Nehemia 13:25 - Eipomek

²⁵ Narye sik aninye ati wenebuka supse. Winipsirye ton tam nang ara kama arye deplopse. Ton tam nang ara, sik potong nirya kobuka batakse. Winipsopura, narye tamubuka nyapse, “Anggunda dipkoprob Allah el si deice nyalin yupu nyaplulume. ‘Nunda tuba tonap, nun kilmapu dobuka, sik yuk mutuku nang ati kum arenamabe. Tonda, nun mapu sik kil dona ati, yuk mutuku kilapu dobuka kum arenamabe. Tonda nun babye, yuk mutuku kilapu ton, pia kum dolbanamabe,’ nyalin yupu deice arye nyaplulume,” nyapse.

Nehemia 13:25 交叉參考

2 Raja-Raja 2:24

Nalinmek bukni, Elisa tamubukabukce, amapu dipdeyukce, amapu ati, ‘Yata deiyok ati nalinmaniyak do? Allah arye, anang wenebuka opnamle,’ tenebukce, Allah el si Yahweh, el si deice arye, malye yupu nyabuka ngalukuk. Winibuka ati ara, adiparyuk buru tam weik yu ning, el si ara beruang basam bitinye, yo noutamak tam arye, kutukuka yarikce, amapu empat puluh nang nirya yanuka obukaprikce sirya dakmanto kiprikopura, amapu 42 dipmanto unmek.

Esra 10:5

Nyabukba, Esra birye deiyok koubuka, Sekanya birye nyabuk atonun winibuk. Ati, Esra birye, imam-imam nang nirya, sik weik deiyok nang ap, sik pil melin nang, Lewi yala nang ap, tonda yuk daulamik Israel nang nirya ati, nyabuk. “Dipkoprop anggun nirya arye, nyapnalume. Ara, ‘Nun nirya ara, Sekanya birye nyapmasil touk, dipkoprob wininamabe. Allah el yupu nyapsilye touk, kekebibirye, aninguk talibuka wininamabe,’ nyabuka, na kekenmanyak arye, nyalin yupu deice arye nyapnalume,” nyabuka, Esra birye nyabuk. Winibuka nyapdeibuk touk, sik nirya arye aninguk winibik.

Esra 7:26

Tonda, yata nang do nirya, anggun ni koproba Allah nyapdeiamuk yupu yaniptabicopura, aninye wenepnalam ning ara, nyapnukine. Malye winibicopura, ance anang ati opnalyame. Kumopura, anggun Israel ninye unamlum noutam arye yakmunyeba, anang yukak unamake. Aning kumopura, sik bona ap, sik taleamikce ning nirya dopropnamlume. Aning kumopura, anang tapu koubukapmunce, wenen aik pum tam dongopnamlume. Aning atonun, na Rajanye birye nyanye yupu ton, kum kekebikirye, yanibikce nang ara, akunum nyapmasin ning atonun arye, anang ati wenamlulume. Raja Artasasta birye nyabuk. Ayupu nirya ara, Babel mutuku ninye deiyoknye Raja Artasasta birye, surat sekeibukce, Esra biti arebuk.

Nehemia 13:11

Aning nirya kekebuka biksirye, na malye kanye bopsirye, amutuku noutam talibuka, ‘Winipnuyabe,’ nyana deiyok nang ati uapsirye nyapse. “Anggunda yata deiyok ati, Allah Yahweh el si eren aik pil melin nang ati arin ning bataklum do?” nyabuka uapse. Nyabuka uapsirye, Lewi yala nang ap, mot sena deiyok nang ap ati, “Tamubuka yalulume,” nyapsiba, yayikopura, bulupdeipsirye, “Anggun min arye yuk-yuk talibuka pil dolamlum touk, apil talibuka donamlume,” nyapdeipse.

Nehemia 13:17

Wininmeka ati, narye, ‘Yata deiyok ati, Sabat sum deice arye wininmak do?’ tenen, Yudea tam talibuka ninye deiyok nang ati yu upnukba, “Yata deiyok ati malye wininamlum do?” nyapse. “Anggun aninye wininamlum deice arye, pia malye-malye weik wininmalumce, Sabat sum yanibuka malye kipdeipmalume,” nyapse.

Nehemia 13:24

Yahudi yala nang arye, yuk mutuku kilapu dolalamika ati, akilapu nirya ara, sik mutuku yupu koproba uk peterelamikba, sik mapu nirya ara ayupu uk kel biklamik. Ati, Yahudi yala mapu ulamik bukni, noutamak arye bokuka ton tam mapu ara, yuk mutuku yupu uk kel biklamik. Ara, Asdod mutuku yupu ap, tonda yuk-yuk mutuku yupu nirya ap kel biklamik. Israel ninye nyalamik yupu ara, kum nyalamik. Yudea mutuku noutam nyalamupu yupu ara, moubuka kum nyalamik.

Nehemia 5:13

Asum aryuk, na ongolamse baju deice talibuka bolom-bolom apsiba, na baju deice uamuk butbuta sakuk. Winipsirye ayupu ton nyapse. “Yata nang do nirya, Allah arye, ‘Aninye ara, ‘Naʼ tenen, ninye upnamak’ tenen, wibuka deiamsuk ninye noutam ara, anggun asum nyalinmanulum yupu, kekebuka kum doproplinye bira, abutbuta sakmo atonun, Allah arye anang nirya bataknamle. ‘Aning ara, winibuka unamabe,’ nyanmanulum yupu, kum kekenyak nang ara, sik aik ap, sikce talinyak ning ap nirya ara, Allah arye kum daneipnamle!” nyapse. Nyapsiba, awekmek ninye nirya kekebikce, ‘E, dipkoprob yupu nyanmasilama ati, anyanmasilam touk wininamap’ tenen, ‘Dipkoprop akunuma’ tenen, “Amin,” nyabik. “Dipkoprop akunuma,” nyapmekce, Allah Yahweh el siuk erebik. Amutuku noutamak ulamikce “Wininamabe,” nyapmek touk, dipkoprob kekebikce, asum arye diprongobuka dotalak nirya winilamik.

Nehemia 5:6

Sik aninye arye patalamuk ning ati, malye kanye bobuka nyalamik ning ara, na akunum kekepsirye, yu upnukba weik arye derepse.

Mazmur 119:53

Tonda, narye sik malye winin ninguk, talibuka wininyak ninye ati, weik arye derenune. Sik aninye ati, lik weik unulul deiyok ara, ance, “Aning ara, wininalulume. Aning ara, pia kum wininamlulume,” nyapdeiamsulum yupu nirya, amalye wininyak ninye arye, ayupu batakuka banyaka atia.

Mazmur 15:4

‘Allah arye bataksilyak’ tenen, kanye lamapdongobuka unyak ninye ara, Allah ati diba tenebuka, unyak nang ati, “Telebe,” nyabuka, si erelulnye bira, Allah un dam yatue. Tonda, anye birye, ‘Na ning ititipnyak,’ kum tenelul bukni, weilamlye touk winilule. Tonda, anye birye, sik malye-malye weik wininyak ninye ara, ‘Na like’ tenen, neika kum unyake.

Keluaran 34:16

“Aning atonun, anggun Israel nang arye, anggun mapu kil dona ati, aminyan binamlum mutuku, tikilyangan nang sik kilmapu dopropmunce, anggun mapu arepmunba, dobikcopura, aminyan talak na bataknikirye, sik kilapu si erenyak Isa Mutuku Dongonye ninguk, ‘Sik ton erebikcak’ tenen, nyapsine. Ara anggun mapu, sik kilapu yupu kekebikirye, sik Isa Mutuku Dongonye si erebikirye, malye winibicak ati, moupnamlulume, nyapsine,” Allah arye nyabuk.

Amsal 28:4

Yatanye do nirya, sik ninye deiyok nang arye, “Aning ara wininamlulume, aning ara kum wininamlulume,” nyalice yupu ati, ‘Ayupu ara nun like’ tenen, yaniltalamak nang ara, winilamice deice arye, dipkoprob pia malye winin nang ati erenyake. Ara, talye ati kume. Ninye neika teleb ubuka una ati, “Wininamlulume, aning ara ton pia unamlume,” nyabuka delinyak yupu ati, yaniltana uk unyak ninye ara, pia malye ninguk, talibuka unyak nang arye, wininyaka ati nyapne. Bukni yata ninye do nirya, ninye neika teleb ubuka una ati, “Wininamlulume, aning ara ton wininamlume,” nyabuka delinyak yupu ati kekebikirye, ayupu uk talibuka diksukumuk unyak ninye ara, wininyaka deice arye, wenena yupu yaniltana uk unyak nang ap, malye ning talibuka unyak nang ap ati, yupu sekenyake.

Yesaya 50:6

“Ati, yuk nang arye na ona ati yayikba, balye tam kipdeipsiba opnike. Tonda yu nang arye, ‘El bam potong lyepropnuyap’ tenen, yayikopura, narye kintineipse. Nalibuka, na asok deice maka tuleipneik talak ara, kum tamubukse.

Ulangan 6:13

Amutuku unamlum talak nirya ara, anggunce anggun ni koproba Allah, el si Yahweh ati, ‘Se, elda pia mambule, el siuk erenamabe,’ tenenamlulume. Allah ati el si erebuka, el amu tamuk namin asa arye unamlulume. Tonda, anggunce, ‘Wininamne,’ nyabuka, nyalin yupu deice nyanamlum talak ara, Allah el siuk erebuka, ‘Dipkoprop wininamne,’ nyabuka, nyalin yupu nyanamlume. Yuknye si ton, kum nyanamlume.

Ulangan 7:3

“Aning atonun, anggun amutuku unamlum talak ara, anggunce amutuku kilapu ton, pia kum dopdanamlulume. Tonda, anggun Israel wel kilapu ap, wel nang ap ati ara, anggunce, ‘Amutuku wel kilapu ap, wel nang ap, talye dopdanamabe’ tenena ara, pia meme.

Yosua 23:12

Aning ara, talye ati kum nyapsine. Winipmanto ara, anggun Israel nang arye, Allah nyapdeiamsuk yupu yanipmunyak arye, ‘Kanaan mutuku tuba unamak nang ap, neika kum unamlume,’ nyabuk ning ara, anggunce diba kum teneplum arye, amutuku nang ap, neika umunce, sik kilapu ton dopropmunyeura, aning ara, pia malye ning nyapsine. Aning atouk, sik Kanaan mutuku tuba unamak nang, sik sal arye, anggun Israel nang arye, deipnalum kilmapu dobikirye, neika ukceura, aning babye, pia malye ning nyapsine. Anggun ap, neika ansinibuka umunye ning ara, Anggunce, Kanaan mutuku kilapu ninye ap, dobuka unamabeʼ tenen ning ati, nyapsine.