Rasul 27:23 - Eipomek

²³ Ara na ni Allah, elce talipnukba, el si erebuka, el pil dobuka unun Allah ara, elcuk el im deice melina pil donanye malaikat, ambusum lukunyan arye dopkwetepmanuba, na dam yanuka tikmoe.

Rasul 27:23 交叉參考

Mazmur 116:16

Diba, na ni Allah Yahweh, nara an amu tam pil donanye unune. Ara, na deiamnuk kil ara, Allah an amu tam ulamuk kil arye deiamnuke. Tonda, malye ning arye, tapu koubuka, wenenak atonun deiamnuk bukni, ance lopdeipnuluma ati, nara an piluk donamkine.

Mazmur 135:4

Ara, Yakub birye deiamukba, dadeipdanin yanganyap nang nirya ara, Yahweh arye, ‘Ayala nang ara, ‘Naʼ tenen nang unamake,’ tenepsukce, wibuka deipsuke. Diba, nun Israel yala nang nirya ara, akunum wibuka erepdeipsuka ati, “Anggun nirya ara, na ninguk ululuma ati, pia ati talipnamsine,” nyasulule.

Mazmur 143:12

Tonda, ance nunti, “Weik tonun bico tenesinirye, pia teleb kilinamsine,” nyabuka, nyalin yupu deice nyapdeiamsulum touk, adeice arye, nun mal olan nang ara, obuka sirya dakanamlame. Ara, nati, ‘Anye bira nun lik,’ teneninyak nang nirya ara, ‘Ance anang obuka, malye kipnalam’ tenen, moropkine na nio! Ara, talye ati kum bukni, deiyok ara ani. Nara, an amu tam unirye, an piluk donuna ati, ance lyepdopnamnilame na nio!

Keluaran 19:5

Ati ara, anggunce na arepsise yupu moubuka kekepmunce, talipmunyopura, narye anggunti ara, “Na tenen ninye tenepsinirye, pia kalikuka melinamsine. Ara, narye, ‘Wininamlulume, aning ara kum wininamlulume,’ nyalisinye yupu kekebuka dobolbamunyopura, narye pia talinamsine. Mutuku im sirya, mutuku sirya nirya ara, na ninguk ulule. Tonda, tukwak mutuku noutamak ara, yuk mutuku ninye weik aunyak bukni, anggun uk ara, na mapu atonun unamnulume.

Kidung Agung 2:16

Narye na dopnamnilanye biti, weik tonun bico tenenirye, elti, na kanye delinune. El tonok ara, na ning ulule. Yuk nang ton pia kum patanulule. Aning atonun, na kanye delinunye birye, nati, weik tonun bico tenenilirye, nati kanye delilule. Ati, nara, el kil unune. Yuk kilapu nirya ara, pia kum patalule. Nun bitinye arye, pia bico tenelanauk unimirye, kanye delilanauk unyame. Winipmanto ara, domba basam weina deiyoknye birye, el domba basam bobalirye, urasin teleb kita, el si ara bunga bakung noutam deipliba, dinmakiba, eiplirye kanye delilamle touk, narye moun dinun nye birye, na si bam bol deice mutupnilye talak ara, pia kanye deibuka ulule.

Kidung Agung 6:3

Na weik tonun bico tenenirye, pia moun dinun nye bira, dipkoprob nara el kil unune. Aning atonun, na dopnamnilanye bira, elce nati kanye delinulula ati, nara el kil koproba atonun unune. Nun bitinye ara, pia kanye deipdanumurye unyame. Ati ara, na dopnamnilanye bira, na dam yalirye, el domba basam boyanuka, amutuku palamle kita, el si ara bunga bakung, koubikba palul noutam deipliba, dinyake.

Yesaya 44:21

Allah el si Yahweh arye Israel ninye ati nyabuk. “Yakub birye deibukba, dadeipdanin balamik ninye, anggunda na wininye ning ara, pia luba kum kinamnululume. Pia moubuka tenemunce unamlulume. Anggunda, na amu tam pil don nang ululume. Na kel biknamnululume, ara narye anggun wipdeiamsesirye, kwepdeiamsise deiyok ara, ‘Anggunda na mapu, ‘Naʼ tenen, ninye unamak’ tenen, wipdeiamsise. Anya arye, Israel ninye anggunda, narye luba kum kipnamsine.

Yesaya 44:5

Teleb ubuka ukiba eibikirye, aninye nirya tonok-tonok, ‘Nara Allah el tamnye unune’ tenen, na siuk nyanamake. Ton nang ara, ‘Yakub el yalanye unune,’ tenebikcopura, sik aninye ara Yakub ance deipminba, dadeipdanin banamak ninye tam uk kilyanganamake. Winibicopura, anang sikce seknamaka ara, ‘Nara, Allah Yahweh el tamnye unune,’ tenebuka, sik taruk deice arye sekenamake. Tonda sikce sik bidamang ati, ‘Nara Allah el tamnye, el tenenanye unune,’ tenen, Israel si nyanamake.

Yeremia 31:33

Bukni, sik malye winilamice ning ati, wenen ning akunum arepnyopura, aminyan talak, narye winiryuk nyalin yupu, sik Israel ninye dam nyapdeipnamne ning ara, atia. Minop talak narye, ‘Aning wininamlulume. Aning ara, kum wininamlume,’ nyabuka, yupu deice nyaiamse ning ara, aminyan talak ara, ayupu moubuka tenenyak, ninye ara, yuk-yuk sik talima noutamak deipniba, moubuka tenenamake. Minop talak ara, keil deice sekuka arepse bukni, aminyan talak ara, sik talima pum tam sekuka deipnamne. Winipnirye, nara sik ni koprop Allah unamne. Sikda, na mapu koprop pia aunamake.

Yeremia 32:38

Wini talak ara, sikda na mapu koproba unyakbuk, nara anggun ni koproba Allah unamne. Naryuk anggunti, kalekuka melisinirye, teleb kilinamsine.

Yehezkiel 36:38

Winipmanto ara, minop talak na si eren ati, weik sum uamukba, na si eren ati ninye yuk-yuk danirye domba basam, pia weik bobuka, Yerusalem mutuku uku dongolyangalamikba, domba basam nukmanto kumce, pia weik ulamik touk, narye Israel ninye yupa pia weika kipdeipnamsine. Ninye yupa weik akunum ubikirye, minop talak yuk mutuku yu weik nang, yin bon nang arye, sik asik nirya uluplomikba, oldemuk ulamuk bukni, wini talak ara, amutuku nirya, ila tuba aik punubuka dobikirye, unamake. Ara, ninye yupa weik, kum nukmanto kibuka ulamikirye, amutuku aik nirya, ninye aniryuk langdipnamake. Winipnyopura, yata mutuku ninye do nirya, dipkoprob na Allah Yahweh ati, biknamniyake. Allah arye nyabuk.

Daniel 3:17

Nyabikce, ayupu ton nyabik. “Nun kele, nun talibuka si erenyap Allah ara, nun ap unyaba ati, weik uku buk noutamak dongopsiminya babye ara, Allah arye lyepdopnamsile. Ati, na ni ance, ‘Winipnamane,’ tenepsiminyopura, telebe dawinipsilyame,” nyabik.

Daniel 3:26

Atalak, Nebukadnesar weik uku buk dinmok aik, bisik bublan dam tikuk. Tikukce, elce ayupu nyabuk. “Sadrak ap, Mesak ap, Abednego ap, anggunda Allah erenanye, el pil don nang ululuma anya arye, weik uku buk dinmala kan-kan noutamak arye, kubuka yamunce, yalulume,” nyabuk. Nyabukopura, Sadrak ap, Mesak ap, Abednego ap, weik uku buk dinmok aik pum tam arye, kubuka yayik.

Daniel 3:28

Winibukopura, Raja Nebukadnesar birye nyabuk. “Sadrak ap, Mesak ap, Abednego ap, sikce si erenyak Allah ati, ‘Telebe,’ nyabuka, si erepne. Sikce si erenyak Allah arye, el malaikat dopkwetepmalba, el pil don nang Sadrak ap, Mesak ap, Abednego ap lyepmala ati bikne. Sikda na nyapse yupu yanipnikce, sik tenepmeka ara, ‘Nun opsitinga babye, teleb uka. Ara, nun si erenyap Allah arye lyepnamsila atia,’ tenebik. Utenebika ati, na yupu yanibuka, sik Allah ati, diba tenebik.

Daniel 6:16

Nyabikopura, atalak aniryuk, ninye deiyoknye Darius arye, ‘Yata wiriptinye kuma,’ tenebukce, “Daniel dobuka, yu weik singa kuse ulamika dam, dopkweteplulume,” nyapdeibukba, dopkwetebik. Dokwetebikopura, ninye deiyoknye birye tamubuka, Daniel biti nyabuk. “An si erelyam Allah ara, ‘El arye lyepkutue’ tenen, patapnile,” nyabuk.

Daniel 6:20

Akunum dilbiyukce, imun kanye bobuka, “Daniel anda Allah el pil donanye ulyamce, Allah el kamnye mikip deice arye, akunum lyepdopmakil do?” nyabuka, weik yupu deice arye binuka nyabuk.

Daniel 6:22

Daniel birye, ayupu ton nyabuk. “Na si erenun Allah arye, el im deice pil don nang, malaikat dopdeipmanilba, yu singa kuse nirya sik si yanuka, lipdongobuka talipmanguba, sikce na nong kum dipmaniake. Na telebuk unmane. Aning ara, na si erenun Allah ara, el kele. Ara, malye un ning, el dam ton kum wininune. Tonda, na deiyoknye an dam ton, malye kum wininune. Ati, Allah arye lyepdopmanile,” nyabuk.

Zakaria 13:9

Winipnamne talak ara, ayupa winilye ara, tonok bokuka seper tiga, ‘Naʼ tenen deipnamne ning ara, lyebuka deipnamne. Sik alyebuka deipnamne nang ara, pia teleb lek nang kipdeipnamne. Winipnamne bukni, winina ati ara, ‘Teleb unamak do, kum do?’ tenen, ikin ning arye, anang nirya piripdenamne. Winipmanto ara, dekna weik kat ning, el si perak dobuka, ‘Malye ning kum uplyeba, teleb ninguk lak upnamleʼ tenen, uku dongobikceba, uku diplyopura, pia teleb ninguk lak ulule. Aning atonun, dekna weik kat ning emas ati, ‘Malye ning kum uplyeba, teleb ninguk tuba unamleʼ tenen, uku arye pirilelamle touk, sik anang babye, ‘Teleb wininamak do, kum do?’ tenen, piripdenamne. Winipnyeba, sik anang nirya arye, nati “Nun ni Allah melipsilyame,” nyabuka moronamake. Winikceura, narye sikti, tamubuka nyanamne. Narye sikti, tamubuka nyanamne yupu ara, ani. “Anggunda, na mapu koproba ululume,” nyapnamne. Winibuka nyapnyeba, sikce tamubuka nati, nyapnamniake. “An Allah Yahweh ara, nun ni Allah ulyama ati, an siuk erenamkiabe,” nyabuka, natibuk si erebuka kinamniake.

Maleaki 3:17

Winibikopura, Allah Yahweh aning nirya talibuka, im deice yin talin malaikat nirya, sik weik deiyoknye birye eibukce, ayupu nyabuk. “Sikce na si tuba ereninyak ninye nirya ara, na mapu koproba, ‘Naʼ tenen, ninye unamake. Tonda, na tenepse sum akunum uplyopura, ninye nirya ati, yupu lipsisikuka bokeipnirye, wenepnamne. Atalak ara, sik aninye ara, na mapu koproba, na kanye delin ninye unamake. Ara, narye sikti, tuba bico tenenamne. Winipmanto ara, el mapu deiamlinye bira, tonok mi arye, ‘Na ni koproba’ tenen, el nyapmalye yupu kekebuka melilamlye mi ara, el li birye, ‘Na mi koproba,’ tenebuka melilamle touk, nati tuba diba tenenyak ninye ati, atonun tenebuka wininamsine. Ara, nati diba tenebuka, na si ereninyak ninye ati bico tenen, lyepropnamne. Sik wenebuka kum oplopnamne.

Yohanes 12:26

Yata ninye do nirya, na amu tam bukuka, na yupu kekebikirye, na pil ati dokcopura, na unye touk adiparyuk wininamake. Na ban bisikuk adiparyuk melinamniyake. Tonda, na unun mutuku nirya, na mapu unamake. Na amu tam bukuka, na yupu kekebikirye, na pil ati donilinye biti ara, na Ni Koprop Allah arye, anye erebuka teleb kipdeipnamle.” Yesus arye nyabuk.

Rasul 12:23

Anang arye nyanmekbuk, Herodes arye, ‘Kume, na teleb unmana ara, na mikip deice aryuk unune,’ tenebukce, Allah si kum erebuka ati, adiparyuk im deice Allah melinanye birye malaikat arye Herodes ati, uk ning aribukura, kuluma weika arye el deiplyu potokukura, minopce dibuk.

Rasul 16:17

Akil arye Paulus ap, nun nirya ap ati dobolbalamsukce, weik yupu arye nyalamuk. “Allah pia mikip weik ulirye, aning-aning nirya bisilul deice arye ulul Allah ara, anang ara, el pil melibuka don nang unyakce, ‘Allah arye Yesus ati dib tenebibya deice aryuk lyesulul,’ Yesus arye lyesulul yupu laka nyanmasiake,” nyabuka akil arye pia nyalamuk.

Rasul 18:9

Ara, tonok sum lukunyan arye, lengdar deice atonun arye, Yesus arye Paulus ati nyabuk. “Na ap neika pia unyama ati ara, ilil una kum mikip aryuk auminya ato sik, ilil pia kum unalame. Tonda, tunim abuka kum unalame, na yupu uk pia peterenamlame.

Rasul 23:11

Bobiyikura, inibukba, alukunyan aryuk nun ni kopropa Yesus Paulus dam tikilyayukce nyabuk. “Ilil kum arye mikip aryuk unamlame. Yerusalem mutuku ulalamce nati teleb kibuka lak nyalamnilam touk, Roma mutuku ababye bimince adiparyuk laka nyanamnilyame,” nyabuk.

Rasul 5:19

Wenena aik dongobik bukni, alukunyan noutamak arye, Allah el im deice pil donanye malaikat tonok yayukce, awenena aik buplan kukuk ak arye, anang nirya dobuka buru tam bobiyuk.

Rasul 8:26

Aminyan talak, Allah el im deice pil donanye, yupu lak lenanye malaikat tonok Pilipus dam nyalyayukce, ayupu nyabuk. “Anda Yerusalem arye Gasa mutuku bana ati, atam yapdeibik bisik noutamak ara, bupu weik ulirye, mek kum ati ninye kum unyak mutuku bisik, ubilyame,” nyabuk.

Roma 1:1

Telebe, na kayapo. Na Paulus birye, anggun Roma mutuku diba tenelulum ninye ati, teleb nyabuka, asurat sekeipsene. Na Paulus ara, Yesus Kristus el amu tam bukuka, el pil melibuka donanye, Rasulnye unune. Allah arye nati, ‘Paulus ara, na laka teleb yupu, ninye lyena yupu dobuka peterelbinamle,’ tenen wibuka deipnukce, el laka teleb yupu dobuka peterelbana ati, deiyok kouna deiyoknye, Rasulnye kipnuke. Ati, elcuk wipdeipnukba, apiluk donune.

Roma 1:9

Na kanye bokoltona kumce, pia pi dobuka, mikip arye peterepda banune. Ara, na kanye talima el deiceuk deipna deice arye, Allah el Mi Kopropa Yesus, el laka teleb yupu, ninye lyen yupu dobuka, mikip arye peterepra banune. Ara, na kanye talima, Yesus el deiceuk deipsa deice arye, ‘Allah el Mi Kopropa Yesus, el kai teleb yupu, ninye lyen yupu dobuka, mikip arye peterepra banune. Allah el Mi Kopropa Yesus, el amu tam unirye, el piluk dopnamne,’ tenenune. Allah elce dinmanila anya arye, na talye yupu kum nyapsine. Allah moronun talak nirya ara, anggun Roma mutuku umunye ninye ati pia tenepnirye, Allah morosunune.

Roma 6:22

Bukni, Isa Mutuku Dongonye arye tapu kouamsukba, el amutamuk ulamlumce, malye winin ninguk talibuka winilamluma noutamak, Allah arye akunum lyebuka loplopsukba, wini talak ara el amu tam bukuka umunyeba, elcuk anggun kanye talima talisulule. Allah el talisilya deice arye, teleb ulisulul ning ara nyapnusine. Ara diksukum teleb ubuka winin ning winipra balamibya ani, aminyan sirya talak ara, Allah ap neika kam pia unamabe.

1 Korintus 6:20

Allah el weik mambul ning deice arye, deksuka ati, el na tenen ninye akunum ululume. Aning ati ara, anggun nong ap, anggun nong deice arye, wininamlum ning nirya ap, anirya deice arye, ‘Allah el siuk erebuka, eltibuk kinamap’ tenen, diksukumuk unamlulume. Na Paulus arye, nyapsine.

Ulangan 32:9

Ura, Allah arye awinibuk ning deiyok ara, el mambul tenelye ning ara, elce wibuka meliamuk ninye uka. Allah el ‘Naʼ tenen ning ara, Yakub elce deibuka, dadeipdanin balamik ninye diamuk. Ara, Israel yala nang ara, Allah elce wipdeibuk nang uka.

2 Timotius 1:3

Na apu yapu arye, Allah el si erebuka, el piluk dolamik touk, na babye atonun, na kanye talima noutam ara, malye ning duknuna pia kum arye, Allah el pil ati pia diksukumuk unirye, pil donune. Atalak noutamak nirya ara, keting noutam babye, lukunyan babye nirya, Allah ati moronye talak noutamak, anti tenekinirye, kanye deibuka Allah ati, “Telebe,” nyakunune.

2 Timotius 2:24

Tonda, Allah el pil dona ati melina ninye ara, yupu deice arye yu uplirye, derelana ara, pia meme. Yu uplirye, malye yupu nyaldana kum bukni, Allah el pil melina ninye arye yuk nang ati, nimalye arye teleb ubuka adiparyuk melinamake. Yuk nang ati, adiparyuk teleb ubuka peterepnamake. Yuk nang arye, Allah el pil don nang ati, malye updeisikca babye, ‘Malye winipdeipmaniak,’ kum tenenamake. Aning ati lubakibikirye, tuba tenena kum unamake. Kanye nimalye aryuk teleb unamake.

2 Timotius 4:17

Anang nirya bataknik bukni, nun deiyoknye Yesus, na dam yanuka melipnuka deice arye, el mikip arepnukbuk, na yupu teleb ubuka nyapse deice arye, atalak bulupmek Yahudi yala kum ninye nirya arye, Allah el ninye lyen yupu kekebik. Atalak ara, aninye arye talye merekukua oplopmanitinge. Bukni, Yesus arye lobuka lyepnuka ati, sikce kum opnike.

Titus 1:1

Telebe, na mi Tituso, an ap, neika Yesus Kristus dib tenebupubuk, kanye talima dukdongopsuk ati, na mi koprop atonun ulyamnye anti, na Paulus arye asurat sekeibkine. Na Paulus ara, Allah el amu tam unirye, el yupu uk kekebuka, el piluk donune. Yesus Kristus arye, ‘Na yupu dobuka peterelbanamle. Elda na Rasulnye unamle’ tenen, wipdeipnukura, Allah arye, ‘Lyepnamne’ tenen, wipdeiamuk ninye ara, ‘Sik arye, elti, weik arye dib tenepnamak’ tenen, pil donune. Tonda aninye arye, ‘Allah el dipkoprop yupu weik arye kel biknamak’ tenen, pil donune. Allah el yupu ara, moubuka kekebibye deice arye, Allah el funguk ulye touk, diksukumuk uptibye.

Titus 2:14

Nun Lyena Deiyoknye Yesus arye, nun lyena ati, el mining nonguk arepsukce, nun pununa ati dipsuke. Malye winin ning noutam akuk ulamupa ati ara, nun wenena ati talye luparabuka oplopsutu bukni, ‘Akili sal ara, deknamne,’ tenelamukce, nun pununa ati, tukwak mutuku yanuka dibuk. Winibuka deksuka deiyok ara, ‘Ninye tukwak kili sal, sik malye un ning nirya kilipnirye, dekuka lopdeipniba, ‘Na’ tenen, ninye pia teleb una ninye unamake. Winibikirye, teleb winin ninguk talibuka, kanye deibuka diksukumuk unamak’ tenen, el nong deice arye deksukce, lyepsuke.

Ibrani 1:14

Anggun ton teneipdelulume. Allah el im deice pil don nang malaikat nirya ara, im deice ning, dib kanye atonun nang unyakba, Allah arye sik malaikat ati, ‘Kume, ninye tukwak ninye lyepneba, ninye lyen ning nirya dolonamak ninye ati, sik melipnamlyame. Tukwak ninye, lyepnamne ninye ara, sik melina ati, ‘Pil melibuka donamlum’ tenen, anggun malaikat dolkwetesunune.’ Allah arye untenyamukce, sik malaikat ati nyabuk. Malaikat ara, Allah arye lyelul ninye sik melina ati, dolkwetelula anya arye, sik malaikat ara, mitik mambul unyak bukni, Allah el Mi Kopropa ara, eluk weik mambul ulule, nyapsine.

Wahyu 22:16

“Na Yesus arye, na im deice pil dona nang, malaikat dobuka an dam dopkwetepmakina ara, ‘Ayupu nirya laka nyapkikiba, ance nati diba tenenyak ninye nirya, laka nyalbinalam’ tenen, amalaikat dopdeipmakine. Minop talak ulamuknye Raja Daud birye deibukba, dadeipdanin yangalamika ani, deibik mi, weik mambul mi ara, na uka. Na si ati, ‘Berentam Talak Panabuka Tikilamla Kurya,’ nyaninyake.”