Pilipi 1:1 - Eipomek

¹ Nun kayapu telebe. Nun bitinye Paulus ap, Timotius ap, asurat sekeipsiname. Nun bitinye ara, Yesus Kristus nun talima talisilya deice, el amu tam unyamce, el yupu uk kekebuka, el piluk donyame. Asurat ara, anggun Pilipi mutuku umunce, Yesus Kristus ati diba teneplumce, eluk talibuka, diksukumuk umunye ninye ap, Allah yupu peterena nang sik melina deiyok nang ap, Allah yupu aik pil melina don nang ap, anggun nirya ati, ayupu sekeipsiname.

Pilipi 1:1 交叉參考

Markus 13:34

Na yanamne talak anggun walwal usilye ning ati, winipmanto yupu nyapnusine. Aik deiyoknye tonok arye, yuk mutuku binulye talak ara, el pil don nang ati, ‘Pil winibuka donamlulume,’ nyabuka bokdeiplirye, tonoknye biti, “Na ni, ‘El minopce yanamle’ tenen, buplan dam kalekuka dinamnilyame,” nyalule.

Yohanes 12:26

Yata ninye do nirya, na amu tam bukuka, na yupu kekebikirye, na pil ati dokcopura, na unye touk adiparyuk wininamake. Na ban bisikuk adiparyuk melinamniyake. Tonda, na unun mutuku nirya, na mapu unamake. Na amu tam bukuka, na yupu kekebikirye, na pil ati donilinye biti ara, na Ni Koprop Allah arye, anye erebuka teleb kipdeipnamle.” Yesus arye nyabuk.

Rasul 1:20

Peterus arye ayupu ton nyabuk. Buku Mazmur noutamak Daud sekuk yupu ara, ani. ‘El ululak sik nirya batakuka binamake. Tonoknye babye, el ululak kum unamlume.’ (Mazmur 69:25) ‘El dolamuk pil pununa ati, yuknye birye dolbinamle.’ (Mazmur 109:8) Peterus arye nyabuk.

Rasul 20:28

‘Malye winipnyap’ tenen, anggun kanye talima moubuka umunyak arye melibuka dildanamlulume. Tonda, Allah El Dib Kanye arye, ‘Sik talima melipdakirye dinamak’ tenen, melin nang atonun kipsuk akarye, wibuka deipsuk nang ara, anggunce sikti, sik talima moubuka kalekuka dinamlulume. Allah el mi koprop dibukura, el ining banmok deice arye, Allah dekuka deibuk ninye ara, domba weilamak nang arye sik domba weilamak touk, Allah el diba tenebuka talinyak nang ati, melibuka weinamlulume. Anang ati moubuka dimunce, melinamlulume.

Rasul 9:13

Yesus arye nyabukura, Ananias arye tamubuka nyabuk. “Anti dib tenelamkik nang Yerusalem mutuku unyak nang ati, anye birye ikin ning weik deililamuk. Tonda, el winilamuk ning nirya sikce nyabikura, kekepse.

Roma 1:1

Telebe, na kayapo. Na Paulus birye, anggun Roma mutuku diba tenelulum ninye ati, teleb nyabuka, asurat sekeipsene. Na Paulus ara, Yesus Kristus el amu tam bukuka, el pil melibuka donanye, Rasulnye unune. Allah arye nati, ‘Paulus ara, na laka teleb yupu, ninye lyena yupu dobuka peterelbinamle,’ tenen wibuka deipnukce, el laka teleb yupu dobuka peterelbana ati, deiyok kouna deiyoknye, Rasulnye kipnuke. Ati, elcuk wipdeipnukba, apiluk donune.

Roma 1:7

Ati na kayapo, anggun Roma mutuku ululum nang kan-kan arye, Allah bico tenepsukce, ‘Na mapu unamak’ tenen, wibuka deiamsuk ninye, anggun nirya ati, asurat sekeipsine. Nun ni Allah ap, nun Deiyoknye Yesus Kristus ap, ‘Sik bitinye arye bico tenesirikirye, sik kanye aryuk melisirikirye arenamsil’ tenen, Allah morosunune. Tonda, nun ni Allah ap, nun Deiyoknye Yesus Kristus ap arye, anggunti melisirica deice arye, olana ap, walana ap, ikin kanye bona ap nirya, kum upliba, ‘Sik nirya kanye deibuka, lamapdongobuka neika unamak’ tenen, anggun Roma mutuku umunyak arye, dib tenelulum ninye nirya ati, Allah morosunune. Na Paulus birye nyapsine.

1 Korintus 16:10

Narye nun Deiyoknye Yesus, el amu tam unirye, el pil dopra balamne touk, nun kwit Timotius babye atonun, pil dobuka ulula anya arye, elce anggun dam, Korintus mutuku yalyopura, anggun ap, neika unamlum talak nirya, teleb ubuka neika unamlume. Ara, ‘El ilil uplyak’ tenen, anggunce elti, taruk talibuka, “Telebe,” nyabuka, melibuka unamlume.

2 Korintus 1:1

Telebe, na kayapu, na Paulus ap, nun weit atonunye Timotius ap, nun bitinye arye asurat sekeipsiname. Ara, anggun Allah ati dib tenebuka Korintus mutuku ululum ninye ap, Akaya tam dib tenenyak ninye nirya ap ati, asurat sekeipsiname. Na Paulus ara, Allah arye tenyamnuk touk, Yesus Kristus el yupu dobuka peterelbana ati, deiyok kouna deiyoknye, Rasulnye wibuka deipnukura, apiluk tuba donune.

Galatia 1:10

Ura, anggun ton teneipdelulume. Ayupu nyapmasin deice arye, yuk nang arye, nati, “Elda telebnye,” nyabuka, ‘Kanye deipnikirye, na si erepnamniyake’ tenen, nyapmasin do? Aning kum bukni, ‘Allah elcuk kanye deipnamnil’ tenen, nyapmasin do? Kume, narye yuk nang ati, ‘Ura, sik kanye deipmanto yupu uk nyapnyeura, kekebikirye, nati kanye delinamniyak’ tenen, yupu kum nyanune. Ato yupu, talye yupu nyaptinyopura, Kristus el pil melinanye dipkoprop kum uptinye. Ati, talye nang arye kanye deipnitingce, ‘Elda pia telebnye tenepnitinge’ tenen, ayupu kum nyasunune. Na Paulus arye nyapsine.

Galatia 3:26

Ura, na kayapu, wini talak ara, anggunce Yesus Kristus ati diba tenepluma deice arye, Allah arye el mapu akunum kipdeipsuke. Wini talak ara, dipkoprop el mapu ululume.

Galatia 3:28

Winipsuka ati ara, wini talak ara, anggun nirya yala yuk-yuk ninye ululum bukni, Yesus Kristus ap kanye talima dukdongobuka umunya deice arye, anggun nirya ara, nong tonok atonun kibuka, el ap neika ululume. Ati wini talak ara, Allah arye nun diba tenenyap ninye ati tenesulula ara, ani. ‘Sik Yahudi nang ani, Yunani nang ani, kilapu ani, sik bidamang kanye aryuk unyak ninye ani, talye pil dobuka unyak ninye ani, yuk nang arye yo bok deice dekikce, talinyakba, urdemuk pil donyak ninye ani,’ kum tenesulule. Aning kum bukni, nun diba tenenyap ninye ara, Allah arye Yesus Kristus ap, kanye talima dukdongopsuk anya arye, el ap ansinibuka neika atonun unyabe. Nun nirya ara nong tonok atonun unyabe.

Efesus 1:1

Telebe, na kayapu, na Paulus birye, asurat sekeipsine. Allah arye, nati tenyamnukce, wipdeipnuk atonun, Yesus Kristus el yupu dobuka peterelbana ati, deiyok kounanye, Rasulnye unune. Asurat ara, anggun Efesus mutuku umunce, Allah ati dib teneplumba, elce wipdeipsuk ninye ati sekeipsine. Anggunda, Yesus Kristus ap talima dukdongobuka umunce, pia batakana kumce, eluk talibuka umunye ninye ati, asurat sekeipsine.

Efesus 1:15

Allah arye, teleb kipdeipnamsila ati, anggun Efesus mutuku ninye dib teneplumba, kekepse talak arye, diprongobuka, atalak nirya ara, anggunti Allah morosunune. Ara, yuk nang arye nati, “Sik Efesus mutuku ninye ara, nun Deiyoknye Yesus ati, akunum dib tenebike. Sikce Allah ati dib tenenyak ninye nirya ati, bico tenebuka melinauk unyake,” nyapnik.

Efesus 6:24

Tonda, yata mutuku ninye do nirya, nun Deiyoknye Yesus Kristus ati, sik kanye el deiceuk deibuka, eluk talibuka unyakce, pia kum batakanyak ninye ati ara, Allah moronun ning nyapnusine. Ara, ‘Allah bico tenesilirye, el kanye aniryuk talye arisilye ning ara, weik arye, arepsilirye, teleb kipdeipnamsil’ tenen, Allah morosunune. Telebe akunum nyapsine. Na Paulus birye, asukumuk deipsine.

Pilipi 2:19

Nun Deiyoknye Yesus Kristus arye, “Teleb ur winiplyame,” nyapnutopura, narye, ‘Wininamne,’ tenenun ning laka nyapnusine. Ara, ‘Timotius ara, anggun Pilipi ninye, anggun mutuku minopce dopkwetepnamsine. Timotius dobuka, anggun mutuku dopkwetepnibuk, elce anggun melibuka daulamlye ani, tamubuka na dam yanamle.’ Yalirye, “Anggun Pilipi ninye wininyak ning ara, ani-ani,” nyabuka, laka nyapniliba kekepnirye, ‘Na kanye deipnamne,’ tenenune.

Pilipi 2:5

Yesus Kristus, el kanye talima tenelamuk touk, anyuk tenebuka wininamlulume. Elce tenelamuk ara, nyapnusine.

Pilipi 3:12

Na kayapu, anyapmasin ning nirya ara, ‘Akunum sirya dakuka winipse’ tenen, kum nyapsine. Tonda, ‘Nada, pia malye winina kum, diksukumnye akunum unune’ tenen, kum nyapsine. Apatanilye ning ara, min kum winipman bukni, Kristus arye nati, ‘Anye ap, na ap, talima dukdongobuka unimirye, diksukumuk ubuka pia unamname’ tenen, lyebuka talipnukce, tuba talinulule. ‘Winipnamle’ tenen, lyebuka talipnuk touk, na bidamnye, ‘Kristus dukdongopnirye, diksukumuk unamne’ tenen, pia pi deibuka, el piluk palibuka donune.

Pilipi 3:3

Bukni, nunda dipkoprop malye ning batakuka, Allah el na tenen ninye unyabe. Ati, ‘Sik Yahudi yala nang ninye ara, malye updeipsicak’ tenen, memelonamlulume. Nunda, Allah El Dib Kanye arye, el mikip arisilya deice arye, Allah el si erenyabe. Nun kanye talima teleb ulin ning ati ara, nun bidamnye mikip ap, nun nong winilamap ning ap, adeice arye, ‘Telebuk winilinamabe,’ pia kum tenenyabe. Aning tenena kumce, ‘Yesus Kristus elda weik mambule’ tenen, ‘Elce pil dopsuka deice aryuk, teleb ulisulule’ tenen, dib tenenyabe.

Pilipi 3:8

Anyapmasin yupu uk kume. Tonda, teleb-teleb kibuka winilamse ning weik aupnuk bukni, Yesus dib tenepnirye, ‘Na deiyoknye Yesus Kristus ap, dukdongobuka unaname,’ akunum tenepne ning ati ara, ‘Mince arye tenelamse ning nirya ara, malye ning atouk, dauplye,’ tenenune. Ara, ‘Na Deiyoknye Yesus Kristus ap, talima dukdongobuka una ara, pia mambule,’ ati nyapsine. Minop talak ara, na diksukum ulamse deice arye, ‘Aning deice arye, teleb updeipnamnile,’ tenelamse bukni, wini talak na kanye ara, ‘Aning nirya ara, mal-malya, sukulonga donoklamak atonun ning ulule,’ tenenune. Tonda, ‘Lyun ning atonun ning ulule,’ tenenune. Winibukap tenenuna deiyok ara, ‘Weik mambul ning ara, Kristus eluk talibuka, el ap, talima dukdongobuka unaname’ tenen, nyapne.

1 Tesalonika 1:1

Telebe nun kayapu. Na Paulus ap, Silas ap, Timotius ap, nun nirya arye anggun Tesalonika mutuku ninye, diba akunum tenelulum ninye ati, asurat sekeipsiabe. Anggunda, nun ni Allah ap, nun Weik Deiyoknye Yesus Kristus ap, kanye dukdongobuka ululume. Nun Ni Kopropa Allah arye, anggun Tesalonika mutuku dib tenelulum ninye ati, bico tenesilirye, el kanye aryuk melisilye ning ap, ‘Yu ulana kumce, kanye deibuka telebuk neika unamak’ tenen, arisilya deiyok ning ap, arisulule. ‘Aning nirya ara, tuba-tuba arenamsil’ tenen, anggun Tesalonika mutuku ululum kili sal ati, Allah morosunune.

1 Tesalonika 2:2

Anggun kele, minop talak ara, Pilipi mutuku beipu ura, malye nang arye nunti ngaluklamsikce, nun nong deice ikin ning weika arye deililamsike. Tonda, yuk nang arye, nun peteren yupu ap, nun ap ati, ‘Lyeklopnamap’ tenen, yanipdesik bukni, nun ni Allah melyamsuka deice arye, balye tam kipsuk deice, arye ilil kum, upsuk akarye el laka teleb yupu, ninye lyena yupu peterelamsupu.

2 Tesalonika 1:1

Telebe nun kayapu. Na Paulus ap, Silas ap, Timotius ap, nun nirya arye, anggun Tesalonika mutuku ninye, Allah ati, dib akunum tenelulum ninye ati, asurat sekeipsiabe. Anggunda, nun ni Allah ap, nun Weik Deiyoknye Yesus Kristus ap, kanye talima dukdongobuka ululume.

2 Tesalonika 1:10

Ayupu laka nyapmap ning nirya winipnamle talak ara, nyapnusiabe. Ura, Yesus el tamubuka yanamle sum arye winipnamle. El yalyopura, elti, diba tenebuka, el mapu kibuka, diksukumuk ulamice ninye arye elti, “Se el pia telebnye,” nyabuka, el si weik arye erenamake. Tonda, elti, diba tenebuka, el ap, kanye dukdongobuka ulamice nang nirya arye, elti, eibikirye, ‘Se, elda pia telebe,’ tenebuka, elti, kanye deibuka si erenamake. Ara, sik wininamak sum ara, anggun Tesalonika mutuku ninye babye, atonun wininamlulume. Ara talye ati kume. Nunce Yesus ati, laka nyabuka peterelamsupu yupu nirya ara, diba teneluluma anya arye, anggun Tesalonika mutuku ninye babye, atonun wininamlulume.

1 Timotius 1:2

Ara, na mi Timotiuso, nun ni Allah ap, nun Deiyoknye Yesus Kristus ap, sik bitinye bico tenesururak akarye, sik kanye tenebuka talye melisirikce ning ap, nun malye una ati, wenebuka talye opsutu bukni, aning namin kipsirikirye, nun patapsilye ning talya aryuk arisirikce ning ap, tonda, ‘Yuk nang ap yu ulana kumce, kanye deibuka, telebuk neika unamle’ tenen, arikurak deiyok ning ap, arikururake. ‘Aning nirya ara, tuba-tuba weik arye tabakuka arenamkirak’ tenen, an Timotius ati, Allah morokunune.

1 Timotius 3:8

Ara, Allah dib tenen ninye ati, sik melibuka pil dopmanto nang yupu nyapnukine. Arup nyapmakin atonun, anang, yuk nang arye, ‘Anang ara, teleb un nang uka,’ tenebice nanguk, wibuka delina telebe. Tonda, aning ara, na tenen arye nyana kum, dipkoprop yupu nyana ap, yu mek kanye wangalamak mek weik arye kum dinyak nang ap, tonda, ‘Yo bok weik doproptibye’ tenen, malye winina ap, na tenena kum arye pil dona ap, kum wininyak nanguk, apil doptinge.

Titus 1:1

Telebe, na mi Tituso, an ap, neika Yesus Kristus dib tenebupubuk, kanye talima dukdongopsuk ati, na mi koprop atonun ulyamnye anti, na Paulus arye asurat sekeibkine. Na Paulus ara, Allah el amu tam unirye, el yupu uk kekebuka, el piluk donune. Yesus Kristus arye, ‘Na yupu dobuka peterelbanamle. Elda na Rasulnye unamle’ tenen, wipdeipnukura, Allah arye, ‘Lyepnamne’ tenen, wipdeiamuk ninye ara, ‘Sik arye, elti, weik arye dib tenepnamak’ tenen, pil donune. Tonda aninye arye, ‘Allah el dipkoprop yupu weik arye kel biknamak’ tenen, pil donune. Allah el yupu ara, moubuka kekebibye deice arye, Allah el funguk ulye touk, diksukumuk uptibye.

Titus 1:7

Aning ara, talye ati kum nyapkine. Allah yupu peteren nang, sik melina deiyok nang ara, dib tenen nang, sik kanye melipdakirye dinamak anya arye, talye pil kum donyake. Sikda, Allah el pil talibuka donamaka ati, sik adiparyuk maknya kintinibuka dina ap, yuk nang yanina ap, kum winiptinge. Tonda, yuk ninye ati minop derelana ap, wenena ap, kanye wangalamak mek pia pataplibuk, weik arye dina ap, kum winiptinge. Tonda, yu weik ubuka, yuk nang oldana ap, bona talin ning yo bok ap, weik arye dolona ati, tenepce arye, minin yupu nyana ap, anirya ara, sik adiparyuk pia kum wininamake. Amalye-malye winin nang ara, ‘Allah ati diba tenen nang, sik melina deiyok nang unamak’ tenen, wibuka pia kum delinamlyame. Aning kum bukni, ‘Allah yupu peteren nang, sik melina deiyok nang unamak’ tenen, diksukum unyak nanguk, wibuka delinamlyame.

Pilemon 1:1

Telebe, na ka, Pilemon, na Paulus arye asurat sekuka dopkwetepkine. Narye, Yesus Kristus, el teleb yupu peterelamsa ati, tapu koubuka, wenena aik dongopnikba, aunune. Na ap, nun weit atonunye Timotius ap arye, asurat sekeipkiname. Anda, nun ka kopropa ati, nun pil neika pil donyapnye uluma ati, kanye deibuka kanye deipkunume.

Ibrani 13:23

Ura, ‘Anggun kel kipnulum’ tenen, nyapnusine. Nun weit atonunye Timotius, tapu koubuka wenena aik dongobikura, daulamuka ani, winira sikce akunum lopdeipmake. Elce na dam minyuma yatopura, el ap, na ap, anggun dam neika dilyanamsiname.

Yakobus 1:1

Na Yakobus arye Yahudi yala nang 12 yala bokuka, yuk-yuk amutuku-amutuku umunce, diba tenelulum nang nirya ati, ayupu sekeipsene. Na Yakobus ara, nun ni Allah ap, nun Deiyoknye Yesus ap, sik talipnirikura, sik piluk dobuka ununye birye, ayupu sekeipsene. Telebe nyapsine.

1 Peterus 2:25

Minop talak ara, anggun nirya domba teleb bisik batakuka, malye bisik kwekdanin balamak touk ulalum bukni, wini talak ara, sik domba weilamak Deiyoknye damuk tamubuka yangalamak touk, akunum yanuka ululume. Ara, anggun kanye talima ap, kanye ap, melipsilirye, ‘Malye ubicak’ tenen, dilesilya Deiyoknye dam, akunum yanuka ululuma ati nyapsine.

2 Peterus 1:1

Na kayapu, telebe nyapsine. Asurat ara, na Simon Peterus arye seksene. Yesus Kristus lyebuka talipnuka, ati el piluk donune. Tonda, ‘Na yupu dobuka peterelbanamle. Rasulnye unamle’ tenen, Yesus arye wibuka deipnuke. Allah kanye deipsukce, nunti el yupu ap, nun diba tenen ning ap, areamsukak, dobuka talyamubu ning, pia teleb ulye touk, anggun babye, atonun upsukbuk, diba tenebuka, na nyapman ning talibuka ululume. Nun Lyena Deiyoknye Yesus Kristus ara, Allah ulule. El diksukumuk ulya deice arye anggun ap, nun nirya ap ati, diba tenena ning areamsukak dopdobupu. Anggun nirya ati asurat seksene.

Yudas 1:1

Na si ara, Yudas arye, Yakobus el weit koprop arye ayupu sekeipsene. Nara, nun deiyoknye Yesus Kristus arye, talipnukura, el piluk donune. Ayupu sekeipsin nang ara, nun ni Allah wipsukce, bico tenesilirye, nun du Yesus Kristus arye, ‘Malye ning arye, malye updeiplyak’ tenen, melibuka kalikisulule. Anggunti ayupu sekeipsene.

Wahyu 1:1

Ayupu nirya ara, minop talak Allah arye duknyamuk bukni, ‘Aminyan talak Yesus Kristus arye wininamle,’ tenena ati laka nyabuk. Ara, ‘Yesus arye aminyan sirya talak wininamle ning laka nyapliba, el amu tam bukuka, elti, dobolbanyak ninye kekenamak’ tenen, laka nyabuk. Allah arye, el im deice pil donanye, malaikat tonok dobuka dopkwetebukba, Yesus el pil donanye Yohanes dam laka nyalyayuk.

Wahyu 1:20

Na sirik taruk talipman kurya tekbarye ap, atekbarye weisa dirina kin ning emas ning ap ara, ‘Deiyok ani’ tenen, moubuka kum tenepmalam bukni, ‘Aning nong ani’ tenen, kel kipnulama ati, laka nyapnukine. Ara, tekbarye weisa dirina ning el nong ara, Asia tam noutamak, Allah diba tenebuka unyak ninye, mutuku si tekbarye jemaat ati ulule. Tek barye talipman kurya sik nong ara, Allah diba tenenyak ninye tekbarye mutuku jemaat, sik melina malaikat unyake. Anye birye, na Yohanes ati nyapnuke.

Wahyu 19:10

Nyapnukopura, narye, ‘Anye binyak kipnun’ tenen, el dam gutam tuku dipdongobuka bukmase bukni, elce nyapnuk. “Amio, winina ara meme. An ap, an kwit yapu aton ninye ap, sik nirya arye Yesus el yupu talibuka, el piluk dolulume. Anggunce aning winilulum touk, na babye, el pil melinanyeuk ununa ati ara, ance nati si erena meme. Allah eltibuk kibuka, si erenamlulume. Anggun nirya arye, ‘Yuk ninye ton Yesus el laka teleb yupu, ninye lyen yupu kekenamak’ tenen, ayupu dobuka peterelamluma atonun, sik minop talak ulamikce, Allah yupu laka nyalamik nang, nabi-nabi nang babye, Yesus ati yupu nyalamik,” nyapnuke.

Wahyu 2:12

Ninye Mi Koprop Atonunye birye nyapnuke. “Yohanes, ance Pergamus mutuku diba tenenyak ninye, sik melin malaikat ati ayupu sekuka dopdeiplyame. Dopdeipnulam yupu ara, ani.” “Narye parang ya dana-dana tam, si taca weik ulul ning talinanye birye, sik Pergamus mutuku nang ati ayupu nyapsine.

Wahyu 2:8

Ninye Mi Koprop Atonunye birye nyapnuke. “Yohanes, ance Semirna mutuku diba tenenyak ninye, sik melin malaikat ati, ayupu sekuka dopdeiplyame. Dopdeipnulam yupu ara, ani.” Aning-aning nirya min kum uamuk talak ara, na akunum ulamse ati, nara Deiyok Kina Deiyoknye unune. Tonda, aning-aning nirya akunum kum uplye talak babye, na pia kam unamne anya arye, nara Sirya Dakna Deiyoknye unune. Na dipse bukni, ila tuba tonap kam buksirye, pia kam unune. Narye anggun Semirna mutuku ninye ati nyapsine.

Wahyu 22:9

Winipse bukni, amalaikatnye birye nyapnuke. “Na ti si erena kume. An ap, Allah ati diba tenelamikce, Allah el yupu laka nyanyak nabi-nabi nang, an du yapu atonun ninye ap, abuku noutamak seknulam yupu talibuka unamak ninye nirya ap, anggunce Allah el amu tam bukuka, el piluk dolulume. Anggunce winilamlum touk, na babye Allah el piluk donuna ati ara, nati si kum erepnunilam bukni, Allah eltibuk kibuka, el siuk pia erenamlulume,” nyapnuke.