Rut 1:17 - Eipomek

¹⁷ Nyabukce, ayupu ton nyabuk. “Tonda, nongo an dan tam dipminyopura, weipnamkiyakak ara, na babye asukumuk dipniba weipnamniyake. Na patapnil ning ara, ani. Narye anti, melina kumce, batakuka bikinyopura, na wenena ati, Allah arye ikin weik ning na deice deipnutue, nyapne. Ati ara, pia melipkineba, unaname. Unanam bukni, na dipnyopura, bataknamkin bukni, kumopura, kume. Atonun an dipminyopura, neika kum upnanam bukni, kam unanam talak ara, pia kum bataknamkine,” Rut birye nyabuk.

Rut 1:17 交叉參考

2 Samuel 15:21

Daud arye nyabuk bukni, anye Itai birye, tamubuka nyabuk. “Kume na nio, dipkoprop, Allah el pia kamuk ululnye. Tonda, an babye na deiyoknye unimince, tuba kam ulyame. Ati na ni, an weiknye banuminye talak ara, na babye neika banamaname. Nara, an amu tam pil melibuka donanye ununa anya arye, banmanimiba, yuk nang arye opnicopura, dipna babye teleb uka. Na patapmanil ning ara, an ap banuka,” nyabuk.

2 Samuel 19:13

Tonda, ninye si Amasa, el dam nyapnamalyame. Raja Daud birye nyapkile. “Anda nabi yalanye ulyam do, kum do? Na batakananye ulyama anya arye, narye nyapkine. Yin talina deiyoknye Yoab, el pununa ati, an wibuka ereipnamkine. Dib nyapkine, arup arye dipdongobuka, atalak-atalak nirya ara, anda na yin talin nang, sik deiyoknye kipnalame. Narye anti, ereipnamkine. Aning kum winipnyopura, na ni Allah, el si Yahweh arye, weik arye wenepnamnutue, nyapne,” Daud birye, nyabuk.

2 Samuel 3:35

Engenmeka ani, aminyan talak ara, amutuku unmek nang nirya arye, ‘Se, keting kumubuka ati, nun ni koproba Daud, din ara mitik tonun ton diptueʼ tenen, arukulinmek bukni, Daud birye nyabuk, “Kume, Allah arye opnilyake. Ara winipmanto, keting asing banmalya ani, pia min kum kumaplye talak arye, roti do, yuk din ning do, mitik tonunuk dipnyeura, Allah arye na wenebuka opnamnile,” nyabuk.

2 Samuel 3:9

Ance na nong deice, pia malye yupu nyapdeipmanilama ati ara, na kanye weik teleb ning ara, narye nun ni Allah tenelamuk ning, kum winipnyopura, Allah arye nati, weik arye wenepnamnile. Ara, talye ati kum nyapkine. Allah arye Raja Daud biti, ‘Winipnamkine,’ nyalin yupu deice arye, nyalamuk ning nirya, narye ton melipnamne. Daud el tam kipnirye, elti, melipnamne.

1 Raja-Raja 13:31

Winilamika ani, aminyan talak ara, anabi wisinye birye, el mapu koprop ati nyabuk, “Na dipnyopura, Allah el pil don nabinye, asukum weipmapnye, el win damuk yanuka, weipnamnulume. Ara, anabi el nong ap, yok ap weipmaluma dana tam, na nong ap, na yok ap ara, asukum yanuka, weipnamnulume,” nyabuk.

1 Raja-Raja 19:2

Akunum ayupu kekebukopura, Elia dam nyalbinuyik nang wipdeibukce, Elia biti nyapnuyik yupu, sik dam yupu nyapdeibuk. “Elia, ance isa si Bahal erelamik nabi-nabi nang opluma ati ara, aning winiplum touk, narye an babye opnamakine. Ara, aunman keting atonun bukni, ambusum aketing uk akunum uplyopura, akunum opnamakine. Aning kum winipyopura, na patapnil ning ara, ‘Na si erenun isa mer arye nati wenebuka kanye ikin ning arepnicak’ tenena ati Elia, anda, ‘Dipkoprop opnicak’ tenen, ilil asa unalame, nyapkine,” nyabuka, yupu nyapdeibukba, Elia dam lak nyalbiyik.

1 Raja-Raja 2:23

Ayupu nirya akunum nyabukopura, Salomo birye nyabuk. “Dipkoprop Allah Yahweh, el si deice arye nyapne. Ara, na nyapnun yupu dipkoprob kum uplyopura, Allah arye na nyapnukin atonun, ikin ning ara, na nong deiceuk dadeipnamnile. Ara, Adonia birye nati, moropmanil ning ara, tamubuka el deice ikin ning deipnirye, wenebuka opniba, diplyopura, Allah Yahweh arye teleb tenepnamnile.

1 Raja-Raja 20:10

Anang arye, Raja Benhadad dam binuka, laka nyabikopura, elce tamubuka nyabuk. “Narye nyapdeipniba, na yin talen nang, pia weik dopdeipniba, Ahab an talibuka ulyam mutuku, Samaria mutuku noutam asik donyak nirya ara, ulubuka atu kiplopnamake. Winibikiba, adaklobice, anyasik kum daneibikiba, anyasik oldem arye, atu butbuta weleplye ning ara, sik ayin talen nang taruk deice yaliba, mitik tonun aryuk bobuka binamake. Aning nyapmana ara, pia dipkoprob winipnamnarya. Aning kum winipyopura, ‘Na si erenun isa wenebuka opnikcakʼ tenen, anggunti nyapne. ‘Sik isa mer nirya ara, na winipnamne ning moubuka dinmanilibuk, ‘Winipnamne,’ nyapdeipne yupu, dipkoprob kum winiplyopura, anggunce adiparyuk oplopnamnulume,’ nyabuka moropsine,” Raja Benhadad birye, nyabuk. Nyabukba, el yupu dobuka, nyalbana nang kekebikce, Raja Ahab dam binuka laka nyabik.

2 Raja-Raja 6:31

Raja malye kanye bobukce, aninye deiyoknye yu weik ubukba ayupu nyabuk. “Na mutuku ninye pia kanye imun unyaka ati ara, arup aryuk narye nyapdeipniba, Sapat el mi Elisa biti opnyopura, el kisok ngang daksaknamle. Aning kum winipyopura, na patapnil ning ara, Allah arye, nara weik wenepnamnile. Deiyok ara, Allah arye, adin patan talak areamsuk bukni, Elisa bira, Allah el yupu lak nyana deiyoknye ulul bukni, ‘Allah arye, nun din patana ara, kum daneipnamsil’ tenen, min kum moropsuke. Ati Elisa opnamnarya,” nyabuk.

Mazmur 45:10

Tonda, anda mambul weiknye ulyama ati, yuk-yuk mutuku ninye deiyok nang arye, ‘Israel ninye unyak mutuku talilul ninye deiyoknye biti, nun kilmapu dobuka arebipyeba, el patalul ning ati melinamak’ tenen, sikce, anti areamkikba, kilapu ara, an dam weik unyake. Diba, ance domlum kil ara, an taruk sirik tam tikilule. El baju deice ara, pia dengna weik ning, el si emas, pia teleb ning, Ofir mutuku arye dobuka boyanamik emas ara, taplak deiamikba, ongolule.

Rasul 11:23

Dopkwetebikura, Barnabas Antiokia mutuku biyukopura, Allah arye anang ati, bico tenyamukce, pia teleb kibuka melipmok ning eibukce, pia kanye deibuk. Barnabas kanye deibukce, anang ati nyabuk. “Anggun Yesus diba tenelulum ning ara, batakna kum, pia talibuka unamlulume. Tonda, anggun kanye teniltona kum arye, anggun kanye talima bokoltona kumce, anirya ansinibuka, nun ni Yesus pia arenamlume. El tibuk pia arenamlulume,” Barnabas arye anang ati, teleb yupu nyabuk akarye, sik talima kwa dibuk.

Rasul 20:24

Nun deiyoknye Yesus arye, pil arepnuk ara, Allah el kanye aryuk nun bico ati, Yesus deice lyepsilirye, talye melisulul yupu, el laka teleb yupu peterena pil arepnuke. ‘Apil nirya doptinirye, sirya daktinyopura, anyuk ara, pia teleb,’ tenenune. Yesus arepnuk pil ara, ‘Pia dopra balamnya ani, sirya daknamne’ tenen, na ona babye, dipna babye, telebe uka. Na kam una ara, ‘Na’ tenen, tenena kum arye, ‘Urtalya, daopnitinge,’ tenenune.” Paulus arye nyabuk.

Rut 1:16

Nyabuk bukni, Rut birye tamubuka, Naomi biti nyabuk. “Nongo, ance nati, ‘Tamubuka bilyame,’ nyana kume. Narye anti, batakuka kum bikitinye. Dan tam binalamak do, tonda dan binuka unalamak do, nirya ara, na pia tuba melinamkine. Tonda, an mutuku ara, na mutuku atouka. Tonda, an yala nang ara, narye, ‘Aninye ara, na yala nang atonun,’ tenenamne. Tonda, an si ereminye Allah ara, na babye el siuk erenamne. Nun neika unanama atia.” Rut birye nyabuk.

Rut 4:15

Tonda, an yamal kil Rut bira anti, weik bico tenekulule. Ance sal mapu tekbarye nang deiptumba, mitik anun arye, teleb ubuka melinamkiting bukni, akil Rut bira, pia weik arye melinamkile. Rut birye, sal mi deipmakil ning ara, ami arye wisi daminye talak, pia melinamkile. Ati, an kanye, pia deipnalyame,” nyabik.

1 Samuel 14:44

Nyabukopura, ninye deiyoknye, Raja Saul birye, Yonatan biti nyabuk, “Se, narye Yonatan an deice ikin ning deipkiniba, kum dipminyopura, Allah arye, na wenebuka opniliba, na dipnamne. Akumopura, kanye imun weik ning, na deice deipnamnile. Ati, anuk dadipnamlyame,” nyabuk.

1 Samuel 20:13

Bukni, na ni birye, ‘Daud opnamne,’ tuba teneplye ning, kel biknyopura, na dipkoprob laka nyapkinirye, teleb kibuka kum opnamkiyak tenenakuk dopdeipnamkine. Aning kum winipnyopura, nun ni Allah weik arye wenepnilirye, pia ikin ning, na nong deice deipnamnile. Bukni, na patapnil ning ara, nyapnukine. ‘Allah el si Yahweh arye, anti pia weika arye melipnamkile’ tenen, Allah moronamkine. Ara, minop talak Allah arye, na ni koproba ati, weika arye meliamuk touk, wini talak ara, an Daud biti, ‘Weika arye melipnamkile’ tenen, ‘Se,’ tenenune.” Yonatan birye, Daud biti nyabuk.

1 Samuel 25:22

Daud tenipdeyukce, utenebuk. ‘Atalak arye, sik Nabal tam nang nirya, kum opnyopura, Allah arye, na wenebuka opnutue,’ tenebuk.

1 Samuel 3:17

Nyabuk buk, Eli birye tamubuka asipdeyuk. “Allah arye yata nyapmaku do? Ayupu nirya ara, na ton laka nyapnilyame. Allah arye nyapmaku yupu nirya, kum laka nyapmanilamce, ton ning ara, kunusa dopminyopura, el weika arye wenepnamkile tenepne,” Eli birye, Samuel biti nyabuk.