Wahyu 1:5 - Eipomek5 Ura, Yesus Kristus ara, pia diksukumnye ulirye, batakna kum diparyuk, Allah ati pia dipkoprop yupu uk nyasulule. Yesus ara, dibuk bukni, Allah arye minyuma kam bukeibuknye bira, el Yesus uka. Tukwak mutuku noutamak ninye deiyok nang weik aunyak bukni, sik deice tam ulirye, aning-aning nirya talibuka weik Ninye Deiyoknye Yesus ara, elce ton anyapmasin ning arenamsile. ‘Allah ap, Yesus ap, Allah el dam bunyak dib kanye tekbarye ap, sik nirye arye anyapmasin ning arenamsiak’ tenen, Allah morosunune. Na Yohanes arye nyapsine. Yesus Kristus ara, weik arye bico tenyamsukce, el ining biyuka deice arye, nun malye un ning tapu kouamsuka noutamak arye lobuka lyepsuke. 參見章節 |
Wahyu 1:5
53 交叉參考
Ninye diksukum ululnye bira, dipkoprob uk ulirye, ninye yupu lipsisikuka bokolina talak ara, el asing arye eipmalye touk, dipkoprob yupu uk laka nyalule. Bukni, yuknye ton, yuk nang arye wininmace ning, el asing arye kum eipmalya babye, talye minina yupu ap, tilila yupu ap, nyalulnye bira, ninye yupu lipsisikuka bokolin talak ara, pia talye yupu uk nyaltakalule.
Narye, ‘Dipkoprop Daud bira, Israel ninye, anggun ninye deiyoknye Raja unamle’ tenen, wipdeiamse. Tonda ‘Yin talin nang, sik weik deiyoknye unamle’ tenen, wipdeiamse. Ara, talye ati kume, Daud erepdeipsiba, aning nirya winilamuk ning deiyok ara ani. Ara, Daud erepdeipsiba, el winilamuk ning ara, ‘Ninye nirya eibikirye, na si ap, na mikip ap, moubuka kel biknamniak’ tenen, winyamse.
Weiknye birye aning winibuka eibukopura, elce, ‘Awinipmal ning melibuka, lak lepnamniyak’ tenen, el amu tam pil don nang ati nyabuk. “Aning-aning nirya, weik kel nang ati, bulubuka, na dam yalulume,” nyabuk. Elce yukubuk nang ara, ani. Ara, asing keten nang ap, ninye kum winipmanto ning, kel bikamik nang ap, keting, wala ap, kurya ap deiyok kel bikamik nang ap, tonda ninye bikilina deiyok ning, kel bikamik nang ap, sik nirya ati, yukubukba, el dam bulubuka wekelyayik.
Winibukba, pia minop talak donirye, Kam Ulamuka ani, Pia Tuba Kam Unamle Deiyoknye, abukmoknye birye, el anye bira, Ninye Mi Atonunye ati, weik mambul ning weik arebuk. Elti arebuk ning ara, ani. Ara, ‘El mikip weik arye, aning-aning nirya talinamle’ tenen, deiyok ning ap, weik dirina ap arebuk. Tonda, ninye im sirya, mutuku sirya nirya ap, aminyan winipnamle ning nirya ap, ‘Elcuk tenelye touk unamle’ tenen, deiyok ning ton arebuk. Tonda, anyarepnya deice arye, ninye ayala-ayala nirya ap, yupu yuk-yuk nyanyak nang nirya ap, tonda im sirya, mutuku sirya nirya unyak ninye nirya arye, ‘El siuk erenamak’ tenen, adeiyok ning ton dobuka, Ninye Mi Atonunye biti arebuk. Tonda, el anye mikip weik arye talinamle ning ap, talibuka pia unamle ning ap nirya ara, ninye yuk nang arye, pia kum kum kipdeipnamake. Elce aning nirya talinamla ara, apia unamle.” Daniel birye nyabuk.
Akunum mek likikceba, malye un ning ton, abaju bol deice do, baju tapu noutam do, basam bol deice do, abarye suse deiyok ning awamlye sukum, mek likikceba, aning kum upmalyeura, tonap tamubuka mek likinamnyake. Ara, ‘Asuse deiyok ning yanamliryaʼ tenen, tonda ‘Tamubuka akunum teleb upnamleʼ tenen, wininamlume. Teleb uplyopura, akunuma.
Allah arye Yehuda tam unyak nang ati, tonap teleb kipdeipnamle talak ara, sik malye ulamik ning ap, tuba malye unyak ning ap ati, kum daneipnamne. Ara, Yerusalem mutuku weik asik noutam unyak nang ap, tonda Daud birye deibukba, dadeipdanin yanamak nang ap ati, narye arepnyeba, weik mek balamle atonun kibuka, banamle. Winipmanto ara, abanamle mek ara, sik malye winin ning nirya, mek likuka lyenamle. Ara, Daud tam nang ap, Yerusalem mutuku noutam unyak nang ap arye, malye wininyak ning ap, isa si erenyakce wininyak ning nirya ara, narye lyebuka, kum daneipnamne.
Na unye touk, anggun babye, wininamlume. Na babye Ninye Mi Koprop Atonunye birye, na bidamnye ati patapnilye ning, ‘Ninye nirya melinamniyak’ tenen, kum yase. Narye tukwak ninye nirya, sik patalye ning ati, ‘Melinamne’ tenen, yase. Na unye touk, anggun na mapu babye atonun unamlulume. Nara, ninye nirya sik kanye arye, malye tenelamikce ning ap, malye winilamikce ning ap ati, ‘Allah arye sik wenebuka oplyak’ tenen, na opnikibuk dipnamne deice arye sekdongopnamne. Winipnyopura, ara ninye kisok arena atonun winipnamne. Allah arye tukwak ninye nirya wenebuka optu bukni, sik yok pununa ati, na dipnamne.” Yesus arye nyabuk.
Atalak ara, sik Yahudi yala ninye arye, Kaplina ati Kwalina ati, ambusumto yupnamek sum ubuk. Atalak ara, Yesus arye, ‘Tukwak mutuku bataknirye, na Ni Koprop Allah dam binamne’ tenen, akunum kel bikamuk. Yesus ara, tukwak mutuku ulamuk talak noutamak nirya ara, el wipdeiyamuk nang, sik 12 nang ati, bico tenebuka melilamuk bukni, el tukwak mutuku ulamuk talak sirya dakmanto ubuka anya arye, atalak ara, ‘Na mapu arye, nun ni Yesus pia weik arye bicoe tenepsilirye, talima arisulule, tenebikirye, kel kipnamak’ tenen, elce alukunyan winibuk ning deice arye peterebuk. Aning ara, ani.
Nyabukura, Pilatus arye, “Ayupu nyapmalam ati, anda ninye deiyoknye, Raja ulyame,” nyabuk. Nyabukba, Yesus arye, “Pilatus ance, ‘Anda Rajanye, weik ninye deiyoknye ulyame,’ nyapmanilam yupu ara, dib nyaplame. ‘Weik ninye deiyoknye, Raja unamne’ tenen, tukwak mutuku yase. Adeiyok ati deipnike. ‘Dipkoprop yupu nyanamne’ tenen, tukwak mutuku yase. Dipkoprop yupu kekebuka talinyak ninye ara, na yupu kekebuka diba teneninyake.” Yesus arye nyabuk.
Allah arye diba tenen ninye nirya ati, kam pia bukeipnamsila deiyok ara nyapnusine. Ara, Allah arye ninye mutuku-mutuku nirya ati, bico tenenyamsukce, kanye weik arye areamsuka ati, el Mi Koprop tonokuk ulamuk bukni, tukwak ninye lyena ati arepsuke. Ara, ‘Yata ninye do nirya, el Mi Koprop ati, diba tenebicopura, pia kum dipnamak bukni, bol koplobuka kam una deiyok ning arepnibuk, pia kam unamak’ tenen, el mi tonok arepsuke.
‘Malye winipnyap’ tenen, anggun kanye talima moubuka umunyak arye melibuka dildanamlulume. Tonda, Allah El Dib Kanye arye, ‘Sik talima melipdakirye dinamak’ tenen, melin nang atonun kipsuk akarye, wibuka deipsuk nang ara, anggunce sikti, sik talima moubuka kalekuka dinamlulume. Allah el mi koprop dibukura, el ining banmok deice arye, Allah dekuka deibuk ninye ara, domba weilamak nang arye sik domba weilamak touk, Allah el diba tenebuka talinyak nang ati, melibuka weinamlulume. Anang ati moubuka dimunce, melinamlulume.
Ara, Allah arye, ‘Tukak mutuku ninye lyepnamle’ tenen, wipdeiyamuknye Mesias el kanye imun ning bobuka ulamlya ani, diplirye, elda minopce kam buknamle. El dipmalya ani, minop kam buklinye birye, el tam nang, Yahudi yala nang ap, Yahudi yala kum ninye ap ati, “Allah arye lyepnamsile,” nyabuka, laka nyaplyeura, ayupu sik kekebikirye, sik talima noutamak ara, dirina atonun upnamle. Musa ap, Allah el yupu laka nyalamik nang Nabi nang ap arye ayupu uk nyapdeiamik. Paulus arye Raja Ageripa ati, ayupu nirya nyabuk.
Allah arye Kristus ati utenyamuk. ‘Yesus Kristus obikiba, el ining binamla deice arye, ninye tukwak ninye sik malye winilamikce ning nirya kum kipdeipnamle. Ninye tukwak ninye, sik pununa ati dipnamle. Yesus obikiba dipnamal deice arye, diba tenebikcopura, tukwak ninye sik malye wininyak ning pununa ati lyepnamle,’ Allah arye tenyamuk. Minop talak ara, ninye nirya arye malyeuk winilamikba, Allah arye, ‘Dauplye’ tenen, namin kilamuk. Bukni, Allah arye, tukwak ninye nirya ati, ‘Allah ara pia diksukumuk ulule’ tenen, ‘Moubuka kel kipnamak,’ tenebukce, Yesus Kristus tukwak mutuku dopkwetepsuke. Ara, tukwak ninye nirya arye, ‘Kume, Allah elda, malye winilamikce ning ati kum bataktue. Malye winilamikce ning nirya ati, yupu lipsisikuka wenelule,’ tenebikirye, ‘Moubuka kel kekepnamak’ tenen, nun pununa ati, Allah arye Yesus Kristus tukwak mutuku dopkwetepsuke.
Amalye winin ning nirya nyapmasina ara, minop talak anggun Korintus mutuku ninye, anggun babye aning atonun winilamlum bukni, nun Deiyoknye Yesus Kristus el si deice ap, Allah El Dib Kanye pil dopsuka ap deice arye, Allah akunum teleb kipdeipsuke. Ara, malye ning talibikirye, mek iliklamak touk, Allah arye, nun malye winin ning nirya kum kipdeipsukce, ‘Na ninye, unamak’ tenen, ansinibuka wipsukce, teleb kipdeipsuke. Winipsuka deice arye, Allah el kanye ara, ‘Aninye ara, akunum diksukumuk unyake,’ tenesulule. ‘Sikda, teleb ninye unamak,’ nyabuka wipdeipsukce, wini talak ara, kanye deibuka tenesulule.
Dipkoprop ara, Yesus Kristus wanwanun yo deice obika deice arye, Yesus arye na malye ulamse ning ati punupnuk anya arye, winipmanto ara na ap, Yesus ap dukdongobuka opnikba, dipse. Ara, Yesus dibuka deice arye, na babye dipna atonun winipsa ati nyapsine. Winipmanto ara, Kristus ap dukdongobuka opnika ati, wini talak ara, na babye yuk kum unun bukni, Kristus ara na talima noutamak ulule. Na ap, Yesus ap talima dukdongobuka unyame. Ati, ninye nong atonun ubuka tuba ununye talak nirya ara, Allah el Mi Kopropa Yesus ati diba tenenuna deice aryuk kam unune. Allah el Mi Kopropa arye nati bico tenepnukce, na pununa ati, el bidamang el nonguk aribukba, yu nang arye obikba, nati dibuke.
Malye-malye weik winilamubu ning ap, malye tuba wininyap ning ap ati, wenebuka oplopsutue. Akunum opmasutu bukni, Allah arye, nun nirya ati, pia weik arye, bico tenepsukce, lyepsuke. Lyepsukce, Kristus ap, talima dukdongopsuka deice arye, kam bulina atonun, teleb kipdeipsukce lyepsuke. Allah arye, nun malye winina ati talye oplopsutu bukni, ‘Se sikda bicoe’ tenen, namin kibuka mitang asa arye, kanye talima arisilya ara, mitik tonun arye kume. Weika arye, bico tenesulule.
Ara, minop talak ulamik Yahudi ninye arye, ‘Allah nun malye winin ning namin kipsilirye, nun moronyap yupu kekenamsil’ tenen, Allah el si erena ati, kam ning obuka arena ap, nintong teleb ning dobuka, uku dongona ap, ulamika atonun, Kristus arye nunti, bico tenebuka kanye talima arepsukce, elcuk el bidamnye nong, Allah ati aribukce, nun yok pununa ati dibukura, Allah arye, kanye deibuk. Yesus arye, kanye talima arepsukce, bico tenesilye touk, anggunce yuk ninye nirya ati, bico tenebuka melilanauk unamlulume.
Narye yuk yala Israel ninye nirya ati, sik wa win tuku ap, yuk ayala-ayala ning nirya ap, bokuka arepnamne. Bukni, sik Lewi yala nang ati ara, aning-aning nirya bokuka, kum arenamne. Na Allah Yahweh aniryuk, sik Lewi yala nang ati, kalikuka melinamne. Sik patan ning nirya ara, na deice aryuk dolonamake. Ara, na Allah arye, sik Lewi yala nang ati, ‘Naryuk anggun patan ning kintinibuka arenamsine,’ nyabuka, nyalilamse atonun wininamake.
Sik anang arye, utenebuka arebikba, Bileam birye anggunti, ‘Malye uptingʼ tenen, suamsuk bukni, anggun ni koproba Allah Yahweh arye, Bileam el nyabuk yupu ara, kum kekamuke. Anye birye, ‘Malye kipdongopnirye, sik anang ara, suknamne,ʼ tenebuk ning ara, Allah arye tamubuka, teleb kipdeipsuke. Aning deiyok ara, Allah arye anggun Israel ninye ati, bico tenepsukce, kanye deiamsuke.
“Allah arye anggunti, wipdeipsuka deiyok ara, ‘Anggunda ninye weik unyaka ati ara, wipnamne,’ kum tenelamuk bukni, deiyok ara ani. Ara, elce tuba bico tenyamsukce, elce anggun apu yapu ati, ‘Wininamsine,’ nyalilamsuk yupu ati, tuba tenelirye, anggun wini talak ululum ninye ati, wipdeipsuke. Minop talak, ‘Wininamne,’ nyabuka, akunum nyabuka ati, Mesir mutuku noutamak ikin weik ulamsuk buk, dobuka lyepsuke. Mesir mutuku weik deiyoknye Firaun, el mikip weik kibukce, anggunti taleamsuke. Winilamukce, ikin pil weik, anggun apu yapu nong deice delilamukba, ikin weik ulamik. Winibuka ulamik bukni, Allah el mikip weik deice arye, lyepsukce dobuka boyasuke.”
Tonda, Allah arye el mapu kwepdeipsuk ninye nirya ara, Yesus talisilirye, nun Weik Deiyoknye usulule. Ara, winipmanto ara, nun kisok upsuk ning nirya deice arye, aning-aning nirya tenebuka unyap touk, Yesus el babye, Allah el mapu nirya ati, Weik Deiyoknye usilirye, talisulule. Tonda, Allah arye, ‘Yesus ara, aubuk ning nirya deice tam kibuka, weik mambulnye unamle,’ tenebuka ati, Allah arye tenyamuk touk, Yesus dibuk bukni, Allah arye Yesus tamubuka kam bukeibuk. Wini talak ara, yuk ninye ton deiamik bukni, Allah arye aninye kam bulilamle bukni, minop kam bukibuknye bira, el Mi Koprop Yesus el uka. Allah arye Yesus minpola kam bukdeibuka deiyok ara, ‘Yesus ara, aning-aning nirya deice tam ulirye, weik mambulnye unamle’ tenen, winibuke. Yuk ning nirya ara, Yesus el amutamuk ulule. Elda deice tam ululnye uka.
Yesus tukwak mutuku tamubuka yanamla ara, Allah arye el tenyamuk touk, atalak akunum uplyopura, Yesus lake kibuka yanamle. Nun ni Allah bira, pia telepuk ulirye, ati, tukwak ninye nirya arye, el siuk erebikirye, elti, ‘Anda pia telebuk ulyame,’ nyanamyake. El tonok aryuk aning-aning nirya, pia Mikip Weik Deiyoknye ulirye, aning nirya deice tam ulule. Yuk weik ninye deiyok nang, sisin nang, Raja nang aunyak bukni, elda sik deice tam Mikip Weik Raja ulule. Ninye deiyok nang yala weik daunyak bukni, sik nirya ara, el amutamuk unyake. El tonok ara, sik nirya ap, isa mer ap, aning-aning nirya ap, pia deice tam ulirye, pia Mikip Weik Deiyoknye ulule.
Musa sekamuk yupu yanilamik nang oltakalamik ning ara, mitik ikin uamuk bukni, Allah el Mi Kopropa ati, yaniltanyak ninye ati, Allah arye wenebuka onamle ning ara, ikin weik kum unamle do? Kume, na kayapo, anggun ton teneipdelulume. Allah arye, “Wininamsine,” nyabuka, nyalilamsuk yupu deice, diksukum ulisilye ning, ‘Nong unamle’ tenen, Yesus el ining arepsukba, biyuke. Aning ara, weik mambul bukni, sik malye nang arye, ‘Kume, aining ara, talye ninguk ulule. Malye ning uka,’ tenenyak ninye ara, Allah arye aninye ati, weik arye weneplirye, kum onamle do? Tonda, Allah El Dib Kanye arye, bico tenesilirye, el kanye aryuk melisilye Dib Kanye ati, el nong deice malye yupu nyabuka, lyek-lyek alamak ninye ara, weik arye wenebuka kum onamle do? Kume, weika arye opliba, aninye ara ikin weik unamake.
Sik minop talak pil dolamik ning ara, mitik mambul pil, nong bol deice ning uk, mitik teleb winilamik bukni, Kristus el bidamang ining deice arye, nun kanye talima dipkoprop teleb kilisilya ara, mambul weik ulule. Kristus ara, pia diksukumuk ulamukba, Allah El Dib Kanye, pia aunamlanye bira, el mikip melyamuka deice arye, Yesus arye Allah ati, el bidamang el nong kopropa arepdayuk. Nun kanye talima noutamak, malye ning usilya deice arye, malye winibirye dibinyabe. Ati, Kristus el ining deice arye, nun kanye talima noutamak malye ning dipsuka deiyok ara ani. Ara, ‘Tukwak ninye arye, Pia Kam Una Deiyoknye Allah, el amu tam ubikirye, el pil donamak’ tenen, pil dopsuke.
Aning atonun kum bukni, Allah malye winina pia kumce, dirinak ulamle touk, nun babye, malye winina kumce, telebuk ubirye, dirinak atouk ulamibyeura, nun nirya ap, tonok kanye tenebuka, ansinibuka unyabe. Allah el yupu uk kekebuka, dobolbabyeura, Allah el Mi Yesus, el ining arye, nun malye tenenyap ning ap, malye wininyap ning nirya ap, kum ubuka deipsilirye, lyepnamsile.
Dipkoprop bico tenena ning ara ani. Ara, nunce mankau ulamuburye, Allah ati kanye kum diamube. Winilamubu bukni, nun malye unyap ning nirya awamukbuk, ‘Sik pununa ati, Na Mi Koprop Yesus obikce deice arye, sik malye ning punupnamle’ tenen, Allah elce bico tenepsukce, el Mi Koprop arepsuke. Winipsuka ara, dipkoprop bico tenena ning ara ati, nyapne.
Anirya dinmasibuk, aminyan ara tonoknye ton, tekbarye malaikat arye, el terompet deice lelim nyabukura, im deice tam noutamak nirya, weik yupu arye nyanmekba, kekepse yupu ara, ani. Ayupu nyanmek. “Tukwak mutuku im sirya, mutuku sirya nirya talibuka ninye deiyoknye nang nirya ara, nun Ni kopropa Allah ap, elce dopkwetepsuk Ninye Lyena Deiyoknye Kristus ap, sik bitinye arye akunum malye kibuka, aning nirya talidurake. Ati wini talak arye dipdongobuka, aminyan doryanamle talak babye, aning-aning nirya taliprikirye, Weik Ninye Deiyok nang pia unamrake.”
Tonda, na yupu laka nyana deiyok nang bitinye ati ara, na mikip weik sik deice deipnyopura, yupa weik keting tamun winilye ap, tonda noutam ning tonap, atalak noutamak nirya arye (1.260 seribu dua ratus enam puluh sum) na yupu laka nyanamrake. Ayupu nyanamdak talak ara, pia malye baju, karung goni atonun ongonamrake. Ara, ‘Imun kanye bobuka, ninye nirya arye engenamak’ tenen, amalye baju ongonamraka ati nyapkine.
“Arebikirye, amalye deiyoknye ap tabakicopura, Domba Mi Atonye biti, opnamake. ‘Domba Mi Atonye opnamap’ tenen, piripdenamak bukni, Domba Mi Atonye birye, sik nirya ati malye kibuka oplopnamle. Winipnamla ara, talye ati kume. Ara, yuk ninye deiyok nang weik aunyak bukni, sik deice tam Weik Ninye Deiyoknye bira, eluk ulule. Tonda, yuk Raja nang weik aunyak bukni, sik deice tam weik erena Raja Deiyoknye bira, Domba Mi Atonye bira, eluk ulule. Ati ara, Domba Mi Atonye birye, sik malye un ninye deiyok nang nirya ati obuka sirya daknamle. Atalak ara, Domba Mi Atonye elce, ‘Aninye na mapu unamak’ tenen, wiamukce, yukamukba, elti, diba tenelamikce, batakna pia kumce, el yupu talibuka dobolyanganyak ninye ap, el ap neika unamake.” Amalaikat arye na Yohanes ati aning nirya laka nyapnuke.
Nyapnuk talak im deice tam, dipdesiba, im deice tam nirya lakak ubukba, eipse ning nyapnune. Tonoknye, el si ara Dipkopropnye, tonda, Batakna Kumnye bira, tonok kurun kuda balye deice bukmokak, eipse. Anye bira, urdem una kum bukni, pia diksukumuk ubuka, yupu lepsisikuka bokolilirye, malye winin ning nirya ap, Allah ati yaninyak kili sal ap, ati olbalule.
Allah Yupu Deiyoknye, el keil deice ap, el baju deice ap ara, el si ton sekeiyamik. Asi ara, ani. Raja nang nirya deice tam ulul Raja. Tonda, weik ninye deiyok nang nirya deice tam ulul Deiyoknye. Asi bitinye sekuka deiamik ning deiyok ara ani. Ara, tukwak mutuku weik ninye deiyok nang, Raja-Raja nang nirya el amutamukiba, sik Weik Ninye Deiyoknye Raja ulirye, sik yuk Raja nang nirya talilule. Aning atonun, sik yuk deiyok nang nirya el amutamukirye, sik Weik Deiyoknye ulirye, sik yuk deiyok nang nirya talilule. Yata deiyok nang nirya, el amutamuk unyak ati, elce sik nirya talilule. Elda weik eitamnye ulule.
Anggun ulamlum mutuku ara, na kele. Isa Mutuku Dongonye arye amutuku ninye nirya ati talilulba, el yupu kekebuka dobolbanyake. Amutuku ninye weika arye wininyak bukni, anggunda, nati kum bataknulumce, tuba diba tenebuka dobolyanganululume. Batakna pia kum aryuk, na yupu dobuka peterelamuknye, el si ara Antipas, anggun mutuku malye nang arye oplomika ati, ikin weik ulamsuk bukni, wini talak noutamak babye, nati kum batakamnulume. Tuba diba tenelulume. Bukni, anggun mutuku noutamak ara, Isa Mutuku Dongonye ulule.”
Ninye Mi Koprop Atonunye birye nyapnuke. “Yohanes, ance Laodikia mutuku diba tenenyak ninye, sik melin malaikat ati, ayupu sekuka dopdeiplyame. Dopdeipnulam yupu ara, ani.” Ayupu nyapsinye bira, na tenene ning nirya nong akunum upnamla ati, ‘Amin,’ nyananye unune. Nara, batakna pia kum diparyuk, Allah el yupu tuba dipkoprop nyanune. Allah arye kwepdeibuk ning nirya ara, na talinirye, weik deiyoknye unune.
Asipdenukbuk, narye, “Na walwal bukni, anda kele,” nyapse. Nyapsiba, anye birye ayupu tamubuka, laka nyapnuke. “Kume, sik aninye ara talye nang kume. Sirya talak noutamak ara, malye nang arye, Allah el mapu nirya ati, ‘Nun like’ tenen, ikin ning pia weika arye, sik nong deice delilamikba, imun kanye weik bolamik bukni, Allah pia kum bataklamik. Kanye darapdongobuka, Allah elti, diba tupa tenelamik. Domba Mi Atonye obikba, el ining biyuka deice arye, sik malye winin ning nirya kum kipdeibukce, pia diksukumuk kipdeibuk. Winipsuka ati ara, sik nirya arye pia teleb koprop kurun baju ongopmake,” nyapnuke.
廣告