Nehemia 9:6 - Eipomek

⁶ Tonda, sik Israel ninye arye, nyabik. Yahweh an tonok ara, dipkoprob Allah ulyame. Yuk ton kum ulule. Ancuk im deice kwepdeiplume. Ancuk im deice ulul ning kurya ap, wala ap, keting ap, aning-aning nirya kwepdeiplume. Tonda, laut mekwen ap, laut mekwen noutamak ulul ning ap, tukwak mutuku ap, tukwak mutuku noutamak ulul ning ap, nirya ara, ancuk kwepdeiplume. Winiplumce, aning-aning nirya kam una ati, isin areplumce, meliminba, tuba kam unyake. Ati ara, im deice yin talibuka unyak malaikat nirya arye, an si erena ati, kisok kanupdongobuka si erekinyake.

Nehemia 9:6 交叉參考

Kejadian 1:1

Aning-aning nirya kum uamuk talak ara, Allah arye im ap, tuku ap kwepdeibuk.

Kejadian 1:9

Winibukopura, Allah arye, nyabuk. “Wini talak ara, im noutamak eitamak arye, outam mekwen ara tonokak deiplirye, tuku mikuka, lak kipnule,” nyapdeibukba, adiparyuk Allah arye nyapmok touk winibuk.

Kejadian 2:1

Winibuka sirya kwepdeibukopura, im ap, tukwak mutuku nirya ap, anoutam ulye ning aning-aning nirya, nukmanto kum ulye touk, Allah arye, aning-aning nirya kwepdeibukce, sirya dakuk.

Kejadian 32:2

Epdayikura, Yakub eibukce, “Se, amutuku ara, Allah el tia ulyak atia,” nyabukce, amutuku si ati, Mahanaim mutuku nyabuka sisibuk.

1 Raja-Raja 22:19

Ayupu nyabukura, Mikha birye tamubuka nyabuk. “Dipkoprop nyapmakine. Ati ara, Allah el si Yahweh arye, nyapmakil yupu kekepnulyame. Aning-aning nirya talilulnye Yahweh, el bunak bukmokba, el pil don nang yin talin malaikat wekuka el kwanim tam ap, el sirik tam ap, tikmokak bukmokba, eipse,” nyabuk.

1 Raja-Raja 8:27

Morobukce ayupu ton nyabuk. “Bukni, dipkoprob Allah anda atukwak mutuku noutamakuk ulamtum do? Kume, im deice babye weik mutukue. Tonda im deice pia eitam babye, dinap weik aulul bukni, Allah anda amutuku babye, kum suktalipnamtume. Anda weik mambulnye biti nyapkine. Ati ara, aning atonun, na dopse aik ara, pia mitik aik dopse ati, anyaik pum tam babye kum uptume. Anda tonok sukumuk kum ulyama ati nyapne.

2 Raja-Raja 19:15

Asurat tukwak binuka deibukce, Hizkia birye Allah el si Yahweh ati morobukce nyabuk. Na ni Allah an si Yahweh, anda Israel nang pia melibuka kalikisilyame. An dirina ara, an si eren aik pum tam ulule. Minop arye, memepdeibik ning, malaikat urasin atonun deibik ning dana-dana tam tikrikce, sik pol anoutam ara, an aulyame. Anda aning-aning deice tam umince aning nirya talilyame. Ninye tukwak nang arye, amutuku-amutuku weik talinyakce, weik deiyok unyak bukni, dipkoprob ara, ancuk amutuku nirya ap, adeiyok nang nirya ap, deice tam umince talilyame. Weik mikip weiknye bira an tonoka. Na ni Allah ancuk im ap, im deice ap, tukwak ap, kwepdeiplumce, weik deiyoknye ulyame.

2 Raja-Raja 19:19

Ati ara, na ni Allah, an si Yahweh ati moropkine. ‘Ance, nun Yehuda tam unyap nang ati lyepsutum’ tenen, moropkine. Asyur mutuku ninye deiyoknye birye, nun ona ati akunum kintinip deipmala ati, ance lyepsilyame na ni. An mikip deice arye, lopdeipsiminba, tukwak mutuku nang mutuku-mutuku nirya arye, eibikirye moubuka kel biknamake. Ara, ‘Se dipkoprob Allah el si Yahweh ara, elda Allah tonoka. Yuk ton pia kum ulule,’ tenebikirye kel biknamake. Hizkia birye Allah ati moronmokce nyabuk.

Nehemia 9:5

Atalak ara, Lewi yala nang arye deiyok koubuka, Allah ati moronmek. Moronmek nang sik si ara ani. Yesua ap, Kadmiel ap, Bani ap, Hasapnia ap, Serebya ap, Hodia ap, Sebanya ap, tonda Petahya ap arye, moronmek. Moronmekce, nyanmek, “Anggun nirya tiklulume. Anggun ni koprop Allah, el si Yahweh ati, si erepnamlume. Yahweh ara, minop arye aulamuka ani, wini talak babye, doyanamle talak babye, apia unamlanye, Allah el si erenamlume,” nyanmek. Sikce nyanmek yupu ara ani. “Nun ni Allah, an si weik mambule. An ap, an si ap ati, pia telebe. ‘Ninye mutuku-mutuku nirya, an si biketinge’ tenen, nyapkiyabe. Yuk-yuk ning, ance arisilyam ning nirya ati, ‘Aning ara mitik mambule’ tenen, ‘Telebe,’ nyaptibye bukni, an tonok ati ara, pia weik arye an si erenyabe. Yuk teleb ning nirya ara, an amu tam uliba, anda weik si erenanye deice tam ulyama anya arye, ‘Anda weik mambule,’ nyapkiyabe. Yuk ning nirya ara, mitik mambul uka. Ati ara, anti pia si erenamkiyabe,” nyabuka si erenmek.

Mazmur 102:25

Ati ara, na ni Allah, narye anti, nyabuka moropkine. Na kam tuba unamanye talak aryuk, ‘Kam una deiyok ning min kum dopropneminyeura, adiparyuk kum dipnamne’ tenen, moropkine na nio. ‘Tuba kam uptinye’ tenen, moropkine. Na ni Allah, anda pia kum dipnalame. Tuba-tuba dounamle talak nirya ara, kamuk unalame. Pia kum dipnalama atia.

Mazmur 103:21

Anggun im deice ululum malaikat nirya, Allah el amu tamuk umunce, Allah nyasilye touk, ayupu moubuka kekepmunce, el piluk dolulum malaikat nirya arye, Allah Yahweh el tibuk, “Anda pia teleb ulyame,” nyabuka, el si erebuka kinamlulume.

Mazmur 115:15

Aning ara, Allah Yahweh im deice ap, tukwak ap, kwepdeibuknye, elcuk anggun dam ulirye, melibuka telebuk winilinamsile.

Mazmur 124:8

Ati ara, nun melina deiyoknye bira, Allah Yahweh el tonok ulule. Nun ti melilyanamsilanye bira, Allah Yahweh el tonok ulule. Allah elda, weik kwemdina deiyoknye ulula anya arye, tukwak mutuku, im sirya, mutuku sirya ap, im deice ulul ning nirya ara, elcuk kwepdeibuk.

Mazmur 146:6

Allah Yahweh arye, tukwak mutuku nirya ap, im ap, im deice ap nirya ara, kwepdeibuke. Tonda, weik laut mekwen ap, laut mekwen noutam ulul ning yala-yala nirya ap ara, elcuk kwepdeibuke. Tonda, Yahweh birye elti, ‘Dibaʼ tenenyak nang nirya ati, batakna pia kumce, kalikuka melilule.

Mazmur 24:10

Weik Ninye Deiyoknye, weik mambul winilul Raja nyapmanye bira, ‘Yatanye do?’ tenena meme. Ara, nun ni koproba Allah Yahweh, im deice unyak yin talin nang, sik malaikat nirya ap, aning-aning nirya ap, elcuk aning nirya talibuka, deice tam ulule. Elda weik mambul weik ulirye, nun ni Weik Deiyoknye Raja ulirye, talisulule. Raja Daud mot nyana deice arye nyabuk.

Mazmur 33:6

Allah Yahweh arye, el kanye aniryuk, yupu nyapdeibukba, adiparyuk, im deice ap, im noutamak ulul ning nirya ap, kwepdeibuk. Im noutamak ulul ning nirya ara, keting ap, wala ap, kurya ap nirya ara, Allah Yahweh arye, ‘Kwepdeipnune,’ tenebukce, yupu nyapdeibukba, adiparyuk, laka ubuk.

Mazmur 36:6

Bukni, na bikse. Na ni Allah Yahweh, ance nunti, ‘Anggun kaliknamsine,’ nyabuka, nyalin yupu deice arye nyapsulum ning nirya ara, dipkoprob pia wininamsilyame. Tonda, ance nunti, weik tonun bico tenepsimince, pia batakna kumce, tuba-tuba melisilyame. Ance, ‘Winipnamne,’ nyapsilam atonun, kibuka ulyame. Winipmanto ara, im deice dua ara, pia im deice tam pia weik aulamle touk, ance tuba melisilyam ning babye, pia weik aulule.

Mazmur 86:10

An siuk erenamkiaka deiyok ara, ani. Ara, ance pia teleb pil, weik tonun ninye dopman kum pil dominye talak nirya ara, ninye nirya arye, ‘Se, aweik mikip pil ara, ouku weikto uptu do?’ tenen, ilil weik upliba, sik kanye deibikirye, pin-pin asa unyake. Dipkoprop, Allah an tonok ulyame, yuknye ton kum ulule.

Yesaya 37:16

“Se, Nun ni Allah Yahweh, anda aning-aning nirya deice tam erebuka umince, pia mikip weiknye uminye birye, im deice yin talin malaikat nirya ara, sik deiyoknye ulyame. Nun Israel nang nirya ara, Allah an mapu ubirye, an siuk erekinyabe. Tonda, na nie, anda Peti Perjanjian bublan deice malaikat urasin atonun ning, el si Kerub, bitinye puturubuka deibubak, deice tam ara, bukmince tuba asukumuk ulyame. Nun ni Allah, an tonok aryuk erebuka uminyeba, atukwak mutuku ninye deiyok kibuka talinyak nang nirya ara, an amu tamuk unyake. Allah ance im ap, tukwak ap wepdeiplumce talilyame. Mutuku sirya im sirya nirya talinyaka deiyok nang ara, an amu tamuk unyake. An tonok ulyame.

Yesaya 37:20

Winibuka ulamika anya arye, nun ni Allah Yahweh, an siuk erekinyaba, ance nunti melibuka kalikisilyame. Ati, Asyur mutuku nang talibuka weik deiyoknye birye, el taruk noutam arye, ance nunti lyepdopsilyame. Ance nunti lyepdopsiminyopura, mutuku sirya im sirya nirya unyak nang, kel bikikirye, ‘Se, dipkoprob Allah Yahweh, el tonok ulule,’ tenen, kel biknamkiyake.” Raja Hizkia birye, Allah ati binuka morobuk.

Yesaya 43:10

“Se, na mapu anggunda na unun ning ati, laka nyan nang ululume. Tonda, ‘Na mambul pil melibuka donamle’ tenen, wipdeipsinye ap, anggun ap arye laka nyapmunyopura, anggunce kel biknamnulume. Ara, ‘Dipkoprop, Allah elda tonok ulule,’ tenebuka kel kipnamlume. Allah nara pia min yuma talak ap, atalak ap, aminyan doryanamle talak ap nirya ara, nara pia aunune. Yuk Allah ton pia kum ulule. Ati, yuk nang arye, ‘Allah min kum ulamuk talak ara, nun si erenyap ning akunum uamuk,’ kum nyaptinge. Tonda, na pia aunamne ati, yuk nang arye, ‘Allah akunum kum danamle talak ara, nun si erenyap ning apia unamle,’ kum nyaptinge. Nara, pia min kum winipmantonye ununa atia. Min talak babye, aminyan doryanamle talak babye, na uk ulamse touk, pia aunamne. Allah ara na tonoka.

Yesaya 44:6

Nara aning-aning nirya talibuka deice tam unirye, Weik Erebuka mikipnye birye nyapnukine. “Nara, Yahweh arye nyapkine. Nara, Israel ninye anggun ninye deiyoknye, Raja unune. Israel ninye anggun malye winina ati, opsitinye bukni, anggun malye ning pununa ati, namin kipsisirye, deksise. Na amu tamuk unamake. Nara, Weik Erenanye bira, na tonok unune. Na Allah Yahweh, aning-aning nirya talinirye, im deice yin talin malaikat nirya, sik weik deiyoknye ununa ati, nara deiyok kouna ap, sirya dakna ap nirya ara, weik deiyoknye, na uka. Yuk Allah ton kum ulule. Allah na tonok unune.

Yesaya 44:8

Ati, na mapu anggunda ilil una meme. Minop talak do winipnin yangalamuka ani, wini talak winilul ning nirya ara, narye ‘Winipnamle’ tenen, pia moubuka kel bikamsirye, kintinip deipse ning kum winilula ati do? Anggunce na winilamse ning eibuka kel bikamnuluma ati, wini talak babye eibuka kel kinululume. Anggun patasulye ning ati melin nang ara, yuk nang ton usinyak ak, kel bikamtinyeura, dipkoprob kum ulula ati, bita kel kum bikse.” Allah arye nyabuk. Nara weik mutuku yangan keil pia abukukce, bukuk touk unamne. Aning atonun, na babye pia aunune. Na aryuk kalikuka melinamsine.” Allah arye nyabuk.

Yesaya 45:12

Na Allah arye, tukwak mutuku, mutuku-mutuku nirya kwepdeipsirye, ‘Amutuku noutam ara ninye unamak’ tenen, tukwak ninye ayala-ayala nirya kwepdeipse. Tonda im deice ap, im noutam ulul ning nirya babye, naryuk, kwepdeipsirye, kurya nirya na tenepse touk deipseba tikilule.”

Yeremia 32:17

Na nio, anda Allah Yahweh, aning-aning nirya talibuka, deice tam erebuka, pia mikip weik ulyama ati, an tenelalam touk, adiparyuk winilyame. Ati, Allah an mikip weik taruk deice arye, im noutam ap, mutuku sirya, im sirya nirya ap, kwepdeiplume. Yata ning nirya do, tonok ning babye, an ikin upkiliba, kum winipmanto ning ton, pia kum ukulule. Anda, pia mikip weik ulyamnye biti, aning-aning nirya ara, kanam aryuk pil dopra ulyame.

Yehezkiel 20:11

Israel nang bobuka, padang pasir noutam delilbisopura, naryuk sikti, “Aning ara, wininamlume. Aning ara, pia kum wininamlume,” nyapsirye yupu arepse. Tonda aning atonun, narye, ‘Anggunda winipnamlume, winipnamlume. Aning talibuka umunyopura, narye melipsinyeba, teleb kibuka, tuba kam unamlume,’ nyapdeipse yupu, ton lak kipdeipse.

Yunus 1:9

Nyabuka asibikba, Yunus birye nyabuk. “Nara Ibraninye yalanye unune. Laut mekwen ap, im deice ap, tukwak ap, kwepdeibuknye, Allah el si Yahweh ara, im deice ululba, el siuk erenune,” nyabuk.

Yohanes 10:30

Na ap, na ni kopropa Allah ap nun tonoka.” Yesus arye nyabuk.

Rasul 4:24

Laka nyaprikura, anang kekebikce, sik nirya arye neika Allah moronmek. Sik moronmek yupu ara, ani.

Ulangan 10:14

Anggun ni koproba Allah, el si Yahweh arye, im deice tam babye, im deice noutam ulul ning nirya babye, el aryuk talilule. Aning atonun, tukwak tam babye, tuku deice ulul ning nirya babye, elce kwepdeibukce, talibuka ulule. Anggun ni koproba Allah, el si Yahweh arye, aning-aning nirya babye, el dem arye talibuka ulule.

Ulangan 32:39

Wini talak ara, anggun nirya arye, na kel biknululume. Dipkoprop anggun ni Allah ara, na tonok unune. Yuk Allah ton, pia kum ulule. Ati ara, naryuk kam una deiyok ap, dipna deiyok ap, aresunune. Aning atonun, teleb winina ap, malye winina deiyok ap nirya ara, naryuk aresunune. Narye, ‘Opnamsine,’ tenepnyopura, opnamsine. ‘Kwetepnamsine,’ tenepnyopura, aninguk wininune. Yata ning do nirya, ‘Naryuk talibuka wenepnamne,’ tenepnyopura, yatanye birye lyepsutu do? Kume, yuk nang arye ton, yupu kum seknitingce, kum lyepsitinge.

Ulangan 6:4

Musa birye, Israel ninye ati nyabuk. “Na kwit capu Israel ninye ara, moubuka kekeplulume. Anggun ni koproba Allah, el si ara Yahweh, el tonok ulule. Yuk Allah ton, pia kum ulule.

Ibrani 1:3

Allah ara pia teleb ulirye, weik erenanye ulule. Ulirye, weik mambule ulul touk, el Mi Kopropa babye, pia atonun ulula anya arye, weik dirina ap, weik mambul weik ap ulule. Aning atonun, Allah ap, el kanye tenen ning ap, el ulul ning nirya ap, aulul atonun, el Mi Kopropa babye, el ulul ning nirya anisibuka ulule. Allah el Mi Kopropa arye, el weik mikip yupu nyalya deice arye, yata ning do nirya, teleb ulilulba, aning-aning nirya kum kum danalule. El nyalul yupu deice aryuk aning-aning nirya talilulba, teleb ubuka tuba kam ulule. Ninye mutuku-mutuku nirya, sik malye unyak ning kum ubuka delina ap, ninye weik lyena ap, teleb kinilina ap ati, mambul pil akunum dopsukce, ila tamubuka im deice welebukce, Allah el taruk sirik tam bukuke. Aning-aning nirya deice tam ulirye, weik erenanye ulule. Allah ara, Weik Mambulnye, im deice ululnye bira, el Mi Kopropa arye, el taruk sirik tam bulbiyuke.

Ibrani 1:6

Arup nyapmasin touk, Allah arye, el minyuma deibuk Mi Kopropa ati, tukwak mutuku dopkwetepsuk talak ara, ami ati ayupu nyabuk. Ayupu ara ani. ‘Na im deice pil donyak nang, sik malaikat nirya ara, na Mi Kopropa ati, el siuk kibuka si erenamake,’ Allah arye nyabuk. (Ulangan 32:43)

Wahyu 14:7

Amalaikat weik yupu deice arye ayupu nyanmokba kekepse. “Allah arye ninye mutuku-mutuku nirya ati, yupu lipsisikuka bokeipsilirye, wenepnamsil talak ara, akunum dam upmasila ati, anggun nirya arye Allah ati ilil asa unamlulume. Ilil upsiliba, Allah ati, ‘Se, anda pia teleb ulyame,’ nyabuka, elti, si erenamlulume. Yata ning do nirya, im noutamak ap, tukwak mutuku ap, laut mekwen ap, balamle mek nirya ap, aning-aning nirya kwepdeibuknye, Allah ati, anggun nirya arye el siuk erepnamlulume,” nyapra banmokce, amalaikat lakuka banmokba, na Yohanes arye eipse.

Wahyu 4:11

“Se, nun ni Allah, anda nun Weik Deiyoknye usilyame. Aning-aning nirya ara, ance, ‘Winibuka, winibuka kwepdeibuka deipnamne,’ tenyamlum touk, adiparyuk kwepdeiamlumba, aning nirya ulule. Aning ati ara, an tonok ara pia telebuk ulyame. Telebe nyana yupu ap, si erena yupu ap, si kina ning ap, mikip kilina yupu ap, anirya ara, an deiceuk delinyabe. Ancuk aning nirya talibuka pia unamlame.” Sik 24 wisi deiyok nang arye Allah ati nyanyake. Na Yohanes arye nyapsine.