Rasul 10:4 - Eipomek

⁴ Nyabukura, Kornelius, ilil weik ubukura, tunim abukce, anye bira el nonguk pia dinmok. Pia dinmokce, “Naio, yata wiripnun do?” nyabuk. Nyabukba, im deice Allah pil donanye malaikat birye tamubuka nyabuk. “Ance Allah morolyam ning ap, ance bona utotoa talina kum ninye talye arilyam ning ap, Allah elikilirye, tenekulule anya arye Allah arye weik kanye deipmakile.

Rasul 10:4 交叉參考

2 Tawarikh 32:24

Atalak Raja Hizkia bira, nakina pia weik deiyok koubukce, uk weik taleamukba, dipmanto ubukce, Raja Hizkia elce, ‘Allah arye kwetepnutueʼ tenen, Allah ati morobuk. Morobukura, Allah arye, ‘Anye kwetepnunʼ tenen, el uk taleamuk ning kwetelina ati, ‘Biknule,’ tenebukce, pitin kipdeibuk ning ton arebuk.

2 Tawarikh 6:33

Ati an unamlam aik dam arye, im deice arye, sik aninye asik nang arye moronamkiak ning ap, tonda sikce nyanamak ning ap ara, kekepmince arenamlyame. Aning atonun, winipminyopura, sik amutuku dana-dana unyak nang ap, tukwak mutuku im sirya, mutuku sirya unyak nang nirya ap arye, an yupu kekebikirye, anti bikiceura, ‘Se, Allah Yahweh ara, dipkoprob mambule weike,’ tenen, anti ilil uplyeura, si erebuka kinamkiyake. Ara, an mapu koproba, nun Israel nang arye, anti teninyap atouk, sik yuk-yuk mutuku nang babye atouk tenenamake. Tonda, narye moubuka dopmakin aik ara, sik mutuku-mutuku nirya unyak nang nirya arye, ‘E, Raja Salomo birye, anyaik dobuka ara, Allah si erena ap, el yupu kekena ap, ulul sukum ara, ani,’ tenenamake.” Raja Salomo birye, Allah ati morobuk.

Mazmur 141:2

Winipmanto ara, sik imam nang arye, nintong teleb nyan ning, uku dongobikiba, atulum ara, an dam yaliba kekelyam touk, ‘Narye moropmakin yupu babye, an dam yatuba, kekeptum’ tenen, moropkine na nio. Tonda, winipmanto ara, nun Israel yala imam nang arye, ‘Nun malye winin ning, namin kipsilirye, tamubuka teleb kipdeipnamil’ tenen, lukunyan talak nirya, kam ning obikirye, an arena ati, uku dongolamak touk, narye na taruk erepnirye, anti moropkine na nio.

Mazmur 20:3

Tonda, ‘Allah arye el si eren aik pum tam bukni, Pia Lek Teleb Aik pum tam arye, el mikip deice arye, melinamsil’ tenen, moronune. Atonun, ‘El ulul mutuku, Sion mutuku arye, el mikip dokwetepsutu deice arye melinamsil’ tenen, moronune.

Yesaya 43:26

Anggun ap, na ap arye, neika tenipdenamabe. Anggun minop talak malye winilamlum ning ara, tuba tonap tenipdenamabe. Anggun malye winilulum ning ara, yupu neika talipnamabe. Anggun Israel ninye arye, ‘Kume nun malye una kumce, telebuk ulamupu,’ nyapnumunyopura, kekepnamsine. ‘Nunce malye winin ning tonok babye kum winilamupu,’ nyapnutumba, kekepsitinirye, ‘Dipkoprop ulamike,’ teneptinye bukni, aning kum nyapnutume.

Yesaya 45:19

Na yupu ara duknubuka kum nyanune. Tonda kunuknak arye duknubuka kum nyanune. Tonda na wiamse ninye Israel ninye ati, ‘Talya urdemuk dibuka banamak’ tenen, kum nyanune. Nara, dipkoprob Allah Yahweh ununa anya arye, ‘Diksukum koprop uk teleb kibuka unamak’ tenen, dipkoprob yupu uk nyalinune.” Allah arye nyabuk.

Daniel 10:11

Winipsopura, na dam yanmoknye birye, nati nyapnuke. “Danielo, Allah arye anti, pia bico tenekulula ati, elce nati, ‘Daniel dam minop bimince, ayupu nyapnulyame,’ nyapdeipnue. Ati, an tikmalamak arye, na nyapnukin yupu ara, moubuka kekepnulyame. Nara, an dam laka nyana ati, akunum dopdeipmanilba yanmane,” nyabuka, elce nati ayupu nyapdeipnukba, kekepse talak ara, ilil upmanuka arye, yok birbir anmanuka deice aryuk, tikmase.

Imamat 2:2

Aboyangana ati ara, elce akintinibuka deipmalinye biryuk, Harun elce deiamukba, dadeipdanin yangakirye, na si eren aik pum tam, pil talibuka donyak imam-imam nang, sik dam boyalirye, yanuka arepnulule. Winiplyopura, imam yala nang bukni, asum anyaik koproba pil donmalinye birye, atepung ton tonok taruk arye, mitik tonun ton doropnulule. Atonun, minyak zaitun mek ap, tonda siltong teleb ning, el si kemenyan nyanyak ning ap, dobukaplirye, aning nirya ara, uku dongona ati, keil pala yangabuka taplakikce, kintinibuka deibikak, el si mesba bobilirye, uku dongopnulule. Auku dongoplya deice arye, aning nirya ara, ‘Yahweh ati, akunum arepneʼ tenen, laka kipnulule. Apil doplya deice arye, uku diliba, siltong teleb ning, Allah Yahweh dam biliba, kekeplirye, pia teleb kanye delinamlule.

Maleaki 3:16

Allah arye Israel ninye ati, weik arye wenebuka, Israel ninye kan-kan, sikce Allah ati, tuba ilil ulamukba, diba tenebuka ulamik ninye arye, bulubuka yupu talipmikce, yupu nyalanmikba, Allah el si Yahweh arye, sik talipmek yupu kekebuk. Sik tuba dib tenen, kili sal ap, sik kayapu dib tenen ninye ap arye, amambul yupu buku dobuka sekik. Ara, ‘Nun ni koproba, Allah Yahweh ati, tuba dib tenebuka elti, ilil tenebuka unyap ninye ara, nun si abuku noutam sekenamabe. Tonda, Allah ati kanye deibuka ubirye, tuba-tuba tenebuka, el siuk erenyap ninye ara, nun si abuku noutamak sekenamabe. Aning sekibirye, luba kina kumce, pia tuba tenenauk unamabe. Tonda Allah arye, aning eiplirye tuba tenenamsile,’ tenebikce, dib tenen ninye si abuku noutamak sekik.

Matius 26:13

Ati ara, dipkoprop nyapsine. Na lak teleb yupu bobuka peterelbinamak mutuku nirya ara, akil arye na nong deice nintong teleb mek dikeipmanil ning ara, ‘Akil elti, pia tenenamak’ tenen, pia peterelbanamake,” Yesus arye nyabuk.

Lukas 1:29

Malaikat arye nyabukura, Maria kekebukce, ‘Yata wiripnamnila ati nyapmanil do?’ tenen, teninmokce ilil weik ubuk.

Lukas 24:5

Winiprikura, akilapu eibikce, lukdayikce ilil weik ubuka ati, koupdongobuka tikmek. Ilil weik ubukura, anang arye akilapu ati nyaprik. “Diplamak ninye wein dam, ‘Yesus aunmal do?’ tenen, dilyanmaluma ara, yata ati do?

Rasul 10:31

Tikilyayuk akarye nyabuk. ‘Korneliuso, Allah arye an moronmalam yupu kekepmakile. Tonda, ance bona utotoa talina kum ninye ati talye arilyam ning ati elikilirye, tenekulule. Allah arye kanya deilikulule.

Rasul 14:9

Paulus peterenmok talak ara, anye birye el yupu moubuka kekenmok. Kekenmokbuk, Paulus arye anye bukmok akuk dinmokce, ‘Anye bira Yesus yupu dib tenepmantonye ulule. Ati ara, Yesus dib teneplyopura, el yana lipsisikuka teleb kipdeiptinye’ tenen, Paulus arye kel kibuk.

Rasul 22:10

Anyanmok yupu kekebuka, ‘Na talyeto winilamse’ tenen, malye kanye bopsirye, “Se, naio, yata wiripnaman do?” nyabuka asipdese. Asipdesibuk, nun ni koprop arye nyapnuk. “Tiklyame. Tikukapmince Damsyik mutuku biminyeura, Allah min arye, ‘Winipnamle’ tenen, tenebukce wiamkuk ning ara, lak nyapnamkiake,” nyabuka lak nyapnuk.

Rasul 3:4

Morobukopura, Peterus ap, Yohanes ap minopce dipderik akarye, Peterus birye ayupu nyabuk. “Nun dipdesilyame!” nyabuk.

Pilipi 4:18

Anggunce dopdeipnulumba, weik arye akunum dopropse. Aninguk kum bukni, tonda anggunce Epafroditus areplumba, elce dobuka boyanuk ning akunum dopropse ati, na patapnuk ninguk kum bukni, weika tonap, dopropse ning ara, akunum moubuka aupmanile. Nunce Allah arena ati, el kanye deililul ning, kam ning obuka aribibirye, nintong teleb ning uku dongobibiba, nintong arye Allah ulyak welelamle atouk, anggun urdem aryuk arepnulum ning ara, atong teleb ning atouk ulule. Anggunce winilamlum ning ati ara, Allah arye kanye deilisulule.

Pilipi 4:6

Yesus nun dolyanamsil talak ara, akunum dam upsil anya arye, yata ning do nirya ati, ilil upsiliba, ‘Se, yata upnamap do’ tenen, teniltonauk kum unamlulume. Ilil upsiliba, teniltona kum unamlum bukni, aminyan winipnamsil ning noutamak nirya ara, Allah ati moronamlulume. Ara, Allah ati telebe nyabuka, anggun patapsilye ning nirya ara, lakak nyapmunce, Allah pia moronamlulume.

Ibrani 13:16

Tonda, luba kina meme. Yata teleb winin ning do nirya, yuk nang ati melibuka umunce, aupmasilye ning noutamak arye bokuka, melibuka arilanamlulume. Deiyok ara, ‘Allah el si erepnuyap’ tenen, yuk ninye ati, melibuka arepye ning nirya ati ara, Allah eipsilirye, kanye delisulula ati nyapsine.

Ibrani 6:10

Allah arye, nun teleb asa wininyap ning ati, tuba tenesilirye, nun wininyaba atonun, yupu lepsisikuka bogolisulule. Deiyok kum upmalibuk, talye ati, kum wenesulule. Ura, anggunce teleb pil dolulum ning nirya ara, kum luba kipnamsile. Sikce elti, diba tenyamik ninye, el mapu ati, bico tenebuka melilamlum ning ap, tuba melilulum ning ap, adeice arye el Allah ati, talima arilulum ning ara, tuba tenesulule.

Wahyu 8:4

Siltong teleb ning dobuka, el taruk arye bopmok makau pum tamuku dilamuka noutamak arye dongobukba, tulum welebuk. Atulum welepmok ning ap, Allah el mapu arye morolamak yupu ap, amalaikat el taruk arye arebukba, Allah dinmok akuk tabakuka neika welenmokba, Allah arye kekenmokce, dinmok.

1 Samuel 3:10

Winibuk talak ara, Allah adiparyuk Samuel dam yayukce, min yuma nyanmok touk, yanuka yukubuk. “Samuel, Samuel,” nyabukopura, Samuel birye tamubuka, “Naio, nara, an amu tam ununye kekenmakina anya arye, yupu nyapnilyame,” nyabuk.