalum nang ara, aning babye, min kum biknamlum do?

Ayub 15:10

Na kanye ara, abikupu ning ara, nun unyaba kan-kan ara, akunum min arye nebuka, wisi danamikce, kul potong tikamuk nang ton aulamikce bikamike. Nun babye atonun tenenyabe. Tonda Ayub, an kabul talak ara, an ni koproba kum ulamuk talak, sik akunum ulamikce bikamike. Ati, nun tenenyap touk, nun tam nang ara, weik aunyab bukni, ance tenepminye ning ara, an tonoka.

Ayub 21:7

Tonda, aning tenenune. ‘Se, Allah arye yata deiyok ati, sik pia malye-malyeuk unyak nang ara, kam una ati lo tonap tabakuka tuba arelulba, wisi delinyak do? Tonda yata deiyok ati, sik malye un nang, mikip weik nang kipnin bakirye, sik bona ara weik arelulba, bona weik talin nang unyak do?

Ayub 8:8

Ance nun apu yapu nang, minop talak ara, kel weik nang winilamik ning ton tenipnalyame. Tonda, nun apu yapu nang, sik punun nang arye winilamik ning ton, nukmince, tenibuka biknalyame.

Mazmur 49:1

Sik Korah yala nang arye, deiamiknye birye, aMazmur mot yupu sekuk. Ara, Allah yupu mot nyana deiyoknye arena ati, sekuk.

Yesaya 34:1

Ninye mutuku sirya, im sirya nirya, asukum yamunce, yanuka bulupmunce, wekuka kekeplulume! Tukwak mutuku ululum nang nirya moubuka kekeplulume! Tukwak mutuku sirya, im sirya nirya, noutam unyak nang ap, atukwak mutuku noutam ulye ning nirya ap ara, yanuka wekmunce, kekeplulume.

Yesaya 7:17

Ara, na Allah Yahweh arye, winipnamaka ara, laka nyapnukine. Narye nyapniba, sik Asyur mutuku ninye arye, an ap, ance talilyam ninye ap, an ni birye deibukba, dadeipdanin yangalamik ninye ap, an mapu koproba ap, aninye nirya ati, anggun nong deice, ikin ning weik deipsikiba, imun kanye bonamlume. Sik Efraim yala ninye ap, Yehuda yala ninye ap, kanye talima wilipdanamikce, bokuka yuk-yuk kiyamik talak ara, ‘Aning ara, weik mambule,’ tenelamlum bukni, aminyan ikin upnamsil ning ara, weik ikin ning unamsile. Ara, na Allah Yahweh arye, Asyur mutuku yu nang ap, sik ninye deiyoknye ap, dopdeipniba, anggun Efraim yala ninye ululum mutuku ap, Yehuda yala ninye ululum mutuku ap yakirye, obuka sirya daknamsiaka ati, nyapkine.

Yeremia 30:7

Se, sikda bicoe! Dipkoprop kanye imun weik sum kipnamle ning ara, ato sum ara, min ton pia kum winilule. Asum noutam ara, na mapu koproba, anggun Israel nang ara, imun kanye bonamaka ati, ilil weik unamak bukni, narye anggunda, atalak noutam arye lyepropnamsine.

Yeremia 5:21

Israel nango! Anggun nirya kekepnululume! ‘'Amutuku noutam ululum nang ara, walwal arye, kum bikmanto nang ululume. Anggunda, ‘Deiyok ning ara ani,’ tenebuka, kum biklume. Anggun asing aupsuk bukni, moubuka kum elilulume. Tonda, anggun amul aupsuk bukni, moubuka kum kekelulume.

Daniel 12:1

Daniel birye nyabuk, “Malaikat arye, ayupu nyapnukopura, ayupu ton dukdongobuka nyapnuke.” Anyabuk yupu ara, ani. “Siria mutuku taleamuknye, akunum diplyopura, atalak noutam ara, Allah el pil donanye malaikat, el si Mikael, laka kipnamlarya. Mikael bira, sik Israel yala nang ati, melibuka kalikilule. Atalak ara, Daniel an mutuku nang, sik Israel nang kalikinamle bukni, atalak noutam ara, kanye imun weik talak ton yanamle. Aning ara, minop talak ara, kanye imun weik ning ton yangalamuk bukni, aning nirya ara, mitik ikin uka. Asirya talak yanamle ning ara, pia ikin weik upnamle. Minop talak ulamik nang arye dipdongobuka, wini talak unyak nang babye, aning atonun ikin ning ton yanamukba, kum dopromik ning yanamle. Bukni, an mutuku nang, Israel nang kan-kan noutam arye, ninye weik ton, Allah arye lyepropnamlarya. Ara, yata nang do nirya, sik si Allah kam deiyoknye, el buku noutam si sekuka deiamlye nang nirya ara, dipkoprob lyepropnamle.

Hosea 4:1

Allah el si Yahweh arye, nabi Hosea biti laka nyabukba, Hosea birye sekuk. Se, anggun Israel ninye ara, Allah Yahweh arye nyalisilye ninguk, moubuka kekepnululume. Nun amutuku ninye malye wininyap ning ara, Allah elcuk kel bikisilirye, nyasulule. Allah arye nyapdeibuk yupu ara, nun ton moubuka kum kekenyaba ati ara, kum dobolbanyaba ati, Allah el winilye ning kum bikinyabe. Tuba walwal ninyeuk unyabe. Tonda, nunce yuk nang ap, teleb kibuka neika kum unyabe. Bico kum tenelamyap deice arye, amutuku unyap ninye ara, nun min arye domupu kilapu ara, deiyok kum uamuk bukni, nun talye kanye bobuka, akilapu batakibirye, yuk kilapu dolonyabe. Tonda, Allah ap, el winilul ning ap ati, moubuka kum bikinyabe.

Hosea 5:1

Allah Yahweh arye, nabi Hosea biti, laka nyapdeibukba, sekuk. Allah arye nyabuk. “Na nyapsin yupu ara, moubuka kekeplulume. Se, anggun Allah el si eren aik pum tam pil dona deiyok nang, imam-imam nang nirya ap, Yakub birye deiamukba, dadeipdanin balulum nang, anggun Israel yala ninye deiyok talibuka, weik ululum nang nirya ara, aning moubuka kekepmunce, wininamlulume. Tonda, anggun ninye deiyoknye Raja, el mapu silip nirya ara, amul kunukulongona meme, anggun babye moubuka kekeplulume. Amol pakuka kekena telebe! Anggunce Israel ninye ati, ‘Mispa mutuku welebuka bibirye, talye ning isa si erebipyopura, ikin kum unamsile. Ilil tenena kume,’ nyalamlumba, sik Israel ninye kekelamikce, anggun nirya arye, Mispa mutuku ap, Tabor mutuku ap welebuka, isa si erelamlum talak ara, pia malye weik winilamlume. Winipmanto ara, wena webikibuk youlamle touk winipsuke. Aning atonun winipmanto ara, ‘Mekin pum tam ulul bal, el si ikan weklirye youpnamle’ tenen, weik aling el si ara, jaring delilamak touk, anggun imam nang arye Israel ninye ati, mek pum bal ikan yulamle tapu atonun, akunum winiplume. Ara, anggunce deiyok koubuka malye winilamumba, Israel ninye nirya babye, isa si erenyaka ati nyapsine. Amalye winilamik ning deiyok ara, anggun imam-imam nang aryuk, malye winin ning deiyok kouamluma ati nyapsine.

Yoel 1:14

Ati, sik Israel ninye nirya ati nyapminyeba, din dina kumce, si tebuka ukirye, ‘Dipkoprop asum ara, weik mambul sum’ tenen, ninye weik bulubuka yakirye, yupu talipnamake. Atalak ara, amutuku ninye deiyok nang ap, wisi-wisi nang ap, tonda Yehuda yala nang ap nirya ati, yukupmunyeba, sik nirya arye, Allah el si eren aikuk bulubuka yakirye, Allah Yahweh el tibuk, ‘Se, nun ni Allah Yahweh, ance melipsilyame,’ nyabuka moronamake.

Yoel 2:2

Asum ara, dua kunukmiting abuka, inipdopnamle. Dirina ton pia kum upnamle. Tonda yuk karin mutuku yin talin nang arye, sul kwising yupa weik ulamle atonun, yin talin nang babye atonun, yupa pia weika arye, mal olan dam bikirye, amutuku-amutuku nirya singipdongopnamake. Ara, winipmanto ning ara, dua sekdoba bobalirye, mutuku deice palilamla touk upnamake. Aning ara, minop talak arye, aning atonun ton kum winibukba, ninye arye eibuka, kum bikinyak ning winipnamle. Awinipnamle ning ara, yuk dotalak babye, pia tonap tamubuka kum winipnamle. Allah tenebuk talakuk, winipnamle.

Amos 3:1

Allah arye Israel ninye ati nyapdeibukba, Amos kekebukce, sekuk yupu ara ani. “Na Allah Yahweh arye, ‘Anggun Israel ninye ati wenepnamsin’ tenen, nyapsin yupu ara, moubuka kekeplulume. Se, Israel ninye anggunda, Mesir mutuku ulalumba, na Allah Yahweh arye dobuka boyanamsise. Ati, na Allah Yahweh arye, anggun Israel ninye nirya ati, awenen yupu nyapsine.

Amos 4:1

Allah arye nyabuk. Se, Samaria mutuku noutam umunye kilapu, kwalina weik kilapu ara, anggun nong kalimna ara, weik sapi basam nelamle touk ululume. Anggun mutuku si Basan mutuku kilapu ara, sapi basam kalimna weik ubuka nelamle touk, anggun babye nelulume. Anggunda, anggun akanye yapu ati nyalulume. ‘Anggun bimunce, anggur mek kanye wangalamak mek, pia yu ning boyasumunyeura, dinamabe,’ nyabuka, anggun akanye yapu ak, tuba-tuba morolulume. Tonda, talye bona utotoa talina kum nang ap, mikip kumce, mitang nang ap ati, aning-aning nirya, kum uamlye nang ati, weik arye patalye ninye nirya ap, ikin ning weik, sik nong deice delilulume. Tonda, sik bona utotoa talina kum ninye taleamice ning ara, ubula dolomunce, ikin pil dilulume.

Amos 5:1

Allah arye nyabukba, Amos birye kekebuka sekuk yupu ara, ani. Allah arye nyabuk. Narye engena deice arye nyapnamasin ning ara, anggun Israel ninye ikin ning dopropmunce, imun kanye bopnamlum ning ati, laka nyapnusine. Ayupu ara, pia moubuka kekepnululume.

Mika 1:2

Allah el si Yahweh arye, nyapnukba nyapsine. Se, na mapu mutuku-mutuku nirya umunye ninye ara, anyapmasin yupu ara, moubuka kekeplulume. Ayupu kekepmunce, kel biknamlulume. Tonda, anggun tukwak im sirya, mutuku sirya, nirya noutamak ululum ninye babye, anggun ululum ning nirya ara, Allah Yahweh aning-aning nirya talibuka, deice tam im deice, Pia Mikip Weik Deiyoknye ulirye, pia telebakuk ululnye birye, disulula ati, anggun Israel yala ninye ap, Yehuda yala ninye ap arye, malye weik winilulum ning dekna ati, wenebuka opnamsila ati, Allah im deice arye nyasilye yupu nirya ara, moubuka kekenamlulume.

Mika 3:1

Nabi Mika birye nyabuk. Se, anggun ninye deiyok nang kibuka ululumce, Israel yala ninye talilulum nang nirya ara, anyapnusin yupu moubuka kekeplulume. Anggunda, ninye deiyok nang ululuma anya arye, dipkoprob anggunda pia diksukum ubuka winilamtumce, teleb pil dolamtumopura. ‘Dipkoprop teleb winin ning ara, ani, malye winina ning ara, ani’ tenen, anggunce akunum moubuka bikamtum bukni, anggunda tuba pia malyeuk winilulume.

Mika 3:9

Anggun Israel ninye nirya, talibuka umunye ninye weik deiyok nang ap, Yakub birye deibukba, dadeipdanin yangalamik ani, wini talak amutuku noutam weik deiyok nang kibuka ululum ninye, anggun nirya ara, narye nyapsine yupu uk, moubuka kekeplulume. Ara, sikce teleb kibuka diksukum winin ning, aupmalebuk batakalulumce, kirikuka malye un ninguk winimunya ati, laka nyapsine.

Matius 13:9

Yesus arye adomon yupu nyabukopura, ayupu ton nyabuk. “Anggun amul aupmasilyopura, ‘Ayupu deiyok ani’ tenen, kekepmanto ninye ara, kekeplulume,” nyabuk.

Wahyu 2:7

Anggun amul wapsilyopura, ‘Ayupu deiyok ara ani’ tenen, kekepmanto ninye nirya ara, Allah El Dib Kanye arye, Allah diba tenenyak ninye nirya ati nyalul yupu ara, moubuka kekenamlulume. Ara, malye winin ning nirya ati, malye kibuka kinyak ninye nirya ati ara, na pia teleb ununa noutamak tikuk yo ati, “Teleb amolul yo duk ara anggunda dakuka diplulum,” nyapnamne. Ayo duk din ning ninye nirya ara, pia kamuk unamak anya arye, ayo el si ara, Kam Una Yo nyanyabe. “Ayupu nirya ara, Efesus mutuku diba tenebuka unyak ninye ati nyapnamlyame,” nyapnuke.