Rasul 1:26 - Eipomek

²⁶ Allah akunum morobikura, mitik keil telen arye doprobikce, anang bitinye, sik si sekdeibikce, makau pum bisik dongobuka singnipdongobuka, amakau lorom-lorom anmekbuk, keil duk minopce sakuk ninguk dobuka, dipdeyikbuk, Matias si upmoka eibikce, eluk wipdeibik. Wibdeibikopura, el ap, Yesus wipdeiamuk nang, sik 11 Rasul nang ap, tabakuka deiyok koubikce, adiparyuk deiyok koubuka, pil dopnin balamik.

Rasul 1:26 交叉參考

1 Tawarikh 24:5

Ara, Eliazar birye el deipdanin, yangalamik yala nang ap, Itamar birye el deipdanin, yangalamik yala nang ap ara, pia telebuk ulamikce, Allah Yahweh el si eren aik noutam pil talibuka dona ati, deiyok kipmanto nang ap, ‘Allah el yupu moubuka talibikirye, el piluk donamakʼ tenen, wipdeipmanto nang ton, mitik weik tonun ulamika anya arye, sik kel bikna ati lakakin ning, tonda win ning, el si undi pil dobika deice arye, anang wibuka yuk-yuk deibik. Bokdeibikce, atam nang ara, sik pil ani. ‘Atam nang ara, sik pil ani,’ nyabuka, yuk-yuk wipdeibuk. Ura anang nirya ara, Allah yupu talibuka, diksukumuk un nang asukumuk ulamika ati, pil yuk-yuk bokdeibikba, undi kel bikilin ning deice arye winibik touk, ‘Aning akunuma,’ tenebikce, anang yuk-yuk bokdeibik.

Nehemia 10:34

Tonda nun ni koprop Allah, an si eren aik pum tam pil dona deiyok nang ap, nun pil melin nang, sik Lewi yala nang ap, tonda, nun Israel ninye nirya ap ara, nun nirya arye lak kilin ning akunum winipmabe. Ara, ‘Yata yala nang arye, Allah el aik damuk u sekenamakak delina ati, yo webuka boyanganmak do? Tonda dan talak arye, yuk yala nang arye boyanganmak do?’ tenen, lak kilin ning akunum wipdeibupu. Akunum winibupu anya arye, wini talak nun kele. ‘Ayala nang ara, aketing tamun noutam, ton sum wala ara, asum deice arye, Allah el aik damuk u sekenamakak ati, yo toubuka boyanganamake. Tonda yuk talak ara, yuk yala nang aryuk, yo toubuka boyanganamake,’ utenena ati akunum kel bikupe. Winibuka boyacopura, Allah arye nyalamukba, Musa birye Mem Yupu buku noutam sekeipsuk touk, Allah el si Yahweh, el si eren aik dam bukni, kam ning obikirye, keil yangabuka delilamakak, aning deice uku seknamakak ara, ayala-ayala nang yuk-yuk arye, yo boyanamake.

Nehemia 11:1

Yerusalem mutuku noutam talibuka ulamikirye, yupu talinyak nang ap, amutuku noutam unyak ninye nirya arye, ‘Dekna dopropnamap’ tenen, dolamak ning el si ara, undi donamlume. Undi donmamun bukni, aning arye akunum kintiniplyeura, tonok mapu silip tagu barye atonun, apia teleb mutuku Yerusalem binuka wekikirye unamake. Bukni, aning undi donmakibuk, atonun kum winiplirye, wibuka kum deiplye ninye ara, Yerusalem mutuku ton kum unamake. Yuk-yuk mutuku uk daunamake.

Amsal 16:22

Yata ninye do nirya, pia moubuka tenipdekirye, ‘Aning winibipyopura, aminyan talak yata wiripnamsil do? Kanam upnamsil do, ikin upnamsil do? Awinipnamsil ning ara teleb do, malye do?’ tenen, moubuka wininyake. Ara, sik winin ning min kum winipmace talak ara, minopce moubuka tenipdekirye, teleb ninguk wibuka wininyake. Aning atonun wininyak ninye, sik wininyak ning ara, winipmanto ara, mek nong dem kutukuka balamle atonun unyake. Bukni, diksukum ubuka ninye arye, sik ayupu kum kekepmanto ukirye, keil kisok kibuka unyak ninye ati, “Wininamlulume, aning ara pia kum wininamlulume,” nyabuka wenena yupu weik arye nyaptinga babye, sik kisok kat deibuka, mandipna unyake ninye anya arye, pia moubuka kum kekenamake. Ayupu ara, kum dobolbanamake. Kekeltana uk unamaka anya arye, ayupu nirya ara, nong pia kum upnamle. Amalye ululnye biti, “Winina pia meme,” nyabuka nyanyak yupu nirya ara, pia talyeuk unamle. Dipkoprop nong kum upnamle.

Amsal 16:33

Ton nang ara, ‘Aminyan unamap ning tenena ati ara, aning wininamap do, aning batakuka yuk ning wininamap do?’ tenen, lak kilin ning, el si ara, undi deice arye winildenyake. Bukni, dipkoprob upnamle ning nirya ara, Allah Yahweh elcuk, ‘Wininamake,’ tenebuka kintinip deiamuk ning tonok ara, dipkoprob unamle.

Imamat 16:8

Ayim kambing basam bitinye ara, ‘Aning wipnun do, aning wipnun do?’ tenen, wina deiyok ning, el si undi, pil dopnamle. Aning ara, yo bitinye wibuka, tonok ning deice na si seknamle. Yuk ning deice. ‘Bura dolkweten kambing,’ seknamle. Winiplirye, asing dina kumce, tonok ning talye lukparabuka dopropnamlule. Winipnamla ara, tonok kambing wiplirye, nara Allah, na si Yahweh ati, arepnamnulule. Yuk kambing ara, aminyan talak ara, talye bai donokonamlule. Deiyok ara, Israel ninye, sik malye ning ati, wenebuka optinye bukni, sik malye winina pununa ati, akambing el nong deice, sik malye winilamak ning dobuka deiplirye, akambing lopdeipliba, ninye pia kum unyak mutuku noutam bindopnamlule. Wininamle ning, el si ara, Asazel nyanamlume. Akambing bitinye wena ati, undi pil donamlule.

Yunus 1:7

Nyabukura, amek liya yo talina deiyoknye ap, Yunus ap, im alip aik akunum weleprikopura, mek lia yo talibuka pil don nang arye, sik mining nanguk nyapdayik. “Weik teleb ning ara, lak bikilin ning, tonda win ning, el si undi, aning deice arye winipdeibibibuk, ‘Yatanye deice bol piplyopura, nun imun upmasil ning ara, anye akunuma. Anye birye, malye upmalba, winimasila ati, deiyok ara elce,’ tenebibirye, kel biknuyabe,” nyapdayik. Nyabikce, undi winipderikbuk, bikilin ning ara, Yunus binyak lak kibuke.

Markus 6:30

Yesus arye, wipdeibukura, el yupu dobuka peterepra balamik nang, sik Rasul nang, peterepra balamika ani, tamubuka Yesus dam yayikce, sik peterepra balamik ning ap, sik pil dolamik ning ap, Yesus ati yanuka laka nyanmek.

Rasul 1:23

Nyabukura, sik nirya arye, Allah arye wipdeipnamlanye bira, ‘Anye do, anye do?’ tenen, ninye bitinye nang sik si sibik. Abitinye nang si sibik. Tonoknye el siuk winilye si nyalamiknye ara, Yusuf Barsabas, ton Yustus nyalamiknye si sibik. Ton, tonoknye Matias si sibik.

Rasul 13:19

Kanaan mutuku noutamak ulamik ninye amutuku yala, amutuku yala ninye nirya tekbarye, Allah el pia meilyamuka deice arye, Israel ninye arye amutuku ninye obisibik. Obisibikura, amutuku-amutuku ninye nirya, sik talyamik mutuku nirya Allah arye Israel ninye ati aribuk.

Rasul 2:14

Nyabikopura, Peterus ap, Yesus arye wipdeiamuk nang, 11 nang ap tikikura, Peterus arye awekmek nang ati, weik yupu arye nyabuk. Na kayapuo, moubuka kekepnalume. Nun Yahudi yala nang ap, anggun Yerusalem mutuku wekmalum nang nirya ap, awekmabe. Na laka nyapnusin yupu ara, moubuka kekepnuse!

Yosua 14:2

Amutuku tuku doprobik ning ara, Allah Yahweh arye, Musa biti, “Winibuka winipnamlume,” nyapdeibuk touk, bokuka arebik. Ara, ‘Dan tam nang arye dopropnamaka do?’ tenen, bikilin ning, el si undi arye, winipdeyik deice arye, “Atam tuku ara, ayala nang arye dopropnamake, otam tuku ara, ayala nang arye dopropnamake,” nyapdeipmuk touk, bokuka arebukba, doprobik. Yordan mek koubuka, otam keting kumulban tam mutuku ara, ninye yala toupne barye (9) yala nang ap, tonok yala ton, Manasye yala nang bukni, ton tam nang bokuka ulamikba, amutuku tuku bokuka arebikba, doprobik.

Yosua 18:10

Sik anang tamubuka, yayik talak ara, Yosua birye, ‘Yata yala nang arye, amutuku dopropnamaka do?’ tenen, Allah Yahweh dinmok sukum arye, bikilin ning el si undi deice arye, ayala-ayala nang nirya ati ara, Allah arye undi ning dobukba, adeice arye, ‘Dan tam nang arye, amutuku arepnyeura, dopropnamaka do?’ tenen, Yosua birye winibuk deice arye, tekbarye yala nang ati, Allah elce kintinibuka, arebuk mutuku ara bikik. Akunum bikik ning ara, Israel yala nang, sik talibuka una ati, tuku ton pia kum dopromik nang ara, Yosua birye amutuku bokuka arebuk.

Wahyu 21:14

Anyasik dana-dana tam domik cang keil poka amu tam ara, aik ayukumna kopropa ikuka dolamak touk, weik mutuku yangan keil atonun, deiyok keil yuk-yuk 12 deiyamikak eipse. Adeiyok keil urasin laka upmokak ara, yuk-yuk bukni, ninye si 12 ton sekuka deiamik ning eipse. Aninye si 12 nang ara, Domba Mi Atonye, ‘Na yupu dobuka peterena deiyok kouna deiyok nang unamak’ tenen, wipdeiyamuk Rasul nang, sik si akeil deice yuk-yuk, sik si sekuka deiyamika upmokba, eipse.