Wahyu 1:18 - Eipomek

¹⁸ Minop talak dipse bukni, wini talak ara, kam unye touk, pia kam unamne. Nara, pia Kam Una Deiyoknye ununa ati ara, aminyan doryanamle talak babye, pia kamuk unamne. Nara, Ninye Dibina deiyok ning ap, akunum diamice ninye unyakak ap, talibuka una deiyoknye ununa anya arye, aning nirya ara talibuka unune.

Wahyu 1:18 交叉參考

Ayub 19:25

Anyapmakin ning ara, urdem ati kume. Im deice ara, nati bico tenenilirye, na malye un ning pununa ati, dekuka lyepnamnilnye, Allah pia aulule. Aulul ati, akunum sirya dakna talak, na melina ati, el yalyeura, tukwak mutuku noutamak yanuka tiknamle.

Ayub 38:17

Tonda ninye dibikirye, wekelbace bublan bisik ara, eiplum do? Aning atonun, sik aninye debuka, kunukne bisik bublan wekelbanyak sukum ara, ance eibuka bikamlum do?

Mazmur 18:46

Tonda, nun ap, yuk mutuku nang ap, mal olan talak ara, sikce, ‘Se, yata wiriptibye do? Kume’ tenen, ilil weik ubukba, sik talima dakalsakanauk ulamuk. Sikda, ‘Anye birye opsilyak’ tenen, ilil weik ubukba, ‘Yuk mutuku nang arye yanuka, opsicak’ tenen, cang keil poka domikce, ulamik asik noutam arye batakuka, na dam yanuka, sik nong sirim talinauk ulamuk.

Mazmur 68:20

Nun nirya arye, nun ni Allah Yahweh aning-aning nirya talibuka, weik mikip ulya deiyoknye ulule. Tonda, nun mal olan nang arye, ‘Opsikcak’ tenen, Allah arye nun nirya ati, lobuka lyelosulule. Ati na ning ara, Allah Yahweh ati, “Naio anda pia telebuk ulyame,” nyabuka, el si uk erenamabe. Tonda, Allah arye asum-asum nirya, nun ikin usulul ning ati, eibuka, melisulule.

Yesaya 22:22

Na Allah arye, anggunda Daud birye deipsukba, dadeipdanin yangalulum nang, anggun duweit ululum aik bublan kukna kunci dobuka Elyakim biti arepnamne. Elda mikip weik arye anyaik talepnamleʼ tenen, bikilina ati, akunci arepnyeura, aning dobuka, el takunya deice diripkwetepnamle. Winipyeba, Elyakim elce akunci dobuka, anyaik bublan kukeiplyeura, yuk nang arye ton yanuka bublan kum tirikdongopnamake. Tonda, Elyakim birye anyaik bublan kunci kibuka tirikdongoplyeura, yuk nang arye ton kum yanuka bublan kukeipnamake.

Matius 11:23

Anggun Kapernaum mutuku ninye ara, ‘Nun teleb nang anya arye, Allah arye erebuka im deice deipnamsile,’ tenelalulum do? Kume, Allah arye wenebuka uku din mutuku donoksiliba, uku arye dibuka sirya daknamsile. Anggun Kapernaum mutuku nang ara, anggun dilamlumba, anggun mutuku noutamak narye ninye kum winipmanto ning, mambul pil dolamse bukni, diba kum tenenululume. Bukni, amambul pil ara, Sodom mutuku noutamak apiluk dolamtinyeba, eipmanitingopura, Sodom mutuku ulamik ninye arye, “Se, nun dipkoprop malye unyabe,” nyabuka, sik malye ning bataktingce, nati diba tenelamnitingopura, kam tuba unamtinge.

Matius 16:19

Tonda, ‘Ninye weknuyak’ tenen, aik deiyoknye birye buplan kukne ning kunci dobuka, buplan kukeipliba weklamak touk, narye Peterus anda, buplan kukna deiyoknye kipdeipkine. Ara, ‘Allah arye ninye mutuku-mutuku nirya noutamak ninye weik lyeplirye, sik kanye talima talinamsiak, ninye ayala-yala nirya wektinge’ tenen, narye anti kunci atonun ning, deiyok ning akunum arepkine. Ara, ance na yupu peterepminya deice arye, dib tenebikirye, na unyak im deice yanganamake. Ance, ‘Winina meme,’ nyabuka yupu seknalam yupu ara, im deice babye, Allah arye ayupu atonun ati, akunum yupu sekelule. Aning atonun ance, ‘Winina telebe,’ nyapnalam yupu ara, im deice babye, Allah arye atonun, ‘Winina telebe,’ nyabuka akunum nyalule.” Yesus arye Peterus ati nyabuk. ‘Nun song’

Lukas 24:5

Winiprikura, akilapu eibikce, lukdayikce ilil weik ubuka ati, koupdongobuka tikmek. Ilil weik ubukura, anang arye akilapu ati nyaprik. “Diplamak ninye wein dam, ‘Yesus aunmal do?’ tenen, dilyanmaluma ara, yata ati do?

Yohanes 11:25

Nyabukopura, Yesus arye nyabuk. “Kam Bulina Deiyoknye ap, Kam Una Deiyoknye ap, na aunune. Yatanye do nirya, nati dib tenepnilinye bira, el nong dipmalya babye, kam pia unamle.

Yohanes 14:19

Like mitik anun talak ton akunum uplyopura, dib tenena kum, talye tukwak ninye arye kum eipnamniyake. Bukni, anggunuk ara, eipnamnulume. Na pia kam unanye ununa ati, anggun babye kam unamlume.

Roma 6:9

Ayupu nyapmasina ara, talye kum nyapsine. Deiyok ara, ani. Nun kele, Kristus dibuk bukni, Allah arye akunum kam bukeibukba, pia kam unamla anya arye, aminyan talak ila tuba tonap kum dipnamle. Ninye dipna deiyok ning ara, Kristus ati kum malye uptue. Ati, nun kele, Kristus pia kam unamle touk, nun babye Kristus ap kanye talima dukdongobuka pia kam unamabe.

2 Korintus 13:4

Ara dip, sikce Yesus tongobuka, wanwanun yo deice arye obik talak ara, Yesus mikip naminuk ulamuk bukni, wini talak ara, Allah el mikip deice arye, kam bukdeibukba, mikip arye ulule. Aning atonun, Kristus ap, kanye talima dukdongobuka neika unyap bukni, nun mikip ara mitang nanguk unyabe. Bukni, Allah el mikip arisilya deice arye, nun ap, Kristus ap neika ubirye, anggunti melibuka pil donamsiabe.

Galatia 2:20

Dipkoprop ara, Yesus Kristus wanwanun yo deice obika deice arye, Yesus arye na malye ulamse ning ati punupnuk anya arye, winipmanto ara na ap, Yesus ap dukdongobuka opnikba, dipse. Ara, Yesus dibuka deice arye, na babye dipna atonun winipsa ati nyapsine. Winipmanto ara, Kristus ap dukdongobuka opnika ati, wini talak ara, na babye yuk kum unun bukni, Kristus ara na talima noutamak ulule. Na ap, Yesus ap talima dukdongobuka unyame. Ati, ninye nong atonun ubuka tuba ununye talak nirya ara, Allah el Mi Kopropa Yesus ati diba tenenuna deice aryuk kam unune. Allah el Mi Kopropa arye nati bico tenepnukce, na pununa ati, el bidamang el nonguk aribukba, yu nang arye obikba, nati dibuke.

Kolose 3:3

Anyapmasina ara, urdem ati kum nyapsine. Deiyok ara, akunum diamik ninye atonun, anggun minop talak winilalum ning nirya ara, akunum bataklumce, wini talak tamubuka tuba kum winilulume. Anggunda, Kristus ap, talima dukdongobuka neika akunum ululume. Yesus ap, Allah ap, neika ururake. Ati anggun kam unamlum talak nirya, Yesus arye kalekuka melisilirye, Allah dam ulule. Anggun ap, Yesus ap, talima dukdongobuka umunyeura, ‘Allah disulul akarye, talibuka usulul anya arye, im deice ulul ninguk patapsiliba’ tenenauk unamlulume.

Ibrani 1:3

Allah ara pia teleb ulirye, weik erenanye ulule. Ulirye, weik mambule ulul touk, el Mi Kopropa babye, pia atonun ulula anya arye, weik dirina ap, weik mambul weik ap ulule. Aning atonun, Allah ap, el kanye tenen ning ap, el ulul ning nirya ap, aulul atonun, el Mi Kopropa babye, el ulul ning nirya anisibuka ulule. Allah el Mi Kopropa arye, el weik mikip yupu nyalya deice arye, yata ning do nirya, teleb ulilulba, aning-aning nirya kum kum danalule. El nyalul yupu deice aryuk aning-aning nirya talilulba, teleb ubuka tuba kam ulule. Ninye mutuku-mutuku nirya, sik malye unyak ning kum ubuka delina ap, ninye weik lyena ap, teleb kinilina ap ati, mambul pil akunum dopsukce, ila tamubuka im deice welebukce, Allah el taruk sirik tam bukuke. Aning-aning nirya deice tam ulirye, weik erenanye ulule. Allah ara, Weik Mambulnye, im deice ululnye bira, el Mi Kopropa arye, el taruk sirik tam bulbiyuke.

Ibrani 12:2

Nun diba tenenyap ning deiyok kouna ap, ansinibuka sirya dakna ap, deiyoknye Yesus ati, diba tenebuka talibibirye, pia tenenauk unamabe. Yesus ara, ‘Allah arye nati erepdeipnilirye, pia teleb ulinamnile’ tenenauk ulamuka anya arye, ‘Se, wanwanun yo deice ninye onyaka ara, alye una asa opnamaka ara, na like,’ kum tenebuke. Kum tenebukce, wanwanun yo deice obik talak ara, uk weik dinmokce, ikin weik unmoka babye, kum batakuke. Aminyan talak, kam bukuka im deice biyukce, Allah el weik Ninye Deiyoknye bunak, sirik taruk tam bulbiyuk. Yesus arye, ‘Allah el taruk sirik tam bulbinamna ara, pia telebe,’ tenyamukce, aninguk tenebuka deice arye, kanye deibukce, ‘Wanwanun yo deice opnamniyaka ara, na like anya arye, bataknamne’ tenen, pia kum tenelamuk.

Ibrani 7:25

Yesus ara, pia kam unamla anya arye, ‘Allah ap talima dukdongobuka unamap’ tenen, Yesus ati diba tenebuka, el deiceuk Allah el dam yanamak ninye nirya ara, Yesus arye pia lyebuka sirya dakasulule. Ninye lyena pil ara, etekdop asa ubuka don pil dosulule. Tonok ning babye kum batakalule. Winisilya deiyok ara, ani. Ara, pia kam ulirye, elti, diba tenenyak ninye ara, ‘Allah arye, elti, diba tenepce ninye melinamle’ tenen, Allah dam bilirye, yupu pia melibuka nyalule. Nun melina ati, Allah ati tuba morosulule.

Wahyu 10:6

El taruk erebukce, ayupu mikip arye nyabuk. “Wini talak arye dipdongobuka, aminyan doryanamle talak noutamak, pia kamuk unamlanye bira, im deice tam ap, im noutamak ap, tukwak mutuku ap, laut mekwen nirya ap, ura, aning-aning nirya noutamak ulul ning, aning-aning nirya ap, kwepdeiamuka deiyoknye, el si deice arye ayupu nyapsine. ‘Lo pia awamsilya ani, aminyan talakuk sirya daknamsila’ tenena pia meme.

Wahyu 15:7

Aning dinmasiba, sik teleb dumbarye kam unyak ning kan-kan, tonoknye birye, karu makau eipmase ning tekbarye dobuka, sik tekbarye malaikat ati bokuka aribuk. Akaru makau emas ning pum bisik ara, kam pia unamlanye Allah, el yu una ap, ninye wenena ap, ona ap deiyok ning nirya ubuk. Pia doyanamle talak kam unamlanye Allah ara, el yu weik ning, akaru makau emas ning pum unmokak eipse.

Wahyu 2:8

Ninye Mi Koprop Atonunye birye nyapnuke. “Yohanes, ance Semirna mutuku diba tenenyak ninye, sik melin malaikat ati, ayupu sekuka dopdeiplyame. Dopdeipnulam yupu ara, ani.” Aning-aning nirya min kum uamuk talak ara, na akunum ulamse ati, nara Deiyok Kina Deiyoknye unune. Tonda, aning-aning nirya akunum kum uplye talak babye, na pia kam unamne anya arye, nara Sirya Dakna Deiyoknye unune. Na dipse bukni, ila tuba tonap kam buksirye, pia kam unune. Narye anggun Semirna mutuku ninye ati nyapsine.

Wahyu 20:13

Atalak ara, laut mekwen deice balamik bukni, diamikba weik laut mekwen dilamukba, danoutam ulamik bukni, min arye akunum diamik ninye lakak tikilyayik. Tonda dipna deiyok ap, diamik ninye ulamikak, el si ara Kerajaan Maut ap, asukum ulamik bukni, min arye diamik ninye ara, lakak yanganmekba, eipse. Aweik deiyoknye, weik buna ning deice bukmoknye birye, aninye nirya ati, yupu lipsisikuka bokeibukce, wenebuk. Aninye nirya babye, sik tukwak mutuku tuba kam ulamik talak noutamak arye, winilamik ning nirya, im deice buku noutamak akunum sekuka deiamika anya arye, abuku dipdeyikce, abuku sekeiyamika noutamak uamuk touk, yupu lipsisikuka bokeibukce aninye nirya ati, wenebuke.

Wahyu 20:14

Aweik ninye deiyoknye birye, apil nirya akunum dopra balamuka ani, apil nirya akunum dobukopura, dipna deiyok ning ap, diamik ninye wekelbalamikak, el si ara Kerajaan Maut ap ara, amutuku bitinye doprobukce uku din mutuku noutamak dopkwetebuk. Uku din mutuku noutam akuku tuba dilamle mekwen ara, Dipna Bitinye ning ati nyanyabe.

Wahyu 3:7

Ninye Mi Koprop Atonunye birye nyapnuke. “Yohanes, ance Piladelpia mutuku diba tenenyak ninye, sik melin malaikat ati, ayupu sekuka dopdeiplyame. Dopdeipnulam yupu ara ani.” Malye winin ning tonok ning babye kum wininirye, pia diksukumnye unune. Tonda, na nyasinye ning nirya ara, pia dipkoprop yupu ati ara, ayupu batakna kumce, anyapmasin touk dipkoprop talibuka ununye birye, ayupu nyapsine. Na aryuk nyanamne yupu ara ani. Ara, “Akili sal ara, Allah el ulya im deice wekna telebe. Bukni, anang ara, im deice kum wektinge,” nyabuka, tukwak kili sal wibuka, yuk-yuk bokolina deiyoknye bira, na unune. Narye buplan pakeipnyopura, yuk nang arye abuplan ila tuba tonap kum tiriktinge. Aning atonun, narye buplan tirikdongopnyopura, yuk ninye arye kum kukeiptinge. Bublan kukulina ap, buplan tirikina ap, deiyoknye bira na uka.

Wahyu 4:9

Dan talak do nirya, sik akam unyak ning dumbarye arye, aweik mambulnye bun ning deice bululnye Allah ati, “Se, anda pia telebuk ulyame. Telebe nyapkiyabe,” nyabuka, elti, si erebikirye, el si kibicopura, sik kanye talima wisamukba, Allah kum batakmanto deiyok nang 24 nang arye wininyake.

Wahyu 5:14

Sikce amot senmekura, sik dumbarye kam unyak ning arye, “Nunce, ‘Aning ara dib unamle’ tenen, ‘Amin,’ nyababe,” nyabikba, sik 24 wisi weik deiyok nang arye gutam tuku dipdongobuka bukmikce, Allah ap, Domba Mi Atonye ap ati kibuka, sik si erenmekba, kekepsirye eipse.

Wahyu 6:8

Dinmasiba, tonok kuda basam tonap yayukba, el urasin ara, bol ekamuk kuda basam unmokba, eipse. Akuda deice bukmoknye, el si ara Ninye Dipna Deiyoknye bukmok. El menekuka banmokba, el aminyan tam meneng dam yanganmok ning ara, akunum diblamice ninye unyak aik talibuka, ulye deiyoknye yanganmok. Ayanganmarik nang bitinye ara, Allah arye, ninye dipna deiyok ning aribukba, doproprik. Ara tukwak mutuku im sirya, mutuku sirya nirya unyak ninye noutamak bukni, anirya dobuka yupa dumbarye wilibuka deiprikirye, yupa winilye batakuka, ‘Tukwak ninye yupa tonok weik arye oplopnamrak’ tenen, dipna deiyok ning aribukba, doproprik. Dipna deiyok ning doproprikce, sik mikip deice arye pil dopricopura, ninye weika arye dipnamak ara, ani. Ton tam nang arye, ton tam nang ati ya ap, yin ap arye pia olanamaka deice arye, ninye weik dibinamake. Tonda din ning aning-aning nirya kum daliba, din patapliba, din dina kum deice arye, ninye weik dibinamake. Tonda, kanye imun uk, weika arye dilamlyani, ninye weik tonap sakdanin balirye, weika arye dibinamake. Ton ning ara, ninye kum unyakak, bai mutuku noutamak kam ulul ning nirya arye, yu weik upliba, ninye weik olyanganamake.

Wahyu 9:1

Aminyan ara, malaikat pamunye birye el terompet deice lelim nyabukba, im noutamak arye tonok weik kurya ton, tukwak mutuku sakukba, eipse. Akurya sakukce, malaikat atonun dayukba, Allah arye buplan kukne ning kunci aribuk. Akunci aribuka ara, tukwak mutuku noutamak tuku pum bisik weik telenga balamuk tam, el deice tam buplan tirikamuk ning kukne ati, akunci aribuk.

1 Samuel 2:6

Allah Yahweh, elcuk kam bulina ap, dibina ap, delina ap, anirya ara, elcuk winililule. Ara, Allah Yahweh elcuk ninye ati, ‘Kam unamle,’ teneplyopura, anye bira kam unamle. Tonda atonun, yuknye biti, ‘Elcuk dipnule,’ teneplyopura, adiparyuk dipnule. Tonda, Allah elcuk, diplinye bira, dibin ninye unyak dam, asukum el si ara Sheol mutuku dolkwetelule. Atonun, elcuk, ‘Kam buknamle,’ teneplyopura, tonye bira, weik kanye imun uk dipliba, dipmanto upmalya babye, Allah aryuk teleb kibuka wetepdeipliba, kam tuba pia unamleʼ. Dipmalya babye, kam bukeipliba, tamubuka telebuk unamleʼ.