Rasul 7:5 - Eipomek

⁵ Amutuku akunum yayukopura, Allah el talyamuk ning bokuka, Abraham el unamuk mutuku ati, tonok babye, pia ton kum aribuk. Tuku mitik anun kum aribuk bukni, Allah arye Abraham ati, ayupu nyabuk talak ara, Abraham el mi tonok babye, kum deiamuk bukni, Allah arye Abraham ati nyabuk. “Ance amutuku talyaminya ani, dipminyopura, ance deipnamlam mapu ap, dadeipdanin binamak mapu ap, amutuku talipnamake,” Allah arye Abraham ati nyabuk.

Rasul 7:5 交叉參考

Kejadian 12:7

Abram bira More mutuku biyukba, Allah el si Yahweh arye, Abram dam yanuka tikukce, ayupu nyabuk. “Abram, ance deipminyeba, dadeipdanin balamica ani, dadeipdanin binamak mapu ati, amutuku nirya arepnamne,” nyabuk. Amutuku ara, Allah arye, Abram dam yanuka tikukce, ayupu nyabuka ati, Abram birye, Allah el si Yahweh ati, el si erena ap, el arena ap ati, pala keil dobukabukce, keil yangapdeibuk.

Kejadian 13:15

Anyaka arye, eipmalam mutuku nirya ara, an ap, ance deipminyeba, dadeipdanin banamak nang nirya ap ati, arepnamsine. Arepsiniba, amutuku anggun pia talinamlume.

Kejadian 15:18

Atulum welenmok makau ap, uku buk ap noutam bisik biyukce, asum aryuk Allah el si Yahweh arye, Abram biti, “Dipkoprop winipnamkine,” nyabuka nyalin yupu nyapdeibuk. Allah el si Yahweh arye, nyalin yupu nyabuk ning ara, ani. “Abramo, ance deipminba, dadeipdanin binamak mapu, an mapu nirya ara, aunmalam mutuku nirya arepnamsine. Ara, Mesir mutuku noutamak weik balamle mek arye, dukdongopbuka, pera otam weik balamle mek el si ara, Efrat mek ap, danoutam mutuku nirya ati nyapkine.

Kejadian 16:2

Sik mi kum ati, Sara birye, utenebuk. ‘Na pil melin kil, Mesir mutuku kil, el si ara Hagar dobuka, na kanya biti arepneba, sik bitinye aryuk nun mi deipsitiringe,’ tenebuk. Utenebukce, Abram biti nyabuk. “Abram, anda nun ni koproba Allah, el si Yahweh arye, kum melipnuka arye, nara mi you kil unune. Ati na melin kil dopmince, anggun neika unmarumunce, akil arye, nun mi deipsutue,” nyabuka morobukba, Abram birye, “Yo, winipnamne,” nyabuk.

Kejadian 17:8

Ati, pia dipkoprob nyapkine. “Kanaan mutuku nirya ara, narye arepneba, ance deipminyeba, dadeipdanin banamak nang ara, amutuku pia talinamake. Narye anti, arekinye touk, arepneba sik aminyan talak unamak ninye babye talinamake.” Allah arye, Abram biti nyabuk.

Kejadian 23:4

“Kume, na ni kayapo, anggun mutuku noutamak unun bukni, nara yuk mutukunye, ninye asik nang ununa anya arye, na tuku kume. ‘Na kil tuku luknaman’ tenen ati, anggunce, “Asukumak luklyame,” nyapnutumba, anggun tuku dektinirye, na kil tuku luknamane,” nyabuka morobuk.

Kejadian 26:3

Ati, Gerar mutuku, asukum unmalamakuk, mitik anun ton tuba unamalyame. Narye melipkinya deice arye, telebuk unalame. Deiyok ara, narye an ni koproba Abraham biti, ‘Dipkoprop winipnamkine,’ nyabuka, nyalin yupu nyapdeipse touk, dipkoprob winipnamne. Ara, an ap, ance deipminyeba, dadeipdanin balamica ani, dortalak nirya unamak ninye ati, mutuku-mutuku nirya arepnamsine.

Nehemia 9:8

Abraham wipdeipluma deiyok ara, anti dib tenelamkukce, pia kum bataklamkukba elilaluma ati, wipdeiplume. Winiplumce, Abraham biti, “Ance deipminba, dadeipdanin banamak nang ati, teleb mutuku arepnamsine,” nyapdeiamlumce nyalin yupu areplume. Abraham biti, ‘Amutuku-amutuku nirya arepnamsine,’ nyapdeiamlum mutuku, amutuku unyak nang sik yala si ara, Kanaan mutuku nang ap, Het mutuku nang ap, Amori mutuku nang ap, Feris mutuku nang ap, Yebus mutuku nang ap, Girgasi mutuku nang ap, ulamik. Ance Abraham biti, “Ayala nang nirya, sik talibuka unyak mutuku-mutuku nirya dobuka, an mapu ati arepnamne. Ara, ance deipminba, dadeipdanin banamak mapu ati, arepnamne,” nyapdeiplume. Allah anda, pia diksukum ulyamnye binya arye, ance nyamsulum touk akunum winipmasilame. Sik Lewi yala nang arye nyabik.

Yehezkiel 33:24

Se, anda ninye sirika aryuk, deipkiknye ulyame. Anggun Israel mutuku noutam, weik asik ap, mitik asik ap dobuka, ulamlum mutuku asik ara, oldem kibukak bukni, amalye mutuku tuba unyak nang arye nyaninyake. Anggunce, ‘Kume, Abraham bira, tonoknye ulamuk bukni, elce amutuku tuku noutam nirya ara, dopdomukce, amutuku noutam ulamuk. Aulamuk talak ara, elda tonoknye ulamuk bukni, amutuku-amutuku nirya dopdomukce, amutuku noutamuk ulamuk. Bukni, na kanye ara, wini talak unyap nang, nunda anang pia weik unyaba ati, dipkoprob ning ara, ance nunti, amutuku arisiminyeba, amutuku pia talibuka ubirye, nun mutuku koproba kipdopnamabe,’ nyaninyake.

Ulangan 10:11

Winibukce, nati ayupu nyapnuke. “Na Allah arye, anggun apu yapu ati, ‘Ateleb mutuku arepsinyeura, talipnamlume,’ nyapdeamsi touk, wini talak ara, Musa ance Israel ninye bobuka bana ati, kintinipnalyame. Ance minopce biminyeba, sikda anyapmakin mutuku, teleb mutuku binuka talibikirye, amutuku noutamakuk unamake.” Allah el si Yahweh arye nyapnuke. Musa birye, Israel ninye ati nyabuk.

Ulangan 11:9

Tonda, arup arye nyapdeipmasin yupu moubuka talipmunce, pia kum batakmunyopura, Allah arye anggun kam una ati, lo weik tonun ton arepnamasile. Ara, anggun omutuku noutam wekelbimunce, unamlum mutuku ara, keting tamun tonap weik tonun mapmunce, unamlume. Amutuku ara, Allah arye anggun apu yapu ati, nyalin yupu nyapdeiamuka deice arye nyabuk. “Anggunce deipmunyeba, dadeipdanin banamak nang nirya ara, pia teleb mutuku arepnamsine. Tonda, winipmanto yupu ara, amutuku ara, sapi basam moum yung ap, mong mek ap, pia weik ulye mutuku dopropnamlume. Ara, amutuku noutam ara, yata teleb ning do, yala-yala nirya, pia teleb ning weik aulula ati nyapsine. Amutuku arepnamsine,” nyapdeiamuk. Ati ara, wini talak amutuku uk, binuka unamlume.

Ulangan 2:5

Tonda, anggunce amutuku nang ati ara, ‘Anang mal pipnamabe,’ tenena pia kume. Sik dam ton kum binuka opnamlume. Tonda, sik anang unyak mutuku, atam nirya ara, narye anggun Israel yala nang ati, mitik tonun babye, ton kum arepnamsine. Deiyok ara, Edom mutuku tam nirya ara, narye Esau yala nang ati, akunum areamsiba, min arye talibuka unyake.

Ulangan 34:4

Allah arye Musa biti, amutuku-amutuku nirya kapdeibukba, Musa birye eibukopura, Allah arye nyabuk. “Narye Abraham ap, Isak ap, Yakub ap ati, ‘Amutuku arepnamsine,’ nyapdeiamse mutuku atia. Ara, narye anggunce, ‘Deipmunba, dadeipdanin banamak ninye ati, amutuku nirya dobuka arepnamne,’ nyamse mutuku atia. An Musa biti ara, kapdeipmakinba, an asing arye amutuku eipmalam bukni, anda Yordan mekin koubuka, otam ulul mutuku nirya ara, kum binuka unalame. Asukumuk dipnalame.” Allah arye Musa biti, nyabuk.

Ulangan 9:5

Dipkoprop anggun diksukum una ap, anggun kanye talima teleb tenena ap ati, Allah arye, amutuku ninye obuka, sirya dakliba, anggun mutuku binuka, talibuka kum unamlume. ‘Nunda teleb nang anya arye, Allah arye amutuku arepsile,’ tenena meme. Allah arye wininamla ara, anggunti kume. Allah arye, amutuku ninye yaknamla deiyok ara, ani. Ara, amutuku ninye arye, malye-malye winin ning weika arye wininyaka ati, Allah arye melipsilyopura anggunce, aninye obuka yakmunce, amutuku binuka weknamlume. Tonda, Allah arye wininamla deiyok ton ani. Ara, Allah arye anggun apu yapu Abraham ap, Isak ap, Yakub ap ati, Allah arye ‘Wininamsine,’ nyabuka nyalin yupu deice deiamuk yupu nyabuka atonun, winipnamla atia. Amutuku arepnamsila deiyok ara, aning uka.